Vakatabui Tale ni Valecavu e Salt Lake

iVakatakilakila

Sa dua na ka dokai ka cecere talega me da tiko ena lotu ni kena vakatabui tale na vale cecere oqo, na Valecavu e Salt Lake, ka tu ena yasa, vaka ki na ra ni Valetabu e Salt Lake. Eda vakavinavinaka vei ira vakayadua kei ira kece sara era cau se ra vakaitavi ena cakacaka levu sa vakayacori ena vale oqo. Eda vakavinavinaka vakatabakidua vei iratou na Matabisopi Veiliutaki—Bisopi H. David Burton, Bisopi Richard C. Edgley, kei Bisopi Keith B. McMullin—ena vakasakiti ni nodratou veiliutaki ka liutaki kina na cakacaka ni kena vakavinakataki ka vakalesui tale mai ni Salt Lake Tabernacle.

E talei tu ga vei au na vakanananu ni veigauna ni noqu gonetagane lailai, kau dau lako mai ki na kin a Valecavu oqo. Au a papitaiso eke. Niu sa dikoni, a kauti au mai ke o tamaqu ki na soqoni raraba ni matabete. Keirau a totolo mai ena tinikalima na miniti ka rawata vakarawarawa sara na neirau idabedabe ena iyatu e cake.

Ena veigauna taumada ni Lotu na vale ga a tara me vakayacori kina na sokalou sai rau na valetabu e Kirtland kei Nauvoo. Erau a tara ruarua me vaka na ivakatakila. Na imatai ni vale volaitukutukutaki ka tara na Lotu me vale ni soqoni a nakiti talega me valenivuli. A tara ena tolonikau mai Missouri ena 1831.¹

Ena gauna e qai vakatabui kina na Valetabu e Kirtland ena 1836 sa sega mada ga ni rauti ira kece na yalododonu era vinakata me ra tiko ena lotu ni vakatatabu. A qai vola kina ena yalo veivutuni na Parofita ko Josefa ni sa sega tale ni rawa me so tale e curu yani ki na vale oya.² Ia, ni tubu me levu cake na veivakacacani vei ira na Yalododonu kei ira na nodra iliuliu e Kirtland, sa tete ki Missouri na Lotu ena 1838, ka biu tu yani kina na vale vakamareqeti oya.

E tautauvata na itaratara ni Valetabu e Kirtland na valetabu e Nauvoo ni ra tu na rumu ni soqoni ena imatai kei na ikarua ni itabavale. Ia, ni se bera ni vakacavari na Valetabu e Nauvoo ena 1846 era dau sota na yalododonu e tautuba, vakavuqa volekata na valetabu, me ra vakarorogo vei Josefa kei ira tale eso na iliuliu ni Lotu. Ena so na gauna e dau yacova sara na udolu o ira era tiko ena veisoqoni oqori.

Me vaka a dikeva o George A. Smith ena nona ivakarau lasalasa, “Ena nona veisiga na Parofita o Josefa… . ‘Era dau soqo vakavinaka cake na Momani e tautuba.” Na vuna oqori baleta “keimami a sega ni rawa ni tara e dua na vale me rauti ira na Yalododonu ni se bera ni a mai mate na parofita.”³

Vakavuqa toka na kena dau vakaleqa na veisoqoni e tautuba na draki ca oqori ka ra dau logaloga ca kina o ira era vosa vata kei ira na vakarorogo. A kaya kina o Peresitedi Joseph F. Smith, ka a nanuma vinaka tiko na logaloga ca ni veisoqoni e tautuba oqori ka a vakayacori volekata na valetabu e Nauvoo:

“Na imatai ni vanua ni sokalou au nanuma rawa oya mai Nauvoo. Ena dua na veikau lailai volekata na valetabu. Ni keirau dau lako vata kina kei na tinaqu au dauvakarorogo vei ira eso me vakataki Brigham Young, Heber C. Kimball, Orson Hyde, Parley P. Pratt, Orson Pratt, kei na Parofita ko Josefa kei na Peteriaki ko Hyrum. Au nanuma vinaka tiko na noqu a tiko ena dua na soqoni ena veikau oqo, ka kele tu kina e dua na qiqidreti ena ose e matadra na vakarorogo, ka sa tekivu me tau kina na uca ena nona tucake tu ena dua na kisi na Parofita ko Josefa me vosa. Erau a tucake e dua se rua me rau vakarurugi koya ena iviu, me rau tarova me kakua ni suasua. E vuqa vei ira na tamata era sega tu ni vakaiviu, ka sa sega kina ni ra duavata ena nodra dabe tiko e kea, ia au nanuma vinaka tiko, e dina niu se gonetagane lailai ga, a sega sara ni dua a lako tani mai kea ena gauna e vosa tiko kina.”⁴

Ni bera ni mate, a lewa na Parofita ko Josefa me tara e dua na valecavu me ra vakaruru kina na Yalododonu ena veisoqoni lelevu. Ena 1845, ni voleka tiko me vakacavari na valetabu, a talai lesu ki na Tokalau ko Elder Orson Hyde ena Kuoramu ni iApositolo Le Tinikarua me laki kumuna eso na ilavo ka volia me “rauta ni va na udolu na iyate” na laca me tara kina na ka e vakatoka o Brigham Young me “na valecavu ni ivavakoso kei Saioni.”⁵

A tuvalaka kina o Baraca Orson Pratt na vakatutu ni vanua kei na itaratara ni valecavu laca ena dua na ivola a volai ena ika 30 ni Okosita, 1845:

“Sa nakiti me tarai kina e dua na valecavu laca e mata ni Valetabu ki na ra, ka me semati vata vakatalega kina. Me na vaka na ibulibuli ni yaloka na valecavu oqo … na levu ni kena butu rara me na rauta ni ra dabe rawa kina e walu ki na tini na udolu na tamata; me na cecere cake mai na iyatu dabedabe e liu na kena idabedabe me vaka ena dua na vanua ni vakatasuasua.”⁶

Sa tekivu me ra samaka na qele ena siga ka tarava o ira na tagane me tara kina na valecavu laca. Ia, ena vuku ni veivakacacani mai vei ira na nodra meca era sa biuti Nauvoo kina na Yalododonu ka sega kina ni qai tara na valecavu laca. A vakavodoka tale kina ko Orson Hyde “na laca ki na qiqidreti ena 1846 ka gole yani vaka ki na ra.”⁷ Eso era tukuna “ni a vakayagataki sara vakavinaka na laca ena veika me vaka na valelaca, vale ni qiqi kei na iubi ni qiqidreti” me baleta na nodra ilakolako na Yalododonu ki na Buca o Salt Lake.⁸

Na Valecavu sa tara oti ena Lomanibai ni Valetabu e tautauvata vakacaca na kena levu kei na valecavu laca a nanumi me tara e Nauvoo, me vaka na valecavu a nanumi me tara e Nauvoo, a toka talega ena yasa ni valetabu vaka ki na ra. Me vaka na veika tale eso, na itokitoki levu ki na Ra, a raivotutaka kina o Josefa Simici e dua na valecavu levu; ka qai vakavotukanataka ko Brigham Young.

Na valecavu a nanumi me baleti Nauvoo, e dina ni a mani sega ni tara e kea, e ivakatakarakara ni vale vakairogorogo oqo. Niu se gonetagane lailai keimami dau vakarorogo ki na koniferedi raraba ena retio; ena gauna oqo ena kena sa vakayagataki na se tilaiti kei na iyaya vakalivaliva vovou eso, eda sa kakaburaki kina mai Salt Lake City ki na veimatanitu e vuravura raraba ena dua ga na gauna—me vaka oqo—ena kena vakayagataki na isema sobu ki na veivale e vuravura taucoko. E yaco na veika oqo ena vuku ni veivakauqeti ka yaco mai vei ira na Veitacini me sotava na nodra gagadre na tamata ena noda gauna. Oqo na ivakaraitaki vinaka ni nona sotava na Turaga na nodra gagadre na lewe ni Lotu. Au vakadinadinataka ni na tomana tiko na Turaga na nona vakatakila mai vua na Nona parofita, ko Gordon B. Hinckley, na sala eso kei na iwalewale me sotavi kina na nodra gagadre na lewe kece sara ni Lotu oqo ka sa tubucake tikoga.

Au vakavinavinaka ni sa vakavoui ka vakaukauwataki na vale vakasakiti oqo me rawa ni vakayagataki tikoga ena nodra dusimaki ka vakatataki na luve ni Kalou. Ena yacai Jisu Karisito, emeni.