Tuleiga Faaiu

O’u uso e ma tuafafine, o se vavega maoae lava nei konafesi. E leai se mea o i le lalolagi e faatusalia i ai. Pe a outou mafaufau ua tatou potopoto mai iinei, i lenei maota tele mo konafesi, ma o mea tatou te ta’u atu o loo aveina atu i le lalolagi atoa ina ia mafai ai e tagata i konetineta uma ona tapuai faatasi i le Atua soifua, e moni lava o se vavega ofoofogia. Sa matuai lelei saunoaga a i latou uma na saunoa. Maimau pe ana lava se taimi sei faalogologo atu ai i le Au Pulega Aoao uma. Ae paga, e le mafai. Ua musuia foi i tatou e sui o faalapotopotoga a ausilali, ia latou savali.

Ua faapena foi ona musuia i tatou i tatalo. Ua matua maoae foi musika ia.

Tatou te matua faafetai ona o lenei Maota ofoofogia mo Konafesi, lenei faleapitaga tele ua tatou potopoto ai, ma le poto faaneionapo ua mafai ai ona auina atu a tatou upu i le salafa o le lalolagi i o tatou tagata i le tele o atunuu ma ituaiga.

Tatou te moomoo ia i ai le filemu i le lalolagi, tatou te tatalo foi e le aunoa ina ia oo mai.

O lenei, a matou uo pele, matou te tuua outou faatasi ma o matou alofaaga ma a matou faamanuiaga. Talosia ia afio ai le Agaga o le Alii i o outou fale. Ia pulea e le alofa a outou sootaga faaleaiga.

Matou te tatalo atu ai, a o matou faatofa mo le isi ono masina, i le suafa paia o lo tatou Togiola, ma tuuina atu o matou alofaaga ma faamanuiaga mo outou, i Lona suafa, le Alii o Iesu Keriso, amene.