E Dua na Lesoni mai na iVola i Momani

E a vakayagataka na ivolanikalou ko Eroni, e dua na daukaulotu uasivi, me vakavulica kina na nodra tui na Leimani kei ira na tamata i Amoni baleta na vakabauta kei na veivutuni kei Jisu Karisito kei na ituvatuva ni marau (raica Alama 22:12–14; 23:4–5). Nikua, na wiliki kei na vulici ni ivolanikalou e tomana na tarai ni noda vakabauta, vukei keda me da vorata na veivakatovolei, ka vakatarai keda me da toro voleka vua na Tamada Vakalomalagi kei na Luvena, ko Jisu Karisito.

Ia, na wiliki ni ivolanikalou e rawa ni solia vei keda yadudua e dua na bolebole. E wasea ko Peresitedi Boyd K. Packer na imatai ni nona sasaga me wilika na Vola i Momani ni se qai yabaki tini vakacaca. E kaya: “Au dolava kau wilika, ‘Koi au, ko Nifai, erau sa rui vinaka na noqu itubutubu’ (1 Nifai 1:1)… . Sa dua na ka talei, kau sa vakamuria sara toka me yacova niu sa tara yani na veiwase ni Aisea… . Ia ena vica na vula ki muri au sa mani lewa meu saga tale meu wilika na iVola i Momani. Au wilika, ‘Koi au, ko Nifai, erau sa rui vinaka na noqu itubutubu,’ ia ena veigauna kece au yacova kina na ilati ni veiwase ni Aisea… . E muri sara au lewa meu sa na wiliki ira ga.”³

Ia e ka dina e a wiliki ira ko Peresitedi Packer. Na kena idola na gugumatua. Ena noda wilika yadua na ivolanikalou, ena vakaibalebale vei keda na veivosa era dau lecavi tu. Ko rawa ni wilika baleti ira na tamata qaqa kei na nodra ivalavala veivakayaloqaqataki. Ko rawa ni vulica na yalololoma ni Turaga. Ia e uasiviti ira kece, ko rawa ni vakila na loloma ni Kalou ka kila ni ko Jisu Karisito e noda iVakabula.

Na masu e dua tale na sala me tarai cake kina na vakabauta. Ni via kila na nodra tui na Leimani na cava me cakava me ciqoma kina na marau ni kosipeli, e a masu vua na Turaga (raica Alama 22:16–17). Koi keda talega e yalataki vei keda ni kevaka eda na kerekere, ena soli vei keda.

Ko Stanley e dua na yabaki 19 dauvakatataro e Hong Kong. E uqeti na yalona baleta na kosipeli ka vinakata me papitaiso me yacova na gauna era vakalewa kina na Lotu na nona itokani. E sotavi rau na daukaulotu. Erau vakadinadinataka ni Kalou ena sauma na nona masu ni rui kauwautaki koya. Erau sureti koya me tekiduru ka taroga vua na Tamada Vakalomalagi se dina na ivakavuvuli. E tekivuna e dua vei rau ka tarava na kena ikarua ena masu leleka. Sa qai masu ko Stanley. Ni mai tinia na nona masu malumalumu, erau tarogi koya, “Stanley, na cava ko vakila?” E laveta cake vakamalua na uluna ka vaka me vakasolokakana ena nona sauma, “Papitaiso, papitaiso.”⁴

A iotioti, na vakayacori kei na maroroi ni veiyalayalati e vakatubura talega na vakabauta. Era yalayala na tamata i Amoni “me ra soli ira me ra mate ia me ra kakua ga ni vakadavea tale na nodra dra na wekadra” (Alama 24:18).

Eda yalayala ena gauna ni papitaiso ka da taura na yaca i Karisito. Eda talevi ena yalayala ko ya ni da vakaivotavota ena sakaramede. Ia ni da maroroya na veiyalayala oqori, ena noda itokani tikoga na Yalo Tabu. Sai koya na Yalo Tabu, na Dauveivakacegui sara mada ga, ka vakavulica vei keda na “veika kecega” (Joni 14:26).

E dua na marama ena korolevu ko Mexico erau a gole yani ki nona vale na daukaulotu ni se qai yabaki 16. E kaya ni rau veivakavulici ena Yalotabu, “e vaka me rau kauta tani mai mataqu na ivadreti ka vakamakaretaka na Turaga na noqu kila… . Na vosa ni Kalou kei na noqu masu e vakaukauwataki [au] meu vorata na noqu vakatovolei tarava, meu sotavi tamaqu. Ni ratou cati au na noqu matavuvale baleta niu sa papitaiso, e a vakaukauwataki au na Yalo ni Turaga ena nona vakasolokakanataka mai: ‘Toso tikoga. Lako tikoga. Era na lewe ni Lotu eso na wekamu.’”⁵

Na ivolanikalou, masu kei na vakayacori kei na maroroi ni veiyalayalati e sega walega ni sa vukei ira na tamata i Amoni ia ko ira talega na imatai-ni itabatamata era lewenilotu e veivanua kece—wili kina koi au. Ko raica, erau sa rui vinaka na noqu itubutubu, ia e a sega ni vakavulici vei au e vale na kosipeli. Ia, erau vakavulici au na noqu itubutubu ena kena talei na bula savasava kei na itovo vinaka. Au nanumi tamaqu, sega ni lewenilotu, ka vukei au meu vola na imatai ni noqu vosa ena lotu. Na iulutaga na yalodina ia me isosomi ni kena cavuti na ika tinikatolu ni yavu ni vakabauta, keirau vakayagataka na ivakaraitaki ni dua na tamata ka yacana buli ko Abe na Yalodina (Honest Abe).

E a vakatautaki tu vei ira na qasenivuli ni Lalai, iliuliu ni Goneyalewa, kei ira na iliuliu vakabete me ra solia vei au na ivakavuvuli ni kosipeli. Niu se qai yabaki vitu, e a vakavulica vei keimami na masu na noqu qasenivuli ni Wilivola ni Sigatabu, kau vinakata meu masu. E vakavulica vei keimami na ikatini kau vinakata meu saumi ikatini. E vakavulica vei keimami na lolo, ka, rairai, au se qai yabaki vitu, kau cata meu lolo. Ia ni vakavulici keimami me baleta na papitaiso, au vinakata meu sa na papitaiso. Au vakavinavinaka vei rau na noqu itubutubu vinaka ena nodrau tokona na noqu lewa ia erau qai lewe ni Lotu talega e muri.

Ko ira na tamata i Amoni era bulataka na kosipeli, ka “ra sa tudei sara na nodra vakabauta na Karisito, ena nodra bula taucoko” (Alama 27:27). E tekivu mai vei ira. Ia e tekivu mai vei keda. Me vaka ni da imatai-ni itabatamata era lewenilotu ka da sa rawata na noda ivakadinadina e sa tu oqo na noda itavi me da vakavulici ira na gone nikua. E dodonu me da vakavulici ira ena noda vuvale kei na kalasi. E dodonu me da vakavulica vei ira na vosa ni Kalou mai na ivolanikalou. E dodonu me da vakavulica vei ira na kaukauwa ni masu ka da vakavulica vei ira na veivakalougatataki ni kena vakayacori kei na maroroi ni veiyalayalati. Ia kevaka eda vakavulici ira, era rawa ni ra kaya:

Ena yaca i Jisu Karisito, emeni.