Taliaina e le Agaga

I se tasi taeao a o o’u auauna atu o se faifeautalai talavou i Beaumont, Texas, sa ma’i ai la’u soa ma sa moomia ai ona malolo. I le mulimuli ai i le fautuaga a lo matou peresitene o le misiona mo tulaga faapea, sa ou tosoina mai ai loa se nofoa i autafa o le faamalama o loo matala o le fale fogafale fa sa ma nonofo ai ma amata ona faitau le Tusi a Mamona.

E lei umi ae lofia au i tusitusiga paia, ma ina ua mavae sina taimi, sa ou tau atu i le Alema mataupu e 29, fuaiupu 1 ma le 2:

“E ana o au o se agelu, ma ua mafai ona maua le manao o lo’u loto, ina ia ou alu atu ma tautala atu ma le pu a le Atua, ma le leo e luluina ai le laueleele, ma talai atu le salamo i nuu uma!

“Ioe, po ua ou talai atu i tagata uma, ma le leo e pei o le faititili, le salamo ma le ala o le togiola, ina ia latou salamo ma o mai i lo latou Atua, ina ia le toe i ai se faanoanoa i luga o le fogaeleele uma.”

A o o’u mafaufau loloto i upu a Alema, sa matuai loloto lava lona patino. E faitau selau faitotoa o fale i Beaumont sa ma tuitui ai ma la’u soa, e faasoa atu i ai le ma savali, ae sa itiiti se faamanuiaina. I la’u vaai faalemafaufau, sa amata ona ou manatunatu pe faapei pe ana o a’u o se agelu ma alaga atu le salamo ma se leo e luluina ai le lalolagi. Sa ou tilotilo atu i fafo o le faamalama i tagata o loo feoai solo i le auala o loo i lalo. Sa ou mafaufau pe faapei pe ana fai ou te tu ai iina ma susulu atu e pei o se agelu, ma o’u lima o loo sisii i luga, ma tautala atu i se leo e pei o se faititili. Sa ou vaai faalemafaufau i le luluina o fale ma le pauu o tagata i le eleele. Ona o tulaga sa ou mafaufauina atonu na faafuaseia ai se manao ia i latou ina ia faalogo i mea ou te fai atu ai!

Ona ou faitauina lea o le isi fuaiupu: “Ae peitai, o au o le tagata, ma ua agasala i lo’u manao; aua e tatau ia te au ona ia toafilemu lo’u loto i mea ua tuuina mai ia te au e le Atua” (f. 3).

Sa faamaualaloina au i le iloaina lea e alofa le Alii i Ana fanau uma ma o loo i ai se fuafuaga mo Lana galuega. O la’u galuega o le faia lea o la’u vaega.

Sa faamaualaloina foi au i le iloaina lea o se isi mea. I lena lava taimi, na ou iloa ai o le mea sa ou faitauina e le o se faafoliga—a o se mea moni. A o o’u faitau ma le filemu ma le leai o se pisa, sa matuai faatumulia lava au i le malamalama ma le iloaina lea o Alema lenei o se tagata moni lava, sa soifua o ia, ma sa matuai loloto foi lona manao e faasoa atu le savali o le talalelei i isi.

Ana fai e te fesili mai ia te au i le taimi lena, “Pe e te iloa e moni lenei mea?” Semanu ou te tali atu, “Ioe!” O le tulaga lena, na matuai manino ai lava ia te au e faapea o loo o’u mauaina se molimau faaleagaga i le moni o le Tusi a Mamona.

A o o’u toe manatunatu i lena aafiaga—ma le tele o isi molimau faapena talu lena taimi—ua sili atu ai ona ou malamalama lelei i le auala e taua tele ai le taliaina e le Agaga. E masani ona tatou taulai atu i le taua o le aoaoina e le Agaga. Ae moomia ona tatou manatua e tutusa foi le taua ua tuuina e le Alii, pe sili atu foi, i le taliaina e le Agaga (Tagai MFF 50:17–22).

O lena ituaiga o taliaina o se mamanu faavae lea o le talalelei. E tuuina atu i le sauniga lea e faamauina ai i tatou o ni tagata o le Ekalesia. I lenei sauniga e poloaiina ai i tatou ina ia “talia le Agaga Paia.” O se valaaulia aloaia lea ina ia faatinoina, ina ia taliaina lenei meaalofa silisili.

A o faateleina ona ou malamalama i lenei mataupu faavae, na ou iloaina ai o loo tumu ia tusitusiga paia i le mataupu o le taliaina. E pei ona saunoa mai Peresitene Boyd K. Packer, “E leai se savali e sili atu ona vaaia soo i tusitusiga paia, ma tele auala ua taua mai ai nai lo le, ‘Ia ole atu, ma o le a outou maua ai’” (“Reverence Invites Revelation,” po o le Liahona, Ian. 1992, i. 24).

I le totonugalemu o lo tatou olaga faataitai o le filifiliga lea ina ia taliaina Iesu o le Keriso. Na aoao mai e le Aposetolo o Ioane:

“Ua maliu mai o ia i lona lava nuu, ae le i talia o ia e ona lava tagata.

“A o i latou uma o e na talia o ia, na ia avatu i ai o lea manuia, ia avea i latou ma fanau a le Atua” (Ioane 1:11–12).

E le mafai e se tasi ona taofiofia le mafaufau i le tele o meaalofa ma faamanuiaga o loo siomia ai i tatou ia e le o mafai ona tatou taliaina. Na fetalai mai ai le Alii: “Aua se a le aoga i se tagata afai ua foai atu ia te ia se mea alofa a e na te le talia le mea alofa? Faauta, e le olioli o ia i le mea ua foaiina atu ia te ia, e le olioli foi i le na foaiina atu ai le meaalofa” (MFF 88:33).

I a tatou sauniga a le Ekalesia, ia tatou suesuega faaletagata ma faaleaiga o tusitusiga paia, ma e oo lava i lenei aso a o tatou faalogo atu i perofeta ma aposetolo a le Alii, o nisi o i tatou o le a tele atu mea o le a taliaina nai lo isi. Aisea? Ua ou aoaoina e faapea o i latou o e taliaina moni e le itiiti ifo ma le tolu ni mea latou te faia, ia e le mafai ona fai e isi.

Muamua, latou te saili. O loo tatou ola i se lalolagi o faafiafiaga, o se lalolagi matamata. E aunoa ma le iloaina, e mafai ona tatou iloaina o tatou tagata o loo malaga mai i le konafesi pe o atu i le lotu ma le uiga, “O lea ua ou sau; ia musuia mai loa au.” Ua tatou faapaie faaleagaga.

Afai la tatou te taulai atu i le saili ma talia le Agaga, ua tatou faalepopole tele la i se faiaoga po o se failauga o loo taofiofia lo tatou taulai atu ae ua ano tele i le gauai atu i le Agaga. Ia manatua o le talia o se veape. O se mataupu faavae o le faatino. O se faailoga faavae lea o le faatuatua.

Lona lua, o i latou e talia, e lagonaina. E ui o faaaliga e oo mai i le mafaufau ma le loto, e masani lava ona lagonaina. E masani lava tatou te le iloaina le Agaga, seiloga tatou te aoao e gauai atu i nei lagona faaleagaga.

I se talatalanoaga talu ai nei ma se tasi o o’u afafine faaletulafono, sa ia fautua mai ai faapea e mafai lava foi ona ma fesoasoani i tamaiti laiti ina ia malamalama i nei lagona o le Agaga. E mafai ona tatou tuuina atu ia i latou fesili e pei: “O a ni ou lagona a o tatou faitau faatasi i lenei mau? O a mea e te lagona o loo uunaia ai oe e le Agaga e fai?” O ni fesili lelei nei mo i tatou uma. Latou te faaalia mai ai le manao e taliaina.

Lona tolu, o i latou o e taliaina e le Agaga e fuafua e faatino. E pei ona poloai mai le perofeta o Moronae, ina ia mauaina se molimau i le Tusi a Mamona, e tatau ona tatou ole atu “ma le manatu tonu i ai” (Moronae 10:4). E aoao mai le Agaga pe afai e faamaoni lo tatou faamoemoe e faia se mea e uiga i mea na tatou aoaoina.

A o o’u toe faitau i la’u tusi o talaaga ina ia malamalama ma saga aoao ai mai le aafiaga sa ou maua i le avea ai ma se faifeautalai, na ou iloaina ai e ui lava sa ou faitau muamua i le Tusi a Mamona, ae o le mea na tupu i Beaumont i lena taeao sa ese aua sa suia ai foi a’u. I lo’u le malamalama e pei ona sa i ai, o lena tulaga sa ou taumafai faamaoni ai e saili ina ia lagonaina, ma o lo’u faamoemoe o le galue lea i le faatuatua i mea sa ou aoaoina. Ua ou iloaina nei o molimau faapena o loo avanoa mo i tatou taitoatasi i taimi uma pe afai o le a tatou taliaina.

O le Tusi a Mamona o le afioga a le Atua, o Iesu o le Keriso. Ua toefuataiina mai le talalelei, ma o loo tatou i ai moni lava faatasi ma aposetolo ma perofeta.

Ou te tatalo i lenei aso ma aso uma lava, o le a tatou aoao ai ina ia sili atu ona taliaina, ina ia mafai ona tatou olioli moni e le gata i le meaalofa, ae o “le na foaiina mai le meaalofa.”

I le suafa o Iesu Keriso, amene.