Ia Faautauta Lava

Uso e ma tuafafine, a o o’u suesue talu ai nei i le Tusi a Mamona, sa ou gauai atu i se tasi o aoaoga a le perofeta o Iakopo. E pei ona outou manatua, o Iakopo o se tasi o atalii e toalua o Tama Liae na fanau i le vao talu ona tuua e le aiga Ierusalema. O ia o se molimau mautu o vavega, sa ia matamata foi a o malepelepe lo latou aiga ona o le le usitai ma le fouvale. Na iloa ma alofa Iakopo ia Lamana ma Lemuelu, e pei ona ia iloa ma alofa ia Nifae, ma o finauga i lo latou va, na felata’i ma patino. I le manatu lava o Iakopo ia, sa le o ni finauga e faatatau i ni manatu o malo, po o ni filosofia o le olaga, po o ni talitonuga faalelotu foi. Sa faatatau [finauga] i le aiga.

O le tiga ma’ale’ale o le agaga o Iakopo sa iloga lea a o ia faailoa lona popole tele ina nei “teenaina e lona nuu upu a perofeta” e uiga ia Keriso ma “faafitia … le mana o le Atua, atoa ma le mea foaifuaina o le Agaga Paia, … ma ula i le ala sili o le togiola” (Iakopo 6:8).

Ma, ina ua toetoe lava oo i le taimi e faatofa mai ai, na ia ta’ua ai nai upu faigofie se valu lea ua avea ma autu faavae o la’u savali i lenei taeao. O le aioiga a Iakopo e faapea “Ia faautauta lava; se a foi se mea ou te fai atu ai?” (Iakopo 6:12).

O outou na o ni matua ma matua matutua, ua iloa lagona atonu na oo ia Iakopo i lena taimi. Na alofa o ia i lona nuu, ona i se isi itu o i latou foi o nisi o lona aiga. Sa ia aoaoina i latou i le manino sa ia mafaia, ma le malosi uma o lona agaga. Sa lapata’ia i latou i ni faaupuga manino i le mea o le a tupu pe afai latou te filifili e le “ulu atu i le faitotoa moni, ma ia tumau pea i le ala lauitiiti” (Iakopo 6:11). Sa le mafai ona mafaufau o ia i se isi lava mea e fai atu e lapata’i ai, e uunai ai, e musuia ai, ma faaosofia ai. O lea na ona ia fai atu ai ma le lofituina e faapea, “Ia faautauta lava; se a foi se isi mea ou te fai atu?”

Ua ou feiloai i tagata o le Ekalesia i le tele o atunuu i le lalolagi. Ua faagaeetia lava au i le agaga ma le malosi o le toatele naua o o tatou tagata. Ua ootia loto ma ua faamanuiaina olaga. Ua agai i luma le galuega i auala maoae, ma ou te matua faafetai ai lava ona o lena mea. Peitai, ua ou vaaia le tele o auala e tatau ona matua faautauta ai tagata o le Ekalesia i mea uma latou te fai.

O le Alii i Lona atamai e le i’u na fuafuaina ai Lana Ekalesia ina ia faagaoioia e se auaunaga e le totogia. O lona uiga ua tuuina mai ia i tatou ina ia leoleo e le tasi le isi ma auauna atu le tasi i le isi. E ao ona tatou fealofani e pei ona alolofa mai lo tatou Tama oi le Lagi ma le Alii o Iesu Keriso ia i tatou. O o tatou valaauga ma tulaga e suia mai lea taimi i lea taimi, ua tuuina mai ai ia i tatou ni avanoa eseese ma le tupito e auauna atu ai ma tutupu ae ai. O le toatele o taitai ma faiaoga i totonu o le Ekalesia o loo galulue ma le naunautai i le faataunuuina o o latou tiutetauave. O isi e le mataalia tele e pei o isi—e moni; ae toetoe lava e i ai pea le taumafaiga faamaoni ina ia tuuina atu le auaunaga ’anoa i le talalelei.

O nisi taimi tatou te mauaina ai nisi ua matuai toaaga lava i le latou auaunaga i le Ekalesia ma ua le paleni ai o latou olaga. Ua amata ona latou talitonu faapea o polokalama o loo latou faatinoina e sili atu le taua nai lo tagata o loo latou auauna atu i ai. Latou te faafaigataina le latou auaunaga i mea faaopoopo ma teuga e le manaomia lea e alu ai le tele o le taimi, tele tupe e alu ai, ma tele le malosi e alu ai. Latou te mumusu e faamatuu atu le faatagaina o isi e tutupu ae i o latou lava tiutetauave.

O se taunuuga o le taulai atu o le tele o lo latou taimi ma le malosi i le latou auaunaga i le Ekalesia, e mafai ai ona faavaivaia sootaga faaleaiga e faavavau. E mafai ona mafatia ai le faatinoga o galuega. E le lelei foi lenei mea i le faaleagaga. E ui e mafai ona i ai taimi e moomia ai e o tatou valaauga i le Ekalesia ni taumafaiga malolosi ma se taulai atu i ai e le masani ai, e moomia ona tatou taumafai ina ia faapaleni lelei mea uma. E le tatau ona tatou faatagaina la tatou auaunaga e suitulaga i le taulaiga e moomia e isi mea taua e faamuamua i o tatou olaga. Manatua le fautuaga a le Tupu o Peniamina: “Ia pule foi ina ia faia nei mea uma i le poto ma le auauai lelei; aua e le tatau ona momoe vave le tagata ia silia le malosi ua ia te ia” (Mosaea 4:27).

Pe mafai ona ou fautuaina atu ni auala se ono e mafai ona tatou auauna lelei ai ma le atamai?

Muamua, taulai atu i tagata ma mataupu faavae—ae le o polokalama. O se tasi o mea sili ona taua tatou te faia e ala i le talalelei a Iesu Keriso o le atiina ae lea o tagata. O le auauna lelei atu i isi e moomia ai le taumafai ia malamalama ia i latou taitoatasi—o o latou uiga, o o latou malosiaga, o o latou popolega, o o latou faamoemoega ma miti—ina ia mafai ona tuuina atu i ai le fesoasoaniga ma le lagolago sao. O le mea moni lava, e faigofie atu ona pulea polokalama nai lo le malamalama ma auauna moni atu i tagata. O le faamoemoega autu lava o fonotaga faaleautaitai a le Ekalesia e tatau ona talanoaina ai le auala e auauna atu ai i tagata. O le tele o faamatalaga masani ma faamaopoopoga ua mafai nei ona faia e ala i le telefoni, i-meli, po o meli masani ina ia mafai e faasologa o mataupu e talanoaina mo fonotaga a aufono ma fonotaga a au peresitene ona taulai atu i manaoga o tagata.

O la tatou sini e tatau ona i ai o le faaaoga pea lea o polokalama a le Ekalesia o se auala e siitia ai, uunaia ai, lagolagoina ai, aoao atu ai, alofa ma faaatoatoa ai tagata. “Ia manatua, e taua tele le aoga o agaga i le silafaga a le Atua” (MFF 18:10). O polokalama o ni meafaigaluega. O lo latou puleaina ma le faatotogaina e le tatau ona sili atu nai lo manaoga o tagata ua fuafuaina i ai ina ia faamanuiaina ma tautuaina.

Lona lua, ia taulamua. A o tatou galulue e faalautele o tatou valaauga, e tatau ona tatou sailia musumusuga a le Agaga e foia ai faafitauli i auala o le a sili ona fesoasoani ai i tagata o loo tatou tautuaina. Ua i ai a tatou tusitaulima o faatonuga, ma o latou taiala e tatau ona mulimulitaia. Ae o totonu o lena faatulagaga o loo i ai ni avanoa se tele e mafaufau ai, e fatufatuai ai, ma faaaoga ai taleni a tagata taitoatasi. O le faatonuga ina ia faalautele o tatou valaauga e le o se poloaiga ina ia teuteu ma faafaigata. O le taulamua e le o le faalautele; e masani lava o lona uiga o le faafaigofie.

Talu ai ona o le mataupu faavae e faavavau o le faitalia ua tuu mai ai ia i tatou le saolotoga e filifili ai ma mafaufau ai mo i tatou lava, ua tatau ona faateleina lo tatou mafaia ona fofoina ia faafitauli. E mafai ona tatou faia ni mea sese i nisi o taimi, ae afai o loo tatou mulimuli i mataupu faavae o le talalelei ma taiala, e mafai ona tatou aoao mai na mea sese ma saga faateleina ai le malamalama i isi ma faateleina ai le lelei i le auauna atu ia i latou.

O le taulamua o lona uiga foi o le le poloaiina lea o i tatou i mea uma e tatau ona tatou faia. Ua fetalai mai le Alii, “E le tatau ona ou poloai atu i mea uma; aua o le tatau ona faamalosia i mea uma lava, e tusa ia ma se auauna faatamala ma le le poto”(MFF 58:26). Matou te faatuatuaina outou, uso e ma tuafafine, ina ia faaaoga musumusuga. Matou te faatuatuaina outou o le a outou faia i totonu o faatulagaga o tulafono ma mataupu faavae o le Ekalesia. Matou te faatuatua o le a outou atamamai i le fefautuaai faatasi ina ia fesoasoani i le fausia o le faatuatua ma molimau i olaga o i latou o e o loo outou auauna i ai.

Lona tolu, vaevae le galuega ma faamatuu atu le tiutetauave. E i ai le eseesega i le va o le nafa ma le vaaia ua faataunuuina le galuega ma le faia o le galuega e oe lava. Mo se faataitaiga, ua tatau ona mavae atu na aso ia e lagona ai e le peresitene o le korama a toeaina e tatau ona faamaea e ia lava ia asiasiga o aoaoga i aiga na misia e isi. E faapena foi i peresitene o le Aualofa e tusa ai ma faiaoga asiasi. E le gata e le o se mea atamai lenei; ae e le o se aoaoga i aiga po o se faiaoga asiasi. O aoaoga i aiga e le faatatau i numera po o le lipoti atu o asiasiga i se aiga; o asiasiga ma fuainumera ua na o se mea e fua ai. O le aoaoga i aiga e faatatau i le alofa i tagata ma le auauna atu ma leoleoina o fanau a lo tatou Tama Faalelagi.

E tatau ona faia ni tofiga, e tatau ona faamatuu atu tiutetauave, ma e tatau ona faatagaina tagata lotu e faataunuu le latou tausiga o mea i le mea sili latou te mafaia. Fautua, timai, faatauanau, uunai—ae aua e te faia le galuega mo i latou. Faataga isi ina ia alualu i luma ma tutupu ae, e tusa lava pe o nisi taimi e maua ai ni taunuuga e le atoatoa i luga o lipoti.

Lona fa, aveese le tausalaina. Ou te faamoemoe e faataunuuina e aunoa ma le faapea atu o le tausalaina e le o se auala faaosofia talafeagai lea mo taitai ma faiaoga o le talalelei a Iesu Keriso. E tatau pea lava ona tatou uunai atu e ala i le alofa ma le talisapaia faamaoni, ae le o le faatupuina o le tausalaina. Ou te fiafia i le manatu “Ia maua atu isi o loo faia se mea sao.”

Ae o loo i ai pea nisi o e na iloaina ni lagona o le tausalaina o se taunuuga o le latou auaunaga i le Ekalesia. O nei lagona e mafai ona oo mai pe a vaeluaina lo tatou taimi ma le taulai atu i le va o mea ua fetuleni mai ma mea e faamuamua. I le avea ai ma ni tagata faaletino, e le mafai ona tatou faia mea uma i le taimi e tasi. O lea e tatau ai ona tatou faia mea uma “ma le auauai lelei” (Mosaea 4:27). E masani lava o le uiga o lena mea o le tolopoina lea o le taulai atu i se isi mea e faamuamua mo sina taimi ina ia taulimaina ai se isi mea. O nisi taimi o le a moomia ai lau taulaiga atoatoa i manaoga faaleaiga. O isi taimi o le a faamuamua ai tiutetauave faalegaluega. Ma o le a i ai taimi o le a muamua ai valaauga o le Ekalesia. E oo mai le paleni lelei i le faia o mea i se auala fuafua lelei ae le o le tolopoina o a tatou sauniuniga po o le faatalitali e faataunuu o tatou tiutetauave i le taimi mulimuli.

E le gata i lena, e moomia ona tatou manatua na afio mai Keriso e aveese le tausalaina e ala lea i le faamagaloina o i latou o e salamo (tagai Alema 24:10). Na Ia afio mai e aumai le filemu i le agaga atuatuvale. “Ou te tuuina atu ia te outou le manuia,”na Ia fetalai ai. “O lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27). E ala mai i le Togiola ofoofogia na Ia fautua mai ai ia i tatou ina “ia outou amoina la’u amo, … ona maua lea e outou o le malologa mo outou agaga” (Mataio 11:29).

A o amata ona galue le mana o le Togiola i o tatou olaga, o le a tatou malamalama ai ua uma ona tauave e le Faaola le avega o lo tatou tausalaina. Ia mafai ona lava lo tatou atamamai e malamalama ai, ia salamo e pei ona moomia ai, ma tuu ese atu ai lo tatou tausalaina.

Lona lima, e moomia ona tatou mafaufau loloto i le fuafuaina o a tatou punaoa o le taimi, tupe, ma le malosi. Ou te fia faailoaina atu ia te outou sina mea lilo. O nisi o outou ua uma ona outou silafiaina. Afai e leai, o le taimi lenei tou te silafia ai. E le afaina po o a manaoga o lou aiga e i ai po o ou tiutetauave i le Ekalesia, e leai se mea e ta’u o le “uma.” O le a tele pea lava mea e mafai ona tatou fai. E i ai pea lava se isi mataupu faaleaiga e moomia ona taulai atu i ai, se isi lesona e saunia, se isi faatalanoaga e faia, se isi fonotaga e auai atu i ai. Pau lava le mea e manaomia ona tatou faia, o le faautauta lea i le puipuia o lo tatou ola maloloina, ma mulimuli i le fautuaga a Peresitene Hinckley lea e masani ona tuuina mai ia tau lava ina faia le mea sili tatou te mafaia.

E foliga mai ia te au, o le ki, o le iloa ma malamalama lea i ou lava gafatia ma tapulaa ona fuafua lea i ai lou tagata, vaevae ma faatulaga lou taimi, o mea e taulai atu i ai, ma au punaoa ina ia fesoasoani ai ma le atamai i isi, e aofia ai lou aiga, i le latou sailiga mo le ola e faavavau.

Lona ono, o se upu ia te outou taitai e uiga i le faalauteleina atu o tiutetauave i tagata lotu, aemaise lava i tagata e lei leva ona liliu mai. Na saunoa Peresitene Hinckley e faapea, o tagata fou uma lava o le Ekalesia e moomia se tiutetauave. Po o le a lava le tiutetauave e mafai ona faalautele atu i ai e le tatau ona lofituina ai tagata fou, ae tatau ona lava se avanoa e tuuina atu ia i latou e fiafia ai i le Ekalesia e ala lea i le aoaoina o ona aoaoga faavae ma le soosootauau ma tagata lotu faauo. E tatau ona taulaina i latou i le talalelei toefuataiina e ala lea i le faatupulaia o a latou molimau ma le tuuina atu o le auaunaga taua.

Uso e ma tuafafine, ia tatou taulai atu i auala faigofie e mafai ona tatou auauna atu ai i le malo o le Atua, ia tauivi pea ina ia suia olaga, e aofia ai o tatou lava olaga. O le mea e sili ona taua i o tatou tiutetauave o le Ekalesia e le o fuainumera o loo lipotiina atu po o fonotaga o loo faia ae pe o auauna atu ea taitoatasi i tagata taitasi—e pei ona faia e le Faaola—e siitia ma uunaia seia oo ina suia. O la tatou galuega o le fesoasoani i isi ia maua le filemu ma le olioli lea e na o le talalelei e mafai ona tuuina atu ai ia i latou. I upu e fitu, na aotele ai e Iesu le auala e mafai ai ona tatou ausia lenei mea. Na Ia fetalai, “Afai tou te alofa mai ia te au, ia outou tausi mai i a’u poloaiga” (Ioane 14:15).

O aso nei ua pei o taimi o Iakopo i le tele o auala. O la’u fautuaga e pei o lana: “Ia salamo, ma ia o mai ma le loto atoa, ma pipii atu i le Atua e pei ona pipii mai o ia ia te outou” (Iakopo 6:5). Uso e ma tuafafine, ia atamamai i o outou aiga. Ia atamamai i le faataunuuina o o outou valaauga i le Ekalesia. Ia atamamai i o outou taimi. Ia atamamai i le faapaleniina o outou tiutetauave uma. Ia atamamai, o’u uso e ma tuafafine. O le a se isi mea e mafai ona ou fai atu?

Ia faamanuia i tatou e le Atua i le faautauta ina ia alolofa ai i Lona Alo o Iesu Keriso, ma fesoasoani ma le atamamai e faataunuuina Lana galuega. Ou te tautino atu ma ou molimau atu o loo soifua o Ia. O Lana Ekalesia lenei. O loo tatou galulue i Lana galuega. Tau ina ia i ai le filemu o le Alii ia i tatou. Ma ia tatou faataunuuina ma le atamai o tatou tiutetauave ou te tatalo atu ai ma le lotomaualalo, i le suafa o Iesu Keriso, amene.