Gauna ni Lesubula Mai

O Setani, “na vu ni ka lasu kecega” (2 Nifai 2:18), “na vu ni veileti” (3 Nifai 11:29), “na vu ni i valavala ca kecega” (Ilamani 6:30), ka sa ikoya talega na “meca ni Kalou” (Moronai 7:12), e dau vakayagataka na kaukauwa ni veika butobuto me vakauqeti keda me da vakabauta ni veika vakaoqo e dau yaco ena gauna eda ivalavala ca kina. Na ivolanikalou e vakatokai koya me “dauveibeitaki” baleta ni vinakata o koya me da vakabauta ni da sega ni rawa ni vosoti (raica na iVakatakila 12:10). E vinakata o Setani me da vakabauta ni gauna eda ivalavala ca kina eda sa lako sivita yani e dua na “gauna ni sega ni lesu rawa mai”—ni sa oti na gauna me da saumaki mai kina. Ena loma ni noda vuravura totoka ka leqaleqa oqo, sa qai dua na ka rarawa dina ni vakasama vakaoqo sa ivurevure tiko ni rarawa, kei na luluqa levu, kei na vakaleqai ni matavuvale, bula vakamau, kei na bula ni tamata yadua.

Sa dau saga tiko o Setani me vakatotomuria na iwalewale ni cakacaka ni Kalou, ia ni vakayacora vakakina ena rawa ni vakacalai ira kina e vuqa na tamata. Ena nona saga me da yalolailai kina, me da lomaleqa tu vakataki koya, ka me da vakabauta ni da sa sega ni rawa ni vosoti rawa tale, ka na rawa ni dau vakatanitaka kina o Setani e so na vosa mai na ivolanikalou e vakamatatataka kina na lewa dodonu ni Kalou, me rawa kina ni kaya ni sa sega na loloma veivueti.

Na isasabai me sabaya na veivakauqeti ni tevoro sai koya na kosipeli i Jisu Karisito. Sai koya oya na itukutuku vinaka ni sa mai vakayacora rawa o Jisu Karisito e dua na Veisorovaki uasivi duadua me baleti ira na kawa tamata. Sai koya na itukutuku ni loloma, inuinui, kei na loloma veivueti ni sa rawa na vakaduavatataki ni tamata vua na Kalou.

Na ivalavala ca sai koya na yalo e gadreva me voroka na lawa vakalou. Sai isolisoli ni Kalou kivei ira na Luvena na Veisorovaki i Jisu Karisito me rawa ni vakadodonutaka ka bokoca laivi na isau ni ivalavala ca. Na Kalou e lomani ira kece sara na Luvena, ka na sega vakadua ni tarova na Nona loloma ka nuitaki keda. Sa matata vinaka tu na ituvatuva ni Tamada Vakalomalagi, ka sa rui cecere na nona iyalayala: “Ni sa sega ni tala mai na Luvena ki vuravura na Kalou me cudruvi ira na kai vuravura … me bula ga koi ira na kai vuravura” (Joni 3:17).

E a lako mai na Karisito me mai vakabulai keda. Kevaka eda sa muria e dua na sala cala, sa vakadeitaka kivei keda na Veisorovaki i Jisu Karisito ni ivalavala ca e sega ni gauna ni sega ni lesu rawa mai. Sa rawa ni da lesubula mai kevaka eda vakamuria na ituvatuva ni Kalou me baleta na noda vakabulai.

Eda a ciqoma na ituvatuva oqo mai na itikotiko cecere duadua e vuravura kecega, sai koya na Kalou, na Tamada Vakalomalagi. Sa vakarautaki tu mai na ituvatuva oqo ni bera ni buli ko vuravura. Sai koya e dua na ituvatuva ni bula marau, na ituvatuva ni loloma veivueti, na ituvatuva ni veivueti, na ituvatuva ni veivakabulai. Na ituvatuva oqo e yaco kina me da vakila na bula vakayago, e oka kina na bula vakavuravura, e dua na gauna ni bula vakatovolei, ka yaco me da lesu ki vua na Kalou ka bula voli ena marau kei na lagilagi tawamudu. Sa vakamacalataki tu vakaivunau na ka oqo ena kosipeli vakalesuimai i Jisu Karisito.

Ni da vakamuria na ituvatuva oqo ena yaco mai na kena isau tawamudu totoka kivei keda yadua, ki na noda matavuvale, kivei ira na itaba tamata era na muri mai, ka vakakina o ira na itaba tamata era sa liu yani. E oka tiko ena ituvatuva oqo na veivakaduavatataki kei na veivosoti vakalou.

Eda sa kila vakavinaka tu ni “sa ivalavala ca ko ira kecega na tamata, ka ra sega ni yacova na ka e vakarokorokotaki kina na Kalou” (Roma 3:23), ia eda sa kaya talega eke ni da sa vakadeitaka ni sa rawa me yaco vakaidina na veivutuni kei na veivosoti me vaka ga na ivalavala ca.

Mai na Veisorovaki i Jisu Karisito sa rawa ki na tamata yadua me na saumi taro ena vuku ni nona ivalavala ca. Eda na valuta rawa na isau ni ivalavala ca ena noda ciqoma na veivakalougatataki kei na isolisoli ni Veisorovaki.

E a kaya vakaoqo o Peresitedi David O. McKay, “Sa ka talei ka bibi duadua na ivakavuvuli kei na cakacakatabu vakalotu yadua ni kosipeli i Jisu Karisito … , ia e sega ni dua me bibi cake sara ki na nodra vakabulai na matavuvale ni kawa tamata me vakataka na ivakavuvuli bula [ni] veivutuni sa vakalou ka tawamudu” (Gospel Ideals [1953], 13).

“Ni na sega ni vakabulai … ia kevaka sa veivutuni ka vakabauta na Turaga ko Jisu Karisito” (Mosaia 3:12).

Na veivutuni ena sega walega ni vakabula na tamata. Na dra ga i Jisu Karisito ena vakabulai keda. E sega walega ni noda veisautaka na noda bula ena yalodina kei na dodonu eda sa vakabulai kina ia “ni da sa vakabulai ena loloma walega, ka segai ena vuku ni cakacaka” (2 Nifai 25:23). Ia na veivutuni dina, sa ikoya na ka e lavaki me rawa kina ni yaco mai na veivosoti ni Kalou ki na noda bula. Na veivutuni vakaidina sa yaco kina “me ramase sara e dua na siga ni oti e dua na bogi butobuto dina” (Spencer W. Kimball, The Miracle of Forgiveness [1969], 362).

Sa gadrevi me kaukauwa na noda vakabauti Karisito me rawa kina ni da veivutuni. Na noda vakabauta oqo me na oka kina na noda kila “na kena ituvaki dina, veika vinaka sara, kei na isolisoli ni [Kalou]” (Lectures on Faith [1985], 38). Kevaka eda vakabauta tiko ni Kalou sa kila na veika kecega, ka sa dauloloma, ka sa dauveivueti, sa na rawa me da na vakabauti Koya me da vakabulai kina ka sega kina na yamekemeke. Ni da vakabauti Karisito ena veisautaka na itovo ni noda vakasama, vakabauta, kei na itovo e sega ni salavata kei na lewa ni Kalou.

Na veivutuni dina ena muataki keda lesu ki na veika dodonu me da vakayacora. Ni da sa veivutuni vakaidina eda na liaca ni da sa caka cala ka yalo veivutuni, se rarawa vakalou, ka vakatusa na ivalavala ca kece oqori vua na Kalou. Kevaka e bibi na noda caka cala sa gadrevi me da vakatusa talega vei ira na noda iliuliu vakabete era sa lesi vakakina. Ena gadrevi me da kerea na veivosoti ni Kalou ka da cakava na veika eda rawa ni da vakavinakataka kina na veika e veivakamavoataki eda a cakava beka. Na veivutuni sa kena ibalebale na kena veisautaki na vakasama kei na yalo—eda sa sega tale ni cakava na veika e ca, ka da sa tekivu me da cakava na ka sa dodonu. Ena solia vei keda e dua na vakanananu vou me baleta na Kalou, kivei keda vakaikeda, kei na bula raraba.

Na veivutuni dina ena vakalougatataka na noda dui bula mai na kaukauwa ni Veisorovaki:eda sa vakila kina na veivosoti ni Kalou kei na Nona veivakacegui, ka kau laivi na yalo sa cala kei na rarawa; ka yaco me da vakauqeti vakalevu sara mai vua na Yalo Tabu; ka da sa vakavakarau vakavinaka cake kina me da laki bula vata kei na Tamada Vakalomalagi.

E vakavulica vakaoqo o Peresitedi Spencer W. Kimball: “Na gacagaca bibi ni cakamana ni veivutuni sai koya na nona vakacegui ni yaloi koya a rarawa taumada, lomaleqa, lomaocaoca, ka rairai vakatotogani beka vakayalo… . ena veivakacegui ga na Kalou … kivei ira sa tagi yaso, ka yalo ca, … kei ira era rere, ka sa vakacalai” (The Miracle of Forgiveness, 363, 368).

E sa yalataka vakaoqo o Jisu, “Au sa laiva vei kemudou na vakacegu,” “au sa solia vei kemudou na noqu vakacegu… . Me kakua ni rarawa na yalomudou, se rere” (Joni 14:27).

Na parofita o Alama, o koya ka a vakabulai mai na ivalavala ca ki na bula marau ena veivosoti ni Kalou, a kaya vakaoqo, ko na “Sega ni kune marau ena nomu ivalavala ca” (Alama 41:10). Sa sotava oti mai o koya na rarawa mosi ni ivalavala ca, ia a vosa talega o koya ena veivakauqeti me baleta na marau e yaco mai ni vakayacori na veivutuni kei na veivosoti dina: “Au sa kaya talega vei iko, … sa sega na ka e vakatauvatani vata rawa kei na levu ni noqu marau” (Alama 36:21). A mani tinia o Alama ena dua na ivakasala momona ka veivakavukui kivei ira kece sara era vakasaqara me ra vosoti: “Ia oqo, … me kakua talega ni vakaleqa tiko na lomamu na veika oqo; ia mo kauwaitaka ga na nomu ivalavala ca ka veivutunitaka sara” (Alama 42:29).

E kaya vakaoqo o Peresitedi Harold B. Lee, “Ena gauna sa oti kece kina na nomu igu mo vorata rawa kina na nomu caka cala, ka sa yaco mo kaya e lomamu ko na sega tale ni cakava … ena qai yaco [mai vei iko] na yalo sa vakacegu ko sa na qai kila kina ni sa vosoti na nomu ivalavala ca” (in “Law of Chastity Vital, Girls Told,” Church News, Sept. 2, 1972, 7).

Ena gauna eda sa veivutuni dina kina, ena qai kauta laivi na Karisito na icolacola bibi ni yalo sa cala ni noda ivalavala ca. Eda na vakila ga vakai keda ni da sa vosoti ka da sa vakasavasavataki. Ena vakadeitaka vei keda na Yalo Tabu na ka oqo; Sai Koya ga na Dauveivakasavasavataki. E sega ni dua tale na ivakadinadina ni veivosoti me cecere cake.

E kaya vakaoqo na Turaga, “Ia ko koya sa veivutuni vakaidina ka muria na vunau ni Turaga ena vosoti” (V&V 1:32; vakasama vakaikuritaki). “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou.” (Maciu 11:28). “Mo yalodina ka gumatua … ia au na ovici iko ena noqu loloma” (V&V 6:20).

E a kaya kina o Koya, “Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca” (V&V 58:42).

Ena saga o Setani me da vakabauta ni na sega ni vosoti na noda ivalavala ca baleta ni da dau nanuma tikoga. E daunilasu o Setani; ena dau saga me vakabuwawataka na noda rai ka kauti keda laivi mai na sala ni veivutuni kei na veivosoti. E a sega ni yalataka na Kalou ni da na guilecava na noda ivalavala ca. Ni da nanuma tiko ena vukea me da drotani mai kina ka kakua ni cakava tale. Ia kevaka eda dodonu ka yalodina tiko, ena seavu yani vakamalua na vakanananu ni noda ivalavala ca. Oqo e sa na tiki tiko ni cakacaka ni veivakabulai kei na veivakasavasavataki ena gadrevi. E a kaya o Alama ni a tagi vei Jisu me vakabulai, ka se nanuma toka ga na nona ivalavala ca, ia na vakanananu ni nona ivalavala ca e sa sega tale ni lomaocaocataki ka vakatotogitaki koya, baleta ni sa kila vinaka tu o koya ni sa vosoti (raica na Alama 36:17–19).

Sa noda itavi sara ga me da drotani mai na veika yadua ena kauta mai na vakanananu ni ivalavala ca makawa. Ni da bula voli ena dua na “yalo sa raramusumusu kei na yalo sa bibivoro” (3 Nifai 12:19), eda sa nuitaka kina ni Kalou ena “sega ni nanuma tale na [noda ivalavala ca].”

Sa vakavulica vei keda o Jisu na dina tawamudu ena nona vakavulica vei keda meda masu vakaoqo: “Ia mo ni kakua ni cudruvi keimami e na vuku ni neimami ivalavala ca, me vaka keimami sa sega ni cudurvi ira sa ivalavala ca vei keimami… . Ia kevaka dou sa sega ni cudruvi ira na tamata era sa caka cala vei kemudou; ena sega talega ni cudruvi kemudou na Tamamudou vakalomalagi; ia kevaka dou sa cudruvi ira … e na cudruvi kemudou talega na Tamamudou ena vuku ni nomudou caka cala” (3 Nifai 13:11, 14–15).

O koya gona, na noda vosota taumada sa ilavaki tiko ni bera ni da vosoti oi keda.

Ena vuku ni noda vinaka, sa gadrevi meda yaloqaqa ka da veivosoti ka kerea me da vosoti vakakina. Ena dokai ka yaloqaqa cake na tamata ni da veivosoti. Oqo e oka kina na noda vosoti keda vakai keda yadua.

Oi keda yadua eda sa umani tu ena dua na veiyalayalati vakalou meda kakua ni veicudruvi ia me da veilomani ka veivosoti vakai keda yadua. Sa gadrevi vakabibi sara na itovo Vakarisito oqo ena noda matavuvale, ena noda bula vakamau, ena noda tabanalevu kei na iteki, ena noda itikotiko raraba, kei na noda matanitu.

Ena yaco me da na ciqoma kina na marau ni veivosovosoti ena noda bula ni sa yaloda dina sara me da solia wale kina na marau oqo kivei ira na tamata. E sega ni taucoko me ka ni vosa walega. Sa gadrevi me da vakasavasavataka na yaloda kei na noda vakasama mai na veika sa vakatani ka vakatara me curumi keda na rarama kei na loloma i Karisito. Sa qai yaco me vakasinaita na yaloda ena marau na Yalo ni Turaga ka umani vata ena vakacegu vakalou ni da sa kila vakaidina (raica na Mosaia 4:2–3).

Kemuni na taciqu kei na ganequ, kei kemuni na noqu itokani gone, ena gauna sa yacova kina o pailate ni waqavuka ni ilakolako balavu na gauna me lesubula rawa mai kina, ka sa kaukauwa sara na tataba ni cagi se sa tekivu me vuka sobu, sa na yaco ga me na laki ro koso ki na dua na rara ni waqavuka voleka ka sega ni kena a namaki taumada me yaco kina. Oqo e sega ni vaka na noda ilakolako lesu ena bula oqo ki na noda itikotiko vakalomalagi. Na vanua cava ga o tiko kina ena bula oqo, se na veivakatovolei ko na rawa ni sotava, e sa dau tu dina ga e dua na gauna ni lesu bula mai; sa tiko na inuinui. O iko ga o pailatetaka tiko na nomu bula, ka sa vakarautaka tu na Kalou e dua na ituvatuva ni lesu ki Vua, ki na nomu icavacava vakalou.

Na isolisoli ni Veisorovaki i Jisu Karisito, na noda iVakabula ka Dauveivueti, sa vakarautaka tu vei keda ena veigauna kei na veivanua kecega na veivakalougatataki ni veivutuni kei na veivosoti. Ena vuku ga ni isolisoli oqo, sa qai rawa kina vei keda ena veigauna kece sara me da lesubula rawa mai koi keda yadua kece sara mai na salatu veivakamatei oya ni ivalavala ca.

Ena vuku ni veika oqo au sa vakavinavinaka kina vua na Tamada Vakalomalagi, kau sa vakadinadinataka na veika oqo mai na vu ni utoqu kei na yaloqu taucoko, ena yaca i Jisu Karisito, emeni.