Nanuma, Veivutuni, ka Veisau

iVakatakilakila

Au vakavinavinaka vakalevu ena vukuna na noda iVakabula kei na veisureti vei keda kece me da “lako vei Karisito ka biuta tani na ivalavala sa sega ni vakalotu, mo dou vinaka kina.”¹ Au nuitaka ni rawa niu vakadewataka vei kemuni eso na ka au vakasamataka tu ka vakila me baleta na nanumi Koya, veivutuni, ka veisau. Au vakabauta ni na rawa niu vakamacalataka sara vakavinaka na veika e tu e yaloqu ena noqu tukuna vei kemuni na veika me baleti iratou e tolu na marama ka qai veitalanoataka eso na lesoni au sa vulica mai na nodratou italanoa.

Au na tekivu vei Ruth May Fox, ka a peresitedi raraba tu ni Goneyalewa ena vuqa na yabaki sa oti. A veiqaravi tiko ena ilesilesi ko ya me yacova ni sa yabaki 84. A sucu ko Sisita Fox mai Igiladi, ni yabaki 13, a taubaletaka na veikalawa yadua me yaco ki na Bucabuca o Salt Lake vata kei na dua na ilawalawa ivuvu ni lotu. A mate na tinana ni se gonedramidrami, a mani tiko kina kei na veimatavuvale duidui eso ena imatai ni dua na daseni ni nona yabaki ni bula. E rairai a dua na gone dredre na nona susugi, baleta ni a vakatoka o buna me “goneyalewa ca” ka bese ni qaravi koya.²

Sa qai yaco e muri me vakamau ko Ruth ka 12 na luvena. A wasea na nona ivakadinadina tudei vata kei ira na luvena ka vakavuvulitaka na ivakavuvuli eso ni kosipeli ni cakacaka vata kei ira, ia a vakadinadinataka ni ra dau vakadodonutaki vakaukauwa ena so na gauna na luvena qase cake ena vuku ni nona dau yalo totolo ka sega ni dau “wili vakatini”³ ena gauna e cudru kina. A cakacaka vakaukauwa me rawa ni lewa kina na malumalumu oqo ka qai yaco me kilai ena vinaka ni yalona kei na nona dau qaravi ira na tani.

A bula tiko ko Sisita Fox me yabaki 104. Ena nona bula balavu a sotava na marau lelevu kei na veivakatovolei dredre ka vakavuvulitaka ni, “bula e dau kauta mai eso na lesoni dredre. Na kau kaukauwa e sega ni tei ena loma ni iloilo, kei na bula qaqa e sega ni rawa ena kena dau levei na leqa.”⁴

Ena yabaki sa oti au a kabata kina na Independence Rock e Wyoming meu raica na vanua e ceuta tu kina ko Sisita Fox na yacana ni se qai yabaki 13 ena nona ilakolako ki na Bucabuca o Salt Lake. Sa voleka sara ni bokoca laivi vakadua na draki ena 140 na yabaki sa oti, ia au rawa ni wilika na “Ruth Me 1867.” Au vinakata meu kila vakavinaka cake na iliuliu cecere oqo, na tisaipeli i Jisu Karisito ka cakacaka ena nona bula taucoko me vakavinakataki koya, ka nona ibole na “na Matanitu ni Kalou se sega ni dua na ka!”⁵

Na noqu italanoa ka tarava e baleta e dua na marama au na vakatoka ko Meri. E luvedrau goneyalewa na itubutubu ivuvu vakalotu yalododonu ka rau dau sorovaki ka vakalevu ena vuku ni kosipeli. A vakamau ena valetabu ko koya ka tinadra e 10 na gone. E dua na marama levu na nona taledi ka dau vakavulici ira na luvena ena masu, ena cakacaka vagumatua, ka me ra dau veilomani. E dau sauma na nona ikatini ka ratou dau vodo vata vakamatavuvale ena nodratou qiqidreti ena ose, ka lako ki lotu ena vei-Sigatabu.

E dina ni sa kila tu ni veisaqasaqa kei na Vosa ni Vuku, a tekivu me vakaitovotaki koya ena gunu kofe ka dau toka ga ena nona sitovu e dua na kuro ni kofe. E dau kaya voli ni na “sega ni vakuwai au ki lomalagi na Kalou ena vuku ni dua na bilo kofe lailai.” Ia, ena vuku ni bilo kofe lailai ko ya, a sega kina ni rawa ni soli vua e dua na ivolatara ni valetabu ka sega talega vakakina vei iratou na luvena era dau gunu kofe vata kei koya. E dina ni a bula tiko me yacova ni sa qase sara ka qai yaco e muri me curuma tale ka veiqaravi ena valetabu, e dua ga vei iratou na le tini na luvena a kilikili kaya ka vakamau ena valetabu, ka lewe levu sara vei ira na nona kawa, sa yacova oqo na ikalima ni itabatamata, era a bula ena taudaku ni veivakalougatataki ni kosipeli sa vakalesui mai, ka a dau vakabauta ka ra a sorovaki ka vakalevu kina na tubuna e liu.

Na iotioti ni italanoa e baleti Christina (e sega ni yacana dina) ka a papitaiso ka vauci ki na nona matavuvale ni se goneyalewa lailai, ia ena dua na gauna e loma, sa mai mudu kina na bulataki ni kosipeli ena nona matavuvale. Oqo sa yabaki tinivakacaca, sa dau cakava eso na digidigi cala ka dau kune rarawa kina.

Ena dua na siga au a solia vua e dua na ivola ni Torocake Yadudua ka kaya, “Na ivola oqo ena vukei iko mo bulataka eso na itovo totoka va-Karisito ena nomu bula me rawa ni o vakayacora kina na veisau o gadreva. Au sureti iko mo sa tekivuna sara ga oqo na nomu cakacaka ena ivola oqo ka qai kauta mai ki na yasanibuka ni itabagone ena yakavi nikua ka wasea vei au na veika ko sa vulica.” Ena bogi ko ya e qai kaya ni tonawanawa tu na matana, “Nikua au tekivutaka kina na noqu torocake yadudua.“ Sa volavola mai vakavica vei au me tekivu mai na siga ko ya. Sa tekivu me lesu tale ki na soqoni ena vei-Sigatabu, na Muavata, kei na semineri. Ena loma ni rua na macawa erau sa tekivu lako vata kaya ki lotu na tinana kei na tacina. E muri sa duavata kei iratou na tamana, ia oqo eratou sa lako vata ki na valetabu na matavuvale kece sara.

O koya gona, na cava eso na lesoni au vulica rawa mai na veitalanoa oqo me baleta na nanuma, veivutuni, ka veisau?

Na imatai ni lesoni sai koya, na tamata kece e dau cala.⁶ Ena dua na gauna lekaleka sa oti, au a tiko vata kei na dua na goneyalewa yabaki walu ena siga ni nona papitaiso. Ni sa oti na siga ko ya e qai kaya ena yalodei, “Sa dua taucoko na siga na noqu papitaiso kau se sega vakadua ni bau ivalavala ca!” Ia a mai cava na nona siga vinaka, kau vakabauta ni sa vulica tiko ena gauna oqo, me vaka ni da dau vulica kece, ni vakacava sara na noda saga vakaukauwa, eda na sega ni rawa ni dau levea kece na veigauna ca, na veidigidigi cala, se me da lewai keda vakavinaka me vaka na kena dodonu. Au sa dau rogoca vakalevu me baleta na itabatamata digitaki ka vakaturaga ni itabagauna oqo, ia au sega ni se bau rogoca me tukuni ni itabatamata uasivi sara. Era dau vakayavalati rawarawa na itabagone, baleta ni tiko dina na kaukauwa nei Setani, ka ra sa cakava tiko na imatai ni nodra digidigi vakataki ira. Sa yaco kina, ni ra sa vakayacora tiko vakakina na imatai ni nodra cala levu.

Oqori na ka a yaco vei Korianitoni ena iVola i Momani. A dodonu me veiqaravi tiko ena yalodina ko Korianitoni ena kaulotu, ia a nanuma o koya ni sa kaukauwa ka maqosa cake me sotava kina na veigauna rerevaki kei na ilawalawa ca, ka yaco kina vua na leqa levu kei na ivalavala ca levu ena gauna sa tekivu lakova kina na veivanua cala, kei na tamata cala, ka vakayacora na veika e cala.⁷

Na ikarua ni noqu lesoni sai koya, ni sega ni ka me da digia na veivutuni. Eda sa vakaroti me da veivutuni.⁸ E vakavuvulitaka na iVakabula, kevaka eda sega ni veivutuni ka “yaco me vaka na gonelailai, … eda na sega sara ni rawata na matanitu ni Kalou.⁹ Me da kakua sara ni laiva e dua na bilo kofe lailai, e dua na itovo ca, e dua na lewa cala me kauti keda tani ena dua na gauna taucoko ni bula.

Ena so na gauna eda dau vakawaletaka na tamata na veivutuni. Au sa rogoca eso na tamata ni ra kaya ni sa rui dredre na veivutuni. Eso tale era kaya ni ra sa oca mai na kilai yalodrataka se ra vakacudrui mai vua e dua na iliuliu ka vukei ira tiko me ra veivutuni. Ena so na gauna era sa dau soro na tamata ni ra cakava eso na cala ka ra nanuma ni sa sega ni dua na nodra inuinui. Eso na tamata era nanuma ni ra na vinaka cake kevaka era biuta tu na kosipeli vakalesui mai ka lako tani yani.

Sai Setani ka dau kauta mai na vakanuinui ca ki na yalodra na caka cala. E dau solia tikoga vei keda na inuinui na Turaga ko Jisu Karisito. E kaya:

“Ko sa digitaki mo vakayacora na cakacaka ni Turaga, Ia kevaka ko sa sega ni qarauni iko mai na ivalavala ca, ko na rawai kina.

“Ia mo nanuma tiko ni sa yalololoma sara na Kalou; ia mo veivutunitaka na nomu cala ni ko a beca na noqu ivakaro, io ko na digitaki tale ka lesi mo vakacavara na cakacaka.”¹⁰

Na sala rawarawa ka totolo duadua ki na marau kei na vakacegu sai koya mo veivutuni ka veisau, ena kena gauna totolo duadua o rawata.

Na ikatolu ni lesoni sai koya, ni da na sega ni kitaka duadua. Ena sega ni rawa na veisau dina kevaka eda cakava vakataki keda. E sega ni rauta na noda dui lewa e loma se na noda inaki vinaka. Ni da cala se da digidigi vakaca, sa dodonu me vukei keda na iVakabula me da lesu tale ena sala. Eda vakaivotavota ena sakaramede ena veimacawa me da vakaraitaka kina na noda vakabauta na Nona kaukauwa me veisautaki keda. Eda vakatusa na noda ivalavala ca ka yalataka me da biuta laivi sara.¹¹

Ni sa sega ni rauta na noda sasaga kaukauwa duadua, eda na qai rawata na igu ena nona loloma soli wale me da tovolea tikoga kina.¹² E kaya na Turaga: “Au sa vota vei ira na tamata na malumalumu vakayago me ra yalomalumalumu kina; ia na noqu loloma sa rauti ira kecega sa vakamalumalumutaki ira vei au; ia kevaka era sa vakamalumalumutaki ira ka vakabauti au, au na vakaukauwataki ira ena veika era sa malumalumu kina.”¹³

Ni da qara na veivuke ni Turaga me veisautaki keda, sa na noda na yalayala oqo: “Ia ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.”¹⁴ E sega ni dau soro ena vukuda na Turaga. E kaya: Dou lako mai vei au koi kemudou vakaadua ga sa oca ka colata na icolacola bibi, ia kau na vakacegui kemudou.“¹⁵ Na reki kei na vakacegu eda rawata ena noda kila ni da sa vosoti sa ka ni veivakalougatataki vakalou. Na vakacegu oqori e yaco mai ena nona gauna na Turaga kei na Nona sala, ia ena yaco dina mai.

Na iotioti ni noqu lesoni sai koya, ni da rawa ni veisau. Na veisiga yadua sa dua na gauna vou me da nanuma kina na noda iVakabula ka muria na Nona ivakaraitaki. Kevaka eda sega ni veivutuni, eda na sega ni rawa ni tubu.¹⁶ Oqori na vuna e ikarua kina ni ivakavuvuli ni kosipeli na veivutuni.¹⁷

Eda sega ni dau vaqara na iulubale ni dua na malumalumu, ia eda na cakacaka ena veisiga yadua me da tauyavutaka na veitovo vivinaka kei na ivalavala va-Karisito. E kaya ko Peresitedi Spencer W. Kimball: “Na bucini ni ivalavala va-Karisito e cakacaka oca ka sega ni oti rawa—e sega ni baleti ira na dau cakacaka vagauna se o ira era sega ni dau sasaga tikoga, ena veigauna.”¹⁸ Au vulica mai vei Christina ni kena tauyavutaki na ivalavala va-Karisito ena noda bula e ivakatakilakila ni da sa veisau tiko.

Baleta ni da tamata vakayago kece, eda dau cala kece. E sega ni ka me da digia na veivutuni, ia eda sega ni na cakava duadua. E tiko na noda iVakabula me vukei keda ena noda veivutuni. Ni da vakatorocaketaka na nona ivalavala ena noda bula, eda kila ni da sa vakayacora tiko kina na veisau ka na vukei keda me da toro voleka yani Vua.

E kaya ko Sisita Fox ni kosipeli e nona itataqomaki mai na veitemaki, [nona] ivakavakacegu ena gauna ni rarawa, [nona] vu ni reki kei na lagilagi ena gauna taucoko ni [nona] bula, ka [nona] inuinui ki na bula tawamudu.”¹⁹ A taura me nona ibole, “na Matanitu ni Kalou se sega ni dua na ka,” baleta ni kila ena nona maroroya ena yalona taucoko na kosipeli, ena rawa ni ciqoma na yalayala sa solia na iVakabula vei keda kece: “Ia ko koya yadua sa veivutuni ka papitaisotaki ena yacaqu, ena vakasinaiti ena Yalo Tabu; ia kevaka sa vosota me yacova na ivakataotioti, au na kunea ni sa savasava ko koya ena mata i Tamaqu ena siga au sa tu kina meu lewai ira na kai vuravura.”²⁰

Ena veivutuni sa yaco kina meu kila na iVakabula, ia ena noqu qara na Nona veivuke meu veisau kina, sa tubu me levu cake kina na noqu vakabauti Koya kei na noqu vakararavi Vua, kau vakadinadinataka ni tiko dina o Koya kei na nona kaukauwa, ena yaca i Jisu Karisito, emeni.