O Le Mana o le Onosai

E maeu lo’u faafetai mo tusitusiga paia o aso e gata ai e faatatau i le totonugalemu o uiga mama faaKerisiano.

O le Tusi a Mamona o loo tuuina mai ai se malamalamaaga i le sootaga i le va o le onosai ma le alofa mama. Ina ua uma ona faailoa mai e Mamona e faapea afai o se tagata “ua le ia te ia le alofa e le aoga o ia; o lea e ao ai ina i ai ia te ia le alofa,” ma faaigoa mai elemene e 13 o le alofa, po o le alofa mama o Keriso. Na sili ona ou naunau i ai ina ua ou iloaina o le 4 o elemene e 13 o lenei vaega e tatau ona i ai se uiga mama e faatatau i le onosai (tagai Moronae 7:44–45).

Muamua, “e onosai le alofa.” O le uiga atoa lava lena o le onosai. “E le faaitaitagofie” le alofa o le isi vaega lena o lenei uiga, e pei ona i ai o le alofa “e faatoatoa i mea uma.” Ma le mea mulimuli, o le alofa e “onosai i mea uma” e mautinoa lava o se faaupuga lena o le onosai (Moronae 7:45). Mai nei elemene o loo faauigaina ai, e mautinoa lava a leai le onosai e teuteuina o tatou agaga, semanu tatou te mananao e umia se uiga faaKeriso.

I totonu o le Tusi Paia o loo aumaia ai e Iopu se faataitaiga lelei o le onosai. I le vaavaai atu i le toese atu o lona malo, e aofia ai lana fanau, sa mafaia lava e Iopu, ona o lona faatuatua e le masuia, ona folafola atu, “Na foaiina mai e Ieova, ua aveeseina foi e Ieova; ia faamanuina le suafa o Ieova.” E ui i ona faigata ma tiga uma, “ua le agasala Iopu, ua na le ta’u valeina foi le Atua” (Iopu 1:21–22).

E faafia ona tatou faalogo i agaga ua nutimomoia o fesili faavalevalea, “E mafai faapefea e le Atua ona faia lenei mea ia te au?” ae o le mea moni e tatau ona latou saili ina ia tatalo mo le malosi e “tauave” ma “onosai ai i mea uma.”

O faataitaiga sili faatusipaia o le onosai o loo maua i le soifuaga o Iesu Keriso. O Lona faapalepale ma le tumau o loo sili atu ona faaalia i lena po matuitui i Ketesemane a o Ia memumemu, i Lana taulaga tiga, “Lo’u Tama e, afai e mafai, ia ave ese lenei ipu ia te au: a e aua le faia lo’u loto, a o lou finagalo” (Mataio 26:39). E moni sa Ia puapuagatia, ma vaivai, ma onosai i mea uma.

A o tutu’i ai i le satauro i luga i Kalevaria, sa faaauau ai e Keriso Lana faataitaiga atoatoa o le onosai a o Ia memumemu i upu segila, “Lo’u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).

O nei faataitaiga o le onosai e i ai se uiga maoae mo i tatou pe a tatou mafaufau i le apoapoaiga e luitauina ai o loo maua i le 3 Nifae: “O lea foi, pe faapefea la outou amio e tatau ai? E moni ou te fai atu ia te outou, e pei lava o au nei” (3 Nifae 27:27).

E tele ni mau o loo laualuga mai ai le taua o le onosai. Ou te fia ta’ua ni nai vaega:

“Ia taitasi le tagata ma faataalise ona faalogologo, ia faagesegese ona tautala, ia faagesegese ona ita” (Iakopo 1:19).

“A e ui i na mea, ua silafia e le Atua ua tatau ona aoai i lona nuu; ioe, na te tofotofoina lo latou onosai ma lo latou faatuatua” (Mosaea 23:21).

I le Mosaea, ua aoao ai i tatou e le Tupu o Peniamina e faapea, o le a avea i tatou ma se tagata o le lalolagi o le ita lea i le Atua seiloga tatou te gauai atu i galuega alofa a le Agaga Paia e ala i lo tatou onosai, faaopoopo i ai ma isi uiga mama (tagai Mosaea 3:19).

Na ta’ua e Iosefa Samita, “O le onosai e faalelagi” (History of the Church, 6:427).

Pe taua ea ma aoga le onosai i o tatou manatunatuga ma sailiga? E mautinoa lava e taua pe afai tatou te aloese mai le faaupuga faalumaluma o le “mea noa” lea e faaaoga e faaigoa ai i latou e leai se alofa. E taua pe afai tatou te mananao ina ia le avea ma se tagata o le lalolagi o le ita i le Atua. E taua pe afai tatou te uiga faalelagi. E taua pe afai tatou te saili ina ia avea faapei o Keriso.

O le le onosai, o le tagata o le lalolagi lea o loo siomia ai i tatou. Ua tatou vaaia o faaalia mai i talafou ia lipoti i matua, i le osotu i luga i le ita, ua fasi faamo’amo’a se tamaitiiti, e oo ai lava i le oti. I luga o o tatou auala tetele, o mea e tutupu i le le onosai po o le ita i luga o le auala e mafua ai ni faalavelave matautia ma o nisi taimi e maliliu ai nisi.

I se tulaga e le matuia tele ae ua taatele naua o le oso lea o le ita ma lafo ni upu faasausili e tali atu ai i le tuai ona minoi se laina o loo tu ai, o telefoni e le mapu o tagata suemea, po o fanau e mumusu e tali atu i a tatou faatonuga. Pe masani ea le faalogo i nisi o nei mea?

Ae o le mea e lelei ai, e i ai vaega e seasea ona lipotia mai, ae o ni tala ofoofogia e mafaufau i ai o le onosai. Talu ai nei lava, sa ou auai atu ai i le maliu o se uo ua leva. Sa faamatalaina e lona atalii se tala matagofie o le onosai faamatua. A o talavou le atalii, sa pulea e lona tama se kamupani faatau uila afi. I se tasi aso sa ia mauaina ai se uta o uila afi fou ma le iila ma sa latou faatutuina uma i totonu o le faleoloa. Sa faia e le tamaitiiti le mea e mananao tamaiti uma latou te faia, o le a’e lea i luga o le uila afi na latalata ane. Sa ia faaolaina. Ina ua ia iloaina ua mamao le mea ua oo i ai lana taumafaiga, o lea na oso ese ai. Ona o lona popole, na avea ai lona oso ese ma auala na pa’u ai le uila afi muamua. Ona pei lea o se faasologa o maa o le tomino le touluulu taitasi uma i lalo. Sa lagona e lona tama le pa’o, ma tilotilo mai tua o le itu sa galue ai. Sa ataata malie o ia ma faapea atu, “Ia atalii, e sili pe a ta faaleleia le isi tasi lea ae faatau, ina ia mafai ai ona ta totogiina uma le isi vaega.”

Ou te manatu o le tali a la’u uo na atagia ai se onosai faamatua.

O le onosai e mafai ona mafaufau i ai o se faitotoa lea o uiga mama, e i ai lona sao i le faatupulaia ma le malosi o isi ona uso uiga mama o le faamagalo atu, faapalepale ma le faatuatua. Ina ua fesili Peteru i le Keriso pe faafia ona ia faamagalo i lona uso, sa tali Keriso, “Ia faafitugafulu ni fitu,” nai lo le na o le faafitu e pei ona fai atu ai Peteru (tagai Mataio 18:21–22). Ina ia faamagalo atu faafitugafulu ni fitu e mautinoa lava e matuai tele se onosai e moomia ai.

Na sosoo e Elder Neal A. Maxwell le onosai ma le faatuatua ina ua ia aoao mai: “O le onosai e matuai fepiitai lava ma le faatuatua i lo tatou Tama Faalelagi. O le mea moni lava, afai tatou te le onosai, ua tatou fautua atu faapea ua sili atu le mea tatou te iloa—nai lo le Atua. Po o le, ua tatou faailoa atu e sili atu la tatou fuafuaga nai lo Ia.” (“Patience,” Ensign, Oct. 1980, 28).

E pau le ala e mafai ai ona tatou tuputupuae i le faatuatua pe afai tatou te naunau e faatali ma le onosai mo faamoemoega ma fuafuaga a le Atua ina ia faaalia mai i o tatou olaga, i Lana taimi.

Talu ai ona o le le onosai ua pei e masani ai, e faapefea ona tatou atiina ae le uiga paia o le onosai? E faapefea ona tatou aveeseina mai o tatou uiga mai le tagata o le lalolagi ae agai atu i lo tatou onosai, ma le faataitaiga sili ona atoatoa, o Iesu Keriso?

Muamua, e tatau ona tatou malamalama o le faia o lena mea e talafeagai, pe afai tatou te mananao ina ia matuai olioli atoatoa i faamanuiaga o le talalelei toefuataiina. O se malamalama faapea e mafai ona uunaia ai i tatou ina ia:

1. Faitau mau taitasi o loo i le Faasino Mataupu o loo lisiina i lalo o le mataupu “onosai” ona mafaufau loloto lea i faataitaiga a Keriso o le onosai.

2. Iloiloina o tatou tagata ina ia fuafua po o fea tatou te tutu ai i le fua o le onosai. O le a le tele o se isi onosai tatou te moomia ina ia avea atili ai faapei o Keriso? O lenei iloiloga a le tagata lava ia e faigata. E mafai ona tatou fai atu i o tatou taitoalua po o se isi tagata o le aiga e fesoasoani mai ia i tatou.

3. Nofouta i faataitaiga o le onosai ma le le onosai lea o loo tutupu i o tatou tafatafa i aso uma. E tatau ona tatou taumafai ina ia mulimuli i na tagata tatou te manatu i ai sa onosai.

4. Toe tautino i aso taitasi ia saga onosai atili, ma ia mautinoa ia tuu ai pea le tagata o le aiga na filifilia ia aafia ai i la tatou galuega o le onosai.

E foliga mai o se galuega tele lenei mea, ae, ina ia ausia soo se sini e aoga e moomia ai le galue malosi. Ma o le faatoilaloina o le tagata o le lalolagi ma le galue ina ia avea atili e faapei o Keriso i lo tatou onosai o se faamoemoega sili lea ona talafeagai. Ou te tatalo o le a tatou sailia lenei ala ma le maelega ma le naunautai.

Ou te molimau atu o Iesu o le Keriso ma o loo tu o Ia i le ao o lenei Ekalesia, e taitaiina i tatou e ala i se perofeta soifua ma faamanuia a tatou taumafaiga uma ina ia avea atili e faapei o Keriso. Ou te molimau atu ai i le suafa paia o Iesu Keriso, amene.