Nanumi Lesu na Valecavu

iVakatakilakila

Kemuni na taciqu kei na ganequ, ko ni tiko eke ena Valecavu kei kemuni na vakarorogo tiko mai na vanua cava ga mai na veiyasai vuravura, sa dua na ka marautaki vei au niu rawa ni tucake tale e matamuni ena loma ni vale totoka oqo. E sega ni dua e tiko eke, ena sega ni vakila na yalo e tiko vei ira na yalododonu ena gauna o ya, ni ra tara tiko na vale totoka ni sokalou oqo, ka vakakina o ira era sa ogataka ena veitabayabaki sa oti mera maroroya ka samaka tiko mai.

Ena dua na gauna lekaleka sa oti au vakananuma voli mai na veika lelevu e tara na noqu bula ka veisemati vata kei na Valecavu qo e Salt Lake. Dina ga ni levu sara na kena iwiliwili meu wilika yani nikua, ia au gadreva meu na wasea ga e vica.

Au nanuma lesu na gauna meu papitaiso kina ka niu sa yabaki walu. E a vakamacalataka tiko vei au o tinaqu na veivutuni kei na ibalebale ni papitaiso; me yacova e dua na siga Vakarauwai ni vula o Sepiteba 1935, ka ni a kauti au yani o tinaqu ena dua na motoka kina loqi ni papitaiso ena Valecavu ka a tiko voli ga ena vale oqo ena dua na gauna lekaleka sa oti. Ena gauna o ya e sega ni kena ivakarau me vaka ena gauna oqo mera dau papitaisotaki ira na luvedra o ira na tamadra, me vaka ni cakacaka tabu vakalotu oqo ena dau vakayacori ga ena mataka se yakavi ni siga Vakarauwai, ka levu vei ira na tama era donumaka tu o ya na gauna ni nodra dui cakacaka. Au a vakaisulu vulavula ka papitaisotaki. Au nanuma vinaka tu na siga o ya me vaka ga e siga ga ena noa ka vakakina na marau au sotava niu sa mai qarava rawa na cakacaka tabu vakalotu oqo.

Ena veitabayabaki e tarava mai, vakauasivi na gauna au a bisovi voli kina, au a donumaka e levu sara na papitaiso ena loqi ni papitaiso ena Valecavu. Na papitaiso yadua e duatani ka veivakauqeti, ka ra kauta lesu mai na vakanananu ni noqu a papitaiso vakaiau.

Ena Epereli ni 1950, keirau a tiko kina kei watiqu o Frances ena soqoni ni koniferedi raraba ena yakavi ni Siga Tabu ka a vakayacori ena loma ni vale oqo. E a Peresitedi voli ni Lotu ena gauna o ya o Peresitedi George Albert Smith ka a qai vunautaka me tinia kina na koniferedi e dua na itukutuku sa bau veilauti ka veivakauqeti sara ga baleta na Tucaketale ni Turaga ka iVakabula o Jisu Karisito. Ni bera ni cava na nona vosa e qai cavuta e dua na ivakaro vaka-parofita. E kaya: “Ena sega ni dede sa na roboti vuravura na veika vakadomobula vakavo kevaka me yaco sara vakatotolo na veivutuni. Ena sega ni dede era sa na mate na milioni ka ra sa veiseyaki tu ena veiyasai vuravura … me baleta na ka ena yaco mai.” (ena Ripote ni Koniferedi, Epe. 1950, 169). Oqo e a vosa ni veivakakidacalataki baleta ni lako mai vua e dua na parofita ni Kalou.

Ni oti e rua veimama na vula mai na gauna ni Koniferedi Raraba, ena ika 25 ni June 1950, e kacabote kina na ivalu mai Korea—e dua na ivalu ka a kauta tani e 2.5 na milioni na bula ni tamata. Na ka e yaco oya e vakavuna meu vakananuma lesu na ka e a tukuna o Peresitedi Smith ena neimami a dabe tu ena loma ni vale oqo ena siga ni vula itubutubu o ya.

Au dau tiko ena levu sara na soqoni ni Koniferedi Raraba ena Valecavu, kau dau vakavukui ka vakauqeti ena nodra dau vosa na Veitacini. Sa qai sureti au o Peresitedi David O. McKay ki na nona valenivolavola ena Okotova ni 1963 ka vakadewataka vei au na veikacivi meu sa lewena na Kuoramu ni iApositolo Le Tinikarua. E qai kerea meu maroroya na veikacivi oqo ka kakua ni vakaraitaka vua e dua, vakavo ga vei watiqu, ka meu na tiko ena Koniferedi Raraba ena Valecavu ena siga ka tarava, ka ni na kacivaki kina na yacaqu.

Au lako mai kina Valecavu ena siga ka tarava, ka sega ni kila na vanua meu dabe kina. Me vaka niu lewe ni Komiti ni Dausikovuvale ni Matabete, au sa qai nanuma meu laki dabe vata kei ira na lewe ni komiti. Au raica e dua na noqu itokani o Hugh Smith, ka lewena talega na Komiti ni Dausikovuvale ni Matabete. Sureti au mai meu laki dabe vata kei koya. Au sega ni rawa ni tukuna vua na veikacivi sa soli mai vei au, ia au mani dabe sobu ga.

Ena gauna ni soqoni, era a tokoni kina na lewe ni Kuoramu ni iApositolo Le Tinikarua ka a wiliki talega mai kina na yacaqu. Au vakabauta ni ilakolako mai na idabedabe kina tavata, sa ikoya na taubale balavu duadua ena noqu bula.

Sa voleka oqo ni 44 na yabaki mai na Koniferedi o ya. Me yacova na yabaki 2000, na gauna e a vakatabui kina na Vale ni Koniferedi, e sa ka dokai vei au meu a vunautaka e dua na drau ka dua na itukutuku ni Koniferedi Raraba mai na tevali ni vale oqo, sega ni wili kina na itukutuku ni koniferedi ni mataisoqosoqo kei na so tale na soqoni e a vakayacori eke. Na noqu vosa nikua e sa na kauta cake na iwiliwili ki na 102. Au a sa sotava oti e levu sara na vei draki ni bula vakayalo ena noqu dau tucake eke meu vosa.

Ena gauna au a vosa tiko kina ena Koniferedi Raraba ni Okotova 1975, e a vakauqeti na yaloqu meu vagolea na noqu itukutuku vua e dua na goneyalewa lailai uluvula ka dabe toka ena itabavale e cake ni vale oqo. Au sa qai vagolea na yalodra na lewenilotu vua na goneyalewa o ya ka vakila ni sa soli vei au na galala meu tukuna ni goneyalwa o ya e gadreva sara tikoga na itukutuku ka tiko vei au baleta tiko na nona vakabauta e dua tani tale na yalewa.

Ni sa mai cava na soqoni, au gole kina noqu valenivolavola, ka raica sara ni waraki au toka kina edua na gonelailai yacana o Misti White, kei rau na buna kei tukana kei na dua na nona nana lailai. Ni vakabula oti ga vei ratou, au kilai Misti sara ni okoya ka a dabe toka mai na taba vale e cake kau a vagolea vua na noqu itukutuku. Au mai kila kina ni sa voleka ni yabaki walu ka sa veilecayaki se me papitaiso se kua. E vakila o koya ni sa dodonu me papitaiso, o rau na tukana kei buna ka rau bula vata voli, eratou vinakata me papitaiso, ia o tinana ka sa mai malumalumu voli ena lotu e vinakata me wawa me yacova ni sa yabaki 18 me qai vakatulewa kina. E a kaya o Misti vei rau o tukana kei buna, “Kevaka medatou lako kina Koniferedi mai Salt Lake, de na rairai vakaraitaka mai kina na Tamada Vakalomalagi na ka meu na cakava.”

Eratou lako sara mai Kalifonia o Misti kei rau o tukana kei buna vakakina o tinana lailai ka ratou rawata na tikite ni idabedabe ena soqoni ni Koniferedi ena Valecavu ena yakavi ni Vakarauwai. Oqo na vanua eratou dabe toka kina ka dreta na yaloqu meu vagolea vua na noqu vosa.

Ni keitou veitalanoa tiko ni mai cava na soqoni, sa qai kaya mai vei au o bui Misti “Au nanuma ni o Misti e via tukuna tiko vei kemuni e dua na itukutuku” Sa qai kaya mai na goneyalewa vinaka oqo “Baraca Monson na gauna o vosa tiko kina ena Koniferedi, o sa sauma sara tikoga na noqu vakatataro. Au sa vinakata sara ga meu sa papitaiso”

Eratou lesu ki Kalifonia ka sa laki papitaiso ka vakadeitaki sara o Misti me sa lewe ni Lotu i Jisu Karisito ni Yalododonu Edaidai. Ena veiyabaki me tekivu mai na gauna o ya, e sa dei ka dina tu kina kosipeli i Jisu Karisito o Misti. Au a vakamarautaka na noqu vakayacora na nona vakamau ena valetabu kei na dua na cauravou vinaka sara, rauta ni tinikava na yabaki sa oti, ka rau sa itubutubu tiko ni lima na gone rairai vinaka, ka dua tale sa vakarau yaco tiko mai.

Kemuni na taciqu kei na ganequ, sa ka dokai vei au meu tucake tale tu e ke ena tevali ni Valecavu, ka tiko na mataqali vakanananu totoka vaka ko ya. Sa dua na tiki ni noqu bula na Valecavu—na tikina kau dau vakamareqeta.

Ena noqu bula taucoko, au dau doka ka taleitaka na noqu dau laveta cake na ligaqu ki na sukuwea meu tokoni ira na ciwa na Peresitedi ni Lotu ni dau wiliki mai na yacadra. Ena mataka nikua, au baci duavata tale kei kemuni ena tokoni Peresitedi Gordon B. Hinckley na noda parofita lomani.

Ni sa na vakatabui tale nikua na vale oqo, oi keda me da sa vakatabui keda talega kina qaravi ni cakacaka ni noda Turaga ka iVakabula o Jisu Karisito. O koya ka a solia na nona bula meda rawata kina na bula. Au masu ena yalomalumalumu meda na dau vakamuria na mawe ni yavana ena veisiga, ena yaca iJisu Karisito, emeni.