Ko e ngaahi fekau pe ngaahi tuʻutuʻuni ʻa e ʻOtuá ʻa ia ʻoku makatuʻunga ai ʻa e ngaahi tāpuaki mo e ngaahi tautea kotoa pē ʻi he langí mo e māmaní. Ko kinautolu ʻoku nau talangofua ki he ngaahi fono ʻa e ʻOtuá ʻoku nau maʻu ʻa e ngaahi tāpuaki kuo talaʻofa maí. Naʻe akoʻi ʻe he Palōfita ko Siosefa Sāmitá ʻoku totonu ke talangofua foki ʻa e kakaí mo fakaʻapaʻapa, mo poupouʻi ʻa e ngaahi lao ʻo e fonuá (TT 1:12).
Naʻe hoko ʻa e fono ʻa Mōsesé ko ha fono teuteuʻanga ke ne ʻomi ʻa e tangatá mo e fefiné kia Kalaisi. Ko ha fono ia ʻo e ngaahi tuʻutuʻuni fakangatangata, ngaahi meʻa ke fai, mo e ngaahi ouau. ʻOku hoko he ʻahó ni ʻa e fono ʻa Kalaisí, ʻa ia kuó ne fakakakato ʻa e fono ʻa Mōsesé, ko hono kakato ia ʻo e ongoongoleleí pe “ko e fono haohaoa ʻo e tauʻatāina” (Sēmisi 1:25).