Tatou te Molimau Atu i le Lalolagi

O’u uso e ma tuafafine, a o tatou potopoto faatasi ai i se isi foi konafesi aoao, ou te fiafia lava e lipoti atu o loo faaauau pea ona ola le Ekalesia i le malosi ma aafiaga. I le 1982, ua 24 tausaga talu ai, sa ou tusia ai i la’u tusi talaaga: “O le a silia ma le 300 alaleo e maua ai fesootaiga o faasalalauga mai le vateatea mo le konafesi aoao ia Oketopa. O lona uiga, o le a silia ma le 300 fale autu o o tatou siteki, o le a mafai ona potopoto ai o tatou tagata i atunuu eseese ma auai mai i konafesi.”

Ua logo mai a’u i le taimi nei, ua 6,066 satelite a le Ekalesia lava ia, ua mauaina saite i atunuu e 83. E maeu lava lo’u faafetai i le faateleina o le fuainumera, a ua faateleina ai foi le tulaga ua mafai ai ona aapa atu ma fesootai ma le Au Paia o Aso e Gata Ai i le lalolagi atoa.

O le taimi nei, e mafai ona tatou moomoo mo nisi mau papatisoga i le Iunaite Setete ma Kanata, peitai e mafai foi ona tatou faia lena lava tala e tasi i soo se mea o le lalolagi. Ae ui i lea, ua tele le seleselega i tagata o le ekalesia i atunuu e 160. E le’i leva tele atu, sa na o ni nai tagata o le Au Paia o Aso e Gata Ai, a o le taimi nei ua malolosi uarota ma siteki, ma alii ma tamaitai faamaoni ma ua agavaa mo tofi ta’ita’i.

E ui ina ua i ai tapulaa o lo matou mafaia ona malaga atu i mea e mafai ona matou malaga atu i ai, a o lea ua faapaleni i le mafai e le Au Peresitene Sili, o uso o le Toasefululua, ma Fitugafulu ona lauga atu e ala i le satelite i se fuainumera tele o siteki i le lalolagi atoa.

E sui ia tulaga, ae e le suia lava la matou savali. Matou te molimau atu i le lalolagi ua tatala mai le lagi, na afio mai le Atua lo tatou Tama Faavavau, ma Lona Alo, le Alii toetu, ma sa malele mai. Matou te tuuina atu la matou molimau paia, ua toefuatai mai le perisitua, faatasi ai ma ki ma le pule o faamanuiaga faavavau.

Sa matou faapaiaina talu ai nei le Malumalu o Sacramento Kalefonia, o le lona 7 ai lea i lena setete, ma o le lona 123 i le lalolagi. Sa matou suatiaina foi le eleele mo se isi malumalu i le eria o Sate Leki.

Matou te fiafia lava e faailoa atu o loo gasolo lelei lava ia taualumaga o le faafouga o le Tapeneko i Sate Leki, ma o le a mafai ona toe faaaoga lenei fale tulaga ese ma le matagofie i le isi tautotogo, e le Aufaipese a le Tapeneko, i ana faasalalauga i vaiaso taitasi.

O loo feagai nei le Ekalesia ma se galuega faatino tele o le toe atiina ae, ona o le naunau e puipuia le siosiomaga o le Lotoa o le Malumalu. E ui ina o le a tele sona tau, ae o le a le faaaogaina ai tupe o sefuluai.

Peitai, o le a faaauau pea ona faaalia le faatuatua o o tatou tagata, i le totogiina lea o sefuluai ma taulaga.

I se aotelega, e mafai ona na ona ou lipoti atu ua matua faamanuiaina lava e le Alii Lana Ekalesia, ma o lo tatou tiute o le faia lea o mea uma tatou te mafaia e tulei ai i luma.

O lenei, uso e ma tuafafine, a maea le pese a le aufaipese, o le a tatou faalogologo atu loa i saunoaga a o tatou uso ma tuafafine. Ma a o faagasolo lenei konafesi maoae, ia tolaulau mai e le Agaga o le Alii mea uma e fai ma mea e saunoa i ai, ma ia faatumuina o tatou loto ma mafaufau ina ia taumasuasua, o la’u tatalo lea, i le suafa o Iesu Keriso, amene.