O Le Fuafuaga o le Faaolataga

A o ou auai i se sauniga faamanatuga i le gasologa o masina o le taumafanafana, sa faamanuiaina ai au ou te faalogo i ni savali mai ni tamaiti aoga se toatolu na tuua atu i aiga mai le aoga mo le taumafanafana. Sa ou naunau lava i se tasi o lauga.

Sa faigaluega o ia i le taimi e malolo ai vasega i le taumafanafana i se faleaiga e tumu i ave loli. E toatasi le avetaavale e afe soo lava i le faleaiga i le aso lava e tasi i vaiaso taitasi e tausami ai. O le afe soo na maua ai se avanoa mo ni feiloaiga pupuu. Sa ia fesili i le tamaitai talavou po o fea e nofo ai. Sa ia ta’u atu i ai e faapea o loo malolo mai o ia i le aiga mo le taumafanafana e sue se tupe e toe foi ai i le aoga i le tautoulu. O le isi ana fesili na sosoo ai, “O fea e te aoga ai?” Sa ia tali atu ma le mitamita: “BYU–Idaho.” Sa fia malamalama atili o ia e uiga i le aoga, lea na tau atu ai i se talatalanoaga i le talalelei. O lana talanoa muamua lava o le aoaoina lea o ia e uiga i le Upu o le Poto. Sa manuia le taumafaiga a le tamaitai. Sa ia faatalitonuina le alii e tuu le ulaula.

Ona sui lea o lana sifi, ma ua ia le toe maua le avanoa e toe tautuaina ai lea alii, o lea sa ia tusi atu ai se faamatalaga i lea alii ma tuu i totonu o se tamaitusi a le Ekalesia e uiga i le ata o le faaolataga. Ina ua tuanai aso e tele, sa ia maua se tusi mai le avetaavale. Na ona ia faapea mai lava, “Ua e suia lo’u olaga.” Faafetai i lenei tamaitai talavou, sa maua ai e lenei alii ni faamatalaga na mafua ai ona ia mafaufau e uiga i suiga e tatau ona ia faia i lona olaga. Ou te le iloa le taunuuga atoa o lenei feiloaiga i le va o se tamaitai faigaluega ma se ave loli, ae na manino lava le suia o le olaga o le alii.

Ona ia faaauau lea e faamatala le auala e faigofie ai ona iloa e isi le matagofie o le talalelei. O loo i ai avanoa iina i aso uma i a tatou sailiga o le olaga ina ia tatalaina o tatou gutu ina ia iloa ai e tagata upumoni o le talalelei, ia o le a faamanuiaina ai i latou iinei ma iina ma le faavavau o le a sau.

E toatele tagata e manatunatu, “O fea na tatou o mai ai? Aisea ua tatou i ai iinei? O fea tatou te o i ai?” E lei auina mai i tatou e lo tatou Tama Faavavau i le lalolagi i se faigamalaga e leai se faamoemoega ma leai se uiga. Ua Ia saunia se fuafuaga mo i tatou e mulimuli ai. O Ia o le Tusitala o lena fuafuaga. Ua fuafuaina mo le alualu i luma o le tagata, le faaolataga ma le faaeaga. E siitia mai le taiala a faifeautalai o le Talai La’u Talalelei:

“O le Atua o le Tama o o tatou agaga. O i tatou moni lava o Ana fanau, ma e alofa o Ia ia i tatou. Sa tatou ola o ni fanau agaga a lo tatou Tama o i le Lagi ae tatou te lei fananau mai i lenei lalolagi. Ae peitai, e le pei i tatou o lo tatou Tama Faalelagi, e le mafai foi lava ona avea i tatou e faapei o Ia ma olioli i faamanuiaga uma o loo Ia olioli ai e aunoa ma le malamalama i le ola ai i le olaga faitino ma se tino faaletino.

“O le faamoemoega atoa lava o le Atua—Lana galuega ma Lona mamalu—ina ia mafai e i tatou ona olioli i Ana faamanuiaga uma. Ua Ia saunia se fuafuaga atoatoa ina ia faataunuuina ai Lona faamoemoega. Sa tatou malamalama ma taliaina lenei fuafuaga ae tatou te lei o mai i le lalolagi” ([2004], 48).

Ae peitai e toatele tagata o loo i le lalolagi i aso nei o loo tauivi pea e saili tali i fesili masani o le olaga. O tuualaga “Faauta, o loo iinei” ma le “Faauta, o loo iila” ua na ona faateleina le leotetele, ma ua tele taimi e fenumiai ai. Ua faateleina e tekinolosi le fenumiai e ala lea i le faasalalauina o savali e ala i peau o le ea ma le anoanoai o uaea o fesootaiga lea ua lilofia ai nei le lalolagi. Ua tele auala e faasalalau ai le tele ma le anoanoai o savali eseese, ou te matea e le o se mea e tatau ona ofo ai i le fenumiai o tagata. Na ta’u mai e Paulo anamua mea e ono tutupu i le lumanai:

“Aua e oo i ona po latou te le mafafai ai ona talia o le mataupu e ola ai, a e tusa ma o latou lava tuinanau, latou te faapotopoto ai a’oa’o mo i latou, ina ua feu o latou taliga;

“Latou te liliu ese foi o latou taliga i le upu moni, a e liliu atu i tala o le vavau” (2 Timoteo 4:3–4).

E le moomia ona tatou fenumiai. O tali i fesili e nunumi ai e faatatau i faamoemoega o le olaga, ua uma ona tuuina mai i tagata mo lo tatou taitaiga.

Sa tatou faalogo muamua i le fuafuaga o le faaolataga ae tatou te lei fananau mai, i le vaega ua taua e tusitusiga paia o lo tatou uluai tofi (tagai Aperaamo 3:26). O le mea na tupu i lenei uluai tofi e nenefu le malamalama i ai, ae ua tatou iloa sa tatou ola iina o ni fanau agaga a lo tatou Tama Faalelagi, ma sa tatou uia nisi o laasaga o le alualu i luma e saunia ai mo le avanoa o le faaofuina o o tatou agaga faavavau i tino faaletino. Ua tatou iloa foi sa faia e le Tama se fono tele e faamalamalama ai le faamoemoega o le olaga i le lalolagi. Sa tatou maua le avanoa e talia pe teena ai le fuafuaga o le faaolataga. E lei faamalosia mai ia i tatou. O le ute o le fuafuaga o le maua lea e le tagata o se avanoa e galueaiina ai lona lava faaolataga i le lalolagi, faatasi ai ma le fesoasoani a le Atua. Na filifilia se taitai e aoaoina i tatou i le auala e mulimuli ai i le fuafuaga ma togiolaina i tatou mai le agasala ma le oti. E pei ona faamatala atu e le Alii ia Mose: “Ae peitai, ua fai mai ia te au lo’u Atalii Pele o la’u Pele lea ma Le na ou Filifilia talu mai le amataga—Lou Tama e, ia faia lou finagalo, ma ia ia te oe pea le mamalu e faavavau” (Mose 4:2).

O Iesu Keriso, lo tatou Uso Matua, na avea ma taitai i le fautuaina o le fuafuaga na fuafuaina e le Tama, ma sa tatou taliaina le fuafuaga ma ona tuutuuga. Faatasi ai ma lena filifiliga, na tatou mauaina ai le aia e o mai ai i le lalolagi ma ulufale mai ai i lo tatou tofi lona lua.

Na foafoaina e le Atua ia Atamu ma Eva i lona lava faatusa, faatasi ai ma ni tino o aano ma ivi, ma tuu i laua i le Faatoaga o Etena. Sa tuuina i ai le filifiliga pe tumau ai i le faatoaga pe aai i le fua o le laau e iloa ai le lelei ma le leaga ma maua ai le avanoa e oo ai i le faaletino. Sa la taliaina le lu’i, o le aai lea i le fua o le laau, ma avea loa ma tagata faaletino ma oo atu ai i le oti faaletino. Talu ai ona o la la’ua filifiliga, o le a la oo ai i tofotofoga ma faigata o le olaga faaletino.

E lua faamoemoega o le olaga i le faaletino. O le vaega muamua ina ia mafai ona tatou maua ai ia aafiaga lea e le mafai lava ona tatou mauaina i se isi ala. O le lona lua o le mauaina lea o ni tino o aano ma ivi. O nei faamoemoega uma e taua uma i le i ai o le tagata. O loo tofotofoina nei ma suesueina i tatou sei vaai pe o le a tatou faia mea uma na poloaiina ai i tatou e le Alii e fai. O nei poloaiga o mataupu faavae ma sauniga o le talalelei, ma o loo aofia ai le talalelei a Iesu Keriso. O mataupu faavae uma ma sauniga e i ai se aafiaga i le faamoemoega atoa o lo tatou tofotofoga, o le saunia lea o i tatou e toe foi atu i lo tatou Tama Faalelagi ma avea atili ai e faapei o Ia. Na saunoa Elder Bruce R. McConkie i le saunoaga lenei e uiga i le ala sao ma le vaapiapi:

“O lo’u manatu o le mea e manaomia ona fai e i tatou uma o le fuafua lea po o fea tatou te tutu ai i taumafaiga uma i le faaletino. I le faavae mai i manatu lautele e manino ma tuusao, tatou te faia ai se faaiuga i le auala o le a tatou ola ai i lenei itu po o lena itu ina ia sopoia ai le tofi faataitai, ina ia faamanuiaina ai i le suega i le olaga faaletino. Afai tatou te faia filifiliga sao, o le a tatou agai atu i le taui faavavau, ae afai tatou te le faia, ona tatou maua lea o se nofoaga e maualalo ifo i malo ua uma ona saunia.

“… O tagata uma o loo i le Ekalesia o e o loo i le ala sao ma le vaapiapi, o e o loo taumafai ma tauivi ma naunau e faia le mea sao, e ui o loo mamao o [ia] mai le atoatoa i lenei olaga; afai e mavae atu o ia mai lenei olaga a o i ai o ia i le ala sao ma le vaapiapi, o le a agai atu o ia i le taui faavavau i le malo o lona Tama” (The Probationary Test of Mortality [devotional address, Salt Lake Institute of Religion, Jan. 10, 1982, 8–9).

Ua mafaia nei mea uma ona o Iesu Keriso. O Ia o le totonugalemu o le fuafuaga faavavau a le Tama, o le Faaola na avea ma togiola mo tagata. Na auina mai e le Atua Lona Alo Pele ina ia faatoilaloina le Pau o Atamu ma Eva. Na afio mai o Ia i le lalolagi e avea ma o tatou Faaola ma Togiola. Sa Ia faatoilaloina puniala o le oti faaletino mo i tatou e ala lea i le ofoina atu o Lona lava soifua. Ina ua maliu o Ia i luga o le satauro, sa tuueseeseina Lona agaga mai Lona tino. O le aso tolu na toe tuufaatasia ai Lona agaga ma Lona tino e faavavau, e lei toe tuueseeseina lava.

O le olaga i le lalolagi e tapulaa lona umi. E i ai se taimi mo i tatou uma e tuueseeseina ai le agaga ma le tino i le oti. Ae ona o le Toetu o Iesu Keriso, o le a tatou toetutu uma ai, e tusa lava pe sa tatou ausiaina le lelei po o le leaga i lenei olaga. O le tino ola pea o le meaalofa lea i fanau uma a lo tatou Tama o i le Lagi. O le oti e tatau ona silasila i ai o se faitotoa i se olaga fou ma le lelei. E auala mai i le togiola mamalu, o le a toefaatasia ai le tino ma le agaga. O le a tatou maua se tino atoatoa ma ola pea o aano ma ivi lea o le a le toe oo i le tiga po o le oti. Ae o le mamalu tatou te maua i le isi olaga o le a faalagolago lea i la tatou faatinoga i lenei olaga. E na o le meaalofa lava o le Togiola ma lo tatou usiusitai i le talalelei e mafai ona tatou toe foi atu ai ma toe ola faatasi ma le Atua.

Ina ua mavae le Toetu o le Faaola, sa o atu Ana Aposetolo e talai lenei savali mamalu i malo o le lalolagi. Sa tele mea latou te femalagaa’i ai a o latou aoao atu le misiona a le Faaola. Sa amata ona faasalalauina atu se laasaga tele o le faaKerisiano i le tele o atunuu. Ae sa faasolosolo atu lava le Ekalesia i se liliuese tele lea na motusia ai lava ma le tuufaasologa o le perisitua. Na aveeseina mai le lalolagi le pule e taitai ai sauniga faaleagaga.

Na faifaimalie lava ona amataina e alii musuia ona aumaia se toe faatulagaina. Na faamatala e Peresitene Gordon B. Hinckley le tafa o ata o se aso matagofie. Na ia saunoa:

“Ae peitai, i lena vaitau umi o le pogisa, sa faamumuina se moligao. Na aumaia e le vaitau o le Toefaafouga se fuga sa taufuifui mai ai aoaoga, o faatufugaga, ma le faasaienisi. O iina na oo mai ai se mau a ni alii ma ni tamaitai lototetele ma le totoa o i latou ia sa vaavaai a’e i le lagi ma le agaga faafetai i le Atua ma Lona Alo paia. Tatou te faaigoaina o le Toefotua’i.

“Ona mavae lea o le tele o augatupulaga sa ola ai i le lalolagi—e toatele naua i latou sa feagai ma feteenaiga, o le feitaga’i, pogisa, ma le amioleaga—ona oo mai ai lea o le aso maoae fou o le Toefuataiga. Sa tatala mai lenei talalelei mamalu i le faaali mai o le Tama ma le Alo i le taulealea o Iosefa. Ua tafa ata o le tisipenisione o le atoaga o taimi, ua alafa’i mai le lalolagi. Ua toefuatai mai mea lelei uma, o mea matagofie, ma le paia o tisipenisione uma ua mavae, i lenei vaitau ofoofogia” (“Ua Tafa Ata o se Aso Matagofie,” Liahona, Me 2004, 82–83).

Ina ua mavae le mea mamalu na tupu o le Uluai Faaaliga, sa tuuina atu le faamaumauga paia o le Tusi a Mamona i le Perofeta o Iosefa Samita. Na aumaia ai se molimau fou i lo tatou Alii ma le Faaola ma Lana misiona i tagata o le fogaeleele.

O lea tatou te vaai ai i le fuafuaga faavavau a lo tatou Tama o Lona alofa e leai ni tuaoi. O loo aofia ai Ana fanau uma. E tutusa uma le tupuaga o tagata ma e tutusa foi le tulaga e mafai ai ona ausia lo latou taunuuga faavavau.

O le perofeta o Amoleka i le Tusi a Mamona, na molimau e faapea o afioga a Keriso o le a aumaia ai lo tatou faaolataga, ma na ia saunoa ai:

“O lenei foi, o’u uso e, ona ua uma ona outou maua nei molimau e tele, ona ua molimau tusi paia i nei mea, ou te loto ina ia o mai outou ma fua mai i fua e tatau ma le salamo.

“Ioe, o lo’u manao ia outou o mai a e le toe faamaaa o outou loto, aua faauta, o ona po nei, ma le aso lenei o lo outou olataga; o le mea foi lea, afai tou te salamo, a e le faamaaa o outou loto, e faataunuuina ai loa ia te outou le ala sili o le togiola.

“Aua faauta, e tatau i tagata ona sauniuni i lenei olaga e fetaiai ma le Atua. Ioe, faauta, o le aso o lenei olaga, o le aso lea e tatau ona fai ai e tagata a latou galuega” (Alema 34:30–32).

Ia aua nei felafoaiina i tatou e peau o matagi faalelalolagi ma mataupu a tagata (tagai Efeso 4:14). Tatou te faailoa atu i le lalolagi e faapea o loo avanoa le lagi ma ua toe faailoa mai i tagata le upumoni e uiga i le fuafuaga e faavavau a le Atua. O loo tatou ola i le tisipenisione o le atoatoaga o taimi. O loo tatou ola i se aso ua tatou maua ai le molimau e ala i tusitusiga paia i le fuafuaga sili a le Alii ua tuuina mai i Ana fanau mai le amataga o taimi e oo mai i lenei taimi o le tisipenisione faaiu. Ua faamaumauina lelei le faamaoniga; e le o tuua na o i tatou e feofeoa’i i le olaga faitino e aunoa ma le iloaina o le fuafuaga autu ua mamanuina e le Alii mo Ana fanau. Ua Ia noatia o Ia lava e ala i le feagaiga paia ina ia tuu mai faamanuiaga o le lagi e tusa ai ma lo tatou usiusitai i Lana tulafono. O lea, ia manatua, ia manatua lava o nei mea ua moni, aua ua faaalia mai e le Alii le Atua nei upumoni ia i tatou. I le suafa o Iesu Keriso, amene.