Ina Ia Latou Iloa Oe

Sa lagiina e le aufaipese le “Iesu, a Mafaufau i Lau Afio.”¹ I totonu o le Tusi a Mamona, na vavalo ai Nifae a o tautala faaMesia:

“E faapea le lalolagi, ona o a latou amioletonu, o le mea noa o ia, o lea latou te sasa ai ia te ia, e onosai ai foi o ia, latou te taia o ia, e onosai ai foi o ia. Latou te feanu ia te ia, e onosai ai foi o ia ona o lona alofa mutimutivale tele ma lona onosai i le fanauga a tagata.”²

O le maoae ma le matautia o puapuaga na oo i le Faaola sa faia mo i tatou ina ia tatou le puapuagatia e pei ona Ia puapuagatia.³ Ae peitai, o puapuaga o se vaega o le olaga, ma e toaitiiti lava o le a sosola ese ai mai lana pu’e. Talu ai ona o se mea lea e oo uma i ai tatou, pe o loo i ai, pe o le a oo i ai i tatou taitoatasi, ua i ai foi ma se fautuaga faaletusi paia e faapea, e mafai ona tatou aoaoina ni lesona faaleagaga pe afai tatou te taulimaina puapuaga, faanoanoaga, ma le faavauvau, ma taulai atu ia Keriso. Na tusia e Paulo anamua, o o tatou puapuaga e mafai ona tatou maua ai se avanoa e iloa lelei ai le Faaola. Na tusi atu Paulo i tagata Roma:

“O loo molimau mai lea lava Agaga i o tatou agaga, o fanau i tatou a le Atua:

“Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.”⁴

O lenei, ina ne’i i ai se tasi e alu e saili faigata ma puapuaga, ae le o le mea lena o loo aoao mai. Ae, o o tatou uiga tatou te taulimaina ai o tatou faigata ma tofotofoga, e mafai ai ona tatou iloa lelei ai le Faaola. O aafiaga ua aoaoina ai i tatou e faapea o puapuaga o se tasi lea o aafiaga o le olaga o le a oo mai e aunoa ma le tau sailia. Afai e mafai ona ou faaaogaina se faataitaiga patino:

I ni nai tausaga ua mavae pe tusa lena ua tasi le tausaga o le ma atalii matua, sa avea ai au ma se faapogai o se mafatiaga sa le manaomia. Sa ma aooga i le kolisi, ma o se tasi afiafi sa ma taaalo ai ma lo’u atalii i luga o le fola. Sa ou alu ese ma le potu ou te alu e fai au meaaoga, ma ao o’u tapunia le faitotoa, sa aapa mai o ia ia te au ma sii i luga lona lima i tua o lona ulu, ma lavea ai lona tamatamailima i le itu o loo tautau ai le faitotoa. Ina ua ou tapunia le faitotoa sa mafatia o ia i se manua tuga i lona tamailima.

Sa ma faanatinatia atu o ia i le potu o faalavelave faafuasei i le falemai, sa fai sona tui faagase ; ma sa oo atu se fomai; sa ia faamautinoa mai ia i maua e mafai ona toe faaleleia. O le mea na [ou] te’i ai, i lena taimi, na o le pau lava le mea na manao i ai lo’u atalii e tasi le tausaga, ia sii o ia e lona tama. O lona iloa mai pea o au, sa ia teena ai soo se taumafaiga e taofi o ia mo le taotoga maaleale. Ina ua ou tuua le potu, sa filemu o ia ma mafai loa ona faaauau togafitiga a le fomai.

I le taimi o le taotoga sa ou naunau lava ou te faalatalata atu i le faitotoa na matala ma tilotilo atu i le pito e vaai pe na a mai le taotoga. A’o ou faamatatasi atu ma le leai o se pao i le tulimanu sa i ona tua mai faapea ma autafa, atonu o se sane na le vaaia, e tuu a’e ai lona ulu i luga ma tau autilo pe o ou i ai iina.

O se tasi o na taimi, a o ou vaai atu ia te ia ma lona lima na faalala ese i lona autafa—sa feliuai solo ai lona ulu e sue lona tama—na oo mai ai se manatu i lo’u mafaufau i se isi Atalii, o Ona lima sa faaloloa, na tutui i se satauro, sa saili atu mo Lona Tama, ma na oo mai i lou mafaufau upu nei, “Lo’u Atua e, lo’u Atua e, se a le mea ua e tuulafoai mai ai au.”⁵ O se taimi sa sili ona atuatuvale i lo’u olaga, na faafuasei ona avea ma taimi sili ona paia.

O loo i ai i tusitusiga paia atoa, se faasologa o alii ma tamaitai o e na foliga sa tausisi pea lo latou taulai atu ia Keriso—o tagata o e, e tusa lava po o a manu’aga po o faiga le faamaoni a le olaga ia i latou, ae sa tumau pea i le faamaoni ma naunau e tumau. Ou te tautala e uiga ia Aperaamo, na faateaina mai le nuu o lona tofi, ma na poloaiina e ositaulaga Isaako; o Iosefa foi o le na faatau atu e fai ma pologa e ona uso, sa faafalepuipuiina ona o le faamamaluina o le amio mama ma le legavia, ma tuua e nofo i le falepuipui ona o se auauna le magafagafa; o Ruta, na maliu lana tane a o talavou ma tuua i le mativa, ae sa tumau pea i le faamaoni i lona tina faaletulafono; o Nifae e toatolu, o Alema e toalua, faapea ma le Perofeta o Iosefa.

E faapitoa ona ou matauina le tumau mausali o Nifae. Sa faaauau pea ona oo atu ia te ia le ita o ona uso, sa saisaia o ia mo aso e fa i luga o le vaa na omai ai i le nuu o le folafolaga. Sa le mafai ona gaoioi o ia, ma o le aso lona fa, ina ua foliga mai o le a tofatumoanaina i latou e le sami, sa matatau le auuso ina nei o latou fano ma faapea ona, “tatalaina noanoaga na i [ona] tapulima, faauta foi, ua fufula tele lava, ua fufula tele foi [ona] tapuvae, ma ua tiga tele.

“Ae ui i lea, na [ia] tepa ae i [lona] Atua ma ua [ia] vivii atu ia te ia i le aso atoa, [na] te lei muimui.”⁶

Ae ia manatua, o Nifae lava na tusia e faapea: “Latou te sasa ai ia te ia, e onosai ai foi o ia, latou te taia o ia, e onosai ai foi o ia. Latou te feanu ia te ia, e onosai ai foi o ia.”⁷ Na malamalama i ai Nifae.

E ui lava ona e le manino i taimi uma le faamoemoega o le puapuaga i lena taimi, ae na oo foi i le Perofeta o Iosefa se aafiaga faaleagaga uigaese a o i ai o ia i le Falepuipui o Liperate. Sa faamafanafanaina o ia e le Alii:

“Lo’u atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava;

“Ona faaeaina lea o oe e le Atua i le mea maualuga; afai e te onosai o le a e manumalo foi i ou fili uma.”⁸

“Ia e iloa ai, lou atalii e, e tuuina atu ia te oe le poto masani ona o ia mea uma, ma avea mou lelei.

“Na oo ifo i lalo o mea uma le Atalii o le Tagata. Pe sili ea oe i lo ia?”⁹

Pe a valaauina i tatou e onosaia ia puapuaga, o nisi taimi e oo mai ai ma le faamoemoeina po o le le’i faamoemoeina foi, e tuua ai i tatou i se tulaga uigaese—pe afai tatou te filifili ai, atonu e mafai ona tatou maua se vaaiga fou i mafatiaga o le Alo o le Atua. E ui ina tau mai e Alema ia i tatou faapea na onosai Keriso i mea uma e ono puapuagatia ai soo se tasi o i tatou, ina ia mafai ona silafia e Ia le ala e tausi ai i tatou,¹⁰ e ono sa’o foi le isi itu e faapea; o o tatou puapuaga e mafai ai ona tatou maua ai se malamalamaaga loloto ma le taua e uiga i Lana taulaga togiola.

A o o’u mafaufau loloto i lena mea na tupu i lo’u atalii i na tausaga e tele ua tuanai, na maua ai ni manatu fou atoa foi ma se malamalamaaga loloto i le taua ma le mamalu o le Togiola. Ua i ai so’u lagona talisapaia loloto o le mea sa naunau le Tama ia oo i ai Lona Alo mo au ma mo i tatou taitoatasi. Na ou maua ai se vaaiga patino fou i le loloto ma le lautele o le Togiola. E le mafai ona ou iloa o le a ou naunau e tuu atu lo’u atalii e mafatia e oo lava i si nei mea itiiti; ae o lo tatou Tama na “alofa mai i le lalolagi, ua ia au mai ai lona Atalii Pele e toatasi.”¹¹

E ui lava ina matou te le’i talanoaina lava, ae semanu e maua foi e lo’u atalii le avanoa e talisapaia ai le fuaitau lea o loo faamalamalama mai e le Faaola, “Faauta, ua ou taia lou faatusa i ou alofilima; e tumau ou pa i o’u luma.”¹²

E ui ina ou te le faapea atu e mafai ona latalata atu ia soo se mea o i lenei tala i le Togiola paia, ae o le ma’ila i le lima o lo’u atalii o loo faaauau pea ona i ai i ona luma ma o loo ia te ia le avanoa, pe afai na te filifili e faaaoga, e faaaoga lona ma’ila e avea o se faamanatu o faailoga i alofilima o le Faaola—lea na puapuagatia mo a tatou agasala. O loo ia te ia le avanoa e malamalama ai i lana lava ala i le alofa o le Faaola mo i tatou i lona finagalo malie e ma’ila’ila, maosiosia, gauia ma tiga mo i tatou.

E ui lava o mafatiaga e oo mai ai le malamalama, ae e tatau ona tatou faaeteete ia le faatusatusaina, ae ia talisapaia. E i ai pea lava se eseesega e le muta i le va o i tatou ma lo tatou Faaola. O Lana fetalaiga ia Pilato, “E leai sau pule ia te au, ana le tuuina mai ia te oe”¹³ e toe faamanatu mai ia i tatou o le finagalo malie ma le natura o Lana taulaga ofofua. E le mafai ona tatou onosaia le loloto, o le natura oo’oo po o le tele o Ona tiga, “O le tiga lea na faagateteina ai au lava, o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga.”¹⁴ Ae e pei foi o Nifae, e mafai ona tatou maua se agaga faafetai tele mo mea na Ia faia ma e mafai ona tatou lagona Lona agaga o loo tausia i tatou ma e mafai ai ona tatou iloa le Faaola i se vaaiga e sili ona moni, ma “o le ola e faavavau foi lenei, ia [tatou] iloa” o Ia.¹⁵

Ou te molimau atu o Iesu Keriso o le Faaola o le lalolagi ma e ala mai i Lona puapuagatia ma le Togiola e mafai ai ona tatou maua se faamagaloga o a tatou agasala ma mafai ai ona maua le ola e faavavau. Ou te molimau atu e uiga i Lona agamalu ma le alofa agalelei. O Ia o le Alo e Toatasi na Fanaua e le Tama, ma na Ia faia le finagalo o Lona Tama i mea uma, i le suafa o Iesu Keriso, amene.