Lakanga Taulaʻeiki Faka-Melekisētekí

Ko e Lakanga Taulaʻeiki Faka-Melekisētekí ʻa e lakanga fakataulaʻeiki māʻolunga angé; pea ko e Lakanga Taulaʻeiki Faka-ʻĒloné ʻa e lakanga fakataulaʻeiki siʻi hifó. ʻOku kau ʻi he Lakanga Taulaʻeiki Faka-Melekisētekí ʻa e ngaahi kī ʻo e ngaahi tāpuaki fakalaumālie ʻo e Siasí. ʻOku fakahā mai ʻa e mālohi faka-ʻOtuá ki he tangatá ʻi he ngaahi ouau ʻo e lakanga fakataulaʻeiki māʻolunga angé (T&F 84:18–25; 107:18–21).

Naʻe ʻuluaki fakahā mai ʻe he ʻOtuá ʻa e lakanga fakataulaʻeiki māʻolunga angé kia ʻĀtama. Naʻe maʻu ʻa e mafai ko ʻení ʻe he kau pēteliake mo e kau palōfita ʻi he ngaahi kuonga kotoa pē (T&F 84:6–17). Naʻe ʻuluaki ui ia ko e Lakanga Fakataulaʻeiki Toputapu, ʻo e Lakanga ʻo e ʻAlo ʻo e ʻOtuá. Naʻe ui ia ki mui ko e Lakanga Taulaʻeiki Faka-Melekisētekí (T&F 107:2–4).

Ko e taimi ko ia naʻe ʻikai moʻui ai ʻa e fānau ʻa ʻIsilelí ʻo fakatatau ki he ngaahi faingamālié mo e ngaahi fuakava ʻo e Lakanga Taulaʻeiki Faka-Melekisētekí, naʻe hanga leva ʻe he ʻEikí ʻo ʻave ʻa e fono māʻolunga angé pea foaki kiate kinautolu ha lakanga fakataulaʻeiki mo ha fono māʻulalo ange (T&F 84:23–26). Naʻe ui ʻeni ko e Lakanga Taulaʻeiki Faka-ʻĒloné pea mo e fono ʻa Mōsesé. ʻI he hāʻele mai ʻa Sīsū ki he māmaní, naʻá ne toe fakafoki mai ʻa e Lakanga Taulaʻeiki Faka-Melekisētekí ki he kau Siú pea kamata ke ne langa hake ʻa e Siasí ʻiate kinautolu. Ka neongo iá, naʻe toe mole ʻa e lakanga fakataulaʻeikí mo e Siasí tupu mei he hē mei he moʻoní. Naʻe toe fakafoki mai ia ki mui ʻia Siosefa Sāmita, ko e Siʻí (T&F 27:12–13; 128:20; SS—H 1:73).

ʻOku kau ki he Lakanga Taulaʻeiki Faka-Melekisētekí ʻa e ngaahi lakanga ʻo e kaumātuʻá, taulaʻeiki lahí, pēteliaké, fitungofulú, mo e ʻAposetoló (T&F 107). ʻE hoko maʻu pē ʻa e Lakanga Taulaʻeiki Faka-Melekisētekí ko ha konga ʻo e puleʻanga ʻo e ʻOtuá ʻi he māmaní.

Ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e palesiteni ia ʻo e lakanga fakataulaʻeiki māʻolunga angé pe ko e Lakanga Taulaʻeiki Faka-Melekisētekí, pea ʻokú ne maʻu ʻa e ngaahi kī kotoa pē ʻoku kau ki he puleʻanga ʻo e ʻOtuá ʻi he māmaní. Ko e lakanga ko ia ʻo e Palesiteni ʻoku maʻu ia ʻe ha toko taha pē ʻi he taimi ʻe taha, pea ko e toko taha pē ia ʻi he māmaní ʻoku fakamafaiʻi ke ne ngāue ʻaki ʻa e ngaahi kī kotoa ʻo e lakanga fakataulaʻeikí (T&F 107:64–67; T&F 132:7).