Na Veika Au sa Kila Tu

Kemuni na taciqu kei na ganequ, au marautaka na gauna oqo meu mai vosa vei kemuni. Au sa vakavinavinakataki kemuni yadua sara ena vuku ni nomuni masu me baleti au. Sa dua na ka na noqu marautaki kemuni. Mai na 49 na yabaki ena noqu veiqaravi tu vaka Vakaitutu Raraba, sa sivia e 200 na gauna na noqu vosa vei kemuni ena koniferedi raraba. Au sa mai yabaki 97 tiko ena yabaki oqo. Sa balavu mai na mudre ni cagi, kau sa vakila niu sa iotioti tiko ni draunikau ena vunikau.

Ia e tu vinaka tu na yagoqu, e dina ga ni tukuni tale tiko e so na ka e veicalati. Era cakacaka sara vakavuku o ira na vuniwai kei na nasi meu bula tiko. E so vei kemuni ena rairai liu tale yani vei au. Ia, niu vakasamataka tiko na balavu ni noqu bula, au gadreva meu vakaraitaka yani vei kemuni na noqu ivakadinadina me baleta na dina ni cakacaka oqo.

Au vakatusa niu sega ni kila na veika kecega, ia ena so ga na ka au kila vakavinaka. Me baleta na veika au sa kila tu, au na vosa kina vei kemuni ena mataka nikua.

Ena gauna sa saumaki mai kina o tui Constantine me lotu Vakarisito, sa kila kina o koya na duidui e tiko ena kedra maliwa na dauvunau me baleta na ituvaki dina ni Kalou. Ena nona saga me walia rawa na ka oqo a vasokumuni ira kina na tamata vakalou cecere ena gauna oya ki Nicaea ena yabaki 325. E a soli kivei ira yadua oqo na gauna mera tukuna kina na veika era kila tu. Sa qai tekivu ga me levu cake na kena veibataki. Ena gauna sa sega kina ni matata e dua na ulutaga sa sagai me dua ga na nanuma. Sa yaco kina me vakatokai na Nicene Creed, na kena yavu ivakavuvuli era sa taurivaka tu e vuqa na yalodina Vakarisito.

Oi au mada ga au sega ni rawa ni kila rawa. Kivei au na ivakavuvuli oya e vakavuna na veilecayaki

Sa dua na ka na noqu vakavinavinaka ni oi keda ena Lotu oqo eda sega ni vakararavi ena dua na ivakavuvuli vakatamata me baleta na ituvaki ni Kalou. Na noda veivakavukui e yaco mai na veika a sotava o Josefa Simici, ena gauna a se cauravou walega kina, a veivosaki kei na Kalou na Tamada Tawamudu kei na Luvena Daulomani, sai koya na Turaga sa Tucaketale. A tekiduru e na Matadrau; a rogoca na Domodrau; ka a rogo yani o koya. E rau tamata yadua. E veivakurabuitaki toka ni laki tukuna vei tinana ni sa kila o koya ni sega ni dina na nona lotu. O koya gona, e dua vei ira na ivakavuvuli cecere ni Lotu sai koya na noda vakabauta na Kalou na Tamada Tawamudu. O koya e tamata, e ka dina, ka vakai koya ga. Sai Koya na Kovana cecere kei lomalagi kei vuravura, ia sai Koya ga na Tamada, sai keda na luvena.

Eda dau masu Vua, ia na masu oqori sa veivosaki ni Kalou kei na tamata. Au sa kila vakaidina ni sa dau rogoca ka sauma o Koya na noda masu. Au na sega ni rawa ni cakitaka. Sa vakavuqa sara na kena saumi mai na noqu masu.

A vakasalataka o Alama na luvena o Ilamani, vakaoqo: “Mo vakarogotaka vua na Turaga na nomu sala kecega, ia ena vakadodonutaka na nomu i lakolako ko Koya; mo soli iko vua na Turaga ni ko sa davo e na bogi ka na vakatawai iko ko Koya; ia ni ko sa yadra ena mataka, mo vakavinavinaka vua na Kalou; raica kevaka ko sa kitaka na veika oqo, ko na laveti cake ena siga mai muri” (Alama 37:37).

Na ikarua ni veivakadeitaki kau kila ni sa vakayavutaki talega ena raivotu nei Parofita Josefa Simici. Oya ni bula tiko o Jisu Karisito. Sai Koya na Karisito sa Bula Tiko. Sai Koya o Jiova ena Veiyalayalati Makawa ka Mesaia ena Veiyalayalati Vou. Ena veiliutaki nei Tamana, sai Koya ka a Bulia na Vuravura. Na kosipeli i Joni e tekivutaki ena malanivosa totoka oqo: “E na ivakatekivu sa bula ko koya na Vosa, a rau sa tiko vata kei na Kalou ko

koya na Vosa, a sa Kalou ko koya na Vosa.

“E na ivakatekivu e rau sa tiko vata ko koya oqo kei na Kalou.

“Sa cakava na ka kecega ko koya; a sa sega ni dua na ka sa caka, me sega ni cakava ko koya” (Joni 1:1–3).

Vakadikeva vakavinaka na iotioti ni tikina oya, “Sa cakava na ka kecega ko koya; a sa sega ni dua na ka sa caka, me sega ni cakava ko koya.”

Sai koya ga na Dauveibuli cecere. Na qaqalo ni ligana a vola kina na vunau e tini ena Ulunivanua. Sai koya ga sa biuta mai na Nona itikotiko cecere vakalou ka lako sobu mai ki vuravura, a mai sucu ena dua na ituvaki vakaloloma sara. Ena gauna ni Nona ilesilesi lekaleka, e a vakabulai ira na tauvimate, era rai na mataboko, vakabulai ira na mate, vunauci ira na vunivola kei na Farisi. Sai koya duadua ga na tamata sa uasivi sara e bula voli e vuravura. Sai koya kece oqo na ituvatuva nei Tamana. Ena Were o Kecisemani, a sotava na rarawa levu ka bunotaka mai na dra ni sa vakamamasu vei Tamana. Ia oqo sa tiki tiko ni Nona veisorovaki cecere. E ra a vesuki Koya na tamata ca, ka veilewaitaki e matai Pailato ni ra sa kailavaka mai na tamata ca me sa vakamatei. A colata na kauveilatai, na iyaya ni Nona mate. Ena vanua o Kolikoca a solia kina na Nona bula, ka kaci yani vakadomoilevu, “I Tamaqu, kakua ni cudruvi ira; ni ra sa sega ni kila na ka era sa kitaka” (Luke 23:34).

Ea laki vakotori sara na yagona ena ibulubulu nei Josefa na kai Arimacea. Ia ni oti e tolu na siga, ena isevu ni mataka ni siga ni Tucaketale, sa lala tu na ibulubulu. A vosa vei koya o Meri na yalewa ni Makitala, ka vosa yani o Koya vua. E a qai rairai vei iratou na Nona iApositolo. E a lako vata kei na rua na tisaipeli ena sala ki Emeo. Sa tukuni talega vei keda, ni a rairai o Koya vei ira e 500 tale na tamata (raica 1 Korinica 15:6).

A kaya taumada o Koya, “E so tani tale na Noqu sipi, era sa sega ni tiko ena bai oqo: sa kilikili meu kauti ira talega mai, a ra na rogoca na domoqu; ena qai duabau na qele ni sipi, ka duabau na ivakatawa” (Joni 10:16). Sa yaco talega, me rairai kivei ira na tamata era tiko mai Bountiful ena Ra kei Vuravura oqo. Eke, a vakavulica ira na tamata me vaka a vakavulici ira mai na Vuravura Makawa. Sa volai tu na veika kece oqo ena iVola i Momani, ka sa ikarua ni ivakadinadina ni ituvaki vakalou ni noda Turaga.

Me tokaruataki, o Koya vata kei Tamana rau a rairai vua na cauravou o Josefa, a vakatakilaitaki Luvena o Tamana, ni kaya: “Oqo na Noqu Gone ni Toko. Mo Rogoci Koya!” (Josefa Simici—Ai Tukutuku 1:17).

Ia oqo, na kena e tarava oqo au sa kila vakaidina, kau sa vakadinadinataka, oya na Veisorovaki ni Turaga o Jisu Karisito. Ke a sega ni yaco sa qai ka wale na bula oqo. Sai koya oya na vatuivakadei ni yavu ni noda bula oqo. Sa vakadeitaka kina ni da a bula tu mai liu ni bera ni da mai sucu eke. Na bula oqo sa ikoya na ikakalawa ki na dua na bula lagilagi ki na gauna sa bera mai. Na rarawa ni mate sa mai wali ena yalayala ni Tucaketale. Ena sega ni rawa ni yaco na Kirisimasi ke sega na siga ni Mate.

Au tukuna tiko oqo na veivakadeitaki sa lakovata mai kei na Vakalesuimai ni kosipeli i Jisu Karisito. Sa yaco oqo na vakalesuimai ni matabete, se na kaukauwa sa soli vua na tamata me ra vosa ena vukuna na Kalou. Na matabete e rua tiko: na kena e lailai sobu, ka kilai tu me Matabete i Eroni, a vakalesuamai o Joni na Dauveipapitaisotaki. Na matabete e cecere cake, oya na Matabete i Melikiseteki, e ratou a vakalesuamai o Pita, Jemesa kei Joni.

Ena kena vakalesuimai na Matabete i Eroni, o Joni na Dauveipapitaiso ka sa tucaketale a tabaka e ligana dina na ului Josefa Simici kei Oliver Cowdery ka cavuta, “Oi kemudrau na noqu itokani, au sa lesi kemudrau e na yaca ni Mesaia ki na itutu ni bete vaka- Eroni, ka solia vei kemudrau na kaukauwa kei na lewa ni ilesilesi oqori; io na nodra cakacaka na agilosi dauveiqaravi, na vunautaki ni ivakavuvuli ni veivutuni kei na papitaiso e na tabadromuci e wai me bokoci kina na ivalavala ca” (V&V 13:1).

Ni sa qase sara o Peresitedi Wilford Woodruff e a vosa vei ira na cauravou ena Lotu ka kaya: “Au gadreva mo ni kila ni sega ni dua na kedrau duidui e dua na Bete mai vua e dua na iApositolo, kevaka e gumatuataka na nona veikacivi. E tiko vua e dua na bete na idola ni nodra cakacaka na agilosi. E sega vakadua ena noqu bula vaka iApositolo, lewe ni Vitusagavulu, se dua na iTalatala Qase, meu taqomaki vakalevu cake mai vua na Turaga me vakataka na gauna au a Bete tiko kina” (ena Millennial Star, Oct. 5, 1891, 629).

Na Matabete i Melikiseteki se Matabete Cecere e solia na kaukauwa vei ira na tagane me ra tabaka na buradeladra tale e so ka vakalougatataki ira kina. Era vakabulai ira na tauvimate. Me vaka e kaya tiko o Jemesa ena Veiyalayalati Vou: “Kevaka e dua vei kemudou sa tauvimate? Me kacivi ira na qase ni soqosoqo lewe ni lotu; ia me ra masulaki koya ka walia ena waiwai ena yaca ni Turaga” (Jemesa 5:14).

Me itinitini, au na vakamacalataka na veivakalougatataki ni vale ni Turaga, ka sa yaco mai ena Vakalesuimai ni kosipeli taumada.

Na veivaletabu oqo, ka sa levu tikoga na kedra iwiliwili ena vica na yabaki sa oti, sa tu na kena veivakalougatataki e sega ni kune ena dua tale na vanua. Na veika kece sara e vakayacori tiko ena veivaletabu oqo sa baleta tiko na nodra na laki ituvaki tawamudu na tamata. Ena valetabu, era vauci vata vakamatavuvale me tawamudu na veiwatini kei ira na luvedra. Na vakamau e sega ni “me tawasei kedaru ga ko mate.” Sa ka tawamudu, kevaka era bula kilikili voli ki na veivakalougatataki o ira oqo. Na kena e cecere duadua oya na lewa me vakayacori kina na cakacaka ni veivakasosomitaki ena vukudra e so tale ena vale ni Turaga. Eke, e vakayacori kina na papitaiso ena vukudra era sa mate ka ra a sega ni ciqoma ni ra a bula tiko e vuravura.

E dua na gauna lekaleka sa oti a tukuni vei au na itukutuku ni dua na marama yada mai Idaho Falls. Sa oti oqo e 15 na yabaki ena nona cakacaka vakaveisosomitaki ni kena soli na edaumeni ni valetabu ki na 20,000 na tamata ena Valetabu e Idaho Falls. E a vakayacora na ika 20,000 ni edaumeni ena siga Vakaraubuka ka lesu ena siga Vakarauwai me vakayacora e lima tale. E a mai takali o koya ena macawa ka tarava.

Me da vakasamataka mada na veika sa vakayacora rawa na marama lailai oqo. E a veisosomitaki o koya ena veiedaumeni kece oya me baleti ira na iwiliwili ni lewevuqa me vakataki ira era mai soqoni ena Koniferedi oqo ena mataka nikua. Mo ni vakasamataka mada na kena dolei mai na yasana ka dua.

Ia oqo, kemuni na taciqu kei na ganequ, sa noqu ivakadinadina oqo kau sa mai vakaraitaka tiko ena vakarokoroko.

Me vakalougatataki kemuni yadudua na Kalou, oi kemuni na Yalododonu Edaidai. Mo ni kune vakacegu kei na loloma ena nomuni dui vuvale ka me dusimaki kemuni tiko na vakabauta kei na masu ena nomuni cakacaka kecega ka sa noqu masu malumalumu oqo, ena yaca i Jisu Karisito, emeni.