O Le a Oo Mai le Aso Sa

Ua ou fiafia lava tatou te mafuta i lenei aso, ma maua mai ai se malosi mai a outou molimau. E sili atu nai lo upu e mafai ona faamatala ai, ou te faafetai mo a outou upu agalelei o le lagolago, o le alofa faaalia, ma a outou tatalo.

O le asō ou te fia ta’ua ai nisi o mea patino e manatuaina.

Sa ou fanau mai i ni matua lelei. Mai lo’u tama o Joseph L. Wirthlin, sa ou aoaoina ai le taua o le galue malosi ma le agalelei. Sa avea o ia ma se epikopo o la matou uarota i le taimi o le Pau o le Tamaoaiga. Sa popole tele o ia mo i latou na pagatia. Sa aapa atu o ia ia i latou na mafatia e le faapea ona o lona tiute lea, ae ona o lona manao moni e aapa atu.

Sa ia tausia ma le le faavaivai ma faamanuiaina olaga o le toatele o e na mafatia. Ou te manatu, o ia o se epikopo lelei.

O i latou sa iloaina lo’u tama sa latou iloaina lona toaga. Sa fai mai se tagata ia te au i se tasi taimi e faapea, e mafai ona ia faia galuega a ni tagata se toatolu. E tau le malolo. I le 1938 sa ia faatautaia ai se pisinisi faamanuiaina ae te’i ua ia maua se valaau mai le Peresitene o le Ekalesia, o Heber J. Grant.

Sa ta’u atu e Peresitene Grant ia te ia o loo latou toe faatulagaina le Au Epikopo Pulefaamalumalu i lena aso ma na manao i lo’u tama e avea ma se fesoasoani ia LeGrand Richards. O lenei mea na faateia ai lo’u tama, ma sa talosaga ai pe mafai ona ia tatalo muamua e uiga i ai.

Na faapea atu Peresitene Grant, “Uso Wirthlin, toe 30 minute amata le isi sauniga o le konafesi, ma ua ou fia malolo. O le a sau tala?”

E moni, na fai atu lo’u tama ioe. Sa auauna atu o ia mo le 23 tausaga, o le 9 o na tausaga na avea ai ma se Epikopo Pulefaamalumalu o le Ekalesia.

E 69 tausaga o lo’u tama ae maliu o ia. Sa ou i ai faatasi ma ia i le taimi na faafuasei ai ona pau. E le’i umi, ae maliu loa o ia.

E masani ona ou mafaufau i lou tama. Ou te misia lava o ia.

O lo’u tina, o Madeline Bitner, o se tasi lea aafiaga maoae i lo’u olaga. O ia o se tagata taalo afeleti lelei ma o le siamupini o le tamoe saosaoa a o talavou. Sa agalelei ma alofagia o ia i taimi uma, ae o lana gaoioi sa faavaivai tagata. Sa masani ona ia faapea mai, “Faatopetope.” Ma a fai mai loa, ona matou faatopetope lea. Atonu o le tasi lena o mafuaaga na ou saoasaoa ai pe a ou taalo lakapi faaAmerika.

Na i ai ni faamoemoega tetele o lo’u tina mo lana fanau ma sa ia faamoemoeina foi mea sili mai ia i latou. Ou te manatuaina pea lona fai mai, “Aua e te faatalanoa. E tatau ona e fai ia lelei atu.” O le faatalanoa o lana upu lea mo se tagata e paie ma le ola e tusa ma lona gafatia.

Na maliu lo’u tina ina ua 87 ona tausaga, ma ou te mafaufau pea ia te ia i le tele o taimi, ma ou te matuai misia lava o ia, e sili atu nai lo a’u upu.

O lo’u tuafafine laitiiti o Judith o se tusitala, fatupese, ma se faiaoga. E tele mea sa fiafia i ai e aofia ai le talalelei, musika ma suesuega o aganuu anamua. O le aso fanau o Judith e na o ni nai aso e muamua ai i lo’u [aso fanau]. O tausaga uma lava, ou te avatu ai ia te ia se tālā pepa fou e fai ma au meaalofa i lona aso fanau. E tolu aso mulimuli ane ae ona ia tuu maia ia te au se 50 sene e avea ma ana meaalofa ia te au.

Na maliu Judith i ni nai tausaga ua te’a. Ou te misia lava o ia ma ou te mafaufau soo foi ia te ia.

Ona ou oo mai lea i lo’u toalua, o Elisa. Ou te manatua le taimi muamua na ma feiloai ai. Sa ou alu atu i lona fale ona o se feau a sa’u uo, e piki mai lona uso o Frances. Sa tatala mai e Elisa le faitotoa, ma ia te au lava ia, na ou alofa faavalea i ai i la’u tepa muamua.

Ou te manatu atonu foi sa ia lagonaina se mea, aua o ana upu muamua ou te manatua na fai mai, “Na ou iloaina lava oe.”

O Elisa o lana mataupu lava o le Igilisi.

E oo mai i lenei aso, ou te teufatuina lava na upu e lima o nisi o upu e aupito sili ona matagofie i le gagana a tagata.

E fiafia lava o ia e taalo tenisi ma e pei o le emo o le mata lana faate’a. Sa ou taumafai ma te taaalo tenisi, ae na iu lava ina ou musu ina ua ou iloaina, e le mafai ona ou taina se mea e le mafai ona ou iloa atu.

Na avea o ia ma o’u malosiaga ma o’u fiafiaga. Talu ai ona o ia, ua avea ai au ma se alii, tane, ma se tama sili atu. Sa ma faaipoipo, maua se fanau e toavalu, ma sa ma ola faatasi i le olaga i tausaga e 65.

E tele mea ou te nofo aitalafu ai i lo’u toalua nai lo mea e mafai ona ou faamatalaina. Ou te le iloa pe na i ai se mea e ta’u o se faaipoipoga atoatoa, ae, i lo’u lava manatu, sa atoatoa le ma [faaipoipoga].

Ina ua saunoa Peresitene Hinckley i le maliu o Sister Wirthlin, sa ia saunoa o se mea lofituina, ma mamafatu le toesea o se tasi e te alofa i ai. E faalavelave pea i lou loto.

Na sa’o lava o ia. I le avea ai o Elisa ma ou fiafiaga sili, o lenei, ua avea lona maliu ma ou faanoanoaga sili.

I taimi o le tuuatoatasi, na ou faaaluina ai le tele o le taimi e mafaufau ai i mea e faavavau. Na ou manatunatu i aoaoga faavae faamafanafana loto o le ola faavavau.

I lo’u olaga ua ou faalogo ai i le tele o lauga e uiga i le Toetu. E pei foi o outou, e mafai ona ou taulotoina mea na tutupu i lena Aso Sa muamua o le Eseta. Ua ou faailogaina i a’u tusitusiga paia fuaitau e faatatau i le Toetu ma e faigofie lava ona maua le tele o faamatalaga autu na fofogaina mai e perofeta o aso e gata ai e uiga i lenei mataupu.

Ua tatou iloa le mea e ta’u o le Toetu—o le toe faatasia o le agaga ma le tino i lona uiga atoatoa.¹

Na saunoa mai Peresitene Iosefa F. Samita e faapea “o i latou ua tatou faamavae atu i ai i lenei olaga, o le a tatou toe feiloai ma fevaaiai e pei ona masani ai. O le a tatou toe feiloai atu i tagata na tatou faifai mea faatasi i le olaga nei.”²

Na faalautele e Peresitene Spencer W. Kimball lenei aoaoga ina ua ia saunoa mai, “Ou te mautinoa afai e mafai ona tatou vaai faalemafaufau ia i tatou lava i o tatou tulaga sili ona lelei, faaletino, faalemafaufau, faaleagaga, o le auala lena o le a tatou toe foi mai ai.”³

Pe a tatou toetutu, “e toe faatuina mai lenei tino e oti i le tino e le oti lava… . [Tatou te] le toe oti lava.”⁴

Pe mafai ona outou vaai atu i lena mea? O le olaga i le taimi sili ona lelei? E le ma’i, e le tigaina, e le pologa i ma’i lea e masani ona fai ma faasoesa ia i tatou i le olaga nei?

O le Toetu o le totonugalemu lea o lo tatou talitonuga i le avea ai o ni Kerisiano. A aunoa ma lea, e leai se uiga o lo tatou faatuatua. E pei ona fai mai le Aposetolo o Paulo, “Afai foi ua le toe faatuina mai Keriso, po ua faaleaoga la matou talai, ua faaleaoga foi lo [tatou] faatuatua.”⁵

I le talafaasolopito atoa o le lalolagi e toatele ni tagata maoae ma le atamamai, o e na umia le atamai faapitoa o le Atua. Ae ina ua toetu mai le Faaola mai le tuugamau, na Ia faia le mea e le’i faia lava e se tasi. Na ia faia le mea e leai se tasi e mafai ona faia. Na ia talaia noataga o le oti, e le gata mo Ia lava, ae mo i latou uma na ola—o e ua amiotonu atoa ma e ua amioletonu.⁶

Ina ua toetu Keriso mai le tuugamau, ma avea ai o le uluai faapolopolo o le Toetu, na Ia faia lena meaalofa ina ia maua e tagata uma. Faatasi ai ma lena galuega matagofie, ua Ia tuuitiitia ai le lofituina ma le mamafatu o e faanoanoa lea e faalavelave pea i loto o e ua toesea e pele ia i latou.

Ou te mafaufau i le tulaga na i ai lena Aso Faraile pogisa ina ua siitia ae Keriso i luga o le satauro.

I lena Aso Faraile matautia, na luluina ma oo ai ina pogisa le fogaeleele. O matagi taufaamatau na taia ai le lalolagi.

Na olioli ai na tagata taupulepule leaga o e na sailia Lona soifua. O lea la ua leai se Iesu, e mautinoa lava o i latou o e na mulimuli ia te Ia o le a taapeape. O lena aso sa latou tutulai ma le manumalo.

I lena aso, na saeluaina ai le ie puipui o le malumalu.

Sa taufai lofituina Maria le Makatala ma Maria le tina o Iesu ona o le faavauvau ma le faanoanoa. O le tamalii maoae sa alofaina ma faamamaluina e i la’ua, a ua tautau mai ua maliu i luga o le satauro.

O lena Aso Faraile na matuai faanoanoa ai le Au Aposetolo. O Iesu, lo latou Faaola—le tagata na savali i luga o le vai ma faatuina e na maliliu—lea na i ai Ia lava i le faalealofa o tagata amioleaga. Sa latou vaavaai atu ma le leai o se mea e mafai [ona latou faia] a o faatoilaloina o Ia e Ona fili.

O lena Aso Faraile sa faalumaina ma taia, sauaina, ma upu leagaina ai le Faaola o tagata uma.

O se Aso Faraile na faatumulia i le lofituina ma le mamafatu o le faanoanoa lea na faalavelave pea i loto o i latou o e na alofaina ma faamamaluina le Alo o le Atua.

Ou te manatu mai aso uma talu mai le amataga o le talafaasolopito o lenei lalolagi, o lena Aso Faraile o le aso sili lea ona pogisa.

Peitai o le matautia o lena aso faanoanoa e le’i tumau ai.

E le’i taamilomilo ai pea le mafatia, aua o le Aso Sa, na talaia ai e le Alii toetu noataga o le oti. Sa afio ae o Ia mai le tuugamau ma faaali mai i le manumalo mamalu o le Faaola o tagata uma.

Ma i se taimi vave o mata sa faapea ona faatumulia i loimata lē mātū, na soloia. O laugutu na musumusuina tatalo o le mafatia ma le faanoanoa ua faatumuina ai nei le lalolagi i viiga matagofie aua o Iesu o le Keriso, o le Alo o le Atua soifua, na tulai i o latou luma o le faapolopolo o le Toetu, o le faamaoniga o le oti ua na o le amataga o se olaga fou ma le matagofie.

O le a tofu i tatou uma ma o tatou lava Aso Faraile—o na aso e foliga ai le atulaulau lava ia ua nutimomoia ma paepae solo mea ua faaleagaina o le lalolagi. O le a tatou oo uma i na taimi o le loto momomo lea e foliga mai e le mafai ona tatou toe tuufaatasia. O le a i ai uma lava o tatou Aso Faraile.

Ae ou te molimau atu ia te outou i le suafa o Le na faatoilaloina le oti—o le a oo mai le Aso Sa. I le pogisa o o tatou faanoanoaga, o le a oo mai ai le Aso Sa.

E tusa lava pe o a o tatou atuatuvalega, e tusa lava pe o a o tatou mafatiaga, o le a oo mai lava le Aso Sa. I le olaga nei po o le olaga a sau, o le a oo mai le Aso Sa.

Ou te molimau atu ia te outou o le Toetu e le o se tala fatu. Ua tatou maua molimau patino a i latou o e na vaai ia te Ia. E faitau afe i latou i Lalolagi Tuai ma Lalolagi Fou na molimauina le Faaola toetu. Sa latou tagotago i manu’a i ona lima, vae ma le itu. Sa maligi o latou loimata o le olioli ua le mataofiofia, a’o latou opoina o Ia.

Ina ua mavae le Toetu, sa toe faafouina le au soo. Sa latou malaga i le lalolagi atoa e folafola atu le tala fiafia mamalu o le talalelei.

Ana latou filifili i ai, semanu e mafai lava ona latou sosola ma toe foi atu i o latou olaga ma galuega sa i ai muamua. Mulimuli ane, e i’u lava ina galo a latou fegalegaleaiga ma Ia.

Sa mafai lava ona latou teenaina le paia o Keriso. Ae peitai, latou te le’i teenaina. I le fetaia’i ai ma tulaga matautia, tauemuga, ma le taufaamatau o le oti, sa latou o atu ai i maota, malumalu ma sunako, ma tala’i atu ma le lototetele ia Iesu le Keriso, le Alo toetu o le Atua soifua.

O le toatele o i latou na ofoina atu e avea ma se molimau faaiu o latou lava ola faapelepele. Sa maliliu i latou faamaturo, ma le molimau e uiga i le Keriso toetu, sa i o latou laugutu a o maliliu.

O le Toetu na suia ai olaga o i latou o e na molimauina. Pe le tatau ea la ona suia ai o tatou [olaga]?

O le a tatou toetutu uma mai le tuugamau. Ma o lena aso, o le a opoina ai e lo’u tama lo’u tina. O lena aso, o le a ou toe opoina ai la’u Elisa faapelepele i o’u lima.

Ona o le soifua ma le taulaga e faavavau a le Faaola o le lalolagi, o le a tatou toe faatasia ai ma e pele ia i tatou.

I lena aso o le a tatou iloa ai le alofa o lo tatou Tama Faalelagi. I lena aso o le a tatou olioli ai ona ua faatoilaloina e le Mesia mea uma ina ia mafai ona tatou ola e faavavau.

Talu ai ona o sauniga paia tatou te mauaina i totonu o malumalu paia, o lo tatou malaga ese atu mai lenei olaga puupuu e le mafai ona umi ona tuuvalavalaina sootaga ua uma ona faamauina faatasi i maea ua gaosia i nonoa e faavavau.

O la’u molimau faamaoni e faapea o le oti e le o le mutaaga lea o le olaga. “Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.”⁷ Ona o le Keriso toetu, “Ua faaumatia le oti i le manumalo.”⁸

Ona o lo tatou Togiola pele, ua mafai ai ona sii ae o tatou leo, e ui lava i le totonugalemu o o tatou Aso Faraile e sili ona pogisa, ma faapea atu, “Le oti e, o fea o i ai lou tui? Le tuugamau e, o fea o i ai lou manumalo?”⁹

Ina ua saunoa Peresitene Hinckley i le matautia o le tuuatoatasi lea e oo mai ia i latou o e maliliu tagata e alolofa i ai, sa ia folafola mai foi e faapea i taimi filemu o le po, e musumusu mai ai se leo filemu ma le le lagona i o tatou loto: “Ua lelei.”

E le mafuatia lo’u agaga faafetai mo aoaoga faavae moni matagofie o le talalelei ma le meaalofa o le Agaga Paia, o le na musumusu mai i lo’u loto ia upu o folafolaga faamafanafana ma le filemu a lo tatou perofeta pele.

Mai le taele o ou faanoanoaga, ua ou olioli ai i le mamalu o le talalelei. Ua ou olioli ona sa filifilia le Perofeta o Iosefa Samita e toefuatai mai le talalelei i le lalolagi i lenei tisipenisione faaiu. Ou te olioli ona o le i ai o so tatou perofeta, o Peresitene Gordon B. Hinckley, o le o loo taitaia le Ekalesia a le Alii i o tatou aso.

Tau ina ia tatou malamalama ma ola i le agaga faafetai mo meaalofa anagata lea e oo mai ia i tatou o ni atalii ma afafine o se Tama Faalelagi agalelei, ma mo le folafolaga o lena aso susulu pe a tatou toetutu manumalo mai le tuugamau.

Tau ina ia tatou iloa i taimi uma, e tusa lava pe o le a le pogisa o o tatou Aso Faraile, o le a oo mai lava le Aso Sa, o la’u tatalo lea, i le suafa o Iesu Keriso, amene.