Barbara Thompson
iKarua ni Daunivakasala ena Mataveiliutaki Raraba ni iSoqosoqo ni Veivukei

iVakatakilakila

Me vaka ni a jeameni vakacegu ni komiti ni itavi qaravi ena tabanalevu, e dau vinaka vei Barbara Thompson me dau dara na tarausese balavu vavaku ka laki biubiuta vata na kato lalai ni samaki ni yago ka sega ni lewe ni mataveiliutaki raraba ni iSoqosoqo ni Veivukei. Ia sa vakamuduo o koya ena veikacivi vou me ikarua ni daunivakasala ena mataveiliutaki oya.

Me vaka ni a veiqaravi tale tu ga mai vaka- daukaulotu tudei ena Tabana ni Kaulotu o Germany Hamburg, ka qasenivuli ni iVakavuvuli ni Kosipeli, dairekita ni keba ni Goneyalewa, daunivakasala ena iSakisaki kei na Maqusa, peresitedi ni Goneyalewa ena tabanalevu, daunivakasala ena iSoqosoqo ni Veivukei, ka lewe ni matabose raraba ni iSoqosoqo ni Veivukei, ka vakabauta tu kina o Sister Thompson ni “gauna e tiko kina e dua nodra ivakadinadina na marama me baleta na dina ni kosipeli, era na lako yani ka cakacaka.”

E a sucu kivei rau o W. Peter kei Fern Rymer Thompson ena ika 13 ni June, 1952, mai San Luis Obispo e California, ka oti oya a qai toki o Sister Thompson kei na nona matavuvale ki na vanua o Granger mai Utah. E dau taleitaka o koya na qito kei na keba, ia sa ka taleitaki vua me vakayagataka na nona gauna me sikovi ira kina na nona itokani kei na matavuvale.

E vakoroi ni vuku o koya mai na Univesiti ni Utah ena cakacaka ni veivukei, ka laki cakacaka sara o Sister Thompson ena Tabana ni Veiqaravi Raraba Vakamatatamata e Utah me 30 na yabaki. Me yacova na gauna sa vakacegu kina, sa veiqaravi oti mai o koya vaka- dairekita liuliu ni dua na isoqosoqo vakaveimatanitu e qaravi ira na gone era vakacacani ka sega tu ni kauwaitaki.

E dina ga ni sega tu ni vakamau se vakaluveni, e kaya vakaoqo o Sister Thompson, “Au sa kauti ira mai na lewe ni matavuvale e so kei na itokani, ka sa dua na ka na noqu tokoni mai vei ira na marama lewe ni Lotu.”

Sa kakavaki tiko kina o Sister Thompson me rogoca na nodra ivakadinadina na lewenilotu e veiyasai vuravura taucoko ena nona veiqaravi oqo. Oqo na nona itukutuku me nodra na marama lewe ni iSoqosoqo ni Veivukei: “Lomana na Turaga. Lako mai vua na Karisito ena yalomu taucoko. Era dau sotava na marama na ibolebole dredre e so, ia ni da vakararavi ena kosipeli kei na matamarama e tiko ena iSoqosoqo ni Veivukei, ena vakamamadataki na noda icolacola.”