Avea ma Tufugaaao o le Atua

Sa na o le 34 tausaga o le tamamatua o lo’u tina, o Alma Benjamin Larsen, ina ua ala a’e i se tasi taeao ma iloa ai ua i ai se faafitauli i lana vaai. O se taimi e le’i mamao mulimuli ane, ae po atoa loa lana vaai. Sa auauna atu tamamatua i se misiona ma o se tagata faamaoni foi o le Ekalesia. Sa avea o ia o se faifaatoaga, sa i ai sona toalua ma se fanau e toatolu, ma sa le mafai ona ia iloa pe faapeī le olaga pe a le pupula. Sa tauave loa e le toalua o tamamatua ma tamaiti laiti ia avega faaopoopo o le fesoasoani i le faatoaga, ma sa oo ina matua utiuti le seleni.

I lenei taimi o le pogisa faaletino, sa toatele tagata na avea ma tufugaaao o le Atua sa fesoasoani i lou tamamatua tauaso. O se tasi mea na tupu na i ai se aafiaga malosi i lona aiga sa tupu i le 1919. O se tausaga sa ogaoga faigata tautupe mo tagata uma o le nuu o Tamamatua. Sa ave faamalosi [e faletupe] ia faatoaga ma sa gau foi pisinisi. Sa i ai se mokesi [aitalafu] telē i lana faatoaga, ma na maua e Tamamatua se tusi e tatau ona ia totogiina le $195 e taofi ai le faatoaga mo se isi tausaga, mai le aveina faamalosi [e le faletupe]. Ia te ia [tamamatua] o le totogiina o lenei pili na pei lava o se avea’i mai mo se pauna aano o lona tino. Na toetoe o tagata uma sa i ai i lenei tulaga, ma sa foliga mai e faigata ona maua se tupe tele faapena. Afai sa ia aoina mai mea uma sa i ai i le faatoaga—o solofanua, povi, ma masini—e le mafai lava ona ia faatauina atu i le $195. Sa talosagaina e tamamatua se tuaoi e fasi ana povi e lua pe tolu, ma sa ia faatauina atu faatasi ma nisi oloa. Sa ia nonoina atu tupe i ona tuaoi ma lona iloa o le a latou toe totogiina mai i le faaiuga o le tausaga, peitai sa leai se tasi o tagata na aitalafu ia te ia na mafai ona totogi mai ana [tupe]. Sa leai se faamoemoe i le tulaga tau i le tamaoaiga mo lona aiga.

I lana tusi talaaga, na faamatala ai e tamamatua e faapea: “O le a le galo lava ia te au lena afiafi malulu, a o lumanai le Kerisimasi o le 1919. Na foliga mai o le a mamulu atu le faatoaga. Sa tuu mai e lo’u afafine o Gladys, se fasipepa i lo’u lima ma fai mai, ‘O le mea lea na maua mai i le meli ananei.’ Sa ou tuuina atu i lona tina ma fai atu i ai po o le a lea mea. O le mea lenei na faitau mai e lo’u toalua ia te au, ‘Lau Susuga Uso Larsen, ua alu lenei aso atoa o ou mafaufau ia te oe. Ou te mafaufau lava pe o e feagai ma se faafitauli tautupe. Afai o lea, o loo i ai la’u $200 e mafai ona avatu ma oe.’ O le tusi na sainia e ‘Jim Drinkwater’. O Jim o se alii pipili faatino iti, ma o ia le tagata mulimuli lava i le fogaeleele, e ono mafaufau i ai se isi, sa na umia se tupe tele faapena. Sa ou alu atu i lona fale i lena po ma sa ia faapea mai, ‘Uso Larsen, sa ou maua se feau faauaealesi mai le lagi i le taeao nei, ma sa le mafai ona aveesea oe mai i lo’u mafaufau i le aso atoa. Sa ou mautinoa lava o loo i ai sou faafitauli tautupe.’ Na tuu mai e Uso Drinkwater ia te au le $200 ma na ma aveina atu le $195 i le kamupani mokesi, ae o le $5 na sili, sa ma faatauina ai seevae ma lavalava mo tamaiti. Sa oo mai lava le Tama o le Kerisimasi i lena tausaga.”

Ona faailoa mai lea e lo’u tamamatua lana molimau, “E le’i tuu aunoaina lava au e le Alii. Ua Ia pai atu i loto o isi tagata e pei ona Ia pai atu ai i le loto o Uso Drinkwater. Ou te molimau atu na pau lava le saogalemu ma le puipuiga na ou mauaina, na oo mai e ala i le taumafai e tausi poloaiga a le Alii ma tumau ma lagolagoina ia taitai o lenei Ekalesia.”

E tele taimi na ou mafaufau ai ia Jim Drinkwater ma faapea, pe na faapefea ona avea o ia ma tagata e mafai ona faatuatuaina e le Alii. O Jim o se alii pipili faatino iti, lea sa faatuatuaina e le Atua e fesoasoani i se faifaatoaga tauaso sa i ai se aitalafu tele ma se fanau e toatolu. E tele ni mea na ou aoaoina mai le mea na oo i lo’u tamamatua ma Jim Drinkwater. Na ou iloa ai, e le faapea seiloga e i ai se tofiga faalelotu o se tagata, se valaaulia e fesoasoani i se tasi, pe lelei foi le soifua maloloina, ona avea lea ma se tufugaaao o le Atua. E faapefea la ona avea oe ma au ma tufugaaao o le Atua? Ua aoao mai i tatou e perofeta ma tusitusiga paia i le auala e [avea ai ma tufugaaao o le Atua].

E muamua lava, e tatau ona i ai so tatou alofa mo le fanau a le Atua. Ina ua fesiligia e le faitulafono le Faaola, “Le Aoao e, o le fea poloaiga ua sili?” na tali atu le Faaola:

“E te alofa atu i le Alii lou Atua ma loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi lona lua. E te alofa atu i le lua te tuaoi, ia pei o oe lava ia te oe.” (Mataio 22:36–39).

Na saunoa Iosefa F. Samita, “O le alofa moni, po o le alofa, o le mataupu faavae silisili o loo i ai. Afai tatou te tuuina atu se lima fesoasoani i le o loo mafatia, afai tatou te fesoasoani ia i latou ua feagai ma faanoanoa, afai tatou te siitia ma faaleleia le soifuaga o tagata, o la tatou misiona le faataunuu, o se vaega taua o lo tatou talitonuga le faia o lea.” (i le Conference Report, Ape. 1917, i. 4). A tatou lagona le alofa mo le fanau a le Atua, e tuuina mai ia i tatou ni avanoa e fesoasoani ai ia i latou i a latou malaga toe foi atu i Lona afioaga.

O aafiaga faafaifeautalai o atalii o Mosaea, e fesoasoani foi tatou te malamalama ai i le auala e avea ai ma tufugaaao o le Atua. “Ua oo foi ina latou malaga i le vao i aso e tele” (Alema 17:9). E tatau ona tatou mananao e malaga. Sa naunau atalii o Mosaea e laa ese mai o latou siosiomaga ae fai le mea sa faigata. Ana faapea e le manao Amona e malaga i se nuu ese, sa nofoia e se nuu feai, ma le loto maaa, ma le fasioti tagata, semanu e le feiloai lava ma fesoasoani ia Lamonae ma lona tama, ma semanu e le mafai e le toatele o sa Lamana ona iloa Iesu Keriso. Ua fetalai mai le Atua ina ia tatou malaga i ni misiona, talia tofiga, valaaulia se tasi i le lotu, pe fesoasoani i se tagata o manaomia se fesoasoani.

I a latou taumafaiga e fesoasoani i o latou uso sa Lamana, sa iloa ai foi e atalii o Mosaea le taua o le anapogi ma le tatalo: “Ua latou anapogi tele ina ia tuu mai e le Atua se vaega o lona Agaga latou te malaga faatasi ai, ia mafuta foi ma i latou, ina ia avea i latou ma tufugaaao o le Atua e aumai ai o latou uso o sa Lamana i le malamalama o le upumoni” (Alema 17:9). Pe tatou te mananao moni ea e avea ma tufugaaao o le Atua? Afai o lea, o le a faatumulia e lo tatou manao a tatou tatalo ma o le a avea ma taulaiga o a tatou anapogi.

Ina ua po lava lana vaai, sa anapogi ma tatalo lo’u tamamatua, afai o le a tumau ai pea o ia i le pogisa, ia faapea ona tuuina mai e le Alii ia te ia le toafilemu. Na ia taua, na toeitiiti atoa le itula, ae “faatoafilemuina loa lo’u mafaufau ma siitia ese le ao pogisa mai ia te au.” Ua mafai ona toe pupula, e le o mata faaletino, ae o mata faaleagaga. Mulimuli ane, na valaauina ai Alma Benjamin Larsen e avea ma peteriaka, lea sa ia tautua ai mo le 32 tausaga. E pei foi o atalii o Mosaea, sa anapogi ma tatalo lo’u tamamatua, ma o le taunuuga, sa tuuina atu ia te ia le avanoa e faamanuia ai le faitau afe o fanau a le Atua.

O i tatou, e pei foi o Jim Drinkwater ma lo’u tamamatua, e tatau foi ona tatou mataala i musumusuga a le Agaga Paia, aua a tatou mananao loa e avea o se tufugaaao o le Atua, e mafai ona tatou maua faaaliga. Na faamatala mai e le perofeta o Alema le Itiiti ia i tatou ia faaaliga na ia maua: “Ua ou iloa mea ua poloaiina ai au e le Atua, ma ua ou mitamita ai … ioe, o lo’u mitamita lenei, atonu e avea au ma tufugaaao o le Atua i le taitaiina mai o se agaga i le salamo; o lou olioli foi lenei” (Alema 29:9). Na maua e Alema ia faaaliga o le mea e fai.

E i ai la’u tamai api ou te fealuai ma feaveai, lea ou te tusia ai musumusuga ma mafaufauga ou te maua mai le Agaga. E le o se tusi matuai taua tele, ma ua masaesae ma e tatau ona sui mai lea taimi i lea taimi. A oo mai manatu i lo’u mafaufau, ou te tusia i lalo ona ou taumafai lea e fai. Na ou iloaina o le tele o taimi, pe a ou faia se mea o la’u lisi, o a’u gaoioiga o se tali lea i se tatalo a se tasi. E i ai foi taimi na ou le faia ai se mea mai la’u lisi, ma sa ou iloa mulimuli ane ai, sa i ai se tasi sa tatau ona ou fesoasoani i ai, ae ou te le’i faia. A tatou maua ni musumusuga e faatatau i fanau a le Atua, a tatou tusia i lalo manatu ma musumusuga tatou te maua ma usitai i ai, e faateleina le talitonuina o i tatou e le Atua, ma tele atu ai avanoa tatou te maua e avea ai ma tufugaaao i Ona aao.

I le saunoaga a Peresitene Faust, “E mafai ona avea outou o ni tufugaaao malolosi; e fesoasoani le Atua e faataunuu ai lenei galuega tele… . E mafai ona e faia se mea mo se isi tagata, lea e leai se tagata soifua e mafai ona faia” (“Tufugaaao i Aao o le Atua,” Liahona ma le Ensign, Nov. 2005, 115). E pele i le Atua i latou o e fesoasoani i Lana fanau. Ou te valaaulia i tatou uma ina ia mulimuli i fautuaga a perofeta ma ia avea ma tufugaaao o le Atua, ma ia faitaulia faatasi ai ma e pele ia te Ia, aua ua tatou fesoasoani i Lana fanau.

I le suafa o Iesu Keriso, amene.