Niuterene Faaleagaga

Sa masani ona ave e lo’u tamamatua ana povi e faatataa i taumafanafana taitasi i vanu lanulauava ma lafulemu i sasae o lo matou nuu i le ogatotonu o Iuta. Ae peitai, e faananau lava povi ma manaomia ni meaai faaopoopo e ala lea i le etoetoina o maa masima. O maa masima e aumai mai se maina eli masima e fai si mamao ese. E faatumu e tamamatua ia pusa masima i le tuuina lea o se taga i luga o se solofanua malosi ma faatumu le taga i maa masima. Sa ou faaigoaina le solofanua ave uta o Slowpoke mo se mafuaaga lelei. E faatietie au e tamamatua i luga o Slowpoke faatasi ai ma le uta maa masima. Na te tuuina mai ia te au le faagutu ina ia mafai ai ona taitai atu le solofanua i luga o le mauga ma mulimuli ia Tamamatua o loo i luga o lana solofanua.

O la’u solofanua o Slowpoke sa telegese, ae ou te lei faamalosia o ia ona o loo ia tauaveina se avega mamafa. E alu le aso atoa o tietie atu i luga o le mauga i le vaega e etoeto ai masima ma la’u ese ia maa masima mai le meaola. A o faasolo ina mafanafana le aso, sa amata ona masimasi o’u vae ua afu uma a o feoloa’i i le tau patupatu o maa masima sa i totonu o taga. O se fiafiaga pe a ma sopoia se vaitafe aua e mafai ona ou oso ese ma le solofanua ma fufuluese le masimasi ma faamamago o’u vae.

E toetoe lava o le aso atoa e pese ai Tamamatua. Na te usuina lava le tele o pese o Siona. Ae e tasi le pese sa sili ona faagaeetia ai au o le “Faaali mai ia te a’u au soa ae o le a ou tauina atu po o ai oe.” I le toe tepa atu i tua, o le aveina atu o masima i le vanu o le mauga o se mea fiafia, ae o niuterene faaopoopo mai maa masima sa faamalolosia ai povi.

O niuterene e maua mai ai meaai lea e faatele’a’i ai le tuputupu ae ma le ola maloloina e le gata i meaola ae faapea foi i tagata. Sa mananao lava povi a tamamatua i niuterene o loo i le maa masima, ae o tagata e moomia se mea e sili atu. Latou te moomia ona toe faatumuina i le faaleagaga aua e “sili le ola i le mea e ‘ai”¹ ma e “i ai lava le agaga i totonu o le tagata: o le manava foi a Le e ona le malosi uma lava e faapopotoina ai i latou.”² E moomia e le agaga o le tagata le alofa. Na te moomia foi ina ia “tausia i upu o le faatuatua ma … mataupu lelei.”³

O meaai faaleagaga e saunia ai i tatou mo le papatisoga. O lenei sauniuniga e aofia ai le faamaualaloina o i tatou lava i luma o le Atua, ua i ai le “loto momomo ma le agaga salamo,” ua salamo i a tatou agasala uma, ma ua “loto malilie e ave i o [tatou] luga le suafa o Iesu Keriso,” ma faaali atu “i a [tatou] galuega ua [tatou] maua le Agaga o Keriso.”⁴

O lo tatou niuterene faaleagaga sili ona taua o se molimau lea faapea o le Atua o lo tatou Tama Faavavau, o Iesu o lo tatou Faaola ma le Togiola, ma o le Agaga Paia o lo tatou Fesoasoani. O lenei molimau e faamautuina ia i tatou e le meaalofa o le Agaga Paia. Mai lenei molimau tatou te maua ai niuterene faaleagaga o le faatuatua ma le faalagolago i le Atua, lea e aumaia ai faamanuiaga o le lagi. O niuterene faaleagaga e oo mai ia i tatou mai punaoa eseese ae talu ai ona o le puupuu o le taimi, o le a ou faamatalaina ai na o le tolu.

I nai tausaga ua tuanai, sa i ai se alii talavou o le sa amataina lona tausaga faaiu i le aoga maualuga, sa faia lana faaiuga ina ia tausia o ia lava e ala lea i le suesueina o tusitusiga paia mo le afa itula i aso taitasi. A o ia amata ona faitau le Feagaiga Fou, sa i ai se mea na tutaia ai o ia. Na te lei lagonaina le maualuga o le faaleagaga, ma na te le o mauaina lava se malamalama. O lea sa ia fesili ifo ai ia te ia lava, “O le a la’u mea sese ua fai?” Ona oo mai ai lea i lona mafaufau se mea na tupu i le aoga. Sa fai a latou tausuaga ma nisi o ana uo—o nisi o tausuaga sa le malie tele, ma e matuai mataga lava. E le gata sa ia auai ai, ae sa faaopoopo atu foi i ai nai ana faamatalaga e le talafeagai. A o ia mafaufau i nei mea, sa tau lana vaai i upu nei i le Mataio: “A ou te fai atu ia te outou, o upu faatauvaa uma e faia e tagata, latou te talatala atu ai le tala i le aso faamasino.”⁵ Na ia iloa na taitaiina o ia e le Agaga i nei upu i lenei taimi. Sa liliuese mai lana Tusi Paia ae tuuina atu se tatalo o le salamo.

O le tali i lana fesili “O le a la’u mea sese ua fai?” sa faigofie. Sa ia faitau i tusitusiga paia, faailoga ia mau, ma fiafia ai foi i mau, ae le o ola ai i fautuaga o loo tuuina mai i tusitusiga paia. A o ia toe faafouina lana faitauga o tusitusiga paia, ma taumafai e ola i faataitaiga a Keriso, sa vave ona ia matauina le amata ona fua mai vaega eseese o lona olaga.⁶ O le faaaogaina o tusitusiga paia i lona olaga, sa ia faaopoopo atu i ai se niuterene taua faaleagaga.

I lo tatou siosiomaga faaletino le mautonu, tatou te manaomia ai le faateleina o o tatou niuterene faaleagaga—o niuterene e maua mai le malamalama o le atoatoaga o le talalelei ma mana o le perisitua paia. Afai e oo ifo lena malamalama i o tatou agaga, e le gata tatou te latalata atu ai i le Atua ae tatou te mananao ai foi e auauna atu ia te Ia ma o tatou uso a tagata.

I nai tausaga ua mavae sa fuafua ai se korama a ositaulaga e aoina ni meaai mo e le tagolima e avea ma se galuega fesoasoani. O Jim, o se tasi o ositaulaga, sa naunau lava e auai ma fuafua ai ina ia tele atu meaai na te aoina nai lo soo se isi lava. Na oo mai le taimi e feiloai ai ositaulaga i le falesa. Sa latou o atu uma lava i le taimi e tasi ma toe foi mai i se taimi na atofaina i lena afiafi. O le mea na ofo ai tagata, sa matuai gaogao le taavale a Jim. Na foliga mai sa to’a lava o ia, ma sa ula nisi o tamaiti ia te ia. I le vaaia o lenei mea ma le iloaina o Jim e fiafia tele i taavale, sa faapea atu ai le fautua, “Sau i fafo, Jim. Ou te manao e te vaai i la’u taavale. E fai lava ma leaga.”

Ina ua la taunuu i fafo, sa fesili atu le fautua ia Jim pe o faanoanoa. Sa tali Jim, “Leai. Ae ina ua ou alu atu e ao mai ni meaai, e tele mea na ou maua. Sa matuai tumu la’u taavale. A o o’u toe taliu mai i le falesa, sa ou afe i le fale o se tamaitai e le auai i le Ekalesia ua tetea ma lona toalua ma o loo nofo i tuaoi o lo tatou uarota. Sa ou tuitui atu i le faitotoa ma faamatala atu i ai le mea o loo tatou faia, ma sa ia valaaulia atu au i totonu. Sa amata ona ia tilotilo solo mo se mea e aumai ia te au. Sa ia tatalaina le pusaaisa ma sa mafai ona ou iloaina e leai ma se mea o i ai. O kapoti e gaogao. Sa iu ina ua ia mauaina se tamai apa pea.

“Sa faigata ona ou talitonuina. Sa i ai uma nei fanau laiti o loo fetaufetuliai solo o loo moomia ona fafagaina, ma sa ia tuuina mai ia te au lenei apa pea. Sa ou tago ave ma tuu i totonu o la’u taavale ma ou savali i le auala. Pe tusa o le afa o le auala talu ona ou alu ae ou faalogoina se lagona mafanafana ua lofia ai au, ma na ou iloaina ai e moomia ona ou toe foi atu i lena fale. Sa ou tuuina atu ia te ia meaai uma.”

Sa faapea atu le fautua, “Jim, aua lava ne’i galo ia te oe le lagona sa e faalogoina i lenei afiafi, aua o le uiga atoa lava lena o lenei fuafuaga.”⁷ Sa tofo e Jim le niuterene o le auaunaga e le faatuaoia.

E tele niuterene faaleagaga e oo mai a o auauna atu i se misiona—mai le matuai aafia i le galuega a le Matai. E oo mai le fesoasoani i tagata ina ia mataala ai faaleagaga ina ia mafai ona latou taliaina le talalelei. I le silia ma se senituri talu ai a o pulefaamalumalu ia Elder J. Golden Kimball i le Misiona a Setete i Saute, sa ia taloina ai se fonotaga a faifeautalai. Sa latou feiloai i se nofoaga tuufua i le togavao ina ia na o i latou ai. O se tasi o faifeautalai sa i ai se faafitauli i se tasi o ona vae. Sa tiga ma fula ma e toeitiiti a faaluaina le isi ona vae. Ae sa tausisi atu pea le faifeautalai e auai atu i lenei sauniga faapitoa a le au perisitua i le togavao. O lea sa sii atu ai o ia e isi faifeautalai e toalua i lenei nofoaga.

Sa fesili atu Elder Kimball i faifeautalai, “Uso e, o le a le mea o loo outou tala’ia?”

Sa latou faapea mai, “O loo matou tala’ia le talalelei a Iesu Keriso.”

“Pe o outou tauina atu ea i nei tagata o loo ia te outou le mana ma le pule, e ala i le faatuatua, e faamalolo ai ma’i?” sa ia fesili atu ai.

Sa latou tali atu, “Ioe.”

“Ia,” sa ia faaauau ai, “aisea la tou te le talitonu ai i ai?”

Sa tautala atu le alii talavou o loo fula le vae ma faapea atu, “Ua ou talitonu.” O le vaega atoa lenei o le tala sa faamatalaina i upu a Elder Kimball: “Sa nofo le [faifeautalai] i luga o se pogati laau ae faataliolio faifeautalai i ona autafa. Sa faauuina o ia ma sa ou faamauina, ma sa faamaloloina ai lava o ia i o latou luma. O se mea sa matuai tetei ai; ma o isi toeaina uma sa mamai sa faauuina, ma sa faamaloloina uma i latou. Sa matou o ese mai lena sauniga perisitua ma sa maua e faifeautalai o latou tofiga, ma sa i ai le olioli ma le fiafia lea e le mafai ona faamatalaina.”⁸ O la latou niuterene o le faatuatua sa faatumuina, ma sa toe faamalosia lo latou maelega mo le galuega faafaifeautalai.

O niuterene faaleagaga, lea e tausia ai i tatou ina ia ola maloloina faaleagaga, e mafai ona mou atu lo latou aoga ma le malosi pe afai tatou te le ola agavaa i le taitaiga faalelagi tatou te moomia. Ua tau mai e le Faaola ia i tatou, “O outou o le masima o le lalolagi outou; a e afai e magalo le masima, pe se a se mea e toe mai ai? e leai se mea e toe aoga ai, na ona lafoaiina i fafo ma solia e tagata.”⁹ E moomia ona tatou tausia o tatou mafaufau ma tino ia mama mai soo se ituaiga o mausa ma mea leaga. Tatou te le filifili lava e ‘ai ni meaai mafu pe ua leaga. I le auala lava lea e tasi, e tatau ai ona tatou faaeteete ina ia aua nei faitauina pe matamata i soo se mea e le lelei. O le tele o mea leaga faaleagaga lea e oo mai i o tatou olaga e auala mai i le Initoneti, taaloga komepiuta, ata i televise ma tifaga lea o loo matuai maualuga mai ai lava le fautuaina o uiga maualalalo o le tagata. Talu ai ona o loo tatou ola i se siosiomaga faapena, e moomia ai ona tatou faateleina lo tatou malosi faaleagaga.

Sa tautala Enosa i le matelaina o lona agaga ma tagi atu i le aso atoa e oo lava i le po mo lona agaga.¹⁰ Sa faananau o ia i niuterene faaleagaga lea e faamalieina le galala mo upumoni faaleagaga. E pei ona tau atu e le Faaola o le lalolagi i le fafine i le vaieli i Samaria, “A o se inu i le vai ou te avatu ia te ia e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna e puna i luga i le ola e faavavau.”¹¹

O lenei afiafi ua tatou feiloai o le au perisitua a le Atua i lenei potopotoga tele, e le gata i e o loo iloa atu ae faapea foi i latou e le o iloa atu, e faamoemoe ua tatou potopoto ona tatou te mananao ina ia fafagaina faaleagaga. Ou te faamoemoe o le a tatou fiaaai ma fia feinu pea i le afioga a le Alii e auala mai i Ana auauna, o perofeta, ma ia mafai ona faatumuina pea i tatou i vaiaso taitasi a o tatou auai atu i a tatou sauniga faamanatuga ma faafouina a tatou feagaiga.

O outou uma alii talavou o le Perisitua Arona o loo i ai i totonu o outou uma ni elemene taua mo lo outou taunuuga e faavavau. O nei elemene, o nisi e le o vaaia, e moomia ona faamalosia ma tausia mai fafo. O nisi e faaletino; o nisi e faaleagaga. E moomia e le agaga o le tagata le iloaina lea o lona taunuuga e faavavau—ina ia iloa po o fea e sau ai, aisea ua i ai iinei i le olaga faaletino, ae o fea e tatau ona alu i ai ina ia maua ai le olioli ma le fiafia ma faataunuuina ai lona taunuuga. O le faatumuina o o tatou agaga i niuterene faaleagaga e mafai ona umi ma o le a tatou o ma i tatou i le faavavau. E pei ona aoao mai Amoleka, “Aua o lea lava agaga o i ai i o outou tino i le aso tou te tetea ai ma lenei olaga e i ai le pule i lea lava agaga e toe foi atu i o outou tino i lena olaga faavavau.”¹²

Uso e, matou te talisapaia lo outou faamaoni ma le amiotonu. O loo outou faatinoina lelei o outou valaauga i korama, paranesi, uarota, ma siteki lea ua tupu ai le Ekalesia, ma o loo agai i luma le galuega atoa a le Atua i le lalolagi atoa. O o outou perisitua ua mafai ai ona faamanuiaina i le suafa o le Alii o outou aiga ma isi o le a talosaga atu ia te outou pe tofia foi outou e faamanuia. E oo mai lenei mea mai le aia faalelagi ua tuuina atu ia te outou e le Alii, aua na Ia folafola mai, “Ai se e te faamanuiaina o le a ou faamanuiaina.”¹³

Uso e, ou te faamoemoe o le a tatou faamaoni ma tumau i a tatou feagaiga uma. Ou te tatalo ina ia mafai ona tatou tautino atu ma le atoatoa i a tatou sootaga uma faaleaiga, aemaise lava i o tatou taitoalua, ae faapea foi i o tatou matua, o a tatou fanau, ma fanau a fanau. Talosia ia maua mai pea i tatou o tuuina atu a tatou lava molimau i le moni o lenei galuega i aso uma o o tatou olaga. Tau ina ia tatou agai i luma i le amiotonu o ni auauna faamaulalo a le Alii, ou te ole atu ai i le suafa o Iesu Keriso, amene.