Nanuma mo Kakua kina ni Rusa

iVakatakilakila

E ka dokai vei au meu vosa taravi Sisita Parkin. Na nona veiqaravi kei na ivakavuvuli ka vaka kina mai vei rau na nona daunivakasala e sa vakalougatataki keda kece. Ena auwa vata oqo ni rauta na 18 1/2 na yabaki sa oti, au a tucake volekata tu na itutu ni vunau oqo ka waraka me tini na nodra lagasere na ivavakoso, meu qai toso yani ki liu ka solia na imatai ni noqu vosa ena koniferedi raraba. E a rairai levu beka na noqu lomaleqa ena gauna ko ya. E a tucake tu mai dakuqu ko Elder L. Tom Perry, ka kala mai ki liu ka vakasolokakana ki daligaqu, ena nona ivakarau dau veivakauqeti ka lasa. “Vakacegu,” e kaya, “e sa vakayabaki mai oqo e sega ni se dua sa mate ena taqaya ena itutu ni vunau oqori!”

Ena vosa ni veivakayaloqaqataki ko ya kei na vica na miniti e tarava mai meu vosa kina ena imatai ni gauna ki na dua na ivavakoso ni Yalododonu Edaidai e vuravura raraba era vakanananu talei vei au. Me vakataki kemuni kece, au dau kumukumuna vata na isoqoni ni vakanananu, ka, ena gauna e nanumi lesu kina, e yaga ka marautaki vakalevu vei au. Ia, veitalia na navunavuci au a kitaka niu se cauravou meu kua ni dau vakasosataki ira na tani ena talanoataka na ka sa oti niu sa qase mai, ia oqo au dau marautaka meu wasea na noqu vakanananu ena dua ga na gauna au rawa ni wasea kina. Nikua, me vaka ko ya, au via wasea e dua na itavi bibi ni nanuma kei na vakanananu ena kosipeli nei Jisu Karisito mai na kena e vakayagataki me veivakamarautaki ga.

Kevaka eda vakarorogo vakavinaka ki na ivakavakayagataki ni vosa nanuma ena ivolanikalou savasava, eda na vakila ni vakanananu ena sala e nakita na Kalou e ivakavuvuli taumada ka veivakabulai ni kosipeli. Oqo e baleta ni veivakasalataki vakaparofita me da nanuma e veikacivi vakalevu ki na cakacaka: me da vakarorogo, me da raica, me da cakava, me da muria, me da veivutuni.¹ Ni da nanuma na ivakarau e vinakata na Kalou, eda vorata na noda ivakarau vakatamata ka vakavakarau ki na ivalu ni bula ka vakaitavi sara ga ena veivaluvaluti, ka vakayacora na veika kece ena noda kaukauwa me da vorata na veitemaki ka levea na caka ca.

E a kacivaka ko Penijamini na Tui me dau yavala vaka ko ya na nodra vakanananu na nona tamata:

“Me kena iotioti, sa sega ni rawa meu tukuna yani na veika kece sa rawa mo ni ivalavala ca kina; raica sa vuqa sara na kena sala ka vuqa na kena ivalavala, io sa rui levu ka sa sega ni wili rawa.

“Ia oqo ga na noqu itatau vei kemuni, kevaka ko ni sa sega ni qarauni kemuni vinaka, ena ka ko ni sa nanuma, kei na vosa ko ni sa vosataka, kei na ka ko ni sa kitaka, ka sega ni muria na vunau ni Kalou, se vakabauta tikoga na itukutuku ni nona lako mai na noda Turaga, me yacova na nomuni mate, ko ni na rusa vakaidina. Mo ni nanuma na veika oqo, mo ni kakua kina ni rusa.”²

Ni da vakila na itavi bibi e kitaka na vakanananu ena noda bula, na cava tale e yaga me da nanuma? Me kena isau, eda soqoni vata nikua me da nanuma ka vakatabuya tale na Valecavu vakairogorogo oqo, au vakatura ni dodonu me da nanumi ira na isitori ni Lotu i Jisu Karisito kei ira na kena tamata. Na ivolanikalou e vakaliuci tiko ena isitori ni Lotu. Ka sa dina sara ni levu na ivolanikalou era isitori ni Lotu. Ena siga saraga e a tauyavutaki kina na Lotu, e vakaroti Josefa Simici na Kalou, “Raica, mo dou vola tiko e dua na ivola tukutuku ni cakacaka.”³ E a vakayacora na ivakaro oqo ko Josefa ena nona digitaki Oliver Cowdery, na ikarua ni italatalaqase ena Lotu ka nona ivukevuke liu, me imatai ni dauniisitori ena Lotu. Eda maroroya na itukutuku me vukei keda me da nanuma, ia e dua na itukutuku ni tubu cake kei na toso ni Lotu e maroroi mai na gauna nei Oliver Cowdery ki na siga edaidai. Na itukutuku vakairogorogo veivakurabuitaki oqo e taleva vei keda ni sa dolavi lomalagi tale na Kalou ka vakatakila mai na dina e kacivi keda ena noda itabagauna me vakayacori.

Ena veika kece e vakasokumuni vata, maroroi, ka ra vola na dauniisitori ena vuqa na yabaki sa oti, e sega ni dua e vakaraitaka vakalevu cake na bibi kei na kaukauwa ni isitori ni Lotu, mai na italanoa rawarawa ka dina, ni nodrau rairai vua na Kalou na Tamada kei na Luvena ko Jisu Karisito vei Josefa Simici, ka vakatokai na iMatai ni Raivotu ena noda ivola ni isitori. Ena vosa era sa cavuqaqataka na daukaulotu ni veitabagauna, ka ra wasea vei ira na vakasaqara na dina ena vuravura raraba, e vakamacalataka kina ko Josefa na mana ni nona ciqoma na isau ni nona vakatataro tarogi ena masu ni Lotu cava e dina:

“Au sa raica kina e cake e dua na duru bukawaqa, donuya tiko na uluqu, ni sa lako sobu tiko mai ka serauni au, ia sa sivia sara na ramase ni matanisiga

“… Ia ni sa mai toka e mataqu, au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko Mo rogoci Koya!”⁴

Rogoci koya, e a vakayacora oqori ko Josefa! Ka milioni era sa rogoca se wilika ka vakabauta na nona italanoa ka ra maroroya na kosipeli nei Jisu Karisito e a vukea na kena vakalesui mai. Au vakabauti Josefa Simici ka kila ni a parofita dina ni Kalou. Ni vakananumi na ka e sotava ena iMatai ni Raivotu e sega ni druka me vakauqeta na yaloqu ki na gugumatua kei na cakacaka vakalevu.

E sega ni dua e levu cake na nona taleitaka na yaga ni isitori ni Lotu me vakataki Peresitedi Gordon B. Hinckley. Eda taleitaka na nona ivakarau marautaki ni veiwali, ia na nona vakila na isitori e vakatalega kina na kena kaukauwa. Na italanoa veivakauqeti ka lasa ena gauna sa oti e curuma tu na nona volavola kei na ivunau. Me vaka ni noda parofita bula, e yalodina ni vakabibitaka na gauna sa oti kei na gauna e sa tu mai liu me vukei keda me da bula dodonu vakalevu cake edaidai. Baleta na nona ivakavuvuli, eda kila ni nanuma e rawarawa kina vei keda me da raica ni veituberi ni Kalou ena gauna sa oti, me vaka ga ni parofisai kei na vakabauta e vakadeitaka vei keda na veituberi ni Kalou ena noda gauna e sa tu mai liu. E taleva vei keda ko Peresitedi Hinckley na nodra ivakarau ni sotava na nodra bolebole na lewe ni Lotu taumada me rawa kina vei keda, ena vuku ni loloma levu ni Kalou, me da sotava ena yalodina levu na noda. Ena noda vakananuma na gauna sa oti, e semati keda vei ira na tamata,vanua, kei na ka e yaco ka tara yani na noda isolisoli vakayalo ia, ena nona vakayacora, e vakauqeti keda ki na veiqaravi, vakabauta, kei na yalovinaka e levu cake.

Ena dua na ivakaraitaki, e wasea talega vakarawarawa ko Peresitedi Hinckley na nona isitori kei na nona matavuvale. E vuqa sara na daukaulotu vou dau yalolailai era vakacegui ni ra vulica ni ko Peresitedi Hinckley e a yalolailai talega ena nona se qai kaulotu ka vakatusa oqo vei tamana. E bau vakaraitaka talega mai ena yaloqaqa na kena isau lekaleka mai vei tamana: “Gordon noqu daulomani, sa tu vei au na nomu ivola walega oqo. E dua ga na noqu vakatutu: guilecavi iko ka laki cakacaka.”⁵ Ni oti e sivia e 70 na yabaki, eda ivakadinadina ki na nona taura matua ka ciqoma vakabibi na ivakasala ko ya ko Peresitedi Hinckley. Na nona itovo uasivi kei na parofisai yalomatua e vakarautaka na ivakadinadina veivakadreti me yaga ena vakananumi tiko ni isitori ni Lotu ka vakakina na noda vakaikeda.

E levu tale na ka me tukuni baleta na nanuma kei na vakanananu e tiko ena kosipeli nei Jisu Karisito. Eda dau tukuna vakawasoma na kena vakananumi tiko na noda veiyalayalati tabu kei na ivakaro ni Kalou kei na vakananumi tiko kei na vakayacori ni cakacakatabu vakalotu ni veivakabulai vei ira na noda qase era sa mate. E bibi sara, na noda dau tukuna ni dodonu me da dau nanuma na noda iVakabula ko Jisu Karisito ia e sega walega ena gauna ko galala kina, ia ena veigauna kece, me vaka e kerea ko Koya.⁶ Eda vakadinadinataka ni da na dau nanumi Koya ena veigauna kece ni da vakaivotavota ena sakaramede. Me kena isau, e yalataka vei keda ni na dau tikoga kei keda na Nona Yalotabu. E vakatubu marau, oqo na Yalotabu vata ga ka tala mai na Tamada Vakalomalagi “ena vakavulici kemudou [keda] ena ka kecega.”⁷ Ia, ena noda kilikili me da ciqoma na sakaramede, eda vakalougatataki ena Yalotabu, me da curuma e dua na cowiri ni vakanananu e yaga vei keda, me da lesuva tale, ka baci lesuva tale ena noda vakasama kei na noda yalodina vei Karisito kei na Nona Veisorovaki.

Lako vei Karisito ka biuta tani na ivalavala sa sega ni vakalotu mo dou vinaka kina, sai koya au vakadinata, ni iotioti ni inaki ni vakananumi ni veika kecega.⁸ Sai koya gona, au masulaka ni na vakalougatataki keda kece na Kalou me da dau nanuma e veigauna, vakabibi na Luvena uasivi, ka kakua kina ni rusa. Au vakadinadinataka ena vakavinavinaka ni sa vakalou na ilesilesi kei na kaukauwa ni Nona veivakabulai na Karisito. Ena yaca i Jisu Karisito, emeni.