E Dua na Valecavu ena Lekutu
Na vanua ni soqoni oqo e sa dua na vanua duatani ka totoka sara ni vakasoqonivata.
Eda soqoni vata tale tiko ena yakavi edaidai, kemuni na taciqu kei na ganequ, ena Valetabu vakairogorogo oqo, ka da sota vakawasoma tiko kina ena koniferedi ena vuqa na gauna sa oti.
Na vale oqo e sa rabailevu sara ga na kena vakavinakataki ena gauna oqo kei na kena tuvai tale me tosoya cake na kena itagede ni tataqomaki mai na uneune. Ena veiqaravi oqo, eda nuitaka ka masulaka na kena irairai vakairogorogo me ra kakua ni vakarusai.
Eso na idabedabe makawa era sa maroroi tu ka ra na vakayagataki tikoga. Ia, me vaka ga o ni sa raica oti, na idabedabe vovou era se kaukauwa vinaka tu me vakataki ira ga na ka makawa!
Na icurucuru ki tautuba e sa tomani tale me sota vata kei na veika e gadrevi ena gauna oqo. Na veiduru vatu lelevu, ka tokona tu na lalaga e tautuba, era sa vakaukauwataki ka taqomaki vakalevu sara. E sa vakaukauwataki na delavuvu ena kena tomani yani kina na tikitiki ni sitila, vata kei na kena vakavoui na delavuvu.
Na veiveisau ena vale oqo, meu tokaruataka, era sega ni ka vou. E sega mada ga ni dede na kena tara e sa vakavouitaki tale. Taumada e a sega na kena varada, ka sa qai mai caka kina.
Ena loma ni vica vata na yabaki oqo, na vanua ni soqoni oqo e sa dua na vanua duatani ka totoka sara ni vakasoqonivata. E lewe vuqa na turaga kei na marama era sa vosa oti eke, ena nodra vakadinadinataka na Vakalesui mai ni kosipeli i Jisu Karisito. Mai na gauna nei Brigham Young ki na gauna oqo, na veiparofita vakayadua era sa vosa oti mai na itutu ni vunau oqo. Eso tale na turaga kei na marama vakaitutu era sa vosa oti, okati kina e vuqa na peresitedi kei Amerika. Sa ikoya e dua na vale me baleta na cakacaka ni liga kei na itovo vakavanua ni itikotiko oqo. Na Utah Symphony e a kena imatai me vakayagataka na vanua oqo me vakayacora kina na nona itavi. Na vakaraitaki ni cakacaka ni liga vakaitamera e a vakayacori eke, me vaka na Mesaia kei na Tanner Gift of Music. Na nodra lotu ni veibulu o ira na turaga kei na marama rogolevu e dau vakayacori eke. Sa ikoya e dua dina na isakisaki me baleta na itikotiko oqo ena loma ni vuqa na veiyabaki sa oti yani.
Na vale oqo e dua tani, sa ikoya duadua ga na kena mataqali e tiko e vuravura taucoko. E a se tara sara volekata e dua veimama na senijiuri sa oti ena gauna ni nodra dravudravua na wekada. Vakaivola sa ikoya e dua na Valecavu ka tara ena loma ni lekutu. Na valetabu e se yawa sara na gauna me qai oti kina ena gauna o ya. O ira era a tara na Valecavu era a cakava ena vakabauta, vakatalega kina na nodra ivakavuvuli ni kila vakamatai. O ira na tawa lotu, era dau lewe levu tu ga e veigauna, era tukuna ni gauna e vagalalataki kina na vata ni vale, ena qeqera sobu vata mai kei na delavuvu. E a sega sara ni yaco vakakina, ka se toka matua ga mai na cila ni siga kei na cagilaba ena vuqa na veiyabaki taucoko sa oti yani.
E sa yaco kina me kilai e vuravura raraba me nodra vale na Mormon Tabernacle Choir, na nodra kakaburaki vakamacawa ena retio e sa rogoci vakabalavu cake sara mai na dua tale na parokaramu ena sala veisemai ‘network’, ena dua na gauna ka sivi yani oqo e 75 na yabaki, me tekivu sara mai na 1929.
Ena gauna oqo, ena Siga ni Vakacecegu, na iVakatagi kei na Vunau e sa na lako tale tiko yani ki vuravura mai na Valecavu oqo ena “gaunisala veilatai ena Ra.” E sa ikoya talega na itikotiko ni Tabernacle Choir kei na Mataivakatagi ena Lomanibai ni Valetabu, ka na vakavaletaki ira talega e vuqa na caka iyaloyalo kei na veicakacaka tale eso. Ena dau vakayagataki tiko me baleta na veikoniferedi ni iteki kei na iwasewase, na vunau raraba, lagasere ni vakatasuasua, kei na so tale na veivakamarautaki.
Na Millennial Star, tabaki e Igiladi, katoni ena siga Vakarauwai, 9 ni Okotova, 1875, ni o John Taylor e a cabora e dua na masumasu balavu ka matailalai ena nona vakatabuya na vale tabu oqo ena vuqa na yabaki ni oti na kena vakayagataki tiko.
Ia ena gauna oqo, kemuni na taciqu kei na ganequ, ena noda mai tinia na soqoni oqo, au sureti kemuni taucoko sara mo ni duavata kei au ena noda cuva sobu ka bobo ena noda vakacabora e dua na masu me vakatabui tale kina.
Cabori Masu ni Vakatatabu
O ikemuni na Kalou, Tamai keimami Tawamudu, keimami cuva sobu e Matamuni ena vakarokoroko ena ituvatuva ni veigauna oqo. Keimami soqoni tiko oqo ena Valecavu cecere, ena gauna oqo e sa vakavinakataki ka sa vakasavasavataki oti ena kena vakayagataki tiko mai ka sa sivia oqo e dua na senijiuri.
Vakaitavi tiko ena kaukauwa ni matabete tabu kei na yaca i Jisu Karisito, keimami sa vakatabuya ka vakatabuya tale, ka vakacabora yani oqo na Valecavu e Salt Lake, kivei Kemuni kei na Luvemuni Lomani, ena loma ni vuqa na veiyabaki sa tu mai liu me rawa ni vakayagataki me dua na vanua me ra dau soqoni kina na Nomuni tamata ena vuqa na inaki.
Ena neimami vakasamataka na soqoni oqo, e lesu tale na neimami vakanananu kivua na Parofita o Josefa, ka iyaya ni cakacaka ena Ligamuni ena kena vakalesui mai na kosipeli tawamudu ni Turaga o Jisu Karisito vata kei na veisolisoli kece kei na kaukauwa kei na veivakalougatataki ka ra salavata kaya mai.
Keimami vakavinavinakataki Kemuni me baleta na cecere ni nodra vakabauta na wekai keimami era a vakasavi mai Nauvoo, ka ra a, vakaleqai vakalevu sara, okati kina na nodra mate e vuqa, takosovi Iowa ka tauyavutaki Winter Quarters qai tarava yani nodra taubale vakabalavu mai Winter Quarters ki na bucabuca oqo kei Great Salt Lake.
Keimami vakavinavinaka vei Kemuni me baleta na veiliutaki veivakauqeti nei Peresitedi Brigham Young ka ni a, sega mada ni se bau raica mai liu na buca oqo, vakavo ga ena raivotu, ka liutaki ira mai na wekai keimami ki ke. E lailai wale sara na ka e kila me baleta na vanua oqo. E sega ni matau vua na qele se na draki, na wai se na ituvaki tale eso. Ena vanua lala oqo o ira na ivuvu era cukicuki ka teitei, vakadrodroi tani na wai, vakatorocaketaki, ka tatamusuki ena vua ni nodra cakacaka vakaukauwa. Era a tuvana e dua na siti, ka sa yaco me vakaitamera ka ra vakatawana tiko ena gauna oqo e drau na udolu.
Ena dua na gauna e lewe levu sara na Yalododonu Edaidai era a vakaitikotiko eke ena qakilo oqo kei na veivanua voleka tale eso ka tauyavutaki kina na veitikotiko tale eso. Ena gauna oqo, e sa tubu na Nomuni cakacaka ke tete yani ki vuravura me yacova ni sa levu cake tale na iwiliwili ni lewenilotu mai na taudaku ni vanua oqo mai na kedra iwiliwili na tiko kina.
Kemuni na Tamai keimami lomani, ni yalovinaka me tomani na tubu cake ni Nomuni cakacaka. Ni vakavuna me vakalevutaki ka tubu cake. Ni vakalougatataki ira na tamata ena nodra soli ikatini kei na isolisoli tale eso me rawa kina na kena tubu ka tete yani. Me toso yani ki liu ka vakasinaita na vuravura taucoko me vaka na vatu ka kavida mai na ulunivanua sa sega ni ta ena liga ka namaki me qiqi yani ka vakasinaita na vuravura. Mo Ni susugi ira na iliuliu kaukauwa mai na veitabatamata mai muri, ka me rawa ni ra reki na Nomuni tamata ka kunea e levu cake sara na marau mai na nodra vakaitavi ena Nomuni cakacaka.
O koya gona, keimami sa vakatabuya, vakatabuya tale, ka vakacabora na ibulibuli tabu oqo, ka vakayacora ka kerea vakakina na veika kece oqo ena yaca tabu i Jisu Karisito, emeni.