Itinitini ni Vosa

iVakatakilakila

Kemuni na taciqu kei na ganequ lomani, eda sa marautaka e dua na koniferedi totoka. Eda sa vakatabuya tale na Valecavu e Salt Lake, ni da vakayagataka tale ni oti e dua na kena vakavoutaki vakaitamera. Eda sa vakasinaita na Vale ni Koniferedi oqo ki na kena iyalayala ena veisoqoni kece. Na noda vosa e sa lako kosova yani na vuravura raraba ki vei ira na lewe ni Lotu era tu vakavoleka kei ira era tu vakayawa.

Oqo, eda na lesu ki na noda vuvale. Keitou vakadreti kemuni ka na draiva tiko mo ni qaqarauni. Me kua ni dua na vakacalaka me vakarusa na yalo totoka ni soqo oqo.

Keitou nuitaka ni ko ni na vakayagataka na mekesini ni lotu tabaki ena Me me ivola ni lotu vakamatavuvale, me taleva tale kina na veika e tukuni ena koniferedi oqo. Na veika era wasea ko ira yadua era vosa era vakarautaka ena nodra sasaga ena masumasu me solia mai na kila ka, ka na veivakauqeti, ka vakavuna vei ira era rogoca me ra saga me ra vakatorocaketaki ira tale vakalailai ka vinaka cake tale vakalailai.

Me tiko mada ga na vakacegu kei na veiyaloni ena nomuni vuvale. Kemuni na turaga, ni lomani ira ka karoni ira na watimuni. Era nomuni iyau talei duadua. Kemuni na marama, ni vakayaloqaqataki ira na watimuni ka masulaki ira. Era gadreva tu na veivuke kece e rawa ni soli vei ira. Kemuni na itubutubu, ni lomani ira na luvemuni. Sai ira oqo na itabatamata e muri, ka ra na kauta mai na dokai ki na yacamuni.

Oqo, ni da veitawasei ena dua tale na gauna, me vakalougatataki kemuni na Kalou, oi kemuni na noqu itokani daulomani. Au masulaka oqo, niu vakamoce, ena yaca i Jisu Karisito, emeni.