E Mafai e le Togiola Ona Faamama, Toe Maua Mai ma Faapaia o Tatou Olaga

I Idaho Falls, i Idaho o loo i ai se malaevaalele matagofie. O se tasi o malaevaalele pito i tele i le itulagi lea, ma o lea malaevaalele e faigofie ai ona ui atu i le Snake River Valley. Ou te manatua a o ou talavou, le taimi na ou toe foi mai ai mai Chile i le malaevaalele lea, ma feiloai ai ma lo matou aiga ina ua mavae la’u auaunaga faafaifeautalai mo le lua tausaga. Ua faafiaafe ona tutupu ai ni vaaiga faapena i lena lava malaevaalele, a o tali atu le Au Paia faatuatua i le valaau e auauna atu. O se vaega aoga, ma le taua tele o le taulaga ma lea itulagi.

I tafatafa o le malaevaalele, o loo i ai foi se isi vaega aoga tele ma le matagofie o le taulaga—o Freeman Park. E tafe atu agai i le paka lena le Snake River, pe tusa ma le lua maila. O loo i ai se ala savali e ui atu i le paka lena ma faataamilomilo atu ai i le vaitafe mo le tele o maila.

O le Freeman Park e anoanoai eka o le mutia lanulauava e faatumulia i malae peisipolo ma sofipolo, o taupega mo tamaiti, o fale e tafafao ai aiga mo a latou mafutaga, o laina laau matagofie ma pupuvao e savalivali ai paaga. O le vaavaai atu i le vaitafe mai le paka, e mafai ona iloa atu ai le malumalu paepae ma le mama o Idaho Falls, o loo tu mai ai i se maupuepue maualuga. O le pao o le tafe a le vai o le Snake Rivers a o ui atu i le papatu lava, e mafua ai ona matua manaomia lenei paka. O se tasi o nofoaga ou te fiafia lava i ai, ma te savalivali ai ma la’u manamea o Lynette; e malolo ai; mafaufau ai; ma manatunatu loloto ai. E ese le toafilemu ma musuia.

Aisea ua ou talanoa ai e uiga i le malaevaalele faaitulagi ma le Freeman Park i Idaho Falls? Aua o loo fausia uma i le ituaiga eleele e tasi; o nei nofoaga tauaogaina uma e lua, sa masani ona avea ma eleele e faatumu i lapisi.

O se eleele e faatumu i lapisi, o se nofoaga lea e tanu ai le lapisi i le va o laina palapala. O loo faamatala mai e le lomifefiloi a Webster, o se eleele faatumu, o se “faiga e lafoai i ai otaota ma lapisi, lea e tanumia ai le otaota i le va o laina palapala e fausia ai ni laueleele maualalalo” (Merriam-Webster’s Collegiate Dictionary, 11th ed. [2003], 699).

O se isi faauigaga o se eleele faatumu o le “nofoaga e tanumia ai le lapisi ma toe maua mai ai le laueleele.” O le faauigaga o le toe maua mai o le “toe faafoi mai mai se amioga sese po o le le lelei … ia laveai mai mai se tulaga e le manaomia” (1039).

Toeitiiti o lo’u olaga atoa na ou ola ai i Idaho Falls. Ua silia ma le 50 tausaga o o’u foai atua le tele o lapisi i na eleele faatumu.

O le a se mafaufau o tama o le taulaga, pe afai e i ai se aso ou te tu atu ai i luga o se alasee o vaalele i le malaevaalele o Idaho Falls, po o le totonugalemu o malae lanulauava o Freeman Park, ma se suotosina ma amata ona sua ni lua tetele? A fesili mai ia te au pe o le a la’u mea la e fai, ae ou tali atu ou te manao e sua i luga lapisi tuai sa ou faia i le tele o tausaga.

Ou te masalo o le a latou fai mai, e le mafai ona iloa tonu a’u lapisi patino, sa aumai ma tanumia i le tele o tausaga ua mavae. Ou te talitonu o le a latou fai mai, e leai sa’u aia e eli ai i luga le lapisi, ma o la ua ou faataumaoia se mea matagofie ma le aoga sa latou fatuina mai i a’u lapisi. I se faaupuga lata mai, ou te iloa o le a latou matua le fiafia lava ia te au. Ou te manatu o le a latou tau mafaufau, pe aisea lava o le a manao ai se tagata e faataumaoi se mea ua matua matagofie tele ma aoga, i se taumafaiga e eli i luga ia lapisi ua leva.

Mata e mafai ona toe maua mai se ola, lea na mafua ona tuulafoaiina ona o le faatamala, ma ua foliga mai e le mafai ona faamagaloina o ia? A le o lea, e faapefea le tagata o loo taumafai ma le faamaoni, ae ua faatele ona pau atu i le agasala ma ua manatu ai, ua leai se auala e mafai ai ona taofia lea tulaga ua foliga mai ua le mafai? A le o lena foi, e faapefea le tagata ua suia lona olaga ae e le mafai ona faamagaloina ia lava?

Na aoao atu le perofeta o Alema i le nuu o Kitiona, e faatatau i le Togiola a Iesu Keriso:

“E maliu foi o ia, e onosai i mea tiga, ma puapuaga, ma tofotofoga uiga eseese; e faapea foi ina ia faataunuuina le upu na faapea mai, na te ave i ona luga puapuaga ma ma’i o lona nuu.

“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu. Na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi a’i lona nuu e tusa ma o latou vaivai.

“O lenei, ua silafia e le Agaga mea uma, a e ui i lea, e tigaina le Alo o le Atua i le tino, ina ia ave i ona luga agasala a lona nuu, ina ia tineia foi a latou solitulafono e tusa ma le mana o lona faaolaina. O lenei foi, faauta, o le mau lea ua ia te au” (Alema 7:11–13).

E faatatau foi i le Togiola, na aoao mai ai Iakopo le uso o Nifae: “O le mea lea e ao ai ina i ai le togiola e le i’u—afai e le o i ai le togiola e le i’u, ona le mafai lea e le tino iuvale ona ofu i le tino ola pea. Afai e faapea, e tumau lava le faamasinoga muamua na oo mai i tagata, e leai se iuga. Afai e faapea, e taatia le tino nei ia pala ma liliu atu i lona tina o le eleele, e le toe tu mai” (2 Nifae 9:7).

O loo avanoa le Togiola a Iesu Keriso mo i tatou taitoatasi. O Lana Togiola e le iu. E faatatau mo tagata uma, e faapena foi oe. E mafai ona faamamaina, toe aumai, ma faapaia; e oo foi ia te oe. O le uiga lena o le le i’u. E atoa, e mae’ae’a, [o tagata] uma, e faavavau. Sa aoao mai Peresitene Boyd K. Packer: “… e leai se mausa, leai se vaisu, leai se fouvale, leai se agasala, leai se liliuese, leai se solitulafono e tuusaunoa mai le folafolaga o le faamagaloga atoatoa. O le folafolaga lena o le togiola a Keriso” (“The Brilliant Morning of Forgiveness,” Ensign, Nov. 1995, 20).

Pei lava ona manaomia e le eleele faatumu se galuega ua tuuto ma le gauai atu i ai, e galulue ai ma le maelega e fola lea laina ma lea laina o le palapala e tanu ai, ina ia toe faataoto lelei ai le eleele maualalo, e faapena foi ona manaomia e o tatou olaga le tausiga lea, e faifai pea le faaaoga o lea laina ma lea laina o le meaalofa faamalolo o le salamo.

Pei foi ona le lelei se faalogona a tamā o le taulaga i Idaho Falls i se tagata e taumafai e toe sua i luga ana lapisi tuai, e faapena foi ona lagona e le Tama i le Lagi ma Lona Alo o Iesu Keriso le faanoanoa, pe a tatou filifili e tumau ai i le agasala, a o lea ua i ai le meaalofa o le salamo e mafai ai ona faamama e ala i le Togiola, ma faapaia o tatou olaga.

A tatou taliaina ma le agaga faafetai ma faaaoga lenei meaalofa taua, e mafai ona tatou olioli i le matagofie ma le aoga o o tatou olaga lea na toe maua mai e le Atua e ala i Lona alofa ma le Togiola e le iu a Lona alo ma lo tatou uso o Iesu Keriso.

Ou te molimau atu o Iesu o le Keriso, o le Alo o le Atua soifua, e moni Lana Togiola, ma o le vavega o le faamagaloga, e mafai ai e Ia ona toe faamama i tatou taitoatasi, e oo lava ia te oe. I le suafa o Iesu Keriso, amene.