Muri tikoga ena Salatu

iVakatakilakila

Ena dua na gaunisala ni veibabavatu ka volekata toka na noqu itikotiko, e toka kina e dua na ivakatakilakila ka volai toka kina, Muri tikoga ena Salatu. Ena gauna e muria kina e dua na tamata na gaunisala oqo, sa matata vakavinaka sara tu ga ni oqo e dua na ivakasala bibi. E tu na veidelana, igole kei na tikina e baba ka lutu ca sara, ka vakakina ni so na vanua yani e liu e malumalumu sara ka so na gauna ena loma ni yabaki, era dau basika mai e kea na gata daukata. Na noqu ivakaro vei kemuni yadua ena bogi nikua e tautauvata ga kei na kena e volai toka ena ivakatakilakila oya—Muri tikoga ena Salatu.

Ena vica na yabaki sa oti, au a gole ena dua na ilakolako ki na Veiulunivanua na Teton mai Wyoming vata kei na dua na ilawalawa goneyalewa. Oqo e dua na ilakolako dredre ia ena ikarua ni siga, keimami sa yacova sara yani na vanua rerevaki duadua ni ilakolako oqo. Keimami sa na taubaletaka yani na Hurricane Pass—e vakatokai donu toka ki na cagi kaukauwa e dau yaco e kea vakavuqa. Keimami sa vakasalataki sara mai vua e dua na dauveitaqomaki me keimami butu tikoga e loma ni salatu, ka lolou sobu tikoga ki ra ena vanua sa ca tu, ka me maroroi vakavinaka na veika ena neimami kato, ka lako vakatotolo. Oya e sega ni vanua ni veitaba se vakaberabera. E lutu na noqu icegu kau marau ni ra sa kosova rawa vakavinaka na goneyalewa yadua na vanua oya. E dua na ka mo ni kila—ni sega sara ga ni dua vei ira a taroga se vakaevei na nodra volekata yani na bari ni vatu!

Ena so na gauna ni da lako voli ena salatu ni bula oqo, eda dau gadreva me da butu sevata na veivanua rerevaki ka nanuma ga me ka ni qito ka me marautaki ni da vakatulewa tiko kina. Ena so na gauna eda rawa ni bula tu e na batibati ni veika vakatani ka nuitaka tiko na noda dodonu. Ia oqori e dua na vanua vakarerevaki me da laki tiko kina. Me vaka ga e tukuna o Parofita Josefa Simici, “Na marau sai koya na madigi kei na ituvatuva ni noda bula oqo, ka na vaka tu kina, kevaka eda na muria ga na salatu e mua tiko kina; na salatu oqo sai koya na bula dodonu” (History of the Church, 5:134–5).

Na ivakasala ni Turaga kivei Ema Simici ena Vunau kei na Veiyalayalati wase 25, sa Nona ivakasala kivei ira kece sara na luvena goneyalewa talei. Sa soli kivei keda e kea, e dua na ivakarau tudei kei na ivakasala me da “caka dodonu” (t. 2). Na bula dodonu “e ivalavala ni vakasama [se] itovo ka tauyavutaki mai na ivakatagedegede sara e cake ni bula savasava” (Vunautaka na Noqu Kosipel [2004], 118). Sa qai cava so beka na itovo ka tauyavutaki mai na ivakatagedegede sara e cake ni bula savasava ka na vukea me da bula dodonu?

Na bula dodonu e dau taqomaka na veika savasava—ena vakanananu, ivosavosa, isulusulu, kei na ituvaki tale e so. Na veika savasava sa ivatuvakadei ni bula savasava. Me vaka ga e dua e sega ni vakaivava ka lakova na salatu ni gata daukata, e sa vakakina ena gauna oqo e vuravura sa ka bibi dina me da bula taqomaki ni da savasava tiko. Ni da bula savasava voli, eda sa vakaraitaka tiko kivei ira na tamata ni da sa kila tiko na keda isema vakaveiwekani kei na Tamada Vakalomalagi ni da sa Luvena yalewa. Eda sa vakaraitaka tiko ni da lomani Koya ka da sa Nona ivakadinadina bula ena veika kecega. Ni da bula savasava eda sa vakatakila tiko vei ira tale e so ni da sa dau “taleitaka vakabibi na bula dodonu” (“Dearest Children God Is Near You,” Hymns, naba 96). Na bula savasava e sega ni dau “vakaiukuukutaki.” E ka ni yalo kei na bula vakalou. E sega ni ka vakarairai. E ka ni yalodina tikoga. E sega ni ka me kilai kina e dua. E ka ni bula savasava ka maroroya na veiyalayalati. E sega ni ka me rogo kina e dua, ia na bula sa vakalomalagi. Na veika savasava sa iusutu kecega ni noda butu donu toka ga ena salatu ni bula savasava kei na bula dodonu. Sa qai matata kina ni bula dodonu sa dua na ilalavaki me rawati kina na bula vakalagilagi. E vukei keda kina o Momani me da kila vakavinaka kina ni bula dodonu kei na bula savasava sai koya na “veika sa vakamareqeti ka iyau levu duadua vei ira kecega” (Moronai 9:9). Eda sa sega ni rawa me da vakawalena se lako volekata yani na batibati ni veika rerevaki. Oqori na vanua rerevaki sara me lakova e dua na luvena yalewa na Kalou.

Eda sa vakasalataki ena Vunau kei na Veiyalayalati wase 25 ni sa dodonu me da nanuma tiko na veiyalayalati eda sa cakava (raica na tikina e 13). Na nanuma sa kena ibalebale me da kabita tiko, vakamuria, ka ququmi matua sara ki na yalayala eda sa cakava vua na Turaga. Ena vaqaqacotaki keda na noda veiyalayalati me da sabaya rawa kina na veitemaki. Ni da maroroya tiko na noda veiyalayalati ena butu donu tiko kina na yavada ena salatu ni bula dodonu. Ni da maroroya na veiyalayalati ena noda papitaiso, eda na butu voli ga ena loma donu ni salatu. E vakaraitaka tale vei keda vakaoqo o Elder Jeffrey R. Holland:

“Vakatekivu sara mai na noda papitaiso, eda sa vakayacora mai kina na veiyalayalati ni da muria donu tiko na salatu oqo ki na bula tawamudu, ka da lakovoli ga ena salatu oqo ni da maroroya tiko… .

“… Sa na qai veirauti kina na veivakauqeti ni Yalo Tabu me baleta na noda gagadre kevaka eda butu tikoga ena salatu ni veiyalayalati. Ena vuqa na gauna ena dredre na itosotoso, ia na veivuke eda sotava ena ilakolako oqo sa vakalou dina. Eratou lewe tolu na Lewetolu Vakalou—na Tamana, na Luvena, kei na Yalo Tabu—e ratou vukei keda me baleta na veiyalayalati eda a sa vakayacora.

“Me vukea na noda nanuma tiko na noda veiyalayalati oya, eda dau vakayagataka kina na sakaramede ena veimacawa. Ena masu ni madrai, eda ‘vakadinadinataka vei kemuni na Kalou, na Tamai keimami tawamudu, ni [keimami] sa yalataka me [keimami] taura na yaca ni Luvemuni, ka dau nanumi koya ka muria na vunau sa solia vei [keimami] ka me tiko ga kei [keimami] na nona Yalo Tabu ka sega ni mudu’ [V&V 20:77]” (“Na Veika Au Gadreva Me ra Kila tu na Lewenilotu Kecega—Ka ra Nanumi na Lewenilotu Makawa Kecega,” Liaona, Okot. 2006, 12).

Ni ko dusimaki mai na Nona Yalotabu, ko na yalonuidei ka kune marau ka na dau yaco me savasava tu ga na nomu vakanananu. E vakamacalataka na iVola i Momani na cava ena yaco ki na dua na itikotiko, era maroroya na nodra veiyalayalati ka ra bula savasava ka bula dodonu: “Era sa tamata mamarau cake mai vei ira na tamata kecega sa bulia na Kalou” (4 Nifai 1:16). Ni ko dusimaki mai vua na Yalo Tabu, sa na yaco talega mo na dauveivakauqeti sara kivei ira na tamata kecega.

Era tiko ena noqu valenivolavola e so na kedra itaba na marama ni noqu kawa vakamatavuvale—oya o buqu vakarua, o buqu, na tinaqu kei na luvequ yalewa o Emi. Na nodratou yalodina kei na vakabauta ki na ituvatuva e sa vukei au dina meu rawata na vanua cecere ka toso yani ki liu. Niu mai raica toka oqo na kena iyaloyalo, sa qai makare sara vei au na kena bibi na noda bulataka e dua na bula savasava. Ena gauna oqo e sega walega ni dua na luvequ yalewa, ia e lima na vugoqu yalewa ka lima na makubuqu goneyalewa lalai me ikuri ni iyaloyalo oya. Sa lomaqu dina mai loma meu bulataka e matadra e dua na ivakaraitaki vinaka ni bula dodonu ka vakalou. Kevaka beka mo sa isevu tiko ni nomudou kawa ena veitarataravi mai, sa tiko na nomu ilesilesi kivei ira era na muri tiko mai.

E na dua na gauna lekaleka sa oti, au gole tale ki na ilakolako vata ga oya ki Tetons na vanua au a tukuna tiko e liu, ia ena gauna oqo au a lako vata kei na turaga watiqu kei na so na ilawalawa keimami yabaki vata. Ni keimami se qai tekivu, keimami marautaka ka rawarawa sara, ia ni bera ni keimami yaco yani, keimami sa tekivu wale kau sa kila ni’u sa na leqa kina. Au a sega sara ni vakavakarau toka mai vakayago me vaka na noqu a taubale vata e liu kei ira na goneyalewa ena vica na yabaki yani e liu—ia oqo sa sakulevu dina na noqu idrekedreke ka bibi na noqu iusana. Sa tekivu me vakamalumalumutaki au na bibi ni noqu idrekedreke ka sa voleka ni kasura. O ira talega na vo ni ilawalawa era sa vakila na kaukauwa ni cagi e cake, na rewa e cake ni bari vatu, kei na bibi ni iusana. Sa raica o watiqu na ka oqo ka vakatotolo yani e liu. Au vakila niu sa biu tu mai. Ia, ni oti toka ga vakalailai e veimama na auwa au sa raici watiqu ni sa laki siro sobu tiko ena yasana kadua ni salatu. E sa cici tiko yani vei au. Ni sa yacovi au mai, a taura sara na noqu kato, qusia na wainimataqu, ka liutaki au yani ki na icavacava ni ilakolako—ki na dua na drano makare era wavokita tu na veipaini balabalavu. A qai vuki yani, lesu tale ki na gaunisala oya, ka cakava tale vaka va na ka vata ga oya kivei iratou na vo ni ilawalawa ni ilakolako oya. Niu raici koya yani, au sa veivutuni niu sega ni vakavakarau vakavinaka kau veivutunitaka vakalevu cake na levu na noqu iusana ena kato ka vakabibitaka tu na noqu icolacola ka sa mai colata oqo o koya. Ia au sa vakavinavinakataka na nona kaukauwa, na nona sega ni nanumi koya ga, na nona a vakarautaki koya rawa, kei na nona loloma.

Ni ko sa cabeta yani na veiulunivanua ni bula oqo, mo butu tikoga ena salatu ni bula dodonu. Era na tu na tamata era na vukei iko—o irau na nomu itubutubu, lewe ni matavuvale, bisopi, daunivakasala, kei ira na tamata yalododonu ni tabayabaki kecega. Ena gauna o sa malumalumu kina se o sa muri cala, muataka lesu na nomu ilakolako ka mo butu donu tale ena salatu ni bula dodonu. Mo dau nanuma tiko oqo ni sa dau tiko vata ga kei iko na iVakabula. Ena vukei iko o Koya mo na veivutuni rawa, vaqaqacotaki iko, vakamamadataka na nomu icolacola, qusia na wainimatamu, vakacegui iko, ka na dau vukei iko mo muri tikoga ena salatu.

Na iVakabula sa ivakaraitaki uasivi duadua ni bula dodonu. Ena gauna e dau lakova kina o Jisu na veigaunisala mai na Vanua Tabu, e “lakovoli ka daucaka vinaka” o Koya (Cakacaka 10:38). E vakabulai ira na tauvimate ka dolava na matadra na mataboko me ra rai rawa ka vakabulai ira na tamata mate. “E vakatavulica na veika dina ni bula tawamudu, na veika dina baleta na noda bula mai liu, na inaki ni noda bula e vuravura, kei na [noda] rawa me da yaco [me da] … luvena tagane ka luvena yalewa na Kalou ena bula e tarava” (raica “The Living Christ: The Testimony of the Apostles,” Liahona, Apr. 2000, 2–3). E dua vei ira na noqu tiki ni ivolanikalou talei e tukuna: “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomu ilakolako ko koya” (Vakaibalebale 3:5–6).

Au vakadinadinataka ni sa dina na veika oqo. E sega walega ni tuvanaka o Koya na salatu, ia e a vukei au sara mada ga o Koya ena so na gauna. “Na Nona ilakolako sai koya na salatu e mua ki na marau ni bula oqo kei na bula tawamudu ena bula e tarava mai” (“The Living Christ,” Liahona, Apr. 2000, 3). Sa noqu ivakadinadina oqo kivei kemuni ni bula tiko o Koya! Ena rogoca o Koya na nomu masu ka dusimaka na nomu ilakolako. Sa noda Daunivakaraitaki ka noda iDusidusi o Jisu Karisito. Muri tikoga ena salatu! Mo bula savasava. Mo ququmi matua tiko ki na nomu veiyalayalati ka mo bula kilikili kaya na veitokani ni Yalo Tabu. Sa yalataka kina vakaoqo na Turaga: “Mo dou reki ga, ni’u sa tuberi kemudou tiko. Raica sa soli vei kemudou na matanitu kei na kena veivakalougatataki, sa nomudou talega na lagilagi me tawamudu” (V&V 78:18). Sa dina sara, au raica ka qoroya na “Na Nona bula sega ni vakatauvatani rawa, kei na kaukauwa tawayalani ni Nona solibula ni veisorovaki“ (“The Living Christ,” Liahona, Apr. 2000, 2; vakamatatataki). Ena yaca i Jisu Karisito, emeni.