Liliú
Ko e tuʻunga ia ʻoku ʻi ai ha niʻihi ʻoku liliu fakataimi ʻa honau fōtungá mo honau angá—ʻa ia kuo, hiki hake ʻa kinautolu ki ha tuʻunga fakalaumālie māʻolunga ange—koeʻuhí ke nau lava ʻo kātakiʻi ke tuʻu ʻi he ʻao mo e nāunau ʻo ha kakai fakalangi.
Ko e liliu ʻo Kalaisí
Naʻe mamata ʻa Pita, Sēmisi, mo Sione ki he ʻEikí ʻoku fonu ʻi he nāunau pea liliu ʻi honau ʻaó. Naʻe talaʻofa foki ki muʻa ʻe he Fakamoʻuí ʻe maʻu ʻe Pita ʻa e ngaahi kī ʻo e puleʻanga ʻo e langí (Mātiu 16:13–19; 17:1–9; Maʻake 9:2–10; Luke 9:28–36; 2 Pita 1:16–18). Naʻe hanga ʻe he Fakamoʻuí, Mōsese, mo ʻIlaiase (ʻIlaisiā) ʻo foaki ange ʻi he meʻa mahuʻinga naʻe hoko ko ʻení ʻa e ngaahi kī ʻo e lakanga fakataulaʻeikí kia Pita, Sēmisi, mo Sione. ʻI he maʻu ʻe he kau ʻAposetoló ʻa e ngaahi kī ko ʻeni ʻo e lakanga fakataulaʻeikí, naʻa nau maʻu ai ʻa e mālohi ke hoko atu ʻa e ngāue ʻo e puleʻangá hili ʻa e hāʻele hake ʻa Sīsū ki he langí.
Naʻe ako ʻaki ʻe Siosefa Sāmita ʻo pehē naʻe liliu foki ʻi he moʻunga ʻo e liliú ʻa Pita, Sēmisi, mo Sione. Naʻa nau mamata ʻi ha meʻa-hā-mai ki he māmaní ʻi he anga hono tuʻunga nāunauʻia ʻi he kahaʻú (T&F 63:20–21). Naʻa nau mamata kia Mōsese mo ʻIlaisiā, ʻokú na ʻi he sino kuo liliu, pea nau fanongo ki he leʻo ʻo e Tamaí. Naʻe folofola mai ai ʻa e Tamaí, “Ko hoku ʻAlo ʻofaʻangá ʻeni ʻa ia ʻoku ou fiemālie lahi ai, fanongo kiate ia” (Mātiu 17:5).