“Nau, Edatou Lotu Vakarisito Li?”

iVakatakilakila

Era dau solevutaka na bula kei na veiqaravi nei Jisu Karisito, na Luvena e Duabauga sa Vakatubura na Kalou na Tamada Tawamudu o ira na Lotu Vakarisito. Era laurai e vuravura taucoko ko ira na Lotu Vakarisito ena veivakavuvuli duidui kece sara. Ena nona curu vou yani ko Cortnee yabaki 14, e dua na luve ni peresitedi ni kaulotu, ena vuli torocake me fomu tolu, era a tarogi koya na lewe ni kalasi se a lotu vakarisito. Era vakalialia na nona isau ni taro ni o koya e Momani, e dua na yaca e dau kilai kina na Lotu i Jisu Karisito ni Yalododonu Edaidai. Ena nona yaco ki vale e tarogi tinana, “Nau, edatou lotu Vakarisito li?”

Noqu tubu cake ena noqu matavuvale, keitou bula ka daulotu ena dua tale na vakabauta Vakarisito. Niu se qai sucu oti ga vakalekaleka au a papitaiso meu lewe ni lotu ko ya. Keitou dau lako i lotu vakamatavuvale ena veimacawa. Ena vuqa na yabaki o au, kei ratou na taciqu keitou dau vukei ira vakaveitacini na italatala era veiliutaki ena neimami lotu ena Sigatabu. Au a vakavulica na bibi ni masu vakamatavuvale ni keitou masu vata vakamatavuvale e veisiga. Au nanuma ni na dua na siga au na vakaitavi tudei vakalotu ena noqu lotu. E sega ni loma tarotaro na loma ikeitou ni keitou rawa ni vakatokai keitou ni keitou daulotu va-Karisito.

Ia, niu sa laki vuli ena univesiti, au veikilai kei ira na lewe ni Lotu i Jisu Karisito ni Yalododonu Edaidai, ka vakakina na kena ivakavuvuli, e dua na vakabauta Vakarisito ka uto ni kena vakabauta o koya na iVakabula. Au tekivu meu vulica na ivakavuvuli ni Vakalesui mai ni kosipeli nei Jisu Karisito ena gauna edaidai. Au vulica na dina au se sega ni kila vakadua ka veisautaka na noqu bula kei na noqu raica na kosipeli. Ni oti e levu na vuli, masu, kei na vakabauta, au digia meu sa ciqoma na dina totoka vakalesui mai ka laurai walega ena Lotu oqo.

Na imatai ni dina vakalesui mai kau vulica sai koya na veika me baleti iratou na Lewetolu Vakalou. Na ivakavuvuli dina Vakarisito ni Lewetolu Vakalou ka kilai ena gauna vakaivolatabu sai koya ni ratou lewe tolu na bula duidui. E a vakadinadinataki Jisu, Na Luvena e Duabauga sa Vakatubura, ena vica na gauna, na Kalou. E vosa ena papitaiso nei Jisu: “O koya oqo na noqu Gone ni toko, au sa dau vinakata vakalevu.”¹ Ko Jisu vakaikoya e vakadinadinataka na Kalou, na Tamana, ena Nona kaya, “Ia sai koya oqo na bula tawamudu, me ra kilai kemuni na Kalou dina duaduaga, kei Jisu Karisito, ko koya ko ni a tala mai.”² Ni oti na mate kei na Tucaketale, eda vulica ni ko Sitiveni, “ko koya, ni sa sinai ena Yalo Tabu, sa rai matua ki lomalagi, a sa raica nai ukuuku ni Kalou, kei Jisu ni sa tu ena liga i matau ni Kalou, ka sa kaya, Raica, au sa qai kunea sa wase rua na lomalagi, ka sa wavu tu na Luve ni tamata ena liga i matau ni Kalou.”³ E dua na ivakadinadina veivakurabuitaki ni Lewetolu Vakalou mai vua na tisaipeli ko ya nei Karisito.

E sa mai yali na kila me baleta na Kalou kei na Nona duatani vakayago mai vua na Luvena kei na Yalo Tabu ni oti na Nona mate na Karisito kei iratou na Nona iApositolo. Na veilecayaki kei na ivakavuvuli lasu me baleta na Lewetolu Vakalou e kau mai na Nicene Creed kei ira na matabose vakalotu mai Constantinople, ka ra vakaraitaka kina na tamata ni me isosomi ni tolu na bula duidui, na Lewetolu Vakalou e tolu na tamata ena dua ga na Kalou, se Lewetolu. Me vaka ga na nodra a veilecayaki ena vakabauta ni tamata oqori ko ira na Lotu Vakarisito tawase mai na Katolika, au a vaka talega kina koi au. Na ivakavuvuli baleta na Lewetolu au vulica niu se cauravou e sega ni matata vinaka vei au.

Ia, niu sa vakilaitaki kina dina lagilagi ni iMatai ni Raivotu e sotava na Parofita ko Josefa Simici, e dua na veivakayadrati totoka vei au meu sa qai kila na dina baleta na ituvaki ni Kalou na Tamada Tawamudu kei na Luvena e Duabauga sa Vakatubura. E vakaraitaka ko Josefa: “Au sa qai raica e rua na Tamata, ia na kedrau iserau kei na kena iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na noqu Gone ni Toko. Mo rogoci Koya!”⁴ Na raivotu vakalomalagi oqo e vakalesuya tale mai ki vuravura na kila qoroi, macala ka vakamareqeti, me baleta na Kalou kei na Luvena, ka kauta laivi saraga na ivakavuvuli au a vulica me baleta na Lewetolu.

Au kila ni vakatakila e soli mai lomalagi e sa sosomitaka na cala bibi ni ivunau vakatamata ena vuku ni Lewetolu Vakalou. Au kila ni Kalou e Tamada Vakalomalagi. Na Luvena, ko Jisu Karisito, e noqu iVakabula. E vakadinadinataki rau na Tamana kei na Luvena na Yalo Tabu. Au vakaraitaka na noqu vakavinavinaka cecekia ki vua na Kalou ena nona vakatakila mai na Turaga ko Jisu Karisito, ka sa vakaturicaketale, kina kawatamata ena veisiga emuri oqo. E bula na iVakabula; E a sa laurai; E a sa vosa; E vakasalataka na cakacaka ni Nona Lotu edaidai vei ira na iapositolo kei na parofita. Sa so na dina uasivi e vakavulica tiko na iVakatawa Vinaka oqo ka tosoya tikoga na Nona vakaraici ira na Nona sipi.

Na ikarua ni dina vakalesui mai au vulica ena noqu vakatataro tiko ena Lotu oqo sai koya na dina ni ikuri ni ivolanikalou kei na vakatakila. E a raica ena dua na raivotu na parofita ko Aisea me baleta e dua na ivola ka qai vunautaka ni a tiki ni “dua na cakacaka vakurabui dina sara.”⁵ Au vakadinadinataka ni ivola ko ya sai koya na Vola i Momani: e dua tale nai vakadinadina kei Jisu Karisito. E dua na ivolatukutuku tabu era vola na parofita ni Kalou me ra vakayarayarataki kina na tamata kece me ra lako vei Karisito, ka vukea na kena vakaraitaki na taucoko ni kosipeli nei Jisu Karisito. Na Vola i Momani e tukuni ira na parofita kei ira na lewe ni Lotu yalodina ka ra taura na yaca iKarisito, ni se bera mada ga ni sucu na iVakabula.⁶ Na ivola oqo e tukuna na Karisito vakaturicaketale ni vakavulica tiko vei ira na tamata na cava me ra vakayacora me ra rawata kina na vakacegu ena bula oqo kei na vakabulai tawamudu ena vuravura se bera mai. Me cava tale e Vakarisito vakalevu cake ena noda segata me da taura na yacana ka vakamuria na Nona ivakasala me da vakataki Koya?

E sa kaya oti ko Peresitedi Gordon B. Hinckley, “Au sega ni kila na cava era sega ni ciqoma kina na ivola oqo na vuravura Vakarisito.”⁷ Au a wilika na Vola i Momani ena imatai ni gauna niu yabaki 21. Au qai taroga vua na Kalou se dina. E a vakatakila vei au na kaukauwa veivakacegui ni Yalo Tabu na kena dina.⁸ Au kila ni Vola i Momani e ikarua ni vakadinadina kei Jisu Karisito. Au duavata kei na nodra ivakadinadina na parofita ni ivola tabu oqo meu vakaraitaka ni “eda sa tukuni Karisito, ka rekitaki Karisito, ka vunautaki Karisito, ka parofisaitaki Karisito.”⁹ E cecekia na noqu vakavinavinaka ena vei vosa e sa vosataka oti ko Koya kei na vei vosa kece e tomana tiko ko Koya ena Nona vakaotia na noda karamaca ena wai ni bula.

E dua tale na dina vakalesui mai ni kosipeli kau mai kila yani sai koya na vakalesui mai ni lewa ni matabete, se kaukauwa me ra vakaitavi ena yaca ni Kalou. E rau talai ira mai na parofita kei na iapositolo e liu me vakataki Ilaijia, Mosese, Joni na Dauveipapitaisotaki, Pita, Jemesa, kei Joni, na Kalou kei Karisito, me ra vakalesuya tale mai na matabete tabu ni Kalou. Ko ira kece era lewe ni matabete ena Lotu oqo sa rawa ni ra raica lesu tale, semasemai ni nodra lewa vakabete me yaco vakadodonu lesu tale vei Jisu Karisito. E sa tu oqo vei ira na turaga na idola ni kena tauyavutaki na Lotu me da rawa ni lako kina vei Karisito ka vakaivotavota ena Nona cakacaka tabu tawamudu ni veivakabulai.¹⁰ Au vakadinadinataka ni oqo na Lotu nei Jisu Karisito—na lotu duadua e vakatarai ena lewa dina vakabete me vakayagataka na idola ni veivakabulai ena cakacaka tabu.

E a taroga ko Cortnee, “Nau, edatou lotu Vakarisito li?” Me vaka ni ko lewe ni Lotu i Jisu Karisito, ko lotu Vakarisito, ka vaka kina koi au. Koi au e dua na lotu Vakarisito kau kalougata vakalevu sara ni tu vei au na kila vakaitamera ni “ivakavuvuli dina i Karisito”¹¹ ena noqu mai saumaki kina Lotu vakalesui mai. Era vakamacalataka na veidina oqo ni tu ena Lotu na taucoko ni kosipeli nei Jisu Karisito. Me vakataki ira na lewe ni Lotu tale eso, au sa qai kila oqo na ituvaki dina ni Lewetolu Vakalou, ka vakarawarawataki vei au na sala kina ikuri ni ivolanikalou kei na vakatakila, kau rawa talega ni vakaivotavota ena veivakalougatataki ni lewa vakabete. Io, Cortnee, edatou lotu Vakarisito, kau vakadinadinataki ira na veidina oqori ena yaca i Jisu Karisito, emeni.