Vaavaai atu i le Faavavau!

Ina ua fanau mai le uluai atalii a le ma tama tama, sa faatopetope uma atu le aiga i le falemai. O se aafiaga ofoofogia mo au le vaai atu i le ma tama matua o Matthew, o sii mai lenei pepe tamameamea faapelepele. A o ma tutu ma la’u tama tama laitiiti o Chad i le faamalama o i ai le pepe, sa ma sioa atu i mata o lenei agaga laitiiti fou—e matua mama lava, e matua atoatoa, ma ua faatoa sau lava mai le lagi. Sa foliga mai na le toe gaioi le taimi, ma e le’i pine a ua mafai ona ma vaai atu i le fuafuaga sili o le faavavau. Sa matua manino mai ai le paia o le olaga, ma sa ou musumusu atu ia Chad, “Ua e malamalama i le mafuaaga e matua taua ai le tumau i le mama atoatoa?” Sa ia tali mai ma le migao, “Ioe, Mama, ua ou iloa.”

Sa matua mamana lena taimi, ma o lea sa ou manao ai i alii ma tamaitai talavou uma, o talavou matutua uma, ma i tatou uma taitoatasi, ina ia lagonaina ma iloa le taua o le ola i se olaga agavaa ma le mama atoatoa. O lo tatou agavaa patino, e agavaa ai i tatou e faataunuu a tatou misiona taitasi i le lalolagi.

Ua leva ona amata a tatou misiona patino ae tatou te le’i taunuu mai i le lalolagi. I le muai olaga, sa “tofia ma saunia” i tatou e ola i le lalolagi i se taimi o le a matua tetele ai faaosoosoga ma luitau. “Ona o lo [tatou] faatuatua tele ma galuega lelei” ma ona ua tatou “filifilia le lelei.”¹ Sa tatou malamalama i le fuafuaga a lo tatou Tama, ma sa tatou iloa e lelei. E le gata ina tatou filifilia, ae sa tatou puipuia foi. Sa tatou iloa o le a faatumulia la tatou misiona i le lalolagi, i faaosoosoga, o luitau ma faigata, peitai, sa tatou iloaina foi o le a faamanuiaina i tatou i le atoaga o le talalelei, o perofeta soifua, ma le taitaiga a le Agaga Paia. Sa tatou iloa ma malamalama, o lo tatou faamanuiaina i lenei lalolagi, o le a fuafuaina i lo tatou agavaa ma le mama atoatoa.

O le a le uiga o le agavaa? I le Tusi a Mamona, sa augani ai le tama o Lamonae, “Se a se mea ou te faia ia ou maua ai lenei ola faavavau ua e ta’uina mai?”² Ona faia ai lea e le tupu o se tautinoga i le Alii i lona faapea atu, “Ou te lafoaiina a’u agasala uma ina ia ou iloa ai lau afio.”³ Ina ua malamalama le tama o Lamonae pe o ai o ia, ma le fuafuaga sili lea foi e lavea ai o ia, na amata loa ona avea le agavaa ma le mama atoatoa ma naunautaiga o lona loto.

Ina ia agavaa, tatou te faia filifiliga o le a mafai ai ona tatou toe foi atu i le afioaga o lo tatou Tama Faalelagi. Tatou te faia mea tatou te agavaa ai mo le mauaina o faamanuiaga uma ua Ia teuina mo i tatou. O le mafuaaga lena ua tatou i ai i lenei lalolagi—“ina ia iloa ai pe [tatou te] faia mea uma e poloaiina ai … i tatou e le Alii.”⁴ O lo tatou faatuatua i le Alii o Iesu Keriso, e mafai ai ona tatou teena faaosoosoga.⁵ O lo tatou faatuatua o le mafai ai ona tatou aloese mai le leaga. O le a avea o se mea inosia ia i tatou aua “o le malamalama e pipii i le malamalama” o le “amiomama e alofa i le amiomama.”⁶

Ina ia lē pona mai le lalolagi, e le gata ina manaomia ai le faatuatua, ae faapena foi le salamo ma le usiusitai. E tatau ona tatou ola i tulaga faatonuina, ma fai mea na e mafai ai ona tatou maua le aia tatau mo le mafutaga faifai pea ma le taitaiga a le Agaga Paia—aua e le mafai e le Agaga ona afio i ni malumalu e le paia. ⁷

Fai mai se tasi taulealea ou te iloa: “Ua matua faigata tele. O le ola i tulaga faatonuina i lo’u lalolagi, e le mafai. E matua faigata tele.” Peitai, o le iloaina o i tatou o atalii ma afafine o le Atua, e tatau ai ona tatou taumafai ia agavaa. E i ai se isi vaega o talavou ua latou faaaogaina le anavatau “E Mafai Ona Ou Faia Mea Faigata.” Ua latou malamalama i lo latou faasinomaga, o la latou misiona, o le punavai o lo latou taitaiga, latou te maua foi le malosi e ala i le tausia o a latou feagaiga. Ua latou malamalama foi a latou faia se mea sese, e mafai ona sui i latou! E manao Satani ia i tatou uma lava e manatu faapea, e le mafai ona salamo. E matua le sa’o lava lena mea. Ua uma ona folafola mai e le Faaola le faamagaloga.⁸ O vaiaso taitasi, o le taumamafa ma le agavaa i le faamanatuga e mafai ai ona mama ma atoatoa i tatou taitoatasi, e pei ona tatou osifeagaiga ai e “manatua pea [le Faaola] ma tausi i ana poloaiga.”⁹ O le talalelei a Iesu Keriso e faigofie lava, ma ua tuuina mai ia i tatou meafaigaluega e sa’o ai ma vaapiapi le ala. E manino lava le ala: “Aua e avegofie la’u amo, o la’u avega foi e mama ia.”¹⁰

Ua tolusefulu valu nei tausaga talu ona faaipoipoina i ma’ua ma lo’u toalua i le Malumalu o Sate Leki, e Peresitene Gordon B. Hinckley. O fautuaga ma le taitaiga na ia tuu mai ia i ma’ua i lena aso, na avea lea ma ta’iala i o ma’ua olaga. Ina ua ma tuua le malumalu o se tane ma se ava, sa ma o atu i se paka e lata ane i le lotoa o le malumalu, ma tusia ai i se tusi talaaga upu o le poto na ma mauaina. Sa ia fautuaina i ma’ua, ina ia manatua e le aunoa a ma tatalo i le po ma le ao, ia tatalo o se ulugalii ma se aiga foi. Sa ia fautuaina i ma’ua ina ia totogi atoa ma le faamaoni e le aunoa a ma sefuluai. Sa ia fautuaina i ma’ua e faitau a ma tusitusiga paia i aso taitasi, ma faaaoga mataupu faavae i o ma’ua olaga. Ma sa ia fautuaina foi i ma’ua ina ia tumau lo ma agavaa. Fai mai a ia, “Ia oulua ola ai e le aunoa faapena, a oo ina oulua manaomia faamanuiaga a le Alii, e mafai ona oulua valaau atu ia te Ia ma maua, aua o lena lua te agavaa.” Na ia fai mai foi: “O le a i ai taimi i o oulua olaga o le a oulua manaomia vave ai faamanuiaga. E ao ona oulua ola i se tulaga o le a toina mai ai—e le ona o le alofa mutimutivale, ae ona o lo oulua agavaa.” Ou te le’i malamalama ai i lena taimi i lona uiga, ae i le 38 tausaga na mulimuli mai ai, sa ma valaau atu ai i lo tatou Tama oi le Lagi mo le tele o “faamanuiaga manaomia vave.” O aso taitasi, o nei mausa paia ma faiga masani amiotonu ua fesoasoani ia i ma’ua, e faatonutonu ai i ma’ua i le ala e toe foi atu ai i le afioaga o lo tatou Tama. Ma i le aso, ou te faapea atu, “Ia viia oe, le Atua, mo se perofeta ua taitaiina i matou i nei aso e gata ai.”¹¹

E taua le agavaa patino e ulufale atu ai i Ona malumalu paia, ma avea moni ai ma suli i “mea uma o i le Tama.”¹² Ua fetalai mai le Alii, “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua.”¹³ A tatou faia lena mea, e mafai ona tatou ulu atu ma le mautinoa i malumalu paia o le Atua, faatasi ai ma se iloa ua tatou agavaa e o atu i le mea e afio ai le Alii lava Ia. A tatou agavaa, e le gata ina mafai ona tatou ulufale atu i le malumalu, ae ua mafai foi ona ulufale mai le malumalu ia i tatou. E avea folafolaga a le Alii mo le faaolataga ma le fiafia ma o tatou folafolaga—e avea foi la tatou misiona i le olaga nei ma Ana misiona.

I le masina na te’a nei, sa o atu ai la’u tama tama o Chad, i le malumalu, faatasi ma se tamaitai talavou lalelei, e faaipoipo ai mo le olaga nei ma le faavavau atoa. Ina ua ia uuina lona lima ma tootutuli i le fatafaitaulaga, sa ou tilotilo atu i faaata i itu uma e lua, sa ou toe manao e musumusu atu i ai, “Ua e malamalama i le mafuaaga e matua taua ai le mama ma le atoatoa?” Peitai i le taimi lea, ou te le’i toe tau faamanatuina atu ia te ia, aua o la na musumusu i ai le Agaga.

I le autalavou o le tofi tamalii, vaavaai atu i pupuni o le faavavau! Vaai atu ia te outou lava ia i malumalu paia o le Alii. Vaai atu ia te outou lava ia o ola i ni olaga agavaa ma le mama atoatoa. E faalagolago augatupulaga ia te outou! Ou te molimau atu, e mafai ona agavaa ona o le mana faaola ma le mana e mafai ai o le Togiola a Iesu Keriso. Ou te tatalo ina ia faatatau lenei fetalaiga ia i tatou taitoatasi, “Latou te savavali ma a’u i ofu sisina: aua ua tatau ai i latou.”¹⁴ I le suafa o Iesu Keriso, amene.