Ko Cei e Tu ena Nona Yasana na Turaga?

iVakatakilakila

Kemuni na taciqu kei na ganequ lomani, au vakavinavinaka ni da bula ena veisiga kei na gauna era sa tu kina e delai vuravura na iapositolo kei na parofita ka ra veivakauqeti ka veidusimaki tiko vei keda. Au vakadinadinataka ni ko Peresitedi Hinckley e parofita dina ni Kalou—me vakataki Mosese, Eparaama kei ira kece na vo ni parofita mai na itekivu ni vuravura. Au vakavinavinaka ena vuku ni nona ivakasala ena mataka nikua kei na gauna talei ena noda, ni cava na koniferedi oqo me da rogoci koya tale.

Nikua au na vosa tiko vakabibi vei ira na cauravou kei na goneyalewa ena Lotu, ka vakakina vei ira na nodra itubutubu kei na iliuliu. Au vosa talega vei ira cauravou kei na goneyalewa itabaqase ka tu vei ira na veitaledi vakasakiti eso kei na rawa ka kei na veika e tu vei ira ka rawa ni vakayagataki ena veiqaravi ena matanitu.

A kaya vaqo ko Peresitedi Hinckley me baleta na itabatamata oqo. “E sega vakadua ni bau dua na gauna vakaoqo. Sa dua na gauna vinaka ena itukutuku ni vuravura me da bula tiko kina! E sega vakadua ena dua na gauna e liu me dua kina na itabatamata itabagone vakaoqo… . “O kemuni ‘na itabatamata digitaki’” (Way to Be! [2002], 3).

O kemuni, ni ko ni itabagone e Saioni, sa tu e dua na cakacaka cecere mo ni cakava—ka sa soli vei kemuni na taledi kece kei na gauna vinaka, se na vanua cava ga o ni tiko kina, mo ni vakayacora vakadodonu sara na veika e namaka vei kemuni na Tamada mai Lomalagi. Au masuta ni na vukei kemuni ena sasaga oqori na noqu vosa ena yakavi nikua.

Ena Feperueri 1852, a papitaiso kina mai Yarmouth e Igiladi e dua na goneyalewa ka yacana ko Hannah Last Cornaby. E sega ni vakarokorokotaki me vaka na kena eda dau sotava e vuqa vei keda, ia a vakamacalataka o koya ena veivosa oqo: “Keitou raica ni ra sa wavokita tu na vale e dua na ilawalawa dau vakacaca, keitou sotava na dredre ena neitou curu maliwai ira yani… . Ni bera ni keitou yaco yani ki na bati ni wai, era sa yacovi keitou yani na ilawalawa oqo; e qai papitaisotaki au na watiqu ni mira tu yani na vatu kei na domo ni kaila … ia, e dina ni cacawiwi wavoliti keitou na vatu, e sega ni dua me tarai keitou, keitou yaco bula ki vale, ka vakavinavinaka vua na Kalou ena cakamana keitou dro bula rawa kina” (Hannah Cornaby, Autobiography and Poems [1881], 24–25).

A sega ni rawarawa na nona gauna ni bula ni oti oya. Ena vica na yabaki ka tarava, a qai vola na veimalanivosa oqo:

E dina ni qaqa ni dua na sere eda sega ni dau lagata wasoma oqo, sa yaco me dua vei ira na noqu sere taleitaki ena vuku ni kena yalayala ki na dina kei na dodonu. Io, oqo e dua na taro e dodonu me dau tiko ena nodra vakasama na cauravou kei na goneyalewa yadua e vuravura taucoko: “Ko cei e tu ena nona yasana na Turaga?” Kei na noda sauma e dodonu me “Koi au!”

Sai koya oqo na taro a tiko ena vakasama nei Nifai ena gauna a dusimaki Nifai kina kei rau na tuakana na Turaga mai vua na tamai Nifai ko Liai, me lesu tale ki Jerusalemi ka me laki kauta mai na peleti parasa. Ni rau vosa kudrukudru ko Leimani kei Lemueli, a votu mai vei Nifai na taro. “Ko cei e tu ena nona yasana na Turaga?” A sauma ka vaka, “Koi au!” ena malanivosa oqo: “Au na lako ka kitaka na ka sa vakarota na Turaga, ka niu kila ni sa dau vakarautaka na Turaga na sala me ra rawata kina na luve ni tamata na ka kece sa vakarota vei ira ko koya” (1 Nifai 3:7).

A vakakina vei Tevita lailai ena Veiyalayalati Makawa. O nanuma tiko na ivakarau, ena nona sikovi iratou na tuakana ena gauna se ivakatawa ni sipi gone voli kina, ena buca ni ivalu. Ni tiko voli kina a rogoca na bolebole nei koya na tuwawa ni Filisitia ko Koliaci vei ira na tagane ni Isireli— ka bolei ira kina me ra vala. Era sa rere na liganiwau kecega ni Isireli me ra vala vata kei na tuwawa. Na nodra sauma na taro “Ko cei e tu ena nona yasana na Turaga?” e sega ni “Koi au!” ia e “Ko cei, o au beka?”

Ia e sega vua na gonetagane ko Tevita. A taura ga na vatu kei na nona irabo na ivakatawa ni sipi ka lako yani vua na tuwawa, ka kaya, “Ko sa lako mai vei au ka vakaiseleiwau, ka vakamoto, ka vakaisasabai; ia koi au kau sa lako mai vei iko ena yacai Jiova ni lewe vuqa… .”

“Ena siga oqo ena soli iko ko Jiova ki na ligaqu; … me ra kila ko ira kecega na kai vuravura ni sa dua na nodra kalou na Isireli” (1 Samuela 17:45–46). Ena gauna ko ya, a sega ni lako rere yani ko Tevita, ia a cici yani me sotava na tuwawa. Ena vuku ni nona vakabauta na Kalou ko Tevita, a vakamatei ko Koliaci, ka qaqa ko Isireli.

Kemuni na taciqu kei na ganequ gone, ena veivanua kece au lakova. Au sotavi ira na itabagone vakaturaga me vakataki kemuni, ka ra dau sotava wasoma na Koliaci eso ni gauna oqo, me vaka na veitemaki ka dau vakavuna na noda voroka na noda veiyalayalati eso kei na ivakarau sa solia vei keda na Turaga. Sa yaco me tikina bibi sara oqo ena nomu vakavolivoliti ena ivakarau ca, na bula tawasavasava sa vakadonui raraba tu vei ira eso, na isulusulu kei na irairai sega ni rakorako, na iyaloyalo se na ivola vakasisila, kei na veika cala ena sala ni vakau itukutuku ka oka kina na retioyaloyalo kei na Initaneti, kei na kena sa taka levu tu na waigaga kei na gunu ni veivakamatenitaki. Ena dua na kena vosa, e sega ni tasivi e dua na siga eda sega ni tarogi kina, “Ko cei e tu ena nona yasana na Turaga? Ko cei?” E rua na noqu vakatutu rawarawa me vukei kemuni ena nomuni vakarautaka na nomuni isau ni taro oya.

Taumada, ni kakua sara ni guilecava o cei o kemuni. Na dina rawarawa e koto ena nodra serenilotu na gonelalai eda sa vulica mai e lewe vuqa ena Lalai: “Au Luve ni Kalou“ (Serenilotu, naba 301). Ia e sega ni talai keda ga ka mai laivi keda duadua tu eke na Tamada Vakalomalagi vuku ka dauloloma. Sa solia vei keda eso na idusidusi me vukei keda ena noda rawata na veika e namaka vei keda ko Koya. Sa solia vei keda na matavuvale me da vukea, me da lomana ka vakavulici ira. Sa solia mai na parofita bula me liutaki keda. Sa solia vei keda mai vei iratou na Mataveiliutaki Taumada, na ivakarau eso, ena ivolalailai Me iSakisaki ni iTabagone vata kei na yalayala oqo: “Keitou yalataka ni ko ni na maroroya na veivakatagedegede oqo ka bulataka na dina e tu ena ivolanikalou, ena qai rawa ni o ni qarava na nomuni itavi ena yalomatua kei na maqosa ka vosota na ka ni veivakatovolei ena nomuni kaukauwa taucoko. Ena vukei iko kina na Yalo Tabu” ([2001], 2–3).

Au dau kauta voli na noqu ilavelave ni ivolalailai oqo—e veigauna! Au bolei kemuni mo ni cakava vakakina. Ni o waraka tiko na basi se dua na nomu gauna galala, taura mai, wilika ka yalataki iko tale mo bulataka na ivakarau ena ivolalailai oya. Au yalataka vei kemuni, ni o vakayacora vakakina, ena tarava mai na marau, na yaloqaqa kei na yalodei.

Ni ko vakayagataka tiko na nomu galala ni digidigi, nanuma tiko ni ko sega ni to duadua. Me kena ikuri na Tamamu Vakalomalagi yalovinaka ka vuku, era tu tale eso era masulaki iko tiko mo dau digidigi dodonu. Niu se itabagone, niu dau lako vata kei na dua na itokani goneyalewa se vata kei ira na noqu itokani. Au dau tukuna vei rau na noqu itubutubu niu sa lesu mai ki vale. Au dau tukituki ga e na nodrau katuba, dolava ka kaya, “Au sa lesu mai,” ka lako sara yani ki moce. Ena dua na bogi niu lesu mai ena dua na gade kei na noqu itokani goneyalewa, tukituki ka dolava na katuba me vaka na kena ivakarau. Niu vakayacora vakakina, e qai cilava yani na tinaqu agilosi na rarama ni cina ni tekiduru voli ena masu. Niu raici koya, au kila se o cei e masulaka tiko. Au sega vakadua ni guilecava na gauna oqori. Na noqu kila ena gauna oqo ni se masulaki au voli ga na tinaqu e dau tokoni au ka dau taleva tiko vei au se ko cei koi au, ka niu sega ni tiko duadua voli.

Na ikarua ni noqu vakatutu: vulica mo lewa na nomu vakanananu. E dua na tiki ni ituvatuva ni marau sa solia mai vei keda na Tamada Vakalomalagi oya ni da a talai mai ki ke me da mai vakatovolei. O koya, ena dau tu ga kina na veivakatovolei. Na noda cakacaka, me vaka ni da Yalododonu Edaidai sai koya me da muria na ivunau ni Kalou, e dina ni tu na veivakatovolei e biuta tiko mai ki na noda sala ko Setani. Ena noqu bula, au raica rawa ni na rawarawa sara na noda cakava oqo kevaka eda lewa tiko na noda vakanananu—ka vakauasivi ni da rawa ni cavuqaqataka na ivakatagi, na ivolanikalou kei na veiserekali vivinaka me vakaisosomitaka na vakanananu ca e dau votu mai ena noda vakasama.

Sa vakasalataki keda ko Peresitedi Boyd K. Packer me da rawa ni cavuqaqataka e dua na serenilotu me rawa kina, ni gauna e votu mai kina e dua na vakanananu sega ni dodonu, ni da vakaisosomitaka ena dua na serenilotu. Ni vakayagataka na idusidusi oqori, e vakamacalataka kina vakaoqo e dua na noqu itokani: “Ena dua na siga au biuta na noqu valenivolavola meu laki vakasigalevu. Niu lako sivita e rua na iyatu vale, au qai kila niu vagugutaka tiko na ‘noqu sere:’ ‘Au Luve ni Kalou. ‘ Niu vakalesuya na noqu vakasama ena duanadrau na ikalawa, au qai kila ena noqu kosova na gaunisala mai na noqu valenivolavola, a takoso e mataqu e dua na goneyalewa ka sega ni rakorako na nona isulusulu. E vakasauri, kau sega ni vakasamataka sara vakavinaka, na kena sa tekivu me lako mai na noqu vakasama na qaqa ni sere kei na ivakatagi ni, ‘Au Luve ni Kalou’—me vakaisosomitaka na vakanananu ca.” Ena siga ko ya a vulica kina na noqu itokani e dua na lesoni cecere me baleta na nona lewa na nona vakasama.

E vakasakiti na nona ivakasala ko Peresitedi George Albert Smith ena ulutaga oqo ena nona kaya, “E koto e dua na laini iyalayala ni vanua ka matata vinaka toka me baleta na nona tikina na Turaga kei na nona na tevoro. Kevaka ko na tiko ena nona yasana na Turaga, ena sega ni rawa ni lako mai kina na meca me temaki iko… Ia … kevaka ko takoso ki na nona yasana na tevoro, o sa tu kina ena nona tikina … ena qai cakacaka vei iko ko koya me kauti iko sara yani vakayawa mai na laini oya ena kena levu ga e rawa ni rawata, ni kila tiko o koya ni sala duadua ga me vakarusai iko kina sai koya me kauti iko tani sara yani vakayawa mai na vanua o rawa ni taqomaki kina” (ena Conference Report, Okt. 1945, 118).

Na ulutaga ni Muavata ni 2007 e vakarautaki kina e dua na yalayala vei ira era rogoca na ivakasala vuku oqo: “Mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou… . [ka] ena sala vata voli ga kei iko na Yalo Tabu …” (V&V 121:45–46).

Au vakadinadinataka vei kemuni ni bula na Kalou. Au kila ni o keda na Luvena, ni kilai keda o Koya ena yacada ka da sega ni tu taudua ena noda vakayacora na veivakatulewa bibi oqo. Ena veisiga yadua ni noda bula, eda na digidigi, na vuana ena biuti keda ena yasa ni laini oqo se ena yasana kadua. Au sa bolei kemuni kina na itabagone kece sara o ni rogoca tiko na domoqu- ki vei kemuni na itabagone sucu turaga e vuravura raraba: ni bulataka na nomuni bula ena kena ivakarau me rawa kina, ena gauna ni nomu digidigi ena vinaka kei na ca, kei na gauna o rogoca kina mai vuniyalomu na taro “Ko cei e tu ena nona yasana na Turaga?”—o sa na vakarau tu mo sauma ena nomu igu taucoko, “Koi au!” Ena yacai Jisu Karisito, emeni.