O Le Augatupulaga Muamua

I ni nai aso ua mavae, sa matou talanoaina ai ni lauga i le taimi na aai ai lo matou aiga. O lo’u afafine e 13 tausaga, o Clarissa, sa sauniuni sana lauga o le lotu faamanatuga, mo la matou paranesi i Moscow, ma sa lagona si ona popole. Sa ou faamautinoa atu ia te ia, o le a lelei mea uma, ma sa ou faamatuu atu i ai si o’u foi tama’i popole i lo’u fai atu, o le mea e sili ai e le o lauga i luma o le fia afe o tagata i le konafesi aoao. Sa tuuina mai e Clarissa sana fo’i fautuaga: “O le a lelei mea uma Tama. Na ona e faatagā mafaufau lava faapea o se paranesi toatele.” Uso e ma tuafafine, e moni lava o outou o se paranesi toatele naua.

Ua ou filifili e faaautu la’u tautalaga i lenei taeao, i le augatupulaga muamua o tagata O Le Ekalesia a Iesu Keriso o le Au Paia o Aso e Gata Ai. O outou na o tagata muamua o outou aiga ua faalogo ma talia le savali, ua toefuatai mai le talalelei a Iesu Keriso i le lalolagi i o tatou taimi, faatasi ai ma perofeta soifua, tagatavaai, ma talifaaaliga. Ua outou faalotomaualaloina outou lava, faaaoga le faatuatua, ma salamo i a outou agasala uma, ma tauaveina i o outou luga le suafa o Iesu Keriso e ala i le papatisoga i le faatofuina, ma mauaina le Agaga Paia.¹ Ona o oe o le tagata muamua o lou aiga ua taliaina le talalelei, o lea ua avea ai oe ma augatupulaga muamua, o se tupulaga filifilia e faamanuiaina ai augatupulaga ua mavae, o le taimi nei, ma le lumanai.²

O le avea ai ma se tagata o le augatupulaga muamua o le Ekalesia, e le faigofie i taimi uma. O le a e savali i mea e le’i i ai se isi o lou aiga ua savali ai. E ono faigata tulaga e siomia ai oe. Atonu e i ai ni nai au uo, po o le leai foi lava, po o ni tagata o aiga e malamalama ma lagolagoina oe. E i ai taimi atonu o le a e faavaivai ai, ma e manatunatu pe o aoga ea. O lo’u faamoemoe i lenei taeao, o le faamautinoa atu lea ia te oe, e aoga.

O tagata o augatupulaga muamua, latou te nofoia se nofoaga faapitoa ma le taua i le Ekalesia faapea o latou aiga. Pe na outou silafia, o tagata o augatupulaga muamua, ua silia ma le afa o tagata auai o le Ekalesia?³ Atonu e leai se isi taimi mai le popofou o le Ekalesia, na tele ai se pasene o le augatupulaga muamua o le aofai o tagata auai o le Ekalesia e pei ona i ai i le taimi nei. O lo outou faatuatua ma molimau o se malosiaga sili i isi. E ala atu ia te outou, tatou te maua ai se malamalama loloto i mataupu faavae o le talalelei, ma faamalolosia ai a tatou molimau.

Tou te faaopoopo atu le malosi i le Ekalesia, pe a outou faaaogaina a outou molimau, taleni, tomai, ma lo outou limamalosi e fausia ai le malo i a outou uarota ma paranesi. O outou o faaaoaoga sili o le faasoa atu o le talalelei, auauna atu i misiona, auina atu o fanau i misiona, ma taliaina uso fou. Tou te aapa atu i le agalelei ia i latou o loo siomia ai outou, siitia ma faamanuia i latou e ala i la outou tautua musuia. E anoanoai mea o loo faia i le Ekalesia i aso nei, semanu e le mafai ona faia e aunoa ma a outou taumafaiga.

O le mea e sili atu ona taua, i le avea ai o se tagata o le augatupulaga muamua i le ekalesia, ua e nofoia se nofoaga taua i lou aiga. O oe o se faaaoaoga i lou aiga, o se soo moni o Iesu Keriso. E tusa pe o i latou o ni tagata o le Ekalesia pe leai, a e ola i le talalelei i le fale, o le a lagonaina e i latou o loo siomia oe le alofa o le Faaola e ala atu ia te oe. Latou te iloa o loo e faia se mea lelei, tusa lava pe latou te le malamalama ai, pe le lava foi lo latou faatuatua e talia ai. Ia onosai ma agalelei, tatalo i aso taitasi ina ia e iloa pe mafai faapefea ona e auauna atu ia i latou, ma o le a fesoasoani le Alii ia te oe ma faamanuia oe e faatosina mai lou aiga mo le lelei. O le tumau i lou lelei ma le amiotonu, o le a e faatuina ai ni mamanu o le faamaoni ma le amiotonu. O na mamanu o le a faafoligaina lou olaga, ae o le mea e sili ona taua, o le a avea ma tulaga faatauaina mo lou aiga ma au fanau.

I le avea ai ma augatupulaga muamua, o oe foi o le ki e tatalaina ai faamanuiaga a le Alii mo tagata o aiga o e na maliliu e aunoa ma le faalogologo i le talalelei, ma mauaina ona sauniga faaola. O lau tupulaga, o le avanoa tulaga ese ma le faamanuiaga e amataina lenei galuega mo i latou. O loo naunau mai i latou ina ia e sailia ma iloa i latou, ma o le a fesoasoani ia te oe i lau sailiga o o latou faamaumauga. A maua loa i latou, o le a mafai e lou olaga agavaa ona faatagaina oe e te auai atu i le malumalu, ma faataunuuina ai sauniga taua mo i latou. O nei sauniga o le a fusia faatasi ai oe ma ou augatama, ma aumaia ai le mana tele faaleagaga i lou olaga.

Ona o oe o se tagata o le augatupulaga muamua, o filifiliga uma lava e te faia e taua. O nai faaiuga laiti, e faaletaua, o le a aafia ai augatupulaga ua mavae atu, ma le lumanai, faapea foi lou lava olaga. O se tasi tagata talavou o le augatupulaga muamua, o Chris, na avatu i ai se ipu pia i le galuega, ina ua uma lona papatisoga. Sa i ai uma ana uo iina ma sa taufai inu uma. Sa matua malosi uunaiga. E leai se isi na iloa, o le aso ananafi na papatiso ai o ia ma faia ni folafolaga i le Alii. Sa ia faia le faaiuga e le inu, ma sa agaleagaina o ia. A o toe manatunatu o ia i lena mea i se taimi mulimuli ane, sa ia tusia: “Ua fasefulu nei tausaga talu ona ou faia na folafolaga [i le papatisoga] ma e mafai ona ou fai atu faamaoni sa ou … tausia le Upu o le Poto… . Ou te talitonu ana faapea ou te taliaina [lena] ipu pia, atonu semanu, ou te le mafaia lava ona tausia le Upu o le Poto.”⁴

Peitai, na tausia e Chris ana folafolaga i le papatisoga. Mulimuli ane, sa feiloai atu o ia i se tagata faamaoni o le ekalesia. Na la tausia faatasi se fanau e toavalu i le talalelei. O le taimi nei, i le augatupulaga lona ono, ua faitau selau i latou faamaoni ua tupuga mai ia te ia. E toatele ua faamisiona ma latou faailoa atu le talalelei i isi. O ana taumafaiga i talafaasolopito o aiga, na tatalaina ai faamanuiaga o le talalelei i le isi fiaselau. O si faaiuga laitiiti lava e tasi a se tagata o le augatupulaga muamua, ua faia ai se eseesega mo afe e mano.

Pe ua mafai nei ea ona e vaai i le mafuaaga e matua taua ai le augatupulaga muamua? Pe ua mafai ona e malamalama i le tulaga ua e nofoia nei, ma le aafiaga e mafai ona e faia mo le lelei? Faamolemole ia aua lava nei e manatu mama pe o ai oe, ma le mana o ia te oe e faaaafia ai isi. E malamalama Satani ia te oe, ma o le a ia faia mea uma na te mafaia e faatosina mai ai oe, ina ia e faia filifiliga sese. E i ai taimi, pe o a lava a tatou taumafaiga sili, tatou te sese uma lava. O le mea e lelei ai, ua saunia e le Tama Faalelagi se auala mo i tatou e faatoilalo ai e ala i le salamo, ma le faalagolago i le Togiola a Lona Alo. Aua e te lotovaivai pe a i ai sau mea sese e fai. O le salamo ma le fetuleni atu pea i luma, atonu o mamanu ia e sili ona taua e atiina ae i le augatupulaga muamua. Ia onosai, ma fetuleni atu i luma i le usiusitai.

I totonu o le Ekalesia, tatou te faitau ma talanoa soo e uiga i paionia i le uluai talafaasolopito o le Ekalesia. O i latou o tagata o augatupulaga muamua e faapei foi o outou. Sa latou ola i aso taitasi ma feagai ma luitau o aiga, galuega, ma le faatuatua. Sa latou ola i ni olaga lelei ma faatauvaa, ma sa faamaoni i le tautuaina o le Ekalesia ma faamanuiaina ai o latou aiga. Pe afai latou te pauu, latou te toe tutu a’e i luga ma aga’i atu i luma. O lenei, o i tatou o e tupuga mai ia i latou, ua tatou toe tepa atu i tua ma le migao ma le loto faafetai ona o lo latou faatuatua.

O lo latou talatuu, e mafai foi ona avea ma a outou talatuu, o ni uso o le augatupulaga muamua. Ia faamaoni, tautua ou uso a tagata, faamanuia o outou aiga, ma faia faaiuga tonu. O oe o le augatupulaga muamua, o se augatupulaga filifilia e faamanuiaina ai augatupulaga ua mavae atu, ma le lumanai. Matou te faaeaea ia te oe. O le a faaeaea foi augatupulaga ua mavae atu ma le lumanai ia te oe. Ae o le mea e aupito sili ona taua, o le a faaeaea le Atua ia te oe ona o lou faamaoni i le augatupulaga muamua. I le suafa o Iesu Keriso, amene.