Faatuatua, Auauna Atu, Tumau Ai

I le tolusefulu-iva tausaga talu ai na tu’itu’i atu ai ni faifeautalai se toalua a le Alii i le faitotoa o lo matou fale i Glasgow, i Sikotilani. Sa matua ootia o matou loto i lo la’ua atamamai, o le lotomaulalo, ma lo la’ua faatuatua. Soo se taimi lava e i ai i la’ua i lo matou fale, matou te lagonaina lava le filemu. O se lagona o le lelei a’ia’i.

O la la’ua aoaoga e patino, faamaoni, ma masani ai. Sa matou lagonaina lava e moni. I nai vaiaso mulimuli ane, sa matou papatiso ai ma faamauina ma e le’i pine ae opoopo i matou e le faauo ma le agalelei mai tagata lotu ma taitai i lo matou aiga fou faale-Ekalesia.

Ma o lea sa amataina ai loa se malaga faaletalalelei lea na faatamaoaigaina ma faamanuiaina ai vaega uma o o matou olaga, ma aumaia ai se lagona loloto, tumau, ma mafanafana o le faamoemoega ma le taitaiga. I le faamoemoe e fesoasoani atu ia i latou faatoa auai i le Ekalesia, o le a na o le tolu ni mataupu faavae faaletalalelei na ou aoaoina, o le a ou faasoa atu i le aso.

Muamua o le mana faaosofia, faaliliu o le faatuatua ia Iesu Keriso. O lena faatuatua e pei o se okesene faaleagaga. A o tatou faatagaina le faatuatua e saoloto ona sosolo atu i totonu o i tatou, na te fagua ma faaolaolaina o tatou lagona faaleagaga. Na te manavaina mai le ola i o tatou agaga.

A o sosolo atu le faatuatua, ia tatou malamalama ma masani i musumusuga a le Agaga. E faamalamalamaina o tatou mafaufau, e tatavale o tatou fatu faaleagaga, e ootia foi o tatou loto.

E fafagaina e le faatuatua le faamoemoe. E suia la tatou vaaiga; e atili manino ai foi la tatou vaaiga mamao. E amata ai ona tatou saili mo le mea silisili, ae le o mea e sili ona leaga, i le olaga ma isi tagata. Tatou te maua se lagona loloto atu o le faamoemoega ma le uiga o le olaga. O le faavauvau foi e aumaia ai le olioli.

O le faatuatua e pei o lenei o se meaalofa faalelagi, peitai e mafai ona sailia ma atiina ae. E pei ona masani ona ta’u mai i le tatou Lomifefiloi o le Tusi Paia “e faamumuina le faatuatua e ala i le faalogo i molimau a i latou e i ai le faatuatua.”¹ Ona fafagaina ai lea o le faatuatua pe a tatou faatagaina i tatou lava e talitonu. E pei o isi uiga mama uma, o le faatuatua e faamalosia pe a tatou faaaogaina pe a tatou ola ma faatino e peiseai ua leva ona loloto lo tatou faatuatua. O le faatuatua o le fua lea o le naunautaiga amiotonu, talitonu, ma le usiusitai.

O lena le faataitaiga i le Tusi a Mamona a le tamā o le Tupu o Lamonae, lea na faalogo i le molimau a Arona ma sa naunau e talitonu ma faatino ma o lea na taitai atu ai e fai se tatalo faatauvaa, “Afai e i ai se Atua, afai foi o oe o le Atua, ia e faailoa mai lau afio ia te au. Ou te lafoaiina a’u agasala uma ina ia ou iloa ai lau afio.”²

E mafai foi ona avea ma i tatou pe a tatou faatagaina i tatou lava e pa’i mai i ai le agaga o le molimau, pe a tatou talitonu, pe a tatou mananao i ai, mafaufau loloto, saili—a o tatou atiina ae lo tatou faatuatua.

Lona lua, a tatou auauna atu, tatou te tuputupu a’e. Sa aoao mai e Peresitene Siaosi Alapati Samita, “E le o mea tatou te maua e faatamaoaigaina ai o tatou olaga, ae o mea tatou te foai atu.”³

O le auauna atu ma le le manatu faapito o se vaifofo matagofie lea o ma’i e mapuna mai le faama’i taatele i le lalolagi o le manatu faaloloto. E i ai nisi e ma’ema’ea pe mateletele pe a tau le gaua’i atu tagata ia i latou, ae semanu e matuai faatamaoaigaina o latou olaga pe ana tele atu lo latou gauai atu i mea o manaomia e isi tagata.

O loo taoto le tali i le fesoasoani e foia faafitauli o i latou o loo siomia i tatou nai lo le popole i o tatou lava olaga ma ia si’i avega e tusa lava pe o tatou lagonaina le mamafatu o a tatou lava avega ma tuu atu o tatou tauau e uunai, ae le o le faitio faapea ua mamafatu le olaga ma ua tatou le mafafai.

O le ma’au atu o o tatou agaga i le auauna atu e fesoasoani lea tatou te tula’i ai i luga atu o mea tatou te pupū i ai, o atugaluga, ma lu’itau. A o tatou taulai atu lo tatou malosi i le siieseina o avega a isi, e i ai se mea ofoofogia e tupu ai. O le a tuuitiitia a tatou lava avega. O le a tele atu lo tatou fiafia. O le a tele le ‘anoa o o tatou olaga.

Lona tolu, o le avea ma soo e le faapea o le a tatou saoloto ai mai matagi o le olaga. Tusa lava pe o tatou faatautaia ma le faamaoni ma le faaeteete la tatou malaga i luga o le ala sa’o ma le vaapiapi, tatou te feagai lava ma to’atuga ma luitau. E i ai aso, atonu foi o masina ma tausaga, e matua faigata ai lava le olaga. Ua tatou tofu oo i puapuaga, o le lototiga, tuulafoaiina, tiga, ma le faanoanoa—o nisi taimi, e foliga mai, ua sili atu nai lo le mea e tatau ona i ai.

O le a le mea e fai pe a oo mai puapuaga? E na o le tasi lava le mea e fai. Tu ia mau lelei ma mata’itu. Ia mausali, tumau, ma faamaoni. O mala moni i asiosio o le olaga faatoa oo mai pe a tatou faatagaina i tatou e feula ese i tatou mai lo tatou ala moni.

I nei taimi o faigata ma lu’itau, e i ai nisi e filifili e lafoa’i le faatuatua i le taimi tonu lava e matua manaomia ai ona opomau mai. E faatuatuana’i le tatalo i le taimi tonu ua tatau ai ona matua faateleina. E soona tuulafoai foi le amioga mama a ua oo i le taimi ua manaomia ai ona faapelepele. E lafoai le Atua ona o manatu faaletagata ae sese faapea ua Ia tuulafoaiina i tatou.

O le mea moni e na o le pau lo tatou saogalemu, e na o le pau lo tatou puipuiga, e na o le pau lo tatou faamoemoe o le pipiimau lea i mea e lelei. A oo ina siomia i tatou i le ao pogisa, na pau lava le mea o le a tatou leiloloa ai pe afai tatou te filifili e faamamulu le ai u’amea, o le afioga lea a le Atua.

O le faataoto a le Faaola i le tagata poto sa fau lona fale i luga o le papa e i ai tonu le mana aua o loo faapupula mai ai luitau o le olaga na feagai foi ma le tagata poto. Na to mai timu, sa agi mai matagi, sa oo mai lologa. Peitai na faasaoina lava o ia aua sa ia fauina lona fale i luga o se faavae mautu ma, o le mea aupito taua, sa nofo ai lava iina ina ua agi mai le afa.

I lana faamatalaga o se tagata malaga i le nuu paia, po o le alualu i luma o se soo, na tusia ai e John Bunyan:

Sa uunaia e le Aposetolo o Paulo le nuu o Kolose ina “ia tutumau i le faatuatua ua faavaeina ma mausali, ma ia le faateaeseina mai le faamoemoe i le talalelei, lea na faalogologo i ai.”⁵

O le nuu i Korinito na aumaia ai lenei molimau mamana:

“Ua puapuagatia i matou i mea uma, a e le faaatuatuvaleina; ua fememea’i ae le matua fememea’i;

“Ua sauaina, ae le tuulafoaiina; ua lafotuina i lalo, ae le fano.”⁶

Na mafai faapefea lea vaaiga? O le mafuaaga lea na tautala i ai Paulo: “Aua o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.”⁷

O la’u molimau a o tatou atiina ae lo tatou faatuatua, tuputupu a’e i le auauna atu, ma tumau ai pea lava pea ma le faamaoni i soo se mea, ona tatou lagonaina ai lea o le alofa o le Faaola. Tatou te tuu i tatou lava i le tulaga e mafai ai ona tatou maua le lautele ma le loloto o faamanuiaga o le Togiola. E liua lo tatou auai i le avea ma soo. E faamalolosia i tatou, faamamaina, faafouina, ma faamaloloina i la le agaga ma lagona.

Ou te molimau atu ai, i le suafa o Iesu Keriso, amene.