Ma Le Alofa Tele ma le Ofoofogia

E tautino mai e tamaiti i le faatuatua mama e faapea, “Matou te talitonu i le Atua le Tama Faavavau, ma Lona Alo o Iesu Keriso, ma le Agaga Paia.”¹ Ae o nisi taimi e le lagonaina ai e le autalavou ma tagata matutua le mana o lenei folafolaga faatauvaa.

O Satani o le “ita i le amiotonu uma”;² o lea na te totoina ai le masalosalo e uiga i le natura o le Aiga Atua ma lo tatou sootaga ma i Latou. Na valoia e Iesu Keriso, o aso amuli e oo lava i e filifilia o le a faaseseina.³ Mafaufau i faataitaiga e tolu o auala o loo “faia ai [e Satani] togafiti ma mailei e pupue ai tagata paia o le Atua.”⁴

O le mailei o le faaseseina i le le atoatoa. O se tagata talavou faamaoni e lagonaina le le mafai ona ausia o faamoemoega o isi. I le fale ma le aoga, e seāseā ona viia o ia ma e masani ona faitioina [o ia]. E ta’u atu e ala lauiloa o faasalalauga e le lava lona lalelei pe le lava lona atamai. O aso uma lava e fesiligia ai e lenei tuafafine pe o ia o se tagata e agavaa mo le alofa o le Tama Faalelagi, le taulaga togiola a le Faaola, po o le taitaiga faifaipea a le Agaga.

O le mailei o le saisaitia i vaivaiga. E lagona e se faifeautalai maoae le le atoatoa i le ausiaina o faamoemoega o le Atua. I lona mafaufau, e vaai faalemafaufau ai lenei alii faifeautalai agavaa i se Tama Faalelagi paū, ua noatia i le mea tonu tumau, o se Faaola e mafai ona faamamaina solitulafono a isi, ae le o solitulafono a lenei lava alii faifeautalai, ma se Agaga Paia e le finagalo e mafuta i se tagata e le atoatoa.

O le mailei o le tausalaina le talafeagai. O se tamaitai faamatuā tagata o se tina faamaoni, o se uo agalelei, o se auauna faamaoni i le Ekalesia, ma o se tagata e alu soo i le malumalu. Ae i totonu o lona loto, e le mafai e le tuafafine ona faamagalo ia lava i agasala na solia i tausaga ua tuanai, ua faapea ona salamo ai ma ua faaleleia uma ma taitai perisitua. E masalosalo o ia ailoga a taliaina lona olaga e le Alii, ma ua leai ai se faamoemoe mo le ola faavavau i le afioaga o le Tama Faalelagi.

Afai e i ai ni ou mafaufauga ma lagona e talitutusa ma nei Au Paia lelei, ou te valaaulia oe ina ia e avea e pei o se tamaitiiti laitiiti ma ia [e] toe lagona le “alofa tele ma le ofoofogia na faaalia e le Tama ma le Alo i le afio mai lea o le Togiola i le lalolagi.”⁵ O le faatuatua e faapei o se tamaitiiti i le alofa atoatoa o le Tama Faalelagi ma Iesu Keriso o le a “vavaeeseina”⁶ ai mailei a Satani o le le atoatoa, vaivaiga, ma le tausalaina.

Ua aoao mai le Faataoto, “Aua e pei ona manatu o ia i lona loto, ua faapea lava o ia.”⁷ Sei ou fautuaina atu—e faaopoopo atu i tatalo e le aunoa, suesueina o tusitusiga paia, ma le auai atu i le lotu ma le malumalu—ni suiga se lima i ou mafaufauga ma lou loto ina ia e lagona atoatoa ai le alofa faapelepele o le Atua.

Muamua, vaai ia te oe lava o se atalii/afafine faapelepele a se Tama oi le Lagi alofa. E pepese ma le mautinoa a tatou fanau, “O au o se atalii o le Atua, ua Ia auina mai au nei.”⁸ E lagona ma iloa e tamaiti laiti le mea atonu ua galo ia te oe. O oe o se atalii po o se afafine pele o le Tama Faalelagi, na faia “i lona faatusa,”⁹ ma e matuai taua tele—le taua tele lena na faapea ona foai ai e Iesu Keriso Lona soifua mo oe.

E ui lava i ou sese, ae e agalelei ma e le mavae lava le alofa o le Atua le Tama mo oe. E na o le leo o Satani o le a mafua ai ona e lagona e leai sou taua. I se isi itu, o le Agaga Paia o le a mafua ai ona e lagona le “tiga e tusa i le Atua”¹⁰ e oo ai i le salamo e faapea ona tumu ai oe i le faamoemoe o se suiga lelei.

Pe a e lagonaina le leai o sou taua, “ia manatua e taua tele le aoga o agaga i le silafaga a le Atua.”¹¹ Ia aloese mai le mafaufau soo po o le faia o faamatalaga le lelei e uiga ia te oe lava—o loo i ai se eseesega iloga i le va o le lotomaulalo ma le faalumaina. Ia iloa ma faaaoga au taleni tulaga ese nai lo le tumau ai i ou vaivaiga.

Lona lua, lafo au avega ia Iesu Keriso. Pe a e lagona le lofituina i faamoemoega ma luitau, aua nei e tauina toatasi le taua. Mulimuli i faataitaiga a tamaiti laiti, ia faapau ifo i ou tulivae i le tatalo.

Ua poloaiina i tatou e Iesu Keriso, “Ia faalagolago ia te au i manatunatuga uma; aua le masalosalo, aua le fefe.”¹² O le masalosalo, fefe, ma le popole e iloa ai ua tatou tuu ia avega ma atugaluga uma o le olaga i o tatou lava luga. Pe a osofaia [oe] i mafaufauga e faapea e te le atoatoa, ia fai ifo [ia te oe lava] ma le mautinoa, “Ou te mafaia mea uma lava i le faamalosi mai o Keriso ia te au.”¹³ Ma a o e “faia ma le fiafia mea uma o loo i ai i [lou] mana,”¹⁴ e mafai ona e nofouta o le a faia e le Alii vaega e totoe ma o le a manuia mea uma.

Na folafola mai e le Faaola, “Ia outou o mai ia te au, o outou uma o e tigaina ma mafatia i avega, o au foi e malolo ai outou.”¹⁵ A o e “tuuina atu ia Ieova o mea uma [e te] popole vale ai,”¹⁶ o le a e lagona le filemu o le Agaga.¹⁷

Lona tolu, faamagalo oe lava i agasala ma vaivaiga. E le o faamoemoe le Tama Faalelagi e te atoatoa lelei i lenei olaga. Na Ia silafia o le a sese Lana fanau, a o latou aoao mai aafiaga o le olaga nei. Ae peitai, “ua faapea lava ona alofa mai o le Atua i le lalolagi”¹⁸ ua faapea ona saunia ai e Lana fuafuaga o le fiafia se Faaola alofa mutimutivale.

Na fetalai Iesu, “Aua o au le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”¹⁹ Amata ia te oe lava, ma ia faamagalo atu foi i isi. Afai o le a le toe manatua e le Atua a tatou agasala ua salamoina,²⁰ aisea la e tatau ai ona tatou [manatuaina]? Aloese mai le maimauina o le taimi ma le malosi e saga ola ai i taimi ua tuanai.

Ina ia faamagaloina oe lava faapea ma isi, e tatau ona e faatuatua i le Togiola a Iesu Keriso. Sa tatalo le perofeta o Senoka, “Ua e toasa, le Atua e, i lenei nuu, aua e le malamalama ia te i latou au mea alofa na e foaiina mai ia te i latou ona o lou Alo.”²¹ E faanoanoa lo tatou Tama oi le Lagi pe a tatou faatapulaaina le mana o le taulaga togiola a Lona Alo. A o e faatinoina le faatuatua ia Iesu Keriso, e mafai ona e “aveeseina”²² lou tausalaina. Afai e tumau pea le tausalaina i le mavae ai o le salamo faamaoni, ia talitonu i ou taitai perisitua ina ua latou tautino atu ua e agavaa.²³

Lona fa, tumau le faamoemoe i le ola faavavau. Afai e te manatu o au agasala na faia muamua, amioga sese, ma faaiuga le lelei e taofia ai oe mai le mauaina uma o faamanuiaga a le Atua, ia mafaufau i le aafiaga a Alema le Matua. I le faatatau atu i tausaga a o talavou ma a o avea ma se faitaulaga amio le mama mo le Tupu amioleaga o Noa, na tautino ai e Alema, “Na lavea foi au i le mailei, na ou faia foi mea e tele ua inosia i le silafaga a le Atua, na tupu ai lo’u salamo matua tele.”²⁴ Peitai sa salamo Alema ma le atoatoa faapea ma le Togiola maoae a Keriso, na faapea ona avea ai Alema ma se perofeta ma na folafola atu i ai le ola faavavau.²⁵ A o e faia le mea sili e te mafaia ina ia [e] usiusitai ma salamo, e mafai foi ona e maua se nofoaga i le malo selesitila e ala i le Togiola ma le alofa tunoa o Iesu Keriso.²⁶

Lona lima, saili le olioli i aso taitasi. O se tasi o puna o le olioli o le auauna atu, aua pe a e pisi i le fesoasoani atu i isi, o le a itiiti se avanoa e te tiga ai i au lava agasala. Na aoao mai ma le poto le Faaola, “Aua ai se fia faasaogalemuina lona ola, e maumau ai ia te ia; a o le faamaumau lona ola ona o au, ma le tala lelei, e faasaoina e ia.”²⁷

O le a e maua le olioli tele i le olaga pe a e lafoaiina le masalosalo lea e tupu mai a o faasolo ina e matua, ae suia i le mautinoa faatamaitiiti. O le mautinoa o se uiga e mafai ai ona tatou iloa le aao agalelei o le Atua i mea e tutupu i lo tatou olaga. Ua fautua mai se viiga e sili ona [ou] fiafia i ai, “Faitau ou manuia; mai le Atua.”²⁸

Ou te molimau i le Tama Faalelagi, o le aapa mai ma le alofa tele ma le ofoofogia i Lana fanau taitoatasi. E tuuina atu lau molimau ia Iesu Keriso, o lē “malosi e faaola”²⁹ i tatou mai o tatou le atoatoa, vaivaiga, ma agasala. Ou te molimau atu i le Agaga Paia, o lē o le a faatasi i le tagata le atoatoa ae ua salamo. Ia te outou le Au Paia faamaoni ma agavaa o e tauivi ma mailei a le tiapolo i aso amuli,³⁰ “ia alofa le Atua ina ia māmā a outou avega ona o le olioli mai lona Alo.”³¹ I le suafa paia o Iesu Keriso, amene.