O Le Tulafono o le Sefuluai

O o’u manatu i lenei afiafi e faamoemoe e avea o se valaaulia mo i latou e lei maua lava se molimau patino e uiga i le totogi atoa o le sefuluai. E tele mafuaaga ua faaaoga ua le totogiina ai sefuluai, e pei o tulaga faafuase’i faalesoifua maloloina, o aitalafu, faafouga o le taavale po o le fale, o tupe faaalu mo aoga, faapea ia inisiua. O nei mafuaaga faapea ma isi mafuaaga faapena e matuai moni lava ma o loo tatou ola ai ma feagai ma nisi i aso uma, afai e leai, o loo feagai ma le toatele lava o i tatou. O nei tofotofoga ua toesea faalafoga ai a tatou punaoa utiuti ma, afai e le o tatou o ni tausimea atamamai o nei punaoa, e ono tulai mai ai le le mafai ona tatou faataunuuina a tatou matafaioi mo a tatou sefuluai i le Alii. O le le lava o le usitaia o lenei tulafono faavavau, e le tatau ai ona faamamasagiaina, ma e le gata e mafai ona matuai faavaivaia ai lo tatou tuputupu a’e faaleagaga ma le atiina ae, ae e mafai foi ona tuuitiitia ai faamanuiaga faaletino ma faaleolaga nei, ia e mafai ona tatou olioli ai.

E pei ona saunoa Peresitene Spencer W. Kimball i se tasi taimi: “Ua faamanino mai e le Alii o le sefuluai o lana tulafono, ma e manaomia [ona ola ai] ona soo uma. O lo tatou mamalu ma se avanoa, o lo tatou saogalemu ma se folafolaga, o lo tatou faamanuiaga sili le ola ai i lenei tulafono a le Atua. O le toilalo i le faataunuuina o lenei matafaioi i le atoatoa, e faafitia ai e i tatou lava o folafolaga ma faagalogalo ai se mataupu mamafa. O se solitulafono, e le o se sasi faapea e le taua.”¹

O le a la le sefuluai? Ua uma ona tuuina mai e le Alii ia i tatou Lana faauigaga: “Ma o le amataga lenei o le sefuluai a lo’u nuu. A mae’a lena, o i latou e fai sefuluai, e ao ina totogi le tasi vaesefulu o a latou faasiliga i tausaga taitasi: ma o le a avea lena ma tulafono tumau mo i latou e faavavau.”² Faamolemole ia manatua o le sefuluai ua le na o se taulaga i le loto fuatiaifo, e le o se 1/20 foi po o se isi lava vaegamea o au faasiliga faaletausaga po o au tupe maua.

Sa ta’ua e Peresitene Howard W. Hunter e faapea: “E faigofie lava le faaupuga o le tulafono o le ‘tasi vaesefulu o a latou faasiliga uma.’ O le faasiliga, o lona uiga o se polofiti, o se totogi po o se taui, o se faaopoopoga. O le totogi o se tagata faigaluega, o le polofiti mai le faagaoioiga o se pisinisi, o se faaopoopoga a se faifaatoaga po o fua, po o le tupe maua a se tagata mai soo se punavai. Fai mai le Alii, o se tulafono e tumau ‘e faavavau’ e pei ona sa i ai anamua.”³

E faapefea ona faaaoga le sefuluai? E totogi e tagata faamaoni o le Ekalesia a latou sefuluai i se uso o la latou au peresitene o le paranesi, po o se au epikopo o le uarota. I lalo o le taitaiga a le perofeta a le Alii, e tuufaatasia ai nei tupe ma faaaoga e faatupe ai le faatupula’ia ma le atiina ae o le Ekalesia i le lalolagi atoa. O ni faataitaiga o le faaaogaina o tupe o le sefuluai e aofia ai le fauina o malumalu, o le faatupeina o le galuega faafaifeautalai i le lalolagi atoa, o le fauina ma le tausiga o falelotu ma isi faamoemoega aoga.

Aisea ua manaomia ai e le Alii Lona nuu e totogi sefuluai? O le Alii o lo tatou Tama, ma ona o Ia o lo tatou Tama, e alofa o Ia ia i tatou. Talu ai e alofa o Ia ia i tatou, e finagalo o Ia ina ia faamanuia i tatou i le faaletino ma le faaleagaga. Faafofoga mai foi i nisi o Ana fetalaiga o loo tusia i tusitusiga paia: “Ina faalogo mai ia ma lagona, outou lo’u nuu e, ua fetalai mai ai le Alii ma lo outou Atua, o outou ou te fiafia e faamanuiaina i faamanuiaga aupito sili i lo faamanuiaga uma.”⁴ Ma le isi: “Aua ua faapea mai le Alii—Ou te alofa mutimutivale ma faapalepale i e matata’u ia te au, ma fiafia lava e faamamalu i e auauna mai ia te au i le amiotonu ma le upu moni e oo i le iuga.”⁵

Ina ia mafai ona faaee atu Ana faamanuiaga i luga o Ana fanau i se faiga amiotonu ma le laugatasia lelei, o lea ua faatuina ai e le Alii ia poloaiga e pulea ai na faamanuiaga ua finagalo o Ia ina ia tatou olioli uma ai. Ua faaalia mai e Ia lenei mataupu faavae o le tulafono i Lana perofeta o le Toefuataiga: “O loo i ai le tulafono, na faavaeina e le matatalaina i le lagi a o le’i faavaeina lenei lalolagi, e autu ai faamanuiaga uma lava—pe a tatou maua foi soo se faamanuiaga mai le Atua, e maua ai i le usiusita’i i le tulafono lea e autu ai.”⁶ Ma lenei: “Ua noatia a’u le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga.”⁷

Na silafia lava e le Alii mai le amataga o i tatou o Ana fanau, o le a feagai ma puapuaga faaletino ma faaleagaga i lenei olaga. Ioe, o nei puapuaga o se vaega taua lea o lenei olaga faata’ita’i. Sa Ia silafia o le a tatou manaomia Ana faamanuiaga i o tatou olaga atoa, ina ia mafai ai ona le gata ina tatou sao mai i tofotofoga o le tagata lava ia, ae tatou te olioli ai foi i le mafanafana e oo lava i le tamaoaiga.

O le mea lea na faatuina ai le tulafono o le sefuluai, mai lava i le amataga. Ua tatou iloa mai tusitusiga paia sa faamanuiaina Aperaamo i lona usiusitai i lenei tulafono, ma ua ia te i tatou foi lena lava tulafono, e pei foi ona toe faamamafa mai e le Faaola i le taimi o Lana asiasiga i tagatanuu o le konetineta o Amerika lea ua latalata i le 2000 tausaga talu ai:

“Ina aumai ia mea e sefulua’i ai a outou mea uma lava i le fale e teu ai mea, ina ia i ai mea e ‘ai i lo’u fale, ma ia outou tofotofo mai ai ia te au, ua fetalai mai ai le Atua o au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.

“Ou te aoai atu ona o outou i le na te ‘aina mea, na te le faaumatia le fua o lo outou laueleele; e le malili foi le fua o outou vine i le fanua, o loo fetalai mai ai le Alii o au.

“E faaamuia foi ia te outou nuu uma lava, aua e fai outou ma nuu moomia, ua fetalai mai ai le Atua o au.”⁸

Oka se tulafono ina a ofoofogia! O Lē ua le gata ina i ai le mana ma mea e faamanuia ai Ana fanau i le faaletino ma le faaleagaga ae ua i ai foi le naunautaiga ina ia faapena ona fai, ua saunia mo i tatou le ki mo na faamanuiaga o loo tatou moomia ma mananao i ai. O lenei ki, o le tulafono lea o le sefuluai. Ioe, e pei ona ta’ua e Peresitene James E. Faust: “Atonu e lagona e nisi e le mafai ona latou gafatia le totogi o se sefuluai, peitai, ua folafola mai e le Alii o le a Ia saunia se ala mo i tatou e tausia uma ai Ana poloaiga. O le totogiina o le sefuluai, e manaomia ai se faatuatua tele naua i le amataga… . Tatou te aoao e uiga i le sefuluai, e ala i le totogiina. Ioe, ou te talitonu e mafai ona tatou o ese mai le mativa, e ala i le faatuatua e toe faafoi atu i le Alii se vaega e tusa lava po o le a le laiti o a tatou mea o i ai.”⁹ O’u uso e ma tuafafine, e tatau ona tatou usita’ia le tulafono.

O valaaulia lenei: Mo i latou e le’i totogia atoatoa lava ni sefuluai, ou te valaaulia outou, ina ia amata nei loa ona totogi a outou sefuluai atoatoa i le Alii e auala atu i lou taitai perisitua i le lotoifale. Ou te valaaulia oe ina ia totogi muamua lau sefuluai i le Alii, ae e te le’i taulimaina nisi o au matafaioi tautupe. Ou te valaaulia oe ina ia tuu atu lou faatuatuaga i le Alii ma, e pei lava ona fetalai mai o Ia, “Ia outou tofotofo mai ia te au.”¹⁰ A o faapea ona e faia ma a o e tuu atu le faamuamua i lau matafaioi o le sefuluai i le Alii e avea ma faamuamua o au matafaioi tautupe uma, o le a avea moni lava oe ma se molimau i le mana e le mafaatusalia o le Alii, a o Ia toina mai pupuni o le lagi ma sasaa mai faamanuiaga “ina seia silisili ona tele.”¹¹ Ona e maua ai lea o lau lava molimau patino e uiga i lenei tulafono paia o le sefuluai, ma afai e faaauau ona e usiusitai i lenei tulafono, o le a matua e latalata atili atu ai lava i le Alii.

Mo outou na ua totogi sefuluai, ou te faamalo atu i lo outou faatuatua. O lena ua outou molimauina, ma ua i ai a outou lava molimau patino i le faataunuuina o folafolaga a le Alii ia i latou o e usiusitai i lenei poloaiga, ma o taimi taitasi uma e te totogiina ai lau sefuluai, e faateleina ai foi lau lava tautinoga patino i le Alii.

Ou te tuuina atu la’u lava molimau patino i le tulafono o le sefuluai ma le moni o folafolaga na tuuina mai e le Alii e faatatau i lenei tulafono. Ua ou iloa mai o’u lava aafiaga e faapea e moni lava e oo mai faamanuiaga, ma o lea ou te matua faafetai ai lava. I le suafa o Iesu Keriso, amene.