“I Aao o Lona Alofa”

O’u tuafafine pele, o se avanoa matagofie ua mafai ona ou tautala atu ai ia te outou i lenei konafesi tele a le Aualofa. Ua tatou faalogologo i lenei po, i lauga matagofie na tuuina mai e tamaitai o le faatuatua tele ma tomai. Ou te manao ia silafia e le au peresitene o le Aualofa, ua ia te i latou lo matou faatuatuaga atoatoa. Matou te talisapaia i latou i soo se itu. Matou te faafetai mo le autu na latou filifilia mai le Tusi a Mamona, mai le 2 Nifae—“Ia Siosiomia e Faavavau i Aao o Lona Alofa” (tagai 2 Nifae 1:15). O tamaitai o le Aualofa, o loo siosiomia moni lava e faavavau i aao o lo tatou Alii.

I la’u lava faamasinoga, o le faalapotopotoga aupito sili lenei a tamaitai i le lalolagi. O se foafoaga lava mai le Atua. Na saunoa Iosefa Samita a o tautua o se perofeta, ina ua ia faatulagaina le Aualofa i le 1842. I lena taimi na ia saunoa ai, “O le faatulagaina o le Ekalesia a Keriso, e le’i atoatoa vagana ai ina ua faatulagaina tamaitai” (Sarah M. Kimball, “Early Relief Society Reminiscences,” March 17, 1882, Relief Society Record, 1880–92, Archives of The Church of Jesus Christ of Latter-day Saints, 30).

O le taimi nei ua i se mea o le lima miliona le faitau aofai o le Aualofa. Ua faatulagaina i le tele o atunuu, ma aoao atu i le tele o gagana. O loo li’oli’o ai i totonu i ona tulaga, tamaitai uma o le Ekalesia ua ta’i 18 tausaga ma matutua atu. O loo aofia ai ni tamaitai talavou nofofua; o tamaitai e le i faaipoipo lava; o i latou ua oti a latou tane pe ua tatala faaipoipoga; o i latou o i ai tane ma aiga; o i latou ua afu le soifua; ma o le toatele foi ua maliliu a latou soa faavavau.

Na fai mai sa’u uo, e le auai i la tatou tapuaiga, “o le LDS o lona uiga o le Alofa, Faamaoni, ma le Auauna Atu.” O le a moni lava le uiga o le Aualofa? O le a lona uiga? Se’i ou taumafai e fai atu se mea faapea.

Aualofa o lona uiga o le alofa. Se mea ina a ofoofogia, o le molimauina o le alofa o ni tamaitai lelei, o le tasi i le isi. Latou te miomiō faatasi i fusi o le alofa, faatasi ai ma le faauo ma le faaaloalo o le tasi i le isi. O lenei faalapotopotoga, ua na o le pau lea o le punaoa ua i ai mo le toatele o tamaitai, e maua ai mafutaga faaleuo.

O le uiga masani lava o tamaitai, le aapa atu ia i latou e mapuitiga ma manaomia le fesoasoani. O le polokalama o le uelefea a le Ekalesia, ua faamatalaina faapea e faavae i le perisitua, peitai e le mafai ona gaoioi e aunoa ma le Aualofa.

Aualofa o lona uiga o le a’oga. O le matafaioi a tamaitai taitasi o lenei Ekalesia, ina ia a’oga i le mea na te mafaia. O le a faalauteleina ai lona olaga, ma faateleina ona avanoa. O le a maua ai e ia tomai e maua ai tupe, ne’i manaomia e ia.

O le vaiaso na te’a nei, na ou mauaina ai se tusi mai se tina nofofua, ou te fia faitauina atu sina vaega. Fai mai a ia e pei ona ta’ua i lalo:

“Ua 10 nei tausaga talu ona e ta’ua lo matou aiga i le konafesi i le masina o Oketopa i le 1996… . O upu apoapoa’i ma le faamalosiau na e aumai mo a’u ma isi uso nofofua, na avea lena ma se mamanu na ou faaaogaina i lo’u olaga i aso taitasi. O le fasifuaitau na avea ma a’u anavatau ma taiala [o le] ‘Fai le mea silisili e te mafaia,’ ma o le mea tonu lena o loo matou faia ma la’u fanau tama.

“Ua faauu uma la’u fanau tama e toafa mai le aoga maualuga ma le seminare. E toalua ua uma misiona. O loo matou galulue e tausia i matou lava, ma tumau pea ona faamaoni ma faatuatua i le talalelei. O se lagona maoae le iloa ua matou mafaia lava e i matou mo nai tausaga ua mavae atu… . O loo i ai se lagona patino ua ausia se mea, ina ua mafai ona e toe tu i ou lava vae ma saunia mea e manaomia e lou aiga… .

“Sa faamalosiauina foi a’u e toe alu i le iunivesite… . O se lu’itau moni lava le galue i le aso atoa, ma alu i vasega i le po. Ua faalauteleina ai la’u vaaiga i le olaga, ma ua fesoasoani ai i le faaleleia atili o lo’u tagata. Sa maeu le lagolagosua mai o lo’u aiga, o tagata o le uarota, ma tagata matou te faigaluega. O lea o le a ou faauu ia Tesema i le tausaga nei.

“A o ou manatunatu loloto i lo’u faamanuiaga faapeteriaka, ma ou anapogi ma tatalo, sa mafai ona ou faatuina ni sini e mafai ona ausia i lo’u olaga, lea na ou faaaogaina o se faafanua i le ala, e faatonutonu ai a’u i mataupu faavae o le talalelei. Sa ou auai i a’u fonotaga, [sa ou] tatalo i aso taitasi, ma totogi a’u sefuluai. Sa ou matua faatauaina lava lo’u valaauga o se faiaoga asiasi… .

“E matua moni lava le Ekalesia, ma o se faaeaea ma se faamanuiaga le faitaulia o se tagata agavaa ma le faamanuiaina O Le Ekalesia a Iesu Keriso o le Au Paia o Aso e Gata Ai. O loo taitaiina i tatou i musumusuga mai se Tama Faalelagi alofa, o Le na te silafia i tatou ma finagalo ina ia tatou alualu i luma ma tuputupu a’e. Ou te faafetai atu mo au upu alofa ma le faamalosiau i le 10 tausaga ua mavae, ma mo upu faifai pea o musumusuga mai le Alii e ala mai i Ana auauna. O a’u o se afafine o le Atua, ma ua faamanuiaina lava lo’u olaga i lo’u auai i Lana Ekalesia.”

Aualofa o lona uiga o le faalagolago o le tagata ia te ia lava. O le faleteuoloa sili lava e le o i eleveita o le uelefea sana, ae o loo i apa ma fagu ua faamauina lelei i totonu o fale o o tatou tagata. O se matuai mea faamalieloto lava le vaaia o apa saito ma araisa ma pi, i lalo o moega po o kapoti a fafine ua latou tauaveina i o latou lima le matafaioi o le uelefea. Atonu e le tofo lelei na meaai, ae o le a tausia lelei ai pe afai e tatau ona faaaoga.

Aualofa o lona uiga o le ositaulaga. E tuia lava lo’u loto e le aunoa i le fuaiupu faigofie lea a Anne Campbell, na tusia mo lana tama. Fai mai a ia:

O le toatele o outou, o tina. Ua ia te oe le matafaioi mo le faafaileleina ma le tausiga o lau fanau. A oo ina e matua, ua sinasina lou lauao, o le a e le fesili i ou ofu teuteu sa ofuina, o taavale sa e aveina, po o le fale tele sa e nofo ai. O lau fesili faamomoiloto o le, “O le a le mea ua oo i ai la’u fanau?”

Afai ua tu lelei, o le a e faafetai. Ae afai e leai, o le a na o sina mafanafana itiiti lava e te maua.

Na ou tusia foi i se isi tusi: “Ia faamanuia e le Atua outou, tina. A faamau ia manumalo ma toilalo o taumafaiga a tamaloloa, a amata ona to’a ane le pefu o taua o le olaga, a mou atu i la tatou vaai mea uma o loo tatou galulue punouai ai i lenei lalolagi, o le a e i ai iina, o oe o le malosiaga o se augatupulaga fou, o le gaoioiga faagasolo ua matua faaleleia o le tuuga” (One Bright Shining Hope, [2006], 18).

I ni nai tausaga ua mavae i le Tapeneko i Sate Leki, sa taitaia ai e Elder Marion D. Hanks se fetufaaiga o manatu. Sa i ai i lena aofia, se tamaitai talavou lalelei ma le atamai, ua tete’a ma le toalua, o le tina o se fanau e toafitu, e amata i le 7 e oo atu i le 16 ia tausaga. Fai mai a ia, i se tasi afiafi na alu atu ai i le isi ituala e ave se mea i se tuaoi. Faafofoga mai foi i ana upu:

“Ina ua ou toe faliu e savali atu i le fale, sa ou vaaia le ola uma o moli o lo’u fale. Sa mafai ona ou lagona atu si’uleo o la’u fanau a o ou savali ese mai le faitotoa i ni nai minute. Sa latou fai mai: ‘Mama, o le a le tatou meaai?’ ‘E mafai ona ta o i le faletusi?’ ‘E fia maua ni a’u pepa lapopoa i le po nei.’ I lo’u vaivai ma le lelava, sa ou tilotilo atu i lena fale, ma ou vaaia le ola o moli i potu taitasi. Sa ou mafaufau i na tamaiti uma, o loo faatalitali mai le fale ia te au, ou te alu atu e fai uma mea o loo latou manaomia. Sa atili ai ona mamafa la’u avega nai lo le mea e mafai ona ou tauaveina.

“Ou te manatua lo’u tilotilo atu i loimata agai i le vateatea, ma faapea atu, ‘Lo’u Tama Pele, ua le mafai ona ou faia i le po nei. Ua ou matua le lavā lava. Ua ou le mafaia. Ua le mafai ona ou alu i le fale ma tausi na o a’u na tamaiti. Pe mafai lava ona ou alu atu ia te Oe, ma ta nonofo ai ma Oe mo se po lava se tasi? O le a ou toe foi mai i le taeao.’

“Ou te le’i lagonaina moni ia upu o le tali, ae sa ou faalogoina i lo’u mafaufau. Fai mai le tali: ‘E leai, si o’u afafine e, e le mafai ona e sau nei ia te au. O le a e le toe manao lava, e toe foi atu. Peitai, e mafai ona ou alu atu ia te oe.’”

E anoanoai i latou e faapei o lenei tina talavou, o lē sa iloa ua tuua toatasi ma ua le lavā tatali, ae meamanu lava lona faatuatua i le Alii, e mafai ona alofa ma fesoasoani atu ia te ia.

Aualofa o lona uiga o le faatuatua. O lona uiga, o le faamuamua o mea e tatau ona faamuamua. O lona uiga, o mea e pei o le totogiina o sefuluai.

Na faamatala e Elder Lynn Robbins o le Au Fitugafulu lana tala i se peresitene o le siteki mai Panama.

Ina ua toe foi mai se alii talavou mai lana misiona, sa ia maua le teine sa manao e faaipoipo i ai. Sa fiafia i la’ua, ae e matitiva.

Ona oo mai ai lea o se taimi na matua iloga le faigata, ina ua uma a la meaai ma ua leai foi se tupe. O se Aso Toonai, ma sa matua leai moni se mea i la la’ua kapoti. Sa popole Rene, aua sa fiaai si ona toalua talavou. Sa tonu ia te ia, ua leai lava se isi tonu e fai ae faaaoga le tupe o la la’ua sefuluai e faatau mai ai ni meaai.

Ina o le a tuua e ia le fale, sa taofi o ia e lona toalua, ma fesili atu i ai pe o fea e alu i ai. Sa fai atu o ia, e alu e faatau mai ni meaai. Sa fesili [le fafine] po o fea na aumai ai le tupe. Sa fai atu o ia o le tupe o le sefuluai. Fai mai le fafine, “O le tupe lena a le Alii—e te le faaaogaina lena tupe e faatau ai ni meaai.” Na malosi atu le faatuatua o le fafine nai lo ia. Sa ia toe teuina le tupe ae momoe ma le fiaaai i lena po.

I le taeao na sosoo ai, sa leai se la ti i le taeao, ma sa la anapopogi ma o i le lotu. Na avatu e Rene le tupe o le sefuluai i le epikopo, ae sa faasausili o ia e ta’u atu i le epikopo, o loo la manaomia le fesoasoani.

Ina ua uma sauniga, sa la tuua le falesa ma amata ona la savavali i le fale. E le’i leva, ae tauvalaau ane se uso fou mai lona fale. O lea tagata o se alii faifaiva, ma sa ia ta’u atu ia i la’ua ua tele naua ana i’a, nai lo le mea e mafai ona ia faaaogaina. Sa ia afifiina ni tama’i i’a se lima i se nusipepa mo i la’ua, ma sa la faafetai atu ia te ia. A o la savavali atu pea i le fale, sa taofi i la’ua e se tasi o le uarota ma sa ia foai atu ia i la’ua ni totila; ona taofi foi lea o i la’ua e se isi, ma avatu i ai se araisa; sa iloa atu i la’ua e se isi tagata o le uarota, ma sa ia avatu ia i la’ua ni pi.

E taunuu atu i la’ua i le fale, ua lava a la’ua meaai mo vaiaso e lua. Sa sili atu lo la maofa, ina ua la talatalaina le afifi i’a, ma la vaaia ai ni i’a tetele lava se lua, ae le o tama’i i’a e lima ia na la vaai i ai. Sa la tipitipiina faalaiti ia i’a, ma teu i le fulisa a lo latou tuaoi.

E la te molimau soo ai lava, talu mai lena taimi e le’i toe fia aai lava.

O’u tuafafine pele, o nei uiga matagofie uma e faauiga ai le Aualofa, e ta’u mai ai o loo siosiomia e faavavau i aao o Lona alofa.

O le mea lea tatou te moomoo uma i ai. O le mea lea tatou te faamoemoe uma i ai. O le mea lea tatou te talotalo uma i ai.

O lenei, o’u tuafafine pele, na o sina upu lava e faamae’a atu ai. Ou te faamanatu atu ia te outou, e le o outou o ni tagatanuu o le vasega lona lua i le malo o le Atua. O outou o Ana foafoaga paia. E umia e alii le perisitua. O outou, e ese la outou matafaioi, ae e matua taua lava foi. A leai outou, e le taunuu le fuafuaga o le fiafia a lo tatou Tama, ma leai foi sona uiga moni. O outou o le 50 pasene o tagata auai o le Ekalesia, ma o tina o le isi 50 pasene. E leai se tasi e mafai ona faate’a lemu outou.

Sa ou mauaina i se tasi aso se tusi mai se uo pele. O lona igoa o Helen, a o le igoa o lona toalua o Charlie. Sa ia tusia mea nei, ae e i ai foi ma isi mea:

“O nei lea na ma lauga ai ma Charlie i le matou sauniga faamanatuga. I la’u lauga, sa ou ta’ua ai le fautuaga na e aumai ia te au, ina ua ou faauu mai le Aoga Maualuga a Idaho Falls, ma sa ou fuafua ai ou te alu i le Kolisi o Ricks. Sa e fai mai ia te au, e tatau ona ou alu i le Kolisi a le Ekalesia i Hawaii, e lelei atu ai le avanoa ou te feiloai ai ma faaipoipo i se alii talavou e i ai sona pito Saina.

“Sa ou talia lau fautuaga ma ou alu i le CCH, lea na ma fetaui ai ma Charlie ma ma faaipoipo ai. Ua 37 tausaga talu ona ma faaipoipo, ma e toalima le ma fanau. Ua faamisiona uma le ma fanau e toalima… . E toatolu le ma fanau ua faaipoipo i le malumalu i Hawaii. E toalua le ma fanau e le’i faaipoipo, ma ua ma faamoemoe o le a la maua ni tagata agavaa e ave i le malumalu i se taimi lata mai. E toaono fanau aulelei a le ma fanau, ma le isi toalua lea e faatalitali.

“Ua faamanuiaina lava a’u i se toalua faamaoni, o lē na te faamamaluina lona perisitua ma ua agavaa foi o ia e auauna atu i le Alii o se epikopo, peresitene o le siteki, ma se peresitene o le misiona. Ua ou maua se avanoa manaomia e lagolagoina ai o ia i ona tofiga uma faale-Ekalesia. Sa avea au ma se peresitene o le Aualofa mo tausaga toeitiiti atoa le lima.

“O le aso, a’o ou faitauina o’u faamanuiaga e tele, e le mafai ona uma lo’u mafaufau i le avea ai o oe ma se tosinaga tele i lo’u olaga. Na o lo’u manao lava ina ia e silafia, sa ou mulimuli i lau fautuaga, ma talu ai lena mea, ua matua faamanuiaina lava lo’u olaga. Ou te faafetai atu, i lou faaavanoaina o lou taimi e tulitulitatao ai lo’u alualu i luma, ina ua ou tuua Hong Kong ae ou sau i Amerika.”

O le mea lena e fai e le Aualofa i tamaitai. E avatu ai ia i latou le avanoa e tuputupu a’e ai ma atiina ae. Latou te maua ai o latou tulaga o ni masiofo i o latou lava auaiga. E avatu ai ia i latou se nofoaga ma se tulaga, e tuputupu a’e ai a o latou faaaogaina a latou taleni. Latou te maua ai le mitamitaga ma taitaiga i le olaga faaleaiga. Latou te maua ai le agaga talisapaia faaopoopo mo soa ma fanau lelei, faavavau.

Oka se faalapotopotoga ina a viia o le Aualofa. E leai lava se mea e faatusalia i ai i le lalolagi atoa.

Ia faamanuia outou taitoatasi e le Alii, i nei uiga ofoofogia lea e maua mai i le toaaga i le faalapotopotoga a le Aualofa. Ou te tatalo ai ma le lotomaulalo, i le suafa paia o Iesu Keriso, amene.