E Dina Na Kosipeli, Se Vakaevei? Ia Na Cava Tale E Bibi Cake?

iVakatakilakila

Au taura me noqu vosa ni kua e dua na ka e a tukuna ko Peresitedi Hinckley ena koniferedi raraba ni Epereli 1973.

Au se qai lesu ga mai ki vale ena kaulotu. E levu sara na ka e tu e mataqu. Au na rawa beka ni vakayacora tiko ga na digidigi dodonu ena noqu bula kece?

E a qai-wasea o Elder Gordon B. Hinckley na nodrau sota kei na dua na turaganivalu e wai, gone, mai Esia. E sega ni Lotu Vakarisito na turaganivalu, ia ena nona vuli tiko e Amerika, e a rogoca kina na Lotu ka papitaiso. Ka sa vakavakarau tiko oqo me lesu tale ki nona vanua.

E a taroga na turaganivalu ko Peresitedi Hinckley: “Era sega ni Lotu Vakarisito na kainomu. Na cava ena yaco ni ko sa na lesu vaka dua na Lotu Vakarisito ki na nomu vanua, ka vakabibi, ni dua na Momani Vakarisito?”

E rairai lomaleqa na turaganivalu, ka sauma: “Eratou na rarawa na noqu vuvale… . Me baleta na noqu veimataka kei na noqu cakacaka, sa na rawa ni sogolati vei au na veisolisoli kece sara meu vakayagataka.”

E taroga ko Peresitedi Hinckley, “Ko na rawa beka ni sauma e dua na isau levu vakaoqori me baleta na kosipeli?”

Ena tonawanawa ni yaloka ni matana butobuto, e sauma ena taro: “E dina beka, se vakaevei?”

E sauma ko Peresitedi Hinckley. “Io, e dina.”

E sauma na turaganivalu, “Ia na cava tale e bibi cake?”¹

E vakayabaki na noqu dau vakasamataka tu na vosa oqori: “E dina beka, se vakaevei? Ia na cava tale e bibi cake?” Na taro oqo erau vukei au meu raica vakamatata na veika e dredre.

Na inaki eda cakacakataka tiko e dina. Eda doka na nodra vakabauta na noda itokani kei ira na wekada. Oi keda kece eda luvena tagane kei na yalewa na Kalou. Eda rawa ni vulica e levu na ka mai vei ira na turaga kei na marama vakabauta ka vinaka, me vaka e vakavulica vakavinaka vei keda ko Peresitedi Faust.

Ia eda kila ni ko Jisu e Karisito. E sa tucaketale. Ena gauna edaidai, mai na Parofita ko Josefa Simici, na matabete ni Kalou sa vakalesui mai. E tiko vei keda na isolisoli ni Yalo Tabu. Na iVola i Momani, e vaka saraga na veika eda tukuna ni okoya. Na yalayala ni valetabu e dina. Na Turaga Vakaikoya e vakaraitaka na taudua kei na kena dua ga na ilesilesi ni Lotu i Jisu Karisito ni Yalododonu Edaidai me dua na “nodra rarama na kai vuravura” ka “ivakarau vei ira na noqu tamata … me caramaka na sala e [Matana]”² me vaka “na tete [yani] ni itukutuku vinaka me yacova na iyalayala kei vuravura.”³

E dina beka, se vakaevei? Ia na cava tale e bibi cake?

E dina, vei keda kece, e tu eso tale na veika ka rawa ni bibi cake. Ena noqu rogoca na vosa nei Peresitedi Hinckley me vaka e dua na yabaki 21, sa na gadrevi meu qacoya vakaukauwa na noqu vuli; sa na gadrevi na cakacaka meu vuli rawa tiko kina; meu sa na vakasamataka talega e dua na kena ivukivuki meu na moica rawa e dua na gone marama totoka me na solia vei au e dua na gauna; kau marautaka talega eso na itavi qaravi kilikili.

Eda na vakadeitaki keda vakacava rawa tiko ena veika era bibi cake? Meda vakarawarawataka ka vakamakaretaka na noda rai. E so na ka e ca ka so e dodonu mera levei; e so na ka e vinaka; e so na ka e bibi; ka so era yaga sara. E tukuna na iVakabula: “Ia sai koya oqo na bula tawamudu me ra kilai kemuni, na Kalou dina duaduaga, kei Jisu Karisito ko ni a tala mai.”⁴

Na vakabauta e sega walega ni dua na ka me vakilai; e dua na vakatulewa. Ena masu, vuli, talairawarawa, kei na veiyalayalati eda na tara ka viribaita kina na noda vakabauta. Na kaukauwa ni noda vakabauta na iVakabula kei na Nona cakacaka ena gauna edaidai ena yaco me dua na iloilo ni vakalevutaki ni ka somidi ka na vukei keda ena noda vakatulewataka na veika kece. O koya gona, ena gauna eda curuma kina na veivakatovolei dredre ni bula, me vaka e vakamacalataka ko na italatala qase Oaks, sa na tu vei keda na kaukauwa me da muria na sala e dodonu.

E kaya vaka oqo ko Peresitedi Hinckley: “Ena gauna e vakayavalati kina [e dua] ena veirawai kaukauwa ni dina, e sa na qai rawa ni lewai koya rawa vakavinaka, e sega ni vuna na veitavi ni Lotu ia e baleta ga na kila ka sa tiko e utona.”⁵

Eda sa vakayavalati vakarauta tiko li ena “veirawai kaukauwa ni dina”? E salavata tiko beka li kei na noda veidigidigi na veivakayavalati oqo? Eda sa vakataki koya beka eda vinakata me da ucia? E dina beka, se vakaevei? Ia na cava tale e bibi cake?

Eda sa kila na ka dodonu. Ena vica na yabaki sa oti e a tiko vata kei iratou na makubuqu na watiqu, o Kathy, ni rau gole tu na nodratou itubutubu. E a biligi tacina vakaukauwa na makubui keirau yabaki va. Ni vakadula oti na gone e tagi tiko oqo, e a vuki vua na yabaki va ka taroga ena vakanananu, “Na cava ko biliga kina na tacimu lailai?” E rai vei buna ka sauma, “Mimi, au kerea meu vosoti. Au vakayalia na noqu mama ni DND (CTR), kau sega ni rawa ni digia na dodonu.” E gadrevi me da qaqarauni baleta ni iulubale e rawa ni vakaberaberataka na noda toso.

“Na vakaitamera kei na kaukauwa ni veirawai ni dina” e laurai ena utodra na Yalododonu Edaidai ena vei vanua e vuravura taucoko. Na kaukauwa ni vakabauta oqo ena tosoya ki liu na cakacaka ni matanitu.

Ena vica vata na yabaki sa oti keirau a tu vakaveiwatini e yasa ni dua na marama yaloqaqa mai Varanise ena gauna e takosova yani kina na watina, ka se qai yabaki 30, na ilati. Na itavi ni veivakavulici vakadodonu ka veituberi taudua vei iratou e lewe va na luvena lalai e vaka me tarabi sara. Ia ni oti e 16 na yabaki e ratou lesu mai na kaulotu ko iratou na luvena tagane ka sa vauci ena valetabu na luvena goneyalewa.

Au kila e dua na turaga mai Brazil ka curu ena Lotu ni yabaki 16, e lewe ni lotu taudua ena nona vuvale. Ena gauna me kaulotu kina, e rau besetaka na nona itubutubu. E sega ni dua na ka e rogoca mai vei rau ena nona kaulotu voli ka lesu ki vale kina vale nei nona bisopi. Ia, e marautaki na kena itinitini na italanoa, ka ni sa mai tiko e dua na nona matavuvale totoka, cakacaka vaka vuniwai ni cavubati, ka rau gadreva na nona itubutubu ke rawa ni vakauqeta vei iratou na tacina na Lotu.

Au kila e dua na turaga ena vanua vaka Latin America ka nakita me sega walega ni, sauma vakadodonu na nona dua na ikatini ni oti na nona papitaiso, ia ena sauma taucoko sara na nona ivakacavacava, e dua na ka era sega ni vakayacora ko ira era veiqati kaya tiko. E vakalougatataki koya na Kalou ena nona yalodina.

E levu na solibula era dau yaco lo ga: ko ira na kaulotu sa lesu mai era sega ni vakadaroya na nodra itavi me ra vakasaqara na nodra itokani tawamudu; ko ira na marama yalododonu ka ra gadreva na gone ka ra solia na nodra bula mera susugi ira ena loloma kei na dina; na veimatavuvale era vakalailaitaka ena qaqarauni na veidreti ni tabana ni itukutuku kei na Initaneti ka rawa ni vakacacana na yalodra; ko irau na veiwatini e segata e levu cake na gauna ni nodrau lako vata ki valetabu.

Era rawa ni vakarabailevutaka na gone na iloilo ni vakalevutaka na ka somidi oqo ni vakabauta. Au a qai sota wale ga kei ira na itaba gone mai Seoul, Korea, e ra, sega ni dau yaco ki nodra vuvale me yacova ni sa bogi levu sara ena veibogi, me vaka ni sa rui levu sara na nodra cakacaka ni vuli, ia era tiko rawa tale ena semineri e veisiga ena 6 ena mataka lima na siga dua na macawa. Au kila e dua na dau qito tavi polo (baseball), yabaki walu dau qito kilai ni timi, e vakamacalataka vakaikoya vua na nona dauniveivakavulici ni na sega ni rawa ni vakaitavi ena iotioti ni qito baleta ni na vakayacori tiko ena Sigatabu.

E levu na ivalavala lo ni vakabauta e titobu e kila taudua ga na Kalou. Ia era volai mai lomalagi. E dina beka, se vakaevei? Ia na cava tale e bibi cake?

E tukuna na iVakabula, “Ia dou vakasaqara taumada na matanitu ni Kalou, kei na nona yalododonu; ia ena soli me kena ikuri vei kemudou na ka kecega oqo.”⁶

Au vakadinadinataka ni dina oqori ka rui bibi sara. Ena yaca i Jisu Karisito, emeni.