Yalodina Vua na Turaga

iVakatakilakila

Ni yadra, na Taciqu kei na Ganequ. Au gadreva meu na vosa vei ira na itabagone ena Lotu me vaka ga keirau vakasalataka tiko na neirau matavuvale kei Sister Dickson ena mataka nikua.

Keimami sa kila tu ni sa dua na itabatamata rarama cake koi kemuni na itabagone ka na yaco mo ni na sosomitaki keimami vakailiuliu ena vuvale, vanua ni cakacaka, ena itikotiko raraba kei na Lotu.

E lomani kemuni yadua sara naTamamuni Vakalomalagi ka talai kemuni mai ki na vuravura oqo ena dua na inaki. Sa vakatakila mai o Koya e dua na iTuvatuva ni Bula Marau, ni kevaka ena vakamuri, ena yaco dina me na kauti iko lesu ki Vua, ena kena valuti rawa na veivakatovolei kei na ibolebole kei vuravura. Ni ko sa yalodina tiko ena gauna oqo mo bulataka na ituvatuva ni Turaga e sa virikotora tu ena vaqaqacotaki iko cake vakalevu ena nomu vakatulewataka na nomu digidigi ni bula. E sa na qai bibi kina na nomu yalodina kivei iko mada ga ka vakakina vua na Turaga. Eda vulica ena iVola ni Same oya me da “Laiva na nomu sala vei Jiova; … ka na vakayacora ko koya” (Same 37:5).

O ni sa tadu mai ki vuravura oqo ena dua na gauna sa namaki oti tu mai na ivakatekivu—na gauna ni bera na iKarua ni Lesu mai na Turaga, oya, ena dua tale na yasana, sa vakalesuimai na kosipeli i Jisu Karisito kei na kena e taucoko, ena yasana ka dua, sa yaco tiko kina na voravora, veilecayaki kei na ivalavala butobuto. E totoka sara na ivakadinadina ni ko sa mai sucu oqo e vuravura, ka yaco kina na veika vivinaka, ia ena gauna vata oqori sa levu tale tu ga kina na veika rerevaki, sa vakarerevaki sara mada ga ki na bula yadua ni tamata. Oqo na gauna mo yalodina kina vua na Turaga ki na nomu ilesilesi ena bula ni vakatovolei oqo. E ra na veivuke talega vei rau na nomu itubutubu ko ira na parofita bula kei na ivolanikalou mo kila rawa kina na vinaka mai na ca me rawa ni yaco na vakatulewa dodonu.

Sa nuitaki tiko ni ko na vulica ena masumasu na ivolalailai, Me iSakisaki ni iTabagone, ka mo dau taleva lesu ka dau kauta voli, ena nomu baosi, na ivakaleka ni ivolalailai oqo. Ena yaco mai vei iko ena bula oqo kei na bula tawamudu na marau e cecere kevaka o sa digitaka oqo mo na bulataka na ituvatuva sa vakarautaki tu ena kena veidraunipepa.

Meu na vukei kemuni mada mo ni kila vakavinaka kina na kena rawa ni vukei kemuni na iwalewale ni kena vinakati vakatotolo na noda dina ena noqu na talanoataka eke e dua na ka a sotava e dua na iliuliu ni Lotu. Ni se cauravou o koya sa lomana sara me na dau muria na Vosa ni Vuku ka kakua ni gunu alkaolo se kana tavako. E sa guilecava o koya na ka a vakauqeti koya me dina ki na ka bibi oya ena gauna oya, ia sa yaloqaqa tikoga o koya, ka tekiduru me solia na nona bula vua na Turaga ka na dau muria tiko na ivakaro oya. Ni toso tiko na gauna sa dau temaki o koya me gunu ka kana tavako, ia sa vulica toka o koya ni sa isau vinaka ga na “sega, vinaka vakalevu”. E a sega tale ni valuti na nona bula me baleta na Vosa ni Vuku baleta ni sa solia kina na yalona, ka sa yalodina sara kina o koya vua na Turaga me vakamuria na ivakaro oya.

Ni ko vakasaqara mo ciqoma na veivakalougataki nei Tamada Vakalomalagi me baleta na Vosa ni Vuku, ka oka kina e dua na solibula me kakua ni tarai na veika ni veivakamatenitaki ka ra sa maliwai keda tu edaidai. Ena sega na nona kaukuawa o vu ni ca me na temaki iko ena veika ko a sega mada ni se bau tara vakadua.

Ni da sa lewenilotu eda sa papitaiso ka da sa vakayacora e dua na veiyalayalati me da taura na yaca i Jisu Karisito ka maroroya na ivakaro ni Kalou. Kevaka eda sa cala, sa vakaraitaka tiko na ivolanikalou ni da sa rawa ni veivutuni vakaidina ka da na vosoti. Na nomu solibula oqo sa rawa ni tekivu ena gauna sara ga oqo, o qase se ko gone, ka oka kina na veivutuni kei na biu laivi ni ivalavala ca sa yaco kina na caka cala.

Sa yalataka tu na Turaga na veivakalougatataki cecere ka tawamudu kivei ira na Luvena yalododonu era sa veivutuni, ia era sa kila tiko ni sa tu na veika e rerevaki sara ena bula oqo, ka sa vakarota vei keda o Koya, vakaoqo, “Mo dou qarauni kemudou, ka gumatua ni muria na ivakavuvuli ni bula tawamudu“ (V&V 84:43). Me baleta ga ni lomani keda ka vinakata o Koya me da lesu Vua, na ivakaro oqo “me da qarauni [keda]” e vakayadrati keda me da qaqarauni mai na veika kecega e baleti keda—na mataqali veimaliwai cava me da tiko kina, na veika eda raica ka wilika, na qaqarauni mai na veitukutuku raraba kei na veivakamarautaki, na ivakatagi se sere eda rogoca, kei na vuqa tale.

Sa ka bibi dina na kena vakarautaki vakatotolo na solibula. Kena ivakaraitaki, ni ko gadreva na veivakalougatataki sa yalataki tu kivei ira era dau sauma na nodra ikatini kei na isolisoli ni lolo, mo na solibula ena gauna sara ga oqo mo na sauma kina na nomu ikatini ni kemu isau taucoko sara. Ni da sauma na noda ikatini ena vukea me da kakua ni kocokoco kina ka yaco me da vakataka na Tamada Vakalomalagi, ni sa gadreva tu o koya me na wasea na veika kece sa Nona kivei ira na Luvena era sa yalododonu. Sa na qai ka bibi dina sara na vakatulewa oya. Sa ka taleitaki dina me da kila, me vaka na soli ikatini, sa vakarautaki na ivakaro kecega me baleta mo ni laki bula marau tawamudu ka yaco mo ni vaka sara na Tamada Vakalomalagi. Vakadeitaki iko nikua mo vakataki Nifai ni gauna makawa e a lomana dina sara me “lako ka kitaka na ka [a] sa vakarota na Turaga” (1 Nifai 3:7).

Me da raica vata mada na solibula tale e so ka na vakalougatataka na nomuni dui bula. Ena sega beka ni totoka, kevaka sa vakayacori tiko na veika cava ga e koronivuli, ia kivei iko ena gauna oqo mo sa na kilai tani ga ena nomu bula dodonu kei na ivosavosa e savasava? Mo sa vakadeitaka ga oqo ni ko sa na sega tale ni lawaki; ni na savasava tu ga na nomu ivosavosa; ia ena nomu bula taucoko ena sega ni voqa mai gusumu na vosa sa vakatani se veiwali. Sai koya oqo na nomu solibula o na cakava ena loma ni nomu rumu ena tekiduru ka masu. Ena yaco mo rawa ka ni ko toro voleka yani ena yalodina, ena masumasu kei na yalomalumalumu vua na Turaga. E vakavulica vakaoqo na ivolanikalou, “Ia mo yalomalumalumu; raica ena tubera na ligamu na Turaga na nomu Kalou, ka vakayacora na nomu kerekere” (V&V 112:10).

Ena gadrevi talega mo na solibula ena nomu isulusulu rakorako kei na itovo ena gauna ni veigadivi. Ena laki rawarawa cake na nomu taurivaka na ivakarau ni bula ni Turaga kevaka o sa vakadeitaka makawa tu mai na ivukivuki ni nomu bula mo na mai taurivaka ni ko vakatulewa ena gauna o tiko vata kina kei nomu itau se itokani se ilawalawa. E so na tamata era na sega ni kila vakavinaka na ivakarau ni nomu bula ena gauna o na dau vakamuria tiko kina na ivakavuvuli dodonu ka vakayacora tiko na nomu solibula, ia ena yaco me ra dokai iko ka qoroi iko dina ka ra na diva me ra na vakataki iko.

Oqo e so tale na ivakarau me na taurivaki ka me ia kina na solibula: na bula savasava tiko ka sega na cala ni veidauci, vakatabui ni Siga ni Vakacecegu, vakavakarau ki na kaulotu kei na valetabu, kei na yalodina ki na kena vakayagataki ena kilikili na sakaramede.

Sa dau lomani kemuni na itabagone o Peresitedi Hinckley ka sa dau vakayaloqaqataki kemuni tiko mo ni dau vakamuria ga na ivakatagedegede sa tuvanaka oti tu na Turaga. Ni ko vakamuria na nona veivakauqeti kei na ivakasala e dua na parofita bula ena yaco mo na muataki e na salatu ki na “marau e tawa yalani” se tawamudu.

Ni ko sa solibula edai mo na cakava na lewa ni Turaga, ena vukei iko ka vaqaqacotaki iko. Na nomu vakabauta, vakanuinui kei na gagadre mo na muri Koya sa na yaco me idola cecere duadua ni nomu rawa ka. Au kila ni o Tamada Vakalomalagi e lomani kemuni yadudua ka a tala dina mai na Luvena Sa Duabau me mai vukei iko ka na rawa kina me lagilagi na nomu rawa ka, ni ko sa solibula mo muri Koya. Ena yaca i Jisu Karisito, emeni.