Manatua le Alofa o le Alii

O Keriso i le Ofutalaloa Mumu, na tusia e Minerva Teichert, e foliga mai o le ata tonu lava lea e faamatala ai le mau ua tatou filifilia i lenei afiafi: “Ua siosiomia a’u e faavavau i aao o lona alofa” (2 Nifae 1:15). E maeu le foliga faafeiloai o Keriso i Ona aao o loo faaloaloa mai ia i tatou. E faapei foi ona Ia valaaulia sa Nifae e “tutulai ma o mai ia te au” (3 Nifae 11:15), e faapena foi ona Ia valaaulia i tatou taitoatasi e o mai ia te Ia, ina ia tatou iloa foi o Ia “o le Atua … o le lalolagi uma, ma [sa] fasia mo agasala a le lalolagi” (3 Nifae: 11:14). Tatou te iloa le lagona o le siosiomia i Lona alofa pe a tatou taliaina lena valaaulia.

Ou te mautinoa ua tofu lagona e outou taitoatasi le siosiomia i aao o Keriso. Ae afai e te faapei o a’u, e i ai taimi e te atuatuvale ai, pe a foliga lofituina oe i atuatuvalega ma le pisi o le olaga, pe a e lagona ua e see ese mai le Agaga. Atonu foi e te lagonaina lou tuulafoaiina. A oo ina ou feagai ma na lagona, o le vaifofo sili lava o lo’u lotomanatua o taimi e oo mai ai le filemu o Keriso e faamalosi ai a’u. O lea, o le po nei ou te valaaulia ai outou ina ia manatua faatasi ma au le lagona o le alofa o le Alii i lou olaga, ma lagonaina le siosiomia o oe i Ona aao.

Na maliu lo’u tina a o avea a’u ma se tina talavou. Sa ou manaomia i lena taimi ana fautuaga ma timaiga. Ina ua iloa ua maua o ia i le kanesa, sa na o le ono vaiaso na ola ai. O lo’u popolega muamua o lo’u tama. Sa ou faafetai ona e le’i umi ona pologa lo’u tina, ma na avea lona maliu, ma se aafiaga matagofie mo i matou. Peitai, i ni nai vaiaso mulimuli ane, na oo mai ai le Aso o Tina ma lona aso fanau, ma sa amata loa ona ou matua misia lava o ia. Sa ou manao i ona lima e opoina a’u, ma sa ou fia iloa po o manuia o ia. Sa ou fia ta’uina atu ia te ia, ou te alofa ia te ia ma ua ou misia lava o ia.

I se tasi po a o ou tatalo ma tagi (e tele taimi ou te faapena ai), sa ou lagona le faatumuina o lo’u tino i le mafanafana—na faafuase’i ma sa ese le malosi. Sa toefotua’i mai lea lagona ia te a’u; sa ou maua ai le filemu. E le’i umi i la le tino, ae sa matua o’oo’o lana faamafanafanaga. Sa ou iloa le mea lea—o le alofa o le Alii ua siosiomia ai a’u ma aumaia ai le filemu ma le malosi ia te au. Peitai, e faapena foi lona taua, sa tumau lena lagona i lo’u lotomanatua e pei o se meaalofa matagofie e tatala ma manatua pe a faigata le olaga.

O nisi foi taimi, e oo mai ai faafuasei taimi o le alofa ma le filemu ma pe a lē o manaomia—ou te le o feagai ma se faafitauli po o se mataupu patino. I se tasi Sapati matagofie i le tautotogo, sa ou nofonofo ai i lo’u nofoa e faitau ai a’u tusitusiga paia, ma matamata i laulaau lanusamasama o toulu ifo mai le laau o le matou tuaoi. Sa ou ea a’e i luga mai a’u tusitusiga paia, ma sa aunoa ma se lapataiga, ae ou faalogoina se lagona o le filemu ma le fiafia ua faatumulia ai au. Sa vave ona faataalise atu lea taimi, ae o le manatuaina o le alofa sa ou lagonaina, na tumau. O se meaalofa o le lotomanatua e tomanatu ai pe a faigata le olaga ma i ai taimi faigata.

Peitai o aso uma lava, pe a ou sailia, ou te iloa ai le alofa o le Alii i lo’u olaga ma lagonaina Ona aao o siosiomia ai a’u. Ou te vaaia le faamaoniga o le alofa o le Alii i a’u savaliga i le taeao, pe a mama le ea ma oso mai le uluai ave o le malamalama i sasae. Ou te lagonaina Lona alofa pe a oso mai se fuaiupu o se mau i lo’u mafaufau ma tautala mai ia te au i se auala fou. Ou te iloa Lona alofa pe a aoaoina a’u e tamaitai lelei o le Aualofa, po o faiaoga asiasi o e manatu mai mo au. Ou te lagonaina Lona faatasi mai, pe a tali atu lo’u loto i musika matagofie po o se lauga faagalo gata. Uso e, e i ai le Alii i soo se mea pe a pupula o tatou mata ma tatala atu o tatou loto i Lona alofa.

Peitai, o loo i ai ni tamaitai i lo outou lotolotoi, ou te talitonu, o loo mafaufau i le taimi nei, “O afea ou te maua ai se taimi e savali ai i le taeao? O le a le taimi mulimuli na ou maua ai se 10 minute filemu e faitau ai a’u tusitusiga paia?” Po o le, “O anafea le taimi mulimuli na i ai so’u aso e aunoa ma se tiga? po o le popole? po o le lototiga?” Ma ua ou iloa e moni, e tele taimi e pei ai le olaga o se faula’iga tele o matafaioi, atuatuvalega, ma faanoanoaga. Peitai, o loo i ai iina le Alii, e le suia lava [o Ia], e faaloaloa mai pea lava Ona aao. A tatou lagona le lofituina, e ao ina tatou manatua le filemu na Ia fetalai mai ai i taimi ua fano. E aumaia e Lona filemu le mafanafana ma le malosi; e le mafai e le lalolagi ona aumaia mo i tatou.

O le avea ai ma tamaitai faamaoni O Le Ekalesia a Iesu Keriso o le Au Paia o Aso e Gata Ai, ua faamanuiaina ai i tatou i le Agaga Paia. A tatou valaaulia le Faaola i o tatou olaga, o le a molimau mai le Agaga Paia ia te i tatou i le alofa o le Tama ma Lona Alo, lo tatou Faaola mo i tatou taitoatasi. Peitai, o le lagonaina o lo La’ua alofa, e faalagolago e le gata i lo tatou mana’o ae faapena foi i a tatou faatinoga. Ma o faatinoga e tatau ona tatou faia, ua tatou masani ai: o le tatalo faamaoni e patino ma lotomaulalo, sosoo ai ma le faalogologo mo tali a le Alii; o le suesue e le aunoa i tusitusiga paia ma se taimi e manatunatu loloto ai i mea tatou te faitauina; ma le mea mulimuli, o se naunautaiga e mafaufau toto’a ia i tatou lava ma talitonu i le folafolaga a le Alii o le a Ia “faia mea vaivai ma mea malolosi ia i [tatou]” (Eteru 12:27). A tatou suesue ma manatunatu loloto, ua ia te i tatou le aia tatau i uunaiga a le Agaga, ma a tatou gauai atili atu i nei uunaiga, ona tatou iloa ai lea i aso taitasi, o galuega a le Alii i o tatou olaga. O le a tatou maua o Ia, e faapei ona ta’ua mai e Elder Neal A. Maxwell, “i auiliiliga o o tatou olaga” (“Becoming a Disciple,” Ensign, June 1996, 19). Ma a oo mai lena iloa, tatou te lagonaina Lona filemu ma iloa ai o loo siosiomia moni lava i tatou i aao o Lona alofa.

I le fonotaga faaleaoaoga a taitai i le lalolagi atoa ia Ianuari 2004, sa apoapoai mai ai Peresitene Gordon B. Hinckley i tamaitai o le Ekalesia ina “ia tu malosi ma le mausali” e tetee atu i le leaga ua faatupulaia i le lalolagi. (Tu Malosi ma le Mausali,” Fonotaga Faaleaoaoga a Taitai i le Lalolagi Atoa, 10 Ian. 2004, 21). Uso e, o le mafuaaga lea e tatau ai ona tatou saili ia iloa ma lagona le alofa o le Alii i o tatou olaga. O le mafuaaga lea e tatau ai ona tatou manatua ma teufatu o tatou lava aafiaga ma Lona filemu ma le malosi o loo aumaia ai. Ma o le mafuaaga foi lea e tatau ai ona tatou faamatala atu o tatou aafiaga o le faatuatua, ma molimau ia tatou fanau, ma i latou e leai ni matua po o ni fanau.

E manaomia e o tatou aiga le filemu o le Atua i o latou olaga, ma afai tatou te le mafaia, pe le valaaulia foi le Alii i o tatou olaga, ona avea ai lea o o tatou aiga ma ata vaaia o lo tatou lava pagatia. Ua poloaiina tamaitai ina ia avea ma e e faafaileleina o latou aiga, peitai e tatau foi ona tatou maua’i; e tatau ona avea i tatou ma fusi faavae mausali e mafai ona tutu ai o tatou aiga. E manaomia e o tatou aiga i tatou e tautala atu ia i latou i le filemu, e faapei foi ona fetalai mai e le Alii le filemu ia i tatou. E manaomia o tatou aiga, ma nofoaga e fia o mai i ai o tatou aiga ma uo, e mafai e i latou uma e ulufale mai i ai ona maua mai ai le malosi ma le lototele e feagai ai ma faigata o le ola ai i se lalolagi ua faatupulaia le amioleaga. E manaomia e a tatou fanau ona faalogo mai o tatou “tautalatala ia Keriso, … olioli ia Keriso, [ma] tala’i atu Keriso” (2 Nifae 25:26) ina ia latou iloa pe o a punavai latou te sailia ai le filemu lea “e silisili lava i mea uma e manatu i ai” (Filipi 4:7).

Ia manatua uso e, e manino le valaaulia a le Faaola ma e tuusa’o foi, ma e taua mo i tatou, aua e tumau pea lava: “Ia outou o mai ia te au, o outou uma o e tigaina ma mafatia i avega… . Ia outou amoina la’u amo, … aua … o la’u avega foi e mama ia” (Mataio 11:28–30). O le folafolaga lenei a le Alii ia te oe ma a’u.

O la’u tatalo mo i tatou taitoatasi, ina ia tatou manatua le taimi e fetalai mai ai e le Alii Lona filemu ia i tatou ma siosiomia i tatou i aao o Lona alofa. E faapei foi ona ta’ua, afai e te le’i lagonaina lena alofa mo sina taimi, ia e saili ina ia e vaai ma faalogoina a o e feagai ma galuega masani o lou olaga. A e faia lenei mea, i aso ma masina ma tausaga o lou olaga, o le a avea taimi o na fegalegaleaiga ma le Alii ma meaalofa matagofie e tatala faalua—po o le faatele foi—e faamalolosi ai oe pe a oo ina faigata le olaga.

“Ou te tuuina atu ia te outou le filemu,” ua folafola mai e le Alii, “ou te le avatu ia te outou faapei ona avatu e le lalolagi” (Ioane 14:27). Filemu. Malosi. O le mea lea tatou te moomoo i ai ma o le mea e mafai. Tau lava ina tatou liliu atu i Ona aao faaloaloa. I le suafa o Iesu Keriso, amene.