E Leai Foi se Mea e Tausuai ai i Latou
O le mana faamalosiau o le Togiola a Iesu Keriso, e mafai ai e oe ma a’u ona faamanuiaina e aloese ma manumalo i le lototiga
Ou te tatalo i lenei afiafi ina ia fesoasoani mai le Agaga Paia ia te a’u faapea foi outou a o tatou iloiloina faatasi ia mataupu faavae taua o le talalelei.
O se tasi o gaoioiga ou te fiafia lava i ai i le avea ai o se taitai perisitua o le asiasi atu lea i tagata o le Ekalesia i o latou aiga. E faapitoa lava lo’u fiafia e asiasi atu ma talanoa ma tagata lotu ua masani ona ta’ua o “tagata ua le toaaga mai.”
I le gasologa o tausaga na ou galue ai o se peresitene o le siteki, e masani ona ou faafesoota’ia se tasi o epikopo ma valaaulia e tatalo ina ia iloa tagata po o aiga, e mafai ona ma asiasi faatasi atu i ai. Ae ma te le’i o i se aiga, ma te tootutuli ma le epikopo ma ole atu i le Tama Faalelagi mo le taitaiga ma musumusuga, mo i ma’ua ma tagata o le au paia o le a ma asia.
O a ma asiasiga e tuusa’o lava. E ta’u atu i ai lo ma alolofa ma le talisapaia o le avanoa ua ma i ai i lo latou fale. Ma te faamautinoa atu i ai o i ma’ua o auauna a le Alii, ua auina atu i se feau i lo latou aiga. Ma te ta’u atu i ai ua matou misia i latou ma e manaomia lava i latou—ma e latou te manaomia faamanuiaga o le talalelei toefuataiina. Ma i se taimi i le amataga o la matou talanoaga e masani ona ou fesili atu i ai faapea: “E mafai lava ona e fesoasoani mai ina ia ma malamalama pe aisea ua e le toaga atu ai i polokalama ma maua faamanuiaga a le Ekalesia?”
Ua ou faia le fiaselau ma selau o na ituaiga o asiasiga. E eseese uma lava tagata taitoatasi, o aiga taitasi, o fale taitasi, ma tali taitasi. Ae peitai, i le gasologa o tausaga, sa ou matauina ai se autu masani i le tele o tali i a’u fesili. O tali masani e pei o nei na aumai:
“I le tele o tausaga ua mavae sa i ai se alii na ta’ua se mea i le Aoga Sa na ou ita ai, ma ou te le’i toe foi atu ai lava.”
“E leai a se tasi o lenei paranesi na te faafeiloaia pe aapa mai foi ia te au. Pei a ta ita o se tagata ese. Sa ou le fiafia i le le faauo o lenei paranesi.”
“Ou te le’i malie i le fautuaga a le epikopo na aumai ia te au. Ou te le toe tuvae lava i lena fale, pe afai e i ai pea o ia i lena tofiga.”
E tele lava isi mafuaaga o le le fiafia na vaaia—mai eseesega o tagata matutua i aoaoga faavae, o le taufaifai, ma le taufaalilili, ma le faaesea e le autalavou. Ae o le autu e tulai mai pea lava o le: “Na ou le fiafia i a …”
Ma te faalogologo toto’a lava ma le faamaoni ma le epikopo. Atonu e sosoo atu ai ma se fesili a se tasi o i ma’ua e uiga i lo latou liliu mai ma molimau i le talalelei toefuataiina. A o matou talanoa, e masani ona susu mata i loimata a’o toe tomanatu nei tagata lelei i le molimau faamautu a le Agaga Paia, ma faamatala o latou aafiaga faaleagaga. O le tele lava o tagata “le toaaga” ua ou asiasi i ai, e i ai se molimau manino ma le mu’amu’a o le moni o le talalelei toefuataiina. Peitai, ua le o auai nei i gaoioiga ma sauniga a le Ekalesia.
Ona ou fai atu ai lea o se tala faapea. “Se’i ou faamautinoa lava ua ou malamalama i le mea na tupu ia te oe. Ona ua faatiga se tasi i le lotu ia te oe, ua le faamanuiaina ai oe i le sauniga o le faamanatuga. Ua e vavaeeseina oe lava mai le mafutaga faifai pea ma le Agaga Paia. Ona ua faatiga se tasi i le lotu ia te oe, ua e momotu ese mai ai oe lava mai sauniga o le perisitua ma le malumalu paia. Ua e le toe faaauauina lou avanoa e auauna atu ai i isi ma aoao ma tuputupu a’e. Ma ua e tuua papupuni o le a faalavefauina ai le alualu i luma faaleagaga o lau fanau, o fanau a au fanau, ma tupulaga o le a mulimuli mai.” E tele taimi e manatu ai tagata mo se minute ona tali mai ai lea: “Ou te le’i mafaufau lava i lena itu.”
Ona ma tuuina atu lea i ai ma le epikopo se valaaulia: “Le uo pele e, ua ma o mai i lenei aso e fautua atu i lau susuga e faapea o le taimi e tuu ai lou le fiafia, o le taimi nei lava. E le gata ina matou manaomia oe, ae e te manaomia foi faamanuiaga o le talalelei toefuataiina a Iesu Keriso. Faamolemole fo’i mai—nei loa.”
Filifili Aua e te Le Fiafia
A tatou talitonu po o le faapea foi ua tatou le fiafia, o le uiga masani lava ua tatou lagona le tiga, ua soona fai, ua faalumaina, pe ua le faaaloalogia foi. Ma o le mea moni lava, o mea faavasivasi, faamaasiasi, e le faavaea, ma limalala’u, e tula’i mai ia tatou fegalegaleaiga ma isi tagata, e ono tupu ai lo tatou le fiafia. Peitai, e matua le mafaia lava e se isi tagata ona faatiga ia te oe, pe faatiga foi ia te au. Ioe, o le talitonu na faatiga i tatou e se isi tagata, o le matua le sa’o lava. O le le fiafia, o se filifiliga lea tatou te faia; e le o se tulaga e faatupu pe fai faamalosi mai e se tagata po o se isi mea i o tatou luga.
I le vaevaega tele o foafoaga uma a le Atua, e i ai mea e faigaluega ma mea foi e galueaiina (tagai 2 Nifae 2:13–14). Ona o i tatou o atalii ma afafine o lo tatou Tama Faalelagi, ua faamanuiaina i tatou i le meaalofa o le faitalia, o le mana e fai au lava taga ma filifiliga. Ina ua faamanuiaina i le faitalia, o lea o oe ma a’u o sui, o lona uiga o oe ma a’u e tatau ona galulue ae le tau galueaiina. Ia talitonu e mafai e se tasi po o se mea ona faia i tatou ia le fiafia, ita, tiga, pe matua faaitiitia ai lo tatou faitalia ma faaliliuina ai i tatou i ni mea [faitino] ina ia galueaiina ai. Peitai, o le avea ai ma sui, ua i ai ia te oe ma a’u le mana e galulue ai ma filifili pe faapefea ona tatou tali atu i se tulaga e le fiafia pe tiga ai.
O Thomas B. Marsh, le uluai Peresitene o le Korama a Aposetolo e Toasefululua i lenei tisipenisione, sa filifili o ia e tiga lona loto i se mataupu faatauvaa e pei o le susu ua aveese le pata (tagai Deseret News, Ape. 16, 1856, 44). O Polika Iaga, i se isi itu, sa matuia lona a’oa’iga e le Perofeta o Iosefa i luma o tagata, peitai na filifili o ia e le tiga ai lona loto (see Truman G. Madsen, “Hugh B. Brown—Youthful Veteran,” New Era, Ape. 1976, 16).
I le tele lava o mea tutupu, o le filifili ina ia tiga le loto o se faailoga lea o se faafitauli faaleagaga ua matua loloto ma matuia tele. Sa faatagaina e Thomas B. Marsh ia lava, ina ia tau galueaiina, ma o le taunuuga na oo i ai o le liliuese ma le faanoanoa. O Polika Iaga o se sui na galue e tusa ai ma mataupu faavae tonu, ma sa avea o ia ma se tufugaaao maoae i aao o le Alii.
O le Faaola o le faataitaiga aupito sili lea o le auala e tatau ona tatou tali atu ai i tulaga e ono oo mai ai le lototiga.
“E faapea le lalolagi, ona o a latou amioletonu, o le mea noa o ia; o lea latou te sasa ai ia te ia, e onosai ai foi o ia, latou te taia o ia, e onosai ai foi o ia. Latou te feanu ia te ia, e onosai ai foi o ia ona o lona alofa mutimutivale tele ma lona onosai i le fanauga a tagata” (1 Nifae 19:9).
O le mana faamalosiau o le Togiola a Iesu Keriso, e mafai ai e oe ma a’u ona faamanuiaina e aloese ma manumalo i le lototiga. “Ua tele le filemu o e naunau i lau tulafono: e leai foi se mea e tausuai ai i latou” (Salamo 119:165).
Falesuesue e Aoao Ai i Aso e Gata Ai
O le malosi e faatoilalo ai le faatausuai atonu e foliga mai e le oo i ai lo tatou malosi. Peitai, o lea tulaga gafatia, e le o faapolopoloina pe faasa mo na o taitai lauiloa o le Ekalesia e pei o Polika Iaga. O le natura tonu lava o le Togiola a le Faaola, ma le faamoemoega o le Ekalesia toefuataiina, ua fuafua e fesoasoani ai ia te i tatou ia maua tonu lava lenei ituaiga o malosiaga faaleagaga.
Sa aoao atu Paulo i le Au Paia i Efeso e faapea sa faatuina e le Faaola Lana Ekalesia “ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:
“Seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso” (Efeso 4:12–13).
Faamolemole ia matau le faaaogaina o le upu faatino “faaatoatoaina.” E pei ona faamatalaina e Elder Neal A. Maxwell, o le Ekalesia e le o se “nofoaga faapea e malolo ai ma fai uma ai mea tatou te manaomia” (“A Brother Offended,” Ensign, 1982, 38). Ae, o le Ekalesia o se falesuesue e aoao ai, ma o se mafutaga faaleaoaoga tatou te maua ai le poto masani pe a tatou faata’ita’i e le tasi i le isi, i le faiga faifai pea o le “faaatoatoaina o le Au Paia.”
Sa faamalamalama lelei mai foi e Elder Maxwell e faapea i lea falesuesue e aoao ai o nei aso e gata ai, lea ua lauiloa o le Ekalesia toefuataiina, o tagata o le ekalesia o “mataupu na e fai i ai suesuega” (tagai “Jesus the Perfect Mentor,” Ensign, Fep. 2001, 13) lea e taua mo le tuputupu a’e ma le atiina ae. E aoao e se faiaoga asiasi lona tiute, a’o ia auauna atu ma alofa i ona uso i le Aualofa. E aoaoina e se faiaoga e leai se poto masani ni lesona taua, a o ia faiaoga i tagata a’oa’o e lagolagoina, ma tagata foi e le faalogo ma oo ai ina avea ma se faiaoga e sili atu ona ta’uaogaina. E aoao foi e se epikopo fou le auala e avea ai ma epikopo, e ala i musumusuga ma le galulue ai ma tagata o le uarota, o ē lagolagoina o ia ma o latou loto atoa, tusa lava pe latou te vaaia ona vaivaiga faaletagata.
O le malamalama o le Ekalesia o se falesuesue e aoao ai, e fesoasoani tatou te sauniuni ai mo se tulaga moni o loo naunau i ai. E i ai nisi taimi, o le a faia ai e se tagata se mea po o se tala foi, e ono faapea ua faatausuai. O na mea e tutupu lava ia i tatou taitoatasi—ma o le a sili atu i le faatasi ona tupu. E ui ina e le i fuafua tagata e faamanu’a pe faatiga ai i tatou, ae e mafai lava ona lē mafaufau ma faalēano i ai.
E le mafai ona ta taofia faamoemoega ma amioga a isi tagata. Peitai, tatou te fuafuaina pe faapefea ona tatou tali atu. Faamolemole ia manatua, o oe ma a’u o sui ua faamanuiaina i le faitalia e tatau ai, ma e mafai ona ta filifili e aua nei faatausuai.
I se taimi matautia o le taua, sa i ai se fetusia’iga i le va o Moronae, le kapeteni o le au a Sa Nifae, ma Pa’orana, le faamasino sili ma le kovana o le nuu. Sa tusi atu Moronae, o lē ua mafatia lana itutaua ona o le le lava o le lagolago mai o le malo, ia Pa’orana “e ala i le ta’usalaga” (Alema 60:2) ma tuua’ia malosi o ia i lona le magafagafa, faatamala, ma le le amana’iaina. E ono faigofie ia Pa’orana ona tetee ia Moronae ma lana savali, peitai na filifili o le a le tiga lona loto. Sa tali atu ma le alofa ia Pa’orana, ma faamatala atu i ai le fouvale i le malo, lea na le i silafia e Moronae. Ona ia tali atu lea, “Faauta, ou te fai atu ia te oe, Moronae, ua ou le fiafia i o outou puapuaga tetele, e moni, ua faanoanoa ai lo’u agaga… . O lenei foi, ua e aoai mai ia te au i lau tusi. Ae peitai, e le afaina; ua ou le ita ai, a ua ou fiafia i lou lototele” (Alema 61:2, 9).
O se tasi o faailoga sili o lo tatou matutua faaleagaga, e faaalia lea i le auala tatou te tali atu ai i vaivaiga, o le leai o se poto masani, ma taga e ono faatausuai ai a isi tagata. O se vaega, o se gaoioiga, po o se faamatalaga e ono mafai ona faatausuai, peitai e mafai e oe ma a’u ona filifili e aua ne’i tiga ai—fai atu faatasi ma Pa’orana, “e le afaina.”
O Valaaulia e Lua
E faaiu atu la’u savali i ni valaaulia se lua.
Valaaulia #1.
Ou te valaaulia outou ina ia aoao ma faaaoga aoaoga a le Faaola e uiga i feutagaiga ma faatinoga e mafai ona faamatalaina e faatausuai.
“Ua outou faalogo na fai mai, Ia e alofa atu i le lua te tuaoi, a ia inoino i le ua ita mai ia te oe.
“A ou te fai atu au ia te outou, Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuua’ifua mai ma faasaua mai ia te outou… .
“Aua afai tou te alolofa atu i e ua alolofa mai ia te outou, se a ea se taui tou te maua ai? E le faia ea e le au telona o lea lava mea?
“Pe afai tou te faapito lo outou fealofani i o outou uso,se a se mea sili ua outou faia? E le faapea ea ona faia e le au telona?
“O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia” (Mataio 5:43–44; 46–48).
O le mea mata’ina, o le apoapoaiga ina “ia atoatoa ona lelei o la outou amio” e sosoo tonu mai lava ma le apoapoaiga i auala e tatau ona tatou amio a’i, e tali atu ai i mea sese e fai mai ma faatausuai. E manino lava, o tulaga ma’oti lava e manaomia e tau atu ai i le faaatoatoaina o le Au Paia, e aofia ai ma tofiga e tofotofo ma lu’itauina ai i tatou. Afai e fai mai e se tagata se mea po o se upu tatou te manatu e faatausuai, o le tatou matafaioi muamua lava, o le aua lea ne’i tiga le loto ae talanoa patino atu lea, ma le faamaoni, ma tuusa’o i lea tagata. O lena faiga, e valaaulia ai musumusuga mai le Agaga Paia, ma mafai ai ona faamanino ni faaletonu, ma malamalama ai i le faamoemoega moni.
Valaaulia #2.
O le toatele o tagata ma aiga e sili ona manaomia le faalogo i lenei savali e uiga i le filifili, e aua nei tiga le loto, atonu tatou te le o mafuta i le konafesi i le aso. Ou te masalo tatou te masani uma lava i tagata o le au paia, ua faamaamulu mai le lotu ona ua latou filifili e talia le lototiga—ma o le a faamanuiaina pe a toe foi mai.
Pe o le a e faailoaina la ma le agaga tatalo se tagata o le a e asiasi atu i ai ma avatu i ai le valaaulia tatou te tapuai faatasi? Atonu e mafai ona e faasoa atu i ai se kopi o lenei lauga mo ia, pe atonu foi e sili ia oe le talanoa atu i ai i mataupu faavae lea sa tatou iloiloina i le aso. Ma faamolemole, o lena valaaulia e tatau ona tuuina atu ma le alofa ma le agamalu—ae le o se agaga o le faafia amiotonu, faafiasili ma le faamaualuga.
A o tatou tali atu i lenei valaaulia ma le faatuatua i le Faaola, ou te molimau ma folafola atu o le a tatala mai faitotoa, o le a faatumulia o tatou gutu, o le a tuuina atu e le Agaga paia le molimau o upumoni e faavavau, ma o le a toe mumu le afi o le molimau.
I le avea ai ma Ana auauna, ou te faaleoina atu afioga a le Matai ina ua Ia fetalai mai, “Ua ou fai atu nei mea ia te outou, ina nei tausuai outou” (Ioane 16:1). Ou te molimauina le moni ma le paia o se Faaola soifua, ma Lona mana e fesoasoani ai ia te i tatou, e aloese ma faatoilalo le faatausuai. I le suafa paia o Iesu Keriso, amene.