E Dua Li na Tamata Me Butakoci Koya na Kalou?

iVakatakilakila

Au gadreva meu vakamacalataka mada na lawa ni ikatini. Ena vola i Malakai, a taroga kina vakaoqo na Turaga:

“E dua li na tamata me butakoci koya na Kalou? Ia dou a butakoci au. Ia dou sa kaya, Keitou a butakoci kemuni beka vakaevei? Dou sa butakoca nai sigana kei na madrali.

“E na dua na veicudruvi dou sa cudruvi kina ni dou sa butako vei au, io koi kemudou na matanitu kece oqo.

“Dou kauta kece mai na sigana ki na lololo, me so kina na kakana e na noqu vale, ka vakatovolei au mada kina, sa kaya ko Jiova ni lewevuqa, se’u na dolava se segai na katuba ni lomalagi, ka sovaraka vei kemudou na ka ni veivakalougatataki, me na sautu dina sara.”¹

Na ikatini sa dua na vunau bibi dina sara, ka ni gauna a rairai kina na Turaga kivei ira na Luvena ena vanua o Amerika ni sa Tucake Tale mai na mate, a cavuta tale na vosa vata ga oya.² E kaya vei keda na Turaga ena noda gauna oqo, “me ra na qai solia ga ena veiyabaki na ikatini ni ka era taukena ko ira era sa solia oti na vo ni nodra iyau.”³

Ena ivola ni Vunau ni Soro, e a kaya kina vakatolu na Turaga, ni ikatini e “sa tabu me nei Jiova.”⁴

E kaya vakaoqo na Turaga, “Ia dou vakatovolei au mada kina [se vakaraici au mada kina], … se’u na dolava se segai na katuba ni lomalagi.”⁵ E vuqa vei keda eda sa vakatovolea sara tikoga na Turaga; ia e so era sega ni vakayacora.

Me kena ivakaraitaki, me da raica mada e tini na apolo. E nona dina sara ga na Turaga na tini na apolo oqo, ia sa kerei keda o Koya me da vakasuka Vua na kena ikatini, se dua na apolo.

O na solia tiko beka ga e dua na tikina lailai ni apolo oya ka maroroya e 90 na pasede? E sa lomamu dina li mo solia vua na Turaga e dua na tikina lailai?.

Ko maduataka beka li se ko na saga mo tabonaka na apolo ka vunia na tikina ko sa kania ka cabora yani vua na Turaga?

Eda gadreva meda solia na noda isolisoli ena kena iwiliwili dina, kei na kena e savasava. Eda sa vakavulici kina vakaoqo: “Raica sa vinakata na Turaga na yalo sa malumalumu ka talairawarawa; ia ko ira sa yalo malumalumu ka talairawarawa, era na kania na veta ni vuata ena vanua ko Saioni e na siga mai muri.”⁶

Ena vica na yabaki sa oti, au a taura kina e dua na ilesilesi meu laki veisautaka na veiliutaki mai na iTeki o Carey Idaho. E a kele yani na waqavuka e Twin Falls ka sa waraki au tu mai o Peresitedi Rou Hubert ka a daumaka dina na nona veiqaravi, a kauti au sara ki na nona vale. Ena neirau sa gole tiko ena motoka, au a tarogi koya sara, “E tiko tale beka e dua na ka e rawa meu na cakava vei iko kei ira na nomuni Yalododonu?”

A kaya mai. “Io, e se qai oti toka ga oqo vei keimami ena vica na yabaki sa oti e dua na lauqa levu. Ia ena yabaki oqo, e sa lauqa cake sara vakalevu ka sa vuqa vei ira na dauteitei era sa biu vanua mera laki vaqara cakacaka tale ki na dua tale na vanua.”

Au a lomaleqataki ira sara vakalevu na lewenilotu yalodina era lomana vakalevu na Turaga kei na Lotu, ka sa tekivu me ca vakadua na nodra iteitei.

E dua na bisopi cauravou, o R. Spence Ellsworth, a qai kacivi me sa peresitedi vou ni iteki. Ena gauna ni isoqoni raraba ena Sigatabu, au sa vakananuma tikoga vakalevu na lauqa oya. Niu sa vosa tiko vei ira na Yalododonu, sa vakauqeti sara vakalevu na noqu vakasama; meu kerea vei ra me ra:

1. Sauma vakadodonu na nodra ikatini, o ira na gone kei na qase.

2. Masu yadudua ka vakamatavuvale vakavuqa ena yalomalua.

3. Yalodina ena nodra vulica na ivolanikalou vaka tamata yadua ka vakamatavuvale

4. Vakatabuya ena vakavinavinaka na Siga ni Vakacecegu

5. Marautaka na curuma tiko na vale ni Turaga, ka laki vakavinavinaka kina.

6. Tokona ka muri ira na iliuliu vou e se qai kacivi ira walega oqo na Turaga.

7. Vakayacora e dua na lolo vakaiteki, ka me ra okati taucoko kina na vakaleqai tu ena i itikotiko ka ra gadreva me ra vakaitavi kina.

Ni oti toka e vica na siga, na koniferedi ni iteki, era sa laki teivaka na lewenilotu na nodra itei, ena vakabauta taucoko, e dina ga ni na sega tiko ni tau na uca.

Ena siga Vukelulu, ena veidusimaki nei Peresitedi Ellsworth, era a lolo kece sara kina na lewe taucoko ni iteki. Ena macawa vata tikoga oya, o ira na iliuliu kei na dui watidra era a curu ki na Valetabu o Boise Idaho ka vakayaco masu ni vakavinavinaka. Ena gauna era a tiko kina e loma ni valetabu o ira na Yalododonu yalodina oqo, sa tekivu me tau na uca ena vanua taucoko e dina ga ni a kacivaki ena tukutuku ni draki ni na sega na draki suasua ena vica tale na macawa. Na Vakarauwai ka tarava e a tau tale kina e dua na uca vinaka me vica tale na siga. A yaco ka oqo ena mua ni vula o Epereli. E a vakarauta na tau ni uca cevata ena veiulunivanua, ka yaco kina me batabata vinaka. Ena itikotiko raraba o Dietrich kei Richfield, a lutu sobu sara tu ga na nodra tobu ni wai ki na 30 na pasede, ia ni mai oti na lolo oya, sa voleka kina ni sinai. Na ivakarau ni wai ena itikotiko o Carey a toro cake sara mai 44 ka sivia na100 na pasede na kena ivakarau tudei. Ena vo ni gauna ni iteitei oya, era a vaqaqacotaka kina na lewenilotu e Carey na nodra vakabauta ena nodra lolo tale vakavica, sauma vakadodonu na nodra ikatini, ka ra lako vakawasoma ki na valetabu, ka sa rogoca ka sauma mai na Turaga na nodra masu. E a qai tau mai na uca cevata batabata sara ena mua ni yabaki oya, ka rawa kina vei ira na dauteitei me ra tamusuka na nodra qereni, dovu kamica, co madu, pateta, kei na kakana tale e so. Mai na siga oya, kei na veiyabaki, vakatekivu mai na gauna ena nodra cabora na nodra masu ni vakavinavinaka ia ka “baleta walega na … nona loloma levu,”⁷ ena tomana tikoga na nona veivakalougatataki na Turaga.

Ena ivola ni Veigauna, e kaya kina vakaoqo na Turaga: “Kevaka era sa vakamalumalumutaki ira ko ira na noqu tamata era sa vakayacani ena yacaqu, ka masu, ka gole vei au, ka lesu mai na nodra ivalavala ca; au na qai rogoca mai lomalagi, ka bokoca na nodra ivalavala ca, ia kau na vakabula na nodra vanua.”⁸

Ni da sauma vakadodonu na noda ikatini ena muataki keda me da gole ki na valetabu.

Au vakabauta, ni ikatini sa dua vei ira na cakacaka vakaparofita e dau vakaliuca o Peresitedi Hinckley.

Ena soqoni ni Goneyalewa ena macawa sa oti, a kaya kina vakaoqo o Peresitedi Hinckley, “Ni da sauma tiko na noda ikatini ena ilavo, sa ka bibi cake me da sauma tiko ena vakabauta.”⁹

E dua tale na gauna a kaya kina vakaoqo o koya: “Oqo e sega sara ni baleta na ka vakailavo ia e sa ka dina ga ni vakabauta… . Au sa vakamasuti kemuni … yadudua sara, mo ni taura matua na vosa ni Turaga me baleta na ka bibi oqo.”¹⁰

Sa ka ga ni solibula. Ko vuravura sa nona ga na Turaga ka oka kina na noda bula na tamata. Sa vakatara o Koya me da vakayagataka na veika kece sara sa tu ena vuravura oqo. E kerea tiko vei keda o Koya meda vakalesuya walega na kena ikatini. Na ikatini sa idole ni noda vakamuduo, talairawarawa, kei na vakavinavinaka—sa ivakaraitaki tiko ni noda lomasoli kei na solibula. Na saumi ikatini, ena lomasolisoli dina, ena vakatorocaketaka e dua na yalo sa dodonu ka savasava. Sa vakalougatataki keda na Turaga ena bula sa vuavuai vinaka.Ni da sauma na ikatini ena vakalevutaka na noda lomana na Turaga.

E kaya vakaoqo na Turaga: “Ia na gauna me ra vakacabora kina na nodra isoro ka solia na nodra ikatini ko ira na noqu tamata.”¹¹

Kemuni na taciqu kei na ganequ, meda vakaraitaka sara na noda vakabauta. Meda vakaraitaka ni sa lomada dina meda talairawarawa ka solibula. Au sa yalataka vei kemuni, ena yaca ni Turaga, o Jisu Karisito, ni gauna e da sauma kina vakasavasava ka vakadodonu na noda ikatini, ena dolava na Turaga na katuba ni lomalagi.

Au kila ni bula tiko na Tamada Vakalomalagi. Ia, ena vakalougatataki kemuni. O Jisu Karisito sa noda iVakabula. Ea raica o Josefa na Tamada Vakalomalagi vata kei na Luvena o Jisu Karisito. Oqo na Nona Lotu. Sa parofita bula ni Kalou o Peresitedi Gordon B. Hinckley . Sa kerei kemuni o koya mo ni dau curuma vakawasoma na valetabu. Sa noqu masu malumalumu oqo ena yaca i Jisu Karisito, emeni