O Le Faapotopotoina o Isaraelu Ua Faataapeapeina

I ona po anamua, sa faamanuiaina ai e le Alii ia Tama Aperaamo i se folafolaga e avea ana fanau ma se nuu filifilia.¹ O loo i ai mau e faasino i lenei feagaiga i vaega eseese o tusitusiga paia. O loo i ai ma folafolaga o le a afio mai le Alo o le Atua e ala mai i le gafa o Aperaamo, o le a i ai laueleele patino e fai ma o latou tofi, o le a faamanuiaina nuu ma ituaiga o le lalolagi e ala i ana fanau, ma le tele o isi mea.² E ui ina ua mae’a ona faataunuuina nisi o vaega o lena feagaiga, ae ua aoao mai e le Tusi a Mamona, o le feagaiga FaaAperaamo, o le a na o aso nei e gata ai e faataunuuina ai!³ O loo faamamafa mai ai foi, o i tatou o le nuu o le feagaiga a le Alii.⁴ O lo tatou avanoa lenei e auai patino i le faataunuuina o nei folafolaga. Oka se taimi ina a manaia e ola ai!

I le avea ai ma e tupuga mai ia Aperaamo, sa mafai e ituaiga o Isaraelu anamua ona maua le pule o le perisitua ma faamanuiaga o le talalelei, peitai na i’u ina fouvale tagata. Sa latou fasiotia perofeta, ma sa faasalaina ai e le Alii. E sefulu ituaiga na ave faatagataotauaina i Asuria. Mai iina na leiloloa atu ai i faamaumauga a tagata. (E manino lava, e le o leiloloa i le Alii ituaiga e sefulu.) Na faaauau pea isi ituaiga e lua mo sina taimi puupuu, ona ave faatagataotauaina foi lea i Papelonia ona o lo latou fouvale.⁵ Ina ua latou toe foi mai, sa alofagia i latou e le Alii, peitai na toe fai foi, lo latou le faamamaluina o Ia. Sa latou teena ma tauemuina o Ia. Sa tauto se Tama alofa ae sa faanoanoa, “Ou te faataapeape foi ia te outou i nuu ese,”⁶ ma sa Ia faia lava—i atunuu uma lava.

O le folafolaga a le Atua mo le faapotopotoina o Isaraelu e tutusa lava le ma’oti ma le manino.⁷ Mo se faataitaiga, na muai iloa foi e Isaia, i aso e gata ai o le a auina atu e le Alii “savali televavave” i nei tagata ua matua “malolosi ma le totoa.”⁸

O lenei folafolaga o le faapotopotoina, lea o loo lalagaina i lautusi uma o tusitusiga paia, o le a faataunuuina e pei lava o valoaga o le faataapeapeina o Isaraelu.⁹

A o loma Lona Faasatauroga, sa faatuina e Iesu Keriso Lana Ekalesia. Sa aofia ai aposetolo, perofeta, fitugafulu, aoao, ma isi.¹⁰ Ma sa auina atu e le Matai Ona soo i le lalolagi e folafola atu Lana talalelei.¹¹

Ina ua mavae se taimi, sa oo ina mamae faaleagaga le Ekalesia sa faatuina e le Alii. Sa fetuunai Ana aoaoga; sa suia Ana sauniga. Na oo mai le Liliuese Tele e pei ona muai ta’u mai e Paulo, o lē sa iloa e le toe afio mai le Alii “se’i muai ona taunuu le tete’a ese.”¹²

O lenei Liliuese Tele na mulimuli lava i le mamanu na faai’u ai isi tisipenisione muamua. O le uluai liliuese lava o le taimi o Atamu. Ona oo mai ai lea o le tisipenisione o Enoka, Noa, Aperaamo, Mose, ma isi. Sa i ai i perofeta taitasi se matafaioi paia e aoao atu ai le paia ma aoaoga faavae a le Alii o Iesu Keriso. I tupulaga taitasi, o nei aoaoga sa faia e fesoasoani ai i tagata. Peitai, o lo latou le usiusitai na tulai mai ai le liliuese. O le mea lea, o tisipenisione uma ua mavae atu, sa tapulaa le taimi ma nofoaga. Sa tapulaa le taimi ona sa faaiuina i le liliuese. Na tapulaa foi le nofoaga i sina vaega e matua itiiti lava o le paneta o le lalolagi.

O le mea la lea, sa manaomia ai se toefuataiga atoatoa. Sa valaau atu le Atua le Tama ma Iesu Keriso i le Perofeta o Iosefa Samita, ina ia avea ma perofeta o lenei tisipenisione. E tatau ona toefuatai uma mai mana paia uma o tisipenisione ua mavae atu, e ala mai ia te ia.¹³ O le a le tapulaaina lenei tisipenisione o le atoaga o taimi, i le taimi po o se nofoaga. O le a le faaiuina foi i se liliuese ma o le a faatumuina ai le lalolagi.¹⁴

E faapei ona valoia e Peteru ma Paulo, e ao ina toefuatai mai mea uma i lenei tisipenisione. O le mea lea, e tatau ona oo mai, o se vaega o lena toefuataiga, le faapotopotoina ua leva ona faatalitali i ai o Isaraelu ua faataapeapeina.¹⁵ O le faata’imuaga ua tatau ai mo le Afio Mai Faalua o le Alii.¹⁶

O lenei aoaoga faavae o le faapotopotoina, o se tasi o aoaoga taua O Le Ekalesia a Iesu Keriso o le Au Paia o Aso e Gata Ai. Na tautino mai e le Alii: “Ou te tuuina atu ia te outou le faailoga … ou te faapotopotoina lo’u nuu, le aiga o Isaraelu, mai lo latou faataapeapeina loaloa, ou te toe faatuina Siona ia te i latou.”¹⁷ O le oo mai o le Tusi a Mamona, o se faailoga lea i le lalolagi atoa ua amata e le Alii ona faapotopoto Isaraelu ma faataunuu feagaiga na Ia faia ia Aperaamo, Isaako, ma Iakopo.¹⁸ E le gata ina tatou aoao atu lenei mataupu faavae, ae tatou te auai foi i le faatinoina. Tatou te faia a o tatou fesoasoani e faapotopoto mai le au filifilia a le Alii i itu uma o le veli.

O le Tusi a Mamona e totonugalemu i lenei galuega. O loo folafola mai ai le aoaoga faavae o le faapotopotoina mai.¹⁹ E matua’ia ai ona aoao tagata e uiga ia Iesu Keriso, e talitonu i Lana talalelei, ma auai i Lana Ekalesia. O le mea moni, ana leai le Tusi a Mamona, semanu o le a le tupu le faapotopotoina lea na folafola mai o Isaraelu.²⁰

Ia i tatou, e taua le igoa mamalu o Aperaamo. E faatele atu ona ta’ua i fuaiupu o tusitusiga paia o le Toefuataiga nai lo fuaiupu o le Tusi Paia.²¹ E i ai le sootaga o Aperaamo i tagata uma O Le Ekalesia a Iesu Keriso o le Au Paia o Aso e Gata Ai.²² Na toe faamautu mai e le Alii le feagaiga faaAperaamo i o tatou taimi e ala mai i le Perofeta o Iosefa Samita.²³ I totonu o le malumalu, tatou te maua ai o tatou toe faamanuiaga, o ni fanau a Aperaamo, Isaako, ma Iakopo.²⁴

O lenei tisipenisione o le atoaga o taimi, na muai silafia e le Atua o se taimi e faapotopoto ai, i le lagi ma le lalolagi. Sa silafia foi e Peteru, a mavae se vaitaimi o le liliuese, ona oo mai ai lea o se toefuataiga. Na ta’utino mai e ia, o lē na i ai faatasi ma le Alii i le Mauga o Liua:

“Ina salamo ia outou ma outou liliu, ina ia soloiesea a outou agasala, ina ia oo mai ai o tausaga e filemu ai mai luma o le Alii; …

“E tatau ona nofo o ia i le lagi seia oo i tausaga e toefuatai ai mea uma lava, ua fetalaia mai e le Atua i fofoga o ana perofeta paia uma lava talu mai anamua.”²⁵

I ona po nei, na auina mai ai Aposetolo o Peteru, Iakopo, ma Ioane e le Alii, ma “ki o [Lona] malo, atoa ma se augatuplaga o le talalelei i aso amuli; ma le atoaga o aso lava ia,” lea o le a Ia “faapotopoto faatasi ai ia tasi mea uma, o mea o i le lagi, ma mea o i le lalolagi.”²⁶

I le tausaga e 1830 na aoao ai le Perofeta o Iosefa Samita e uiga i se avefeau faalelagi e igoa ia Elaia, o lē o loo umia ki e faataunuu ai le “toefuataiga o mea uma.”²⁷

I le ono tausaga mulimuli ane, na faapaia ai le Malumalu o Katelani. Ina ua uma ona taliaina e le Alii lena maota paia, na o mai avefeau faalelagi ma ki o le perisitua. Na sau Mose ²⁸ “ma tuuina mai … ki o le faapotopotoina o Isaraelu mai itu e fa o le lalolagi, ma le taitaiga o ituaiga e sefulu mai le laueleele i matu.

“Ina ua uma lea, na oo mai Elaia, ma tuuina mai le augatupulaga o le talalelei a Aperaamo, ua faapea mai ai ona o i ma’ua ma a ma’ua fanau, o le a faamanuiaina ai tupulaga uma o le a mulimuli mai ia te i ma’ua.”²⁹

Ona oo mai ai lea o Elia le perofeta ma folafola mai, “Faauta, ua oo mai lava le aso na ta’uina e le fofoga o Malaki—ua molimau mai o le a auina mai o ia [Elia] a o le’i oo mai le aso tele ma le matautia o le Alii—e faaliliuina ai loto o tama i fanau, ma fanau i tama, ina ne’i taia le lalolagi atoa i le fetuu.”³⁰

Na taunuu nei mea i le aso 3 o Aperila, 1836,³¹ ma sa faataunuuina ai le valoaga a Malaki.³² Na toefuatai mai ki paia o lenei tisipenisione.³³

Ma le alofa mutimutivale, e mafai foi ona tuuina atu le valaaulia e “o mai ia Keriso”³⁴ ia i latou na maliliu e aunoa ma se silafia i le talalelei.³⁵ O se vaega o la latou sauniuniga, e manaomia ai taumafaiga i le lalolagi a isi tagata. Tatou te aoina mai pepa o le faasologa o gafa, fai pepa o talafaamaumau o le vaega faaleaiga, ma faia galuega sui mo le malumalu e faapotopoto mai ai tagata taitoatasi i le Alii, ma o latou aiga. ³⁶

I lenei lalolagi, e taua tele le galuega faafaifeautalai i le faapotopotoina o Isaraelu. E ao ona aveina atu muamua le talalelei i “mamoe ua leiloa o le aiga o Isaraelu.”³⁷ O le mea lea, ua o atu ai auauna a le Alii e folafola atu le Toefuataiga. I le tele o atunuu, ua sailia ai e o tatou faifeautalai i latou ua faataapeapeina o Isaraelu; ua latou tutuli ia te i latou “mai mavaevae o papa”; ua latou fai faiva ia te i latou e pei o aso anamua.³⁸

O le filifiliga e o mai ia Keriso, e le o se itu e faatatau i se nofoaga faaletino; o se itu e faatatau i le naunau o le tagata. E mafai ona “aumaia tagata i le malamalama o le Alii”³⁹ e aunoa ma le tuua o o latou atunuu o nonofo ai. E moni, i popo fou o le Ekalesia, o le uiga o le liliu mai, o le masii atu foi lea e mau i se isi nuu. Peitai, o le taimi nei, o lea lava ua faapotopoto i atunuu taitasi. Na poloaiina e le Alii le faatuina o Siona⁴⁰ i atunuu taitasi, ua Ia tuuina i Ana Au Paia e fananau mai ai, ma avea ma o latou tofi. Na mua’i ta’u mai e le mau faapea o tagata, “o le a faapotopotoina i latou i nuu o latou tofi, ma o le a faatuina i latou i o latou nuu uma ua folafolaina.”⁴¹ “O atunuu taitasi, o se nofoaga e faapotopoto ai mo ona lava tagata.”⁴² O le nofoaga e faapotopoto ai le Au Paia i Pasila, o Pasila; o le nofoaga e faapotopoto i ai le Au Paia o Nigeria, o Nigeria; o le nofoaga e faapotopoto i ai le Au Paia i Korea, o Korea; ma faapena ai lava. O Siona, “o e loto mama.”⁴³ O Siona o soo se mea lava o i ai le Au Paia amiotonu. Ua i ai nei lomiga, o fesootaiga, ma faapotopotoga ua toetoe ai lava o tagata uma o le ekalesia, ua mafai ona maua aoaoga faavae, o ki, o sauniga, ma faamanuiaga o le talalelei, tusa lava po o fea nofoaga o i ai.

O le saogalemu faaleagaga o le a faalagolago e le aunoa i le pe faapefea ona ola le tagata, e le pe o fea e ola ai. E tutusa aia a le Au Paia i nuu uma mo faamanuiaga a le Alii.

E moni lenei galuega a le Atua Silisiliese. O loo soifua o Ia. O Iesu o le Keriso. O Lana Ekalesia lenei, ua toefuatai mai e faataunuu ai lona taunuuga paia, e aofia ai le faapotopotoina o Isaraelu, na folafola mai. O Peresitene Gordon B. Hinckley, o le perofeta a le Atua i le taimi nei. Ou te molimau atu ai i le suafa o Iesu Keriso, amene.