O Sa Kila Li?

Ena dua na gauna sa oti au a veitalanoa kina kei na dua na goneyalewa vakasakiti yabaki 16. Au qai kila ni o koya duadua ga na lewe ni Lotu ena nona koronivuli torocake. Au taroga vua, “Na cava na bolebole dredre duadua o sotava ni o lewenilotu duadua ga?”

A vakasama mada vakatitobu qai tukuna mai e dua na isau ni taro matata ka kilai vinaka, “Sai koya na noda vakabauta na dina ni dua na ka ena gauna era vakabauta kina o ira kece na kena vo ni lasu, kei na noda vakabauta na cala ni dua na ka ena gauna vata era vakabauta kina o ira kece na kena vo ni sega ni dua na kena leqa.”

Au taroga vua e dua tale na taro: “O sa kila li ni parofita ni Kalou ko Josefa Simici?” E vaqo na kena isau mai vua, “Au nanuma ni vakakina, ia au sega ni vakadeitaka sara.”

Ena mataka nikua au vinakata meu taroga vei ira na itabagone ena Lotu raraba, “O sa kila li?”

Na imatai ni gauna au kila kina ni sa dua na noqu ivakadinadina me baleti Josefa Simici oya niu se qai yabaki 11, ena nodrau kauti au na noqu itubutubu ki na Lomanibai ni Valetabu e Salt Lake City.

E dau noqu itavi qaravi taleitaki na vakasokumuna na veika sega ni vakayagataki. Sa yaco meu maqosa sara ena kena vagalalataki na veika eso. Au na dau taroga vaqo, “Sa sega beka ni vakayagataki qo?” Au na qai dodoka yani na ligaqu yabaki 11 ena yalovinaka ka kaya “Vinaka vakalevu? E sega tale beka ga ni vakayagataki oqo? Vinaka vakalevu!” Ena so na gauna ena kaya beka e dua, “Sega, vosota, oqori e lima na sede na kena isau.” Niu sega ni yavalati, au na vakacuva na uluqu ka vakaraitaka na noqu rarawa ka kaya, “Isa, au dau vinakata meu wilika na ivolalailai oqo, ia e sega vei au na ilavo. Vinaka vakalevu!” Au dau rawata sega ni saumi vakaoya. Na ka dina sai koya: niu sega ni dau laki wilika. Au dau vakasokumuna ga.

Ia ena ilakolako oqo, au a tiko duadua voli ena neitou Chevrolet ni 1948 ka waraki rau na noqu itubutubu ena gauna au sa vucesa dina sara ga kina. Ena vakanuinui au raica sobu yani na idabedabe ka raica na noqu ibinibini iyaya sega ni vakayagataki. Au tomika cake e dua na ivolalailai na yacana na Joseph Smith Tells His Own Story ka tekivu wilika.

Au a taleitaka ka vakasinaiti ena marau. Niu sa vakacavara, au a raica na kequ iyaloyalo ena iloilo kau kurabui niu sa tagi tu. Au a sega ni kila ena gauna ko ya, ia au sa qai kila oqo. Au a vakila e dua na ivakadinadina bula ni Yalotabu. Erau a sega ni tiko e kea na noqu itubutubu. A sega kina na ganequ. A sega kina na noqu qasenivuli ena Lalai. Koi au ga kei na Yalo ni Yalo Tabu.

Ia, e rawa ni yaco vei iko oqo, se rairai sa yaco oti beka ena dua na ka, ka tautauvata kaya.

Ni ko vakasaqara e dua na ivakadinadina, o kemuni o ni sucu ena Lotu o ni na vakasaqara tiko beka e dua na draki vakayalo ka duatani na veika e vakilai kina mai na veika kecega o sa vakila oti. O rogoca beka na nodra ivakadinadina eso era saumaki ki na lotu ka nanuma de o calata tiko beka eso na ka. E dua na vuna e duatani kina vei ira oya ni ka vou.

O iko o sa vakila tu mai na veika oqori ena nomu bula taucoko ena gauna ni lotu vakamatavuvale, ena soqoni ni ivakadinadina ni itabagone, ena kalasi ni semineri, ena gauna ni wili ivolanikalou, kei na vuqa tale na gauna.

Era vakavulici na noda daukaulotu me ra vukei ira na vakadikeva tiko na Lotu me ra kidava rawa na gauna era vakila kina na Yalotabu. Au nanuma ena veigauna e vuqa niu dau cegu ena loma ni dua na veivosaki vakayalo bibi ka kaya, “Tou cegu mada vakalailai ka veivosakitaka na veika o vakila tiko ena gauna oqo. O vakila ni vaka me keirau taleva tiko vei iko na veika o sa guilecava tu. O vakila ni keirau tukuna tiko vei iko na ka dina. O vakila tiko na vakacegu. O vakila tiko na Yalo Tabu.”

Au nanuma na noqu a vakavulica e dua na marama vuku sara ka a dredre dina vua me ciqoma e dua na ka me yacova ni sa vakadeitaka kece na veika e sega tu ni matata vua. Ia, ni sa oti e dua na gauna balavu, keitou sa qai rogoca na nona kaya, “Sa sega ni rawa niu qai cakitaka tale na veika au vakila tiko oqo.”

A curuma na Lotu ka bula marau ena vica na yabaki ka tarava ia a mani laiva me curu tale yani na lomalomarua ena vuku ni nona kila ka, a mani qai biuta kina na Lotu.

Sa sivi e tinikalima na yabaki e qai lako mai me mai sikova na neitou matavuvale. Keitou kauti koya ki na Lomanibai ni Valetabu. Ni tekivu me keitou kabata cake na ikabakaba cowiri ki na ivakatakarakara ni iVakabula, a tu vakadua ka kaya ena luluvu, “Sa baci yaco tale mai na yalo vata oya. Sa gadreva tikoga vakalevu na yaloqu na veika e sega ni rawa ni ciqoma na noqu vakasama!”

Ni o sa vakila rawa, o na sega ni guilecava tale.

Na ivakadinadina bula vakayalo ena yaco mai vei ira era tadravi tu ena draki ni bula vakayalo ni ra se gone ga. Ni da itubutubu, qasenivuli ka veiliutaki, eda dau maqosa sara ena noda vakadeitaka me da kila na lawa kei na ivakaro. E rawa ni da vakavinakataka cake na nomuni vukei mo ni rawata e dua na ivakadinadina ni ivakavuvuli kei na ivunau. De rawa ni da dau cegu vakawasoma cake ka vukei kemuni mo ni vulica mo ni kidava na Yalotabu.

Ena gauna o sa kila rawa kina se cava na yalo oya, ena tubu na nomu vakabauti ira. Sega ni dede o na raica ni o sa tara cake na ika ono ni nomu wakilakila vakayalo ka na sega ni rawa ni vagolei tani.

Niu yabaki 11 au sa kila ni parofita ni Kalou ko Josefa Simici. Au sega ni rogoca na domo, raici ira na agilosi, se dua tale na ka e vakakina. Na veika au vakila e tudei cake sara. A tarai na noqu wakilakila vakayalo. Au vakila na marau uasivi ni tovure mai e vu ni lomaqu ka taqomaki tu mai na ivadi kecega. Na wakilakila vakayalo oqo ena sakure ga ni yavalati mai na Yalo Tabu.

E vakaevei na veika e vakilai ena ivakadinadina bula vakayalo oqo? E dredre sara na kena vakamacalataki me vaka na kena dredre ni vakamacalataki na iboi ni dua na rosi se na sere ni dua na manumanu se na totoka ni dua na vanua. Ia, o na kila ena gauna o vakila kina.

E solia vei keda na ivolanikalou eso na vakasama me baleta na yalo eso oqo:

“E dina, e dina, au sa kaya vei iko, au sa solia vei iko na noqu Yalo Tabu, ia ena vakavukui iko ko Koya ka vakasinaiti iko ena marau; a ka oqo ko na kila kina” (V&V 11:13–14).

Ena so na gauna na yalo oqo e vaka na balolo ni vakanananu. Eda vulica taumada na kosipeli ena noda itikotiko Vakalomalagi. Eda lako mai ki na vuravura oqo vata kei na dua na ilati ni guiguileca. Ia e lili voli ga ena dui yaloda na vakanananu vunitaki koya. E rawa ni dolava na Yalo Tabu na ilati ka kauta mai na veika oqori ena vanua era vuni tu kina. E vakavuqa niu dau kaya vakaoqo ena vuku ni dua na ka dina au qai kila vakadua “O io, au nanuma na ka oya!”

“Na Dauveivakacegui, o koya na Yalo Tabu … [ena] vakavulici kemudou ena ka kecega” (Joni 14:26).

Kemuni na taciqu kei na ganequ itabagone, au sureti kemuni mo ni “rogoca na noqu vunau ka vakabauta” (Alama 32:27). O ni na wilika beka ka masulaka na italanoa kei Josefa Simici?

Na ka e taleitaki kina na noda kila ni dina sai koya ni o na kila talega ena gauna vata ga ni rau bula tiko na Kalou na Tamana kei Jisu Karisito ka rau tu ena ulu ni Lotu oqo ena gauna oqo. Au a kila rawa oya ena gauna au yabaki 11 kina, ia oqo au tu e matamuni me vaka niu dua na ivakadinadina bula digitaki i Jisu Karisito ka vakadinadinataka ni dina. Au vakadinadinataka talega ni vinakata na Turaga mo kila ni dina ka na qai “vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4). Ena yacai Jisu Karisito, emeni.