Na te Faatuatuaina i Tatou!

I le tele o tausaga ua mavae sa valaauina ai i ma’ua ma Sister Ellis e pulefaamalumalu i le Misiona a Pasila Sao Paulo i Matu. O lona uiga o le valaauga o le a ma malaga ese mo le tolu tausaga. Talu ai ona o tulaga o le matou aiga ma le pisinisi, sa uunaia ai i maua e taofi pea lo matou fale ma le pisinisi i Houston nai lo le faatau ese atu.

A o amata ona ma faia ni fetuunaiga talafeagai, na manino mai o le a ma manaomia le ma loia e saunia se pule faalefaamasinoga. O se pepa lena o faamatalaga faaletulafono e tuuina atu ai i se isi tagata le pule e faia ai soo se mea i o ma igoa. O le tagata e i ai lenei pepa o faamatalaga e mafai ona ia faatauina atu lo ma fale po o isi aseta, nono mai ni tupe i o ma igoa, faaaoga a ma tupe, e oo lava foi i le faatau ese atu o le ma pisinisi! O le mafaufau atu i le tuuina atu i se tasi o lena pule ma le aia i a ma meatotino sa popole tele ai.

Sa ma filifili loa e tuu atu le ma pule faalefaamasinoga i se tagata ma te faatuatuaina, o se ma uo ma se paaga lelei lava, o le sa faaaogaina lelei lena pule ma le aia. Sa ia faia le mea semanu ma te faia pe ana ma i ai iina.

Uso e, mafaufau i le mea ua tuuina mai e le Alii ia i tatou—o Lona mana ma le pule! O le mana ma le pule e galue ai mo Ia i mea uma e faatatau i Lana galuega!

Faatasi ai ma lenei pule o le perisitua ma pe a talafeagai ai, o le faamaoniga a i latou o i ai nei ki tatau, e mafai ai ona tatou faia sauniga o le faaolataga i Lona suafa: papatiso mo le faamagaloina o agasala, faamau ma faaee atu le Agaga Paia, faaee atu le perisitua ma faauu isi i tofi o le perisitua, ma faia sauniga o le malumalu. O Lona suafa e mafai ona tatou taitaia ai Lana Ekalesia. O Lona suafa e mafai ai ona tatou faamanuia, faia aoaoga i aiga, ma faamalolo i e mamai.

E maeu se faatuatuaga ua tuuina mai e le Alii ia i tatou! Mafaufau i ai, uso e. Na te faatuatuaina i tatou!

Ae tatou te le’i mauaina le perisitua, ua leva ona saunia ma faamaonia i tatou. Sa tatou faatinoina le faatuatua ia Iesu Keriso, salamo, ma papatisoina, ma maua le meaalofa o le Agaga Paia. O le maualuga o le malamalama tatou te aumaia i lo tatou faauuga e eseese lava. Ae o le faatulagaga faalelagi e tutusa lava. Sa tatalo i ai ma faatalanoa i tatou e i latou o loo faaaogaina na ki o le perisitua. Sa lagolagoina i tatou i le sii lima o tagata o le Ekalesia i la tatou iunite. Sa faauuina i tatou e se tasi ua i ai le pule ma le faatagaga na te faia faapea.

E faaeteete tele le Alii i Lana perisitua. O le faaaogaina o Lona mana ma le pule o se faatuatuaga paia lea.

E maeu le matagofie o le faatuatuaina o i tatou e le Atua! Ua Ia faatuatuaina oe! Ua Ia faatuatuaina au!

Pe a tatou mauaina le perisitua, tatou te maua lea e ala i se feagaiga. O le feagaiga o se folafolaga faifaatasi. Ua ia folafola mai e faamanuia i tatou i ni aiaiga faapitoa. Tatou te folafola atu e faataunuu na aiaiga. A o tatou faia, e tausia lava e le Alii Ana folafolaga ma tuuina mai ia i tatou le faamanuiaga. E masani lava ona Ia tuuina mai ia i tatou faamanuiaga e sili atu nai lo le aiaiga na malilie i ai. E agalelei tele o Ia.

Pe a tatou maua le Perisitua Mekisateko, ua tatou maua le vaega e taua “o le tautoga ma feagaiga” o le perisitua. Tatou te folafola atu ai i le Alii ni mea se lua, ma Na te folafola mai ia i tatou ni mea se lua. Tatou te folafola atu o le a tatou “faamaoni i le maua o nei perisitua e lua” ma faamaoni i le “faalauteleina o lo [tatou] valaaulia.” Ua Ia folafola mai o le a “faapaiaina [i tatou] i le Agaga.” Ma afai tatou te faamaoni i mea uma e oo i le iuga, ua Ia folafola mai “o le a tuuina mai ia [i tatou] ia mea uma o i ai i lo’u Tama” (tagai MFF 84:33–41).

E faamanuia e le Alii Lana fanau e ala lea i a tatou auaunaga faaleperisitua. Ina ia fesoasoani ia tatou manuia i le faataunuuina ma le faamaoni o a tatou auaunaga faaleperisitua, ua Ia tuuina mai ia i tatou faatonuga ma lapataiga. Ua Ia faia lena mea i tusitusiga paia ma faaauau ai ona taitai i tatou e ala i o tatou taitai ma e ala i musumusuga a le Agaga Paia.

O loo i ai i tusitusiga paia le tele o fuaitau o taitaiga ma lapataiga ia i latou e umia le perisitua. O se tasi o fuaitau aupito sili ona manaia o loo i le vaega e 121 o le Mataupu Faavae ma Feagaiga. I nai na fuaiupu o loo aoao mai ai le Alii ia i tatou e faapea e na o le amiotonu lava e mafai ona faaaoga ai le perisitua. E tatau ona tatou faia i isi ma le faatauanau, faapalepale ma le agalelei. Ua Ia faamanatu mai ia i tatou le taua o le alofa ma le amio mama i le mauaina lea o le mafutaga tumau a le Agaga Paia.

O loo lapatai mai foi lena vaega ia i tatou i uiga ma amioga o le a mafua ai ona aveesea lo tatou mana o le perisitua. Afai tatou te “manao i viiga mai tagata,” taumafai e “tau ufiufi a tatou agasala,” taumafai e “faamalie lo tatou loto maualuga” po o le “fia sili le aoga,” pe saili e “pulea” isi, o le a aveesea mai lo tatou mana o le perisitua (tagai f. 35–37). O le taimi lena e avea ai i tatou ma faitaulaga pepelo. O le a tatou tuua le galuega a le Atua ae tuu atu i tatou lava i le galuega a Satani.

O se tulaga lelei mo i latou e umia le perisitua le toe suesue e le aunoa i le Mataupu Faavae ma Feagaiga vaega e 121. E faigofie ona malamalama i le mafuaaga ua faamamafa mai ai e o tatou perofeta o ona po nei le faatumauina o lo tatou agavaa ma ua tuuina mai ia i tatou le Mo le Malosi o le Autalavou e avea ma taiala e fesoasoani ia i tatou.

O le tasi mafuaaga e ao ai ona tatou faatumauina lo tatou agavaa aua tatou te le ma iloa lava po o afea e valaauina ai i tatou e faaaoga le perisitua.

Ina ua lima tausaga o le ma atalii o Matthew, sa pau ifo ai o ia mai le tumutumu o le laupapa pito i luga e feosofi ai i lalo i le vaitaele o le matou pitonuu. Sa pa’u o ia i luga o le fola sima ma sa tigaina ai i le laulua o le ipu o lona ulu ma le pogisa o lona faiai. Sa faananati atu o ia i se helikopa Laveai i le Falemai Autu i Houston mo togafitiga faafuasei. Sa ou manaomia vave lava se fesoasoani faaleperisitua. O lo matou faiaoga o aiga, ma lo matou taitai perisitua sa agavaa ma saunia uma i lena lava taimi. Sa latou fesoasoani e tuuina atu ia Matthew se faamanuiaga ma sa toe manuia atoatoa o ia.

E tatau ona tatou saunia i soo se taimi. E pei ona tatou taua i le Sikauti, “Ia saunia.”

E moni lava tatou te mananao ia aloese mai faitaulaga pepelo. Ae ua lapataia i tatou e le Aposetolo o Paulo e uiga i se isi tulaga matautia. Ua ia lapataia i tatou e faapea o o tatou aso o le a i ai i latou “o e ua peiseai ua amio atua; a o le mana ua i lea mea ua latou teena” (2 Timoteo 3:5).

E mafai faapefea e i tatou ua umia le perisitua ona avea e peiseai ua amio atua, ae ua teena le mana ua i lea mea? Pe o le tatou umia ea o le perisitua ae tatou te le faaaogaina? asiasi i o tatou aiga nai lo le aoaoina o i latou i o latou aiga? tatalo mo se tasi i se sauniga po o se faauuga nai lo le faamanuiaina o i latou? faia o le galuega a le Alii i le auala sili tatou te iloa, ae le muamua faatoga atu ia iloa ma faia Lona finagalo i Lana ala?

Manatua le fautuaga a le Alii ia i tatou e ala mai ia Nifae, ia “aua [tatou] te faia se mea e tasi i la le Atua, seiiloga [tatou] te muai tatalo” (2 Nifae 32:9).

O tausaga ua mavae, sa valaauina ai au ou te auauna atu o se fesoasoani i le au peresitene o le Siteki a Houston Texas Matu. Sa ou suesueina le faataoto i taleni. Ua outou manatuaina le tala. Sa fia malaga ese le matai, o lea na ia tuuina atu ai i ana auauna ana oloa. O le isi na maua taleni e lima, o le isi e lua, ma le mulimuli na maua le tasi. Ina ua toe foi mai o ia, sa ia fesili atu mo se lipoti.

O le auauna sa na maua le lima na foi mai ma le sefulu, na faapena foi i le na alu ma le lua na foi mai ma le fa, sa taua i la’ua o auauna lelei ma le faamaoni. Ae o le mea na taulai i ai lo’u mafaufau, o le auauna sa na maua le tasi, sa ia tausia, ma toe faafoi mai ma le saogalemu i lona matai. Sa ou te’i i le tali a le matai: “Le auauna leaga e ma le paie, … e faoa le mea ua i ai, … ia tulia le auauna le aoga i le pouliuli i fafo”! (Tagai Mataio 25:14–30.)

O lenei mea na foliga mai o se tali matuia i se tasi o le na foliga mai sa taumafai e tausi i le mea na tuuina atu ia te ia. Peitai na aoao mai e le Agaga ia te au le upumoni lenei—e faamoemoe mai le Alii i se eseesega! Na ou iloa i lena taimi, o le a i ai se aso tatou te laulaututu ai taitoatasi i luma o le Atua ma tuuina atu se lipoti o la tatou auaunaga faaleperisitua ma le tausiga o mea. Pe na tatou faia ea se eseesega? I lo’u tulaga, pe sa sili atu ona lelei le Siteki a Houston Texas Matu ina ua faamaloloina au nai lo le taimi na valaauina ai au?

O le mea e faafetai ai, ua aoaoina i tatou e le Alii i le ala e faamanuiaina ai, i le ala e faia ai se eseesega. “O le tumau ia te au, ma au ia te ia, o ia lava e fua tele mai” (Ioane 15:5). Afai tatou te faaaogaina Lana perisitua i Lana ala, mulimuli i le taitaiga tatou te maua mai Ana auauna ma Lona agaga, o le a avea i tatou ma auauna lelei ma faamaoni!

Ou uso pele o le perisitua, o loo soifua le Alii o Iesu Keriso, lo tatou Faaola ma le Togiola! Na te silafia i tatou; e alofa o Ia ia i tatou. Ua Ia tuuina mai Lona faatuatuaga ia i tatou e ala i le tuuina mai o Lana pule ma le mana o le perisitua. O au o se molimau o lenei upumoni. Tau ina ia tatou faaaogaina Lona mana ma le pule e faia ai Lona finagalo i Lana ala o lau tatalo lea.

A o tatou faalogologo atu ia Peresitene Hinckley, Peresitene Monson, ma Peresitene Faust, ou te tuuina atu lau molimau patino o i latou taitoatasi o se perofeta, tagatavaai ma talifaaaliga. Ou te naunau lava e faalogo i a latou fautuaga. I le suafa o Iesu Keriso, amene.