Na iTukutuku ni Veivakalesuimai

Na icavacava ni taucoko ni itabagauna oqo e a kau mai ena dua na raivotu uasivi kivua e dua tale na gonetagane ka se bera sara ni yacova na yabaki 15, ka a lako ki veikau me masulaka na isau ni nona taro e vakananuma tiko me baleta na lotu. E vakamacalataka o Josefa Simici na lagilagi ni raivotu ka raica, ena veivosa oqo:

“Au sa raica kina e cake e dua na duru bukawaqa, donuya tiko na uluqu, ni sa lako sobu tiko mai ka serauni au; ia sa sivia sara na ramase ni matanisiga.

“… Ia ni sa mai toka e mataqu, au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa; raica e rau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya!” (Josefa Simici—A iTukutuku, 1:16–17).

E vakatakila vei keda na raivotu oqo ni Kalou, na Tamada, kei Jisu Karisito, na Nona Gone ni Toko, e rau duidui tamata. E rau yadua na yago vakalewena ka vakasuina ka sa vakalagilagi ka vakataucokotaki, e vakavuna na kena vakadodonutaka na vakanananu cala ka se tu mai ena vuqa na veisenitiuri sa oti yani me baleta na vakanananu ni Kalou. E sega ni lomatarotarotaki nona vola o Josefa Simici na Yavu ni Vakabauta, ena kena imatai e tukuna: “Keimami vakabauta na Kalou na Tamada Tawamudu, kei na Luvena ko Jisu Karisito kei na Yalo Tabu”? (Yavu ni Vakabauta 1:1)

Ena kena kilai ni vakatitiqa, tawavakabauta, kei na itukutuku cala e rawa me vakasauri nona salamuria mai na Parofita ena nona nanuma lesu na iMatai ni Raivotu, e kauta sara mai na Turaga na iVola iMomani, e dua tale na ivakadinadina ni noda Turaga, o Jisu Karisito. Na ilavelave makawa ni veivolanikalou tabu sa ikoya e dua na itokani tabu ni iVola Tabu, ka lewena na ivakavuvuli sa dina ka tudei iJisu Karisito. E vakarautaka tale ga na ivakadinadina veivakauqeti ki vuravura ni o Josefa Simici e parofita dina ni Kalou. E tiko ena Vunau kei na Veiyalayalati na itukutuku me baleta na lako mai ni iVola iMomani:

“E a solia vei [Josefa Simici] na [Kalou] na nona ivakaro ka vakauqeti koya sara;

“A sa solia vua na kaukauwa mai lagi kei na iyaya sa vakarautaki tu mai, me vakadewataka kina na iVola iMomani;

“Sa volai tale tu ga kina na uto ni ivakavuvuli iJisu Karisito vei ira na matanitu tani kei ira tale ga na Jiu;

“A vakatakila mai na Kalou, ia a qai mai vakaraitaka na agilosi vei iratou na lewe tolu me ratou vakadinadinataka ki vuravura—

“Na ivola oqo sa ivakadinadina e vuravura ni sa dina na iVola Tabu; sa kilai tale ga kina ni sa dauuqeti ira ka daulesia na Kalou na tamata me ra qarava na nona cakacaka tabu ena itabatamata oqo, me vaka vei ira na itabatamata e liu” (V&V 20:7–11).

Na vakadewataki ni iVola iMomani sa ikoya e dua na ka veivakurabuitaki vakaikoya ka tosoya cake na ivakadinadina ena kena vakalou na kena ivakatekivu. Ena nona yaco yani o Oliver Cowdery ki Harmony, Pennsylvania ena ika 5 ni Epereli, 1829, me veiqaravi vakavunivola ni Parofita, e se qai vakadewataki walega e vica na draunipepa ena iotioti ni tiki ni vosa. Ena yakavi bogi o ya me yacova yani na lomaloma ni bogi, e rau a dabe vata o Josefa kei Oliver ka veivosakitaka kina na veika e a sotava na Parofita. Ena ika 7 ni Epereli, ni oti e rua na siga, e rau a tekivuna na vakadewataki ni cakacaka. Ena loma ni tolu na vula ka tarava, e vakadomobula na vakavakadewa nei Josefa—e rauta ni 500 na draunipepa tabaki ena loma ga ni 60 na siga ni cakacaka.

E vola o Oliver na veivakurabuitaki ni veika e sotava: “Oqo na veisiga guiguilecavi dredre—mai na dabe ka rogoca na domo iJosefa ena nona cavuta na vosa veivakauqeti mai lomalagi, bulia na vakavinavinaka uasivi duadua e lomaqu! Ni cava na veisiga yadua au tomana, sega ni vakasosani, me volai ni lutu mai gusuna, ena nona vakavakadewa, vata kei na Urimi kei na Cumimi… na itukutuku makawa, se itukutuku vakaivola, vakatokai ‘A iVola iMomani’” (Messenger and Advocate, Oko. 1834, 14; raica talega Josefa Simici—A iTukutuku 1:71, ivakamacala e ra).

Ena nodrau tosoya tiko, e rau vakadrukai o Josefa kei Oliver ena ivunau ka ra tu ena ivola oqo. E rau kauwaitaka vakalevu sara na veiyalayalati ni papitaiso me vaka e vakavulica na iVakabula ka a tucake tale ena Nona a veisiko yani kivei ira era vakaitikotiko ena Western Hemisphere. Na kena bibi na ivunau ni papitaiso e a vakatakilai vakamatata sara ga ki na nodrau vakasama. E rau vakadeitaka ni dodonu me rau vakasaqara na Turaga ena masumasu vagumatua ni na rawa ni rau vulica kina me rau ciqoma vakacava na veivakalougatataki ena nodrau papitaiso sara ga o rau.

Ena ika 15 ni Me, 1829, e rau a lako ki veikau volekata na Uciwai na Susquehanna ka tekiduri sobu ena masumasu. E vakamacalataka o Oliver na ka e a qai yaco: “E vakasauri, me vaka beka na lomadonu ni tawamudu, na domo ni Dauveivueti sa vakatakila mai vei keimami, ena kena a tadola mai na lomalagi ka lako sobu mai na agilosi ni Kalou e vakaisulu tu ena lagilagi, ka solia mai na itukutuku eda a nanamaki tiko kina, vunautaki ni ivakavuvuli ni veivutuni!—Eda marautaka! eda lomatarotarotaka! e veivakurabuitaki! Ni vakaleqai [tu] na vuravura ka vakagolei tani tu—e milioni era sa [vakayayamo] voli ki na bai me vakataki ira na mataboko, o ira na tamata era vakabauta na veika sega ni vakadeitaki, vakararaba ena kabuwacara, e a qai raica na matada—e rogoca na daligada” (Messenger and Advocate, Oko. 1834, 15; raica talega Josefa Simici—A iTukutuku 1:71, ivakamacala e ra).

E vakaveikilaitaki koya na agilosi ni yacana ko Joni, io ko Joni na Dauveipapitaiso ka tukuni ena Veiyalayalati Vou. E a tabaka na uludrau o Josefa kei Oliver ka kaya:

“O ikemudrau na noqu itokani, au sa lesi kemudrau ena yaca ni Mesaia ki na itutu ni bete vaka-Eroni, ka solia vei kemudrau na kaukauwa kei na lewa ni ilesilesi oqori; io na nodra cakacaka na agilosi dauveiqaravi, na vunautaki ni ivakavuvuli ni veivutuni kei na papitaiso ena tabadromuci e wai me bokoci kina na ivalavala ca; raica ena tudei tu e vuravura na ilesilesi oqo; io me ra vakacabora mada vua na Turaga na isoro sa dodonu ko ira na luvei Livai.

“A kaya ko koya ni sega ni tu ki na Matabete iEroni na kaukauwa me soli kina na isolisoli ni Yalo Tabu ena veitabaki ni liga, ia ena qai soli e muri vei keirau; a vakaroti keirau me keirau laki veipapitaisotaki, ka vakasalataki keirau meu papitaisotaki Oliver Cowdery e liu, ka qai papitaisotaki au e muri ko koya.

“Keirau a lako sara ka kitaka vakakina. Au papitaisotaki koya taumada, qai papitaisotaki au ko koya—oti au a tabaka na uluna ka lesi koya ki na Matabete iEroni, a qai tabaka na uluqu ko koya ka lesi au tale ga ki na matabete oqori— io me vaka na ka sa vakaroti vei keirau” (Josefa Simici—A iTukutuku 1:69–71).

Ni oti e dua na gauna lekaleka, eratou basika mai na iApositolo o Pita, Jemesa, kei Joni, tabaka na ligadratou ena uludrau na lewe rua na dauveiqaravi oqo, ka vakatikora vei rau na Matabete iMelikiseteki.

Ni sa tiko tale e vuravura ena gauna oqo na kaukauwa ni veiqaravi ena yaca ni Turaga, e a vakaroti o Josefa me tuva vakaivakarau na Lotu. Ena ika 6 ni Epereli, 1830, ena vale nei Peter Whitmer Sr. e Fayette, New York, e ono na turaga era a papitaiso taumada era digitaka vakalevu sara me ra tuvanaka, me vaka na ivakaro ni Kalou, na Lotu iJisu Karisito. Ena soqoni oqo e a ciqomi kina e dua na raivotu:

“Raica, mo dou vola tiko e dua na volatukutuku ni cakacaka; ia me volai kina [Josefa Simici] ni ko sa daurairai, dauvakadewataka na vosa, parofita ka iapositolo iJisu Karisito, ia mo italatala qase ni lotu me vaka na lewa ni Kalou ko Tamada, kei na loloma ni nomu Turaga ko Jisu Karisito,

“Ia ena vakauqeti iko na Yalo Tabu mo tuva na yavu ni lotu ka tara cake ena vakabauta.

“A mai tauyavutaka ka vakaduri na Lotu ena ika ono ni siga ni vula ko Epereli, ena ikadua na udolu, walu na drau tolusagavulu ni yabaki ni noda Turaga.

“Raica sa kilikili sara mo dou muria na lewe ni lotu na vosa kei na ivakaro kecega sa vakatakilai vua me tukuna vei kemudou, io mo dou caka dodonu kina e mataqu;

“Ia mo dou vakabauta ka muria na ka sa tukuna, me vaka ga au sa tukuna vei kemudou” (V&V 21:1–5).

Ia na Lotu iJisu Karisito e a tiko tale e vuravura me vakalougatataki ira na tamata ena ivunau kei na ivakavuvuli ni iVakabula. Na Lotu oqo e a tuvanaki me vaka na ituvatuva ni Turaga ka tauyavutaki ena gauna makawa.

E na iVola Tabu, ena ivola iEfeso, e a tukuna o Paula:

“Ia sa ikoya sa solia eso, me ra iapositolo; ka so, me ra parofita; ka so, me ra tamata dauvunau voli; ka so, me ra ivakatawa ka ivakavuvuli;

“Me ra vakavinavinakataki kina ko ira sa lotu, me ia na cakacaka ni italatala, me vakatataki cake na ivavakoso nei Karisito:

“Me da yaco sara ko ikeda kecega me da lomavata ena vakabauta, ka kila sara na Luve ni Kalou, me da tautauvata kei na ivakarau ni tamata dina, era sa sinai sara kei Karisito:

“Me da kakua ni vagonegonea tiko, ka veitosoyaki ka veikauyaki ena cagi kecega ni ivakavuvuli, ena ilawaki ca ni tamata, ena dauveivaqaseni sa nakiti kina na veivakacalai;

“Ia me da ia na ka dina ena yalololoma, me da tubu cake vei koya ena ka kecega, vei koya ga na uluda, na Karisito” (Efeso 4:11–15).

E kaya o Peresitedi Hinckley me baleta na Vakalesuimai: “Ni oti na nodra lako mai ki vuravura e vuqa na veitabatamata—e vuqa sara vei ira era sega ni duavata, veicati, butobuto, ka ivalavalaca—e qai yaco mai na siga vou, ka cecere ni Veivakalesuimai. Na kosipeli lagilagi oqo e a qai vakaraitaki mai vata kei na rairai mai ni Tamada kei na Luvena kivua na gonetagane o Josefa. Na kida mai ni icavacava ni itabagauna e cilava na vuravura. Na veika vinaka taucoko, e rairaivinaka, na vakalou ni veitabagauna sa oti yani e a vakalesuimai ena gauna uasivi duadua oqo” (“The Dawning of a Brighter Day,” Liaona, Me 2004, 83).

Na noda itukutuku e sega ni dua na ka me tautauvata kaya. Eda vakaraitaka ki vuravura ni taucoko ni kosipeli iJisu Karisito e sa vakalesuimai ki vuravura. Eda vakaraitaka ena doudou ni kaukauwa ni matabete e sa vakalesui mai kivei ira na tamata, vata kei na kaukauwa ni vauci e vuravura kei lomalagi. Na taqomaki ni cakacaka tabu e vakarogotaka na Turaga ni gadrevi me baleta na rawati ni bula tawamudu vata kei Koya e rawa me vakayacori ena gauna oqo ena vauci vata ni kaukauwa mai vei ira era kilikili me ra vakayacora na kaukauwa ni Nona matabete tabu. Eda kacivaka yani ki vuravura ni sa ikoya oqo na siga ka vagolei kivei ira na parofita ni ivolatabu me ikarua ni gauna. E sa ikoya na iotioti ni gauna, ni se bera nona lako mai o Jisu Karisito me lewa ka veiliutaki e vuravura.

Keimami sa sureti kemuni kece mo ni rogoca mai vei keimami na itukutuku ni vakalesuimai vei keda na kosipeli iJisu Karisito. E sa na qai rawa mo ni vakatautauvatana na itukutuku lagilagi vata kei na veika e rawa mo ni rogoca mai vei ira na tani, me rawa mo ni vakadeitaka kina na kena mai vua na Kalou kei na kena mai vua na tamata.

Na noqu ivakadinadina kivei kemuni sa ikoya ni oqo na Lotu iJisu Karisito, tauyavutaki ena iotioti ni gauna. Ena yaca ni noda Turaga ka iVakabula, o Jisu Karisito, emeni.