Naʻe lava ʻo fakahoko ʻa e palani ʻo e fakamoʻui ʻa e ʻOtuá, tuʻunga ʻi he fakalelei ʻa Sīsū Kalaisí. ʻOku kau ʻi he ongoongoleleí ʻa e ngaahi moʻoni pe ngaahi fono, ngaahi fuakava mo e ngaahi ouau taʻengata ʻoku fie maʻu ʻe he faʻahinga ʻo e tangatá ke nau lava ʻo toe foki hake ai ki he ʻao ʻo e ʻOtuá. Naʻe fakafoki mai ʻe he ʻOtuá ʻa hono kakato ʻo e ongoongoleleí ki he māmaní ʻi he senituli hongofulu mā hivá ʻo fakafou mai ʻi he Palōfita ko Siosefa Sāmitá.