Faamaoni i lo Tatou Tiute o le Perisitua

I ni nai vaiaso talu ai i se sauniga anapogi ma molimau i le matou uarota, sa ou matauina ai se tamaitiiti i le laina pito i tua o tau faata’ita’i lona lototele e fai ai lana molimau. Pe faatolu pe faafa ona ia faatagā amata ona nofo lea i lalo. Na i’u ina oo mai lona taimi. Sa faasasa’o nai ona tama’i tauau, savali mai ma le toa i vainofoa ma agai atu i le tulaga, ma laa atu i le pulelaa, tuu ona lima i luga o le pulelaa, pulato’a atu i le faapotopotoga, ataata—ona toe faaliu mai lea i tua, ma toe laalaa atu i na faasitepu e lua ma toe savali atu ai i vainofoa i lona tama ma lona tina. Sa ou vaavaai atu ia te outou i lenei po, i lenei Maota tele mo Konafesi, ma mafaufau ia i latou o loo faafofoga mai ma mafai ona talisapaia atoatoa taga a lena tamaitiiti.

O’u uso e, ua faamamaluina lava au i le avanoa manaomia, e tautala atu ai ia te outou i lenei afiafi. Sa ou mafaufau lava pe o le a sa’u tala e fai atu. O iina na oo mai ai i lo’u mafaufau se mau ou te fiafia i ai: “Ia e mata’u i le Atua, ma e anaana i ana poloaiga: aua o mea ia e tatau i tagata uma” (Failauga 12:13). E ese lo’u fiafia, ma faapelepele i le upu tautamalii o le tiute.

O le Taitaiau logologoa o le Taua i le Lotoifale a Amerika o Robert E. Lee na saunoa mai, “O le tiute o le upu sili ona mamalu i la tatou gagana… . E le mafai ona e faia se mea e sili atu i le tiute. E le tatau foi ona e moomoo e faia se mea e itiiiti ifo i lo le tiute” (in John Bartlett, Familiar Quotations [1968], 620).

E tofu i tatou uma ma tiute e o faatasi ma le perisitua paia ua tatou tauaveina. E tusa pe o tatou tauaveina le Perisitua Arona po o le Mekisateko, ae tele mea o loo faamoemoeina mai ia i tatou taitoatasi. O le Alii lava Ia na aoteleina lo tatou tiutetauave ina ua Ia fautua mai i le faaaliga i le perisitua. “O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa” (MFF 107:99).

Ou te faamoemoe ma lo’u loto ma lo’u agaga atoa i alii talavou uma o e ua i ai le perisitua o le a latou faamamaluina lena perisitua ma ia faamaoni i le tiute lea o loo auala mai ai ina ua tuuina atu.

I le limasefulu tausaga talu ai na ou faalogo ai ia William J. Critchlow, Jr., a o avea lena ma peresitene o le Siteki a Ogden i Saute o le na avea mulimuli ane ma se Fesoasoani i le Korama a le Toasefululua, o lauga atu i le usoga i le sauniga aoao a le au perisitua o le konafesi, ma toe faamatala atu se tala e faatatau i le faatuatuaina, faamamaluina, ma le tiute. Ou te fia faasoaina atu le tala ia te outou. O lona lesona faigofie e faatatau foi ia i tatou i aso nei, e pei ona i ai i lena taimi.

“Sa tutu ia Rupert [Laitiiti] i autafa o le auala ma matamata i se aofaiga e le masani ai o le toatele o tagata o telea’i ane. Ina ua mavae se taimi sa ia iloaina atu sana uo. ‘O fea a outou faanatinati uma i ai?’ sa ia fesili atu ai.

“Sa faatali teisi le uo. ‘E te lei faalogo i ai?’ sa ia fai atu ai.

“‘Ou te lei faalogo i se mea,’ sa tali atu ai Rupert.

“‘Ia,’ sa faaauau le tala a [le] uo, ‘ua leiloa le maa taua a le Tupu! O ananafi sa ia auai atu ai i se faaipoipoga a le aloalii ma sa ia asoaina i lona ua le maa taua o loo tautau i le filifili auro. Na tei ua pa’u ese le maa taua mai le filifili. O loo sailia e tagata uma, aua ua ofoina mai e le Tupu se taui… mo le tagata e mauaina. Sau, e tatau ona ta faavave.’

“‘Ae le mafai ona ou alu e aunoa ma le faanoi ia Tinamatua,’ o le tali atu lea a Rupert ma le le mautonu.

“‘E le mafai la ona ou faatali. Ou te manao e sue le maa taua,’ o le tali lea a lana uo.

“Sa faataalise atu Rupert i le fale o loo i le faatausiusiuga o le vaomatua e saili le faatagaga a lona tinamatua. ‘Afai e mafai ona ou mauaina o le a tatou tuua loa lenei falesoo susu ae faatau se fasi fanua i autafa o le mauga,’sa ia aioi atu ai ia Tinamatua.

“Ae sa lulu le ulu o lona tinamatua. ‘O a mea a mamoe o le a fai,’ sa ia fesili atu ai. ‘E le o fifilemu i totonu o le pa, o loo faatalitali le taimi e ave ai i le vao ma faamolemole aua ne’i galo ona ave e faafeinu pe a susulu maualuga mai le la i le vanimonimo.’

“Sa ave ma le faanoanoa tele e Rupert ia mamoe i le vao, ma o le aoauli sa ia taitaiina atu ai i latou i le alia o loo i le togavao. O iina sa ia nofo ai i luga o se maa lapoa i autafa o le vai. ‘Ana mafai ona ou maua lava sina avanoa ou te sailia ai le maa taua a le Tupu,’ sa ia mafaufau ai. Sa punou ifo lona ulu ma faatausisila atu i lalo i le taele o le alia, ae faafuasei ona ia sioa i totonu o le vai. O le a le la mea? E le mafai! Sa oso o ia i totonu o le vai, ma uu mai i ona lima se mea e lanumeamata, ma sina filifili auro [ua motu]. ‘O le maa taua a le Tupu!’ sa ia alaga ai. ‘Masalo na lelea ese mai le filifili [ao tietie le Tupu i lana solofanua, i luga o le ala laupapa ma lelea ese ai ma tafea mai ai iinei] i le tafe.’

“Faatasi ai ma ona mata ua susulu, sa tamoe atu loa ia Rupert i le faleoo o lona tinamatua e ta’u atu i ai le mea maoae ua ia mauaina. ‘Ia manuia oe, la’u tama,’ sa ia fai atu ai, ‘ae semanu e te le mauaina lava pe ana e le faia lou tiute, o le vaaia lea o mamoe.’ Ma na iloa e Rupert e sa’o lelei lava.” (In Conference Report, Oct. 1955, 86; paragraphing, capitalization, and punctuation altered.)

O le lesona e aoaoina mai lenei tala o loo maua i se solo e masani ai: “Fai [lou] tiute; o le mea sili lena. Tuu i le Alii le vaega o totoe!” (Henry Wadsworth Longfellow, “The Legend Beautiful,” in The Complete Poetical Works of Longfellow [1893], 258).

Ia te outou o e o loo avea ma peresitene o a outou korama, ou te fia fautua atu e faapea o lou tiute e le faamutaina pe a uma lou taimi i le tofiga. O lena sootaga ma tagata o lau korama, lou tiute ia i latou, e faaauau pea lava i lou olaga atoa.

I le taimi a o avea au ma se aoao i le Perisitua Arona, sa valaauina ai au e avea ma peresitene o le korama. Faatasi ai ma le uunai ma le lagolago a se fautua maelega ma le musuia o le korama, sa ou galue ai ma le filiga ina ia mautinoa o loo auai e le aunoa ia alii talavou taitoatasi i a matou fonotaga. E toalua i laua sa sili ona faigata, ae o le tumau mausali ma le alofa sa amata ai ona la auai mai i sauniga ma auai i gaoioiga a le korama. Ae peitai, a o mavae atu taimi ma la tuua le uarota e faaauauina aoaoga ma sailia galuega, sa toe foi ai i laua i le le toe toaaga.

I le gasologa o tausaga sa ou vaaia ai nei uo pele e toalua i nisi o faatasiga, e aofia ai le tele o faaipoipoga ma maliu. Soo se taimi ou te fetaui i ai, ou te tuu ai se lima i luga o o la tauau ma faamanatu ia i laua, “O loo avea pea au ma peresitene o la oulua korama, ma ou te le tuua lava oulua. E tele se taua o oulua ia te au, ma ou te manao ia oulua olioli i faamanuiaga ia e oo mai i le toaaga i le Ekalesia.” Ua la iloa ou te alofa ia i laua ma o le a ou le fo’i ai lava.

Mo i tatou na o loo umia le Perisitua Mekisateko, o la tatou aia e faalauteleina o tatou valaauga o loo i ai nei. O i tatou o leoleo mamoe e vaavaaia ia Isaraelu. O loo tilotilo mai mamoe fiaaai, ua saunia e fafagaina i le areto o le ola.

I le tele o tausaga ua tuanai, i se po o le Halouini, sa ou maua ai le avanoa e fesoasoani ai i se tasi ua le iloa lona ala mo sina taimi ma sa moomia ai se lima fesoasoani e toe foi mai ai. Sa ou alu atu i la’u taavale i le fale mai le ofisa, ua fai foi si tuai. Sa ou faatuatuai ona o le Halouini, ae tuu ai lo’u toalua na te taulimaina le au asíasi o le [Halouini]. A o o’u pasi atu i le Falemai o St. Mark i le Aai o Sate Leki, sa ou manatuaina se uo pele e igoa ia Max, o loo ma’i ai i le falemai lena. A o ma faamasani i tausaga ua mavae, sa ma iloaina ai sa ma ola faatasi a’e i le uarota e tasi, e ui e eseese taimi. O le taimi na ou fanau ai, o le taimi lena na siitia ese ai Max ma ona matua mai le uarota.

O lena po o le Halouini, sa ou afe ai i le vaega e paka ai taavale ma ou alu atu ai i le falemai. Sa ou afe i le kesi o loo i luma e fesili mo le numera o lona potu, sa faailoa mai ia te au e faapea ina ua tusia le igoa o Max i le falemai, sa ia tusia se isi lotu faapea o lana lotu ae le o le AAG.

Sa ou ulu atu i le potu o Max ma faafeiloai ia te ia. Sa ou ta’u atu i ai lo’u mitamita i le avea ai ma se tasi o ana uo ma lo’u popole tele mo ia. Sa ou talanoa e uiga i lona soifua galue i faletupe, ma se taitai faaili pe a malolo. Sa ou iloaina ai sa tiga lona loto i se faamatalaga pe tasi pe lua mai nisi, o lea na tonu ai loa e auai i se isi lotu. Sa ou fai atu ia te ia, “Max, o loo e umia le Perisitua Mekisateko. Ou te fia tuuina atu ia te oe se faamanuiaga i le afiafi nei.” Sa malie o ia i ai, ma sa tuuina atu loa le faamanuiaga. Ona ia fai mai lea, o loo ma’i tigaina foi lona toalua o Bernice, i le isi potu e sosoo ai. O la’u valaaulia, sa ma aufaatasi ai ma Max e tuuina atu se faamanuiaga i lona toalua. Sa talosaga mai ou te fesoasoani atu ia te ia. Sa ou faatonutonuina o ia. Sa ia faauuina lona toalua. Sa i ai loimata ma opoopoga, a o ou faamauina le faauuga faatasi ai ma Max, o ona lima ma o’u lima i luga o le ulu o lona toalua, ma avea ai lena afiafi o le Halouini ma mea e manatuaina pea.

Ina o le a ou tuua le falemai i lena afiafi, sa ou afe i le kesi o loo i luma ma ta’u atu i le tali telefoni e faapea ua aumai le faatagaga a Max ma lona toalua, e tatau ona suia le faamaumauga ina ia iloa ai e auai i la’ua i le Ekalesia a Iesu Keriso o le Au Paia o Aso e Gata Ai. Sa ou faatalitali ma matamata seia oo ina ua uma ona sui.

Ua i ai nei i le isi itu o le veli au uo o Max ma Bernice, ae sa la faaaluina tausaga mulimuli o o la olaga e toaaga ma fiafia ai i le mauaina o faamanuiaga na oo mai ma molimau o le talalelei ma le auai i le lotu.

Uso e, o la tatou galuega o le aapa atu lea ia i latou o e, po o le a lava le mafuaaga, o loo moomia la tatou fesoasoani. E mafai ona faatoilaloina o tatou luitau. O loo tatou i ai i le feau a le Alii, ma o lea ua tatou maua ai le aia i le fesoasoani a le Alii. Ae tatau ona tatou taumafai. Mai le tala faatino o le Shenandoah, e i ai laina musuia: “Afai tatou te le taumafai, ona tatou le faia lea; ma afai tatou te le faia, aisea la ua tatou i ai iinei?”

O lo tatou tiutetauave o le ola lea i ni olaga afai e talosagaina i tatou e tuu atu se faamanuiaga faaleperisitua pe fesoasoani atu i soo se auala, ae o loo tatou agavaa e faia. Ua tauina mai ia i tatou e faapea e le mafai ona tatou sosola ese mai aafiaga o o tatou uiga faaletagata. E tatau ona tatou mautinoa o o tatou aafiaga, e lelei ma faagaeetia.

Pe o mama ea o tatou lima? Pe o mama ea o tatou loto? Pe a toe tepa i tua i itulau o le talafaasolopito, tatou te maua ai se lesona o le agavaa mai upu a le Tupu o Tariu ua latalata ona aso. Na faalauiloa i se sauniga aloaia, o Tariu o se tupu faaletulafono o Aikupito. O lona sui tauva, o Alesana le Sili, na faailoa mai o se atalii faaletulafono o Amona. O ia foi o se Farao. Ina ua tau atu Alesana ia Tariu o le a maliu, sa ia tuu ona lima i lona ulu e faamalolo ia te ia, ma poloai atu ia te ia e tulai ma faaauau lana pulega o se tupu, ma faaiu atu ana upu, “Ou te tauto atu ia te oe Tariu, e ala atu i atua uma, ou te faia nei mea ma le faamaoni e aunoa ma le faa’ole’ole.”

Na tali atu Tariu ma se aoaiga malu, “Alesana lo’u atalii e, … pe e te manatu ea e mafai ona e pa’i atu i le lagi ma na lima?” (Adapted from Hugh Nibley, Abraham in Egypt [1981], 192.)

E mafai ona oo mai ma le filemu le valaau o le tiute pe afai tatou te faia tiute ua tatou maua o le perisitua ua tatou umia. Na saunoa mai Peresitene Siaosi Alapati Samita, lena taitai mataalia ma le tauagafau ma o le Peresitene lona valu o le Ekalesia, “O lou tiute muamua lava o le iloa lea o le mea e finagalo ai le Alii ona faalauteleina lea o lou valaauga i le mana ma le malosi o Lana Perisitua Paia i luma o ou uso a tagata ma o le a fiafia ai i latou e mulimuli ia te oe” (in Conference Report, Apr. 1942, 14).

E faapefea la ona faalautele e se tasi se valaauga? E na o le faatinoina lava o le galuega e faatatau i ai.

Uso e, o le faatinoina—ae le na ona moemiti i ai—e faamanuiaina ai olaga, e taialaina ai isi, ma laveaiina ai agaga. “A ia fai outou ma e anaana i le upu, ae aua le na ona faalogologo i ai, o faaseseina ai outou e outou,” o le tautinoga lea a Iakopo (Iakopo 1:22).

Tau ina ia faia e i tatou uma o loo faapotopoto mai i lenei po i lenei sauniga a le perisitua se taumafaiga faafouina ina ia agavaa ai mo le taitaiga a le Alii i o tatou olaga. E toatele naua i latou o loo iina o loo aioi ma tatalo mai mo se fesoasoani. E i ai i latou ua faalotovaivaiina, o i latou ua mananao e toe foi mai ae ua le iloa pe faapefea ona amata.

O te talitonu pea lava i le moni o upu, “O faamanuiaga matagofie a le Atua e oo atu i lima o i latou o e auauna atu i le Alii iinei” (Whitney Montgomery, “Revelation,” in Best-Loved Poems of the LDS People, ed. Jack M. Lyon and others [1996], 283). Ia saunia o tatou lima, ni lima mama ma ni lima naunau, ina ia mafai ona tatou auai i le sauniaina o mea o loo finagalo lo tatou Tama Faalelagi ia maua e isi mai ia te Ia.

Ou te faaiu atu i se faataitaiga mai lo’u lava olaga. Sa i ai sa’u uo faapelepele lava o le na foliga mai ua sili atu ia faafitauli ma faigata o le olaga ua ia oo i ai nai lo le mea na te mafaia. Mulimuli ane sa ma’i o ia i se ma’i tumau ma sa taoto ai i le falemai. Ou te lei iloaina sa i ai o ia iina.

Sa ma o ma Sister Monson i le falemai foi lava lea e asiasi atu i se isi tagata sa matuai ma’i foi lava. Ina ua ma ulufafo mai ma le falemai ma amata ona ma agai atu i le mea sa paka ai le taavale, na ou lagonaina lava se faalogona ma’oti e toe foi atu ma fesili pe o ma’i ai la’u uo o Hyrum iina. Na faamaonia ai ua tele ni vaiaso o ma’i ai Hyrum iina.

Sa ma foi atu i lona potu, tuitui le faitotoa ma tatala. Ma te lei saunia mo le vaaiga o loo faatalitali mai ia i maua. Sa tautau solo ia paluni. Sa pipii i luga o le puipui se pepa lautele o loo i ai upu “Manuia lou Aso Fanau Papa” o loo tusia ai i luga. Sa saofai Hyrum i luga o lona moega i le falemai, faatasi ma tagata o lona aiga i ona tafatafa. Ina ua ia vaai mai ia i ma’ua, sa ia faapea mai, “Uso Monson, na faapefea ona e iloa o lo’u aso fanau lenei?” Sa na o lo’u ataata ae ua le talia le fesili.

O i latou sa i totonu o le potu sa umia le Perisitua Mekisateko, sa siosiomiaina lo latou tama, tamamatua, ma o la’u uo foi, ma sa tuuina atu loa i ai se faamanuiaga faaleperisitua.

Ina ua mavae loimata maligi, sa fefaaaliai le laufofoga fiafia o le loto faafetai, ma sa matou feopoa’i foi i le alofa, sa ou punou ifo ia Hyrum ma musumusu atu i ai, “Ia manatua afioga a le Alii, aua e lagolagoina ai oe. Na ia folafola atu ia te oe, ‘Ou te le tuua outou o matuaoti, ou te sau ia te outou.’ (Ioane 14:18).”

O loo alu lava le taimi. O loo o faatasi lava o tatou tiute e fai ma le taimi. E le tuuitiitia tiute pe mavae atu foi. E oo mai faigata ma feteenaiga ma toe mou atu, ae o le taua mo agaga o tagata e faaauau pea lava e le malolo. E pei o le leo o le pu le oo mai o le afioga a le Alii ia te oe, ia te au, ma i latou uma ua umia le perisitua i soo se mea. Ou te toe ta’uina atu lena upu: “O lea, ia taitoatasi ai le tagata ma aoaoina lona tiute, ma galue i le tofi ua tofia ai o ia, i le maelega atoatoa” (MFF 107:99).

Uso e, ia tatou aoao i o tatou tiute. Ia tatou agavaa e faatino na tiute, ma, i le faatinoina o o tatou tiute, ia mulimuli i tulaga aao o le Matai. Ina ua oo mai ia te Ia le valaauga o le tiute, sa Ia tali atu, “Lo’u Tama e, ia faia lou finagalo, ma ia ia te oe pea le mamalu e faavavau” (Mose 4:2). Ia faapena foi ona tatou faia, ou te tatalo atu ai, i le suafa o Iesu Keriso le Alii, amene.