Nodra Vosa na Agilosi

Sa mai vakatitobutaka na Parofita Josefa Simici na noda kila vakavinaka na kaukauwa ni vosa ena nona a vakavulica vakaoqo, “Ena vosa walega … [sa yaco]me vakayaco ka na tamata yadua ni sa cakacaka ena vakabauta. E a kaya vakaoqo na Kalou, ‘Me rarama mai: a sa rarama mai.’ A vosa ko Josua, ka ra tu vakadua na rarama ka a bulia na Kalou. A vunauca na vuravura ko Ilaija, ka tu vakadua ko lomalagi me tolu na yabaki ka ono na vula, me kakua kina ni tau na uca… . Na veika kece oqo a yaco ena vakabauta ga … Na vakabauta sai qai cakacaka ga ena vosa ;ia ena [vosa] sa yaco kina na veika lelevu, ka na vakayacori, vakakina”¹ Me vaka ga na isolisoli kece ni “veika vakalomalagi,” sa “ka tabu, io me cavuti ena vosa e kilikili, ena veituberi ni Yalo Tabu.”²

Ni semati ena kilai na kaukauwa kei na vakalou ni vosa oqo au gadreva meu veivakasalataki kina, ke sa gadrevi vakakina, me baleta tiko na noda veivosaki vakai keda kei na noda ivosavosa baleti keda yadua.

E dua na malanivosa mai na Apocrypha ena vakamacalataka vakavinaka cake mai vei au na bibi ni ulutaga oqo. E vakaoqo, “Na veivakanakuitataki sa mavoa kina na yago: ia na vosa mai na gusu sa vakaramusutaka na sui.”³ Niu sa vakasamataka vakabibi na ka oqo, au a maqusa meu wilika na ivola i Jemesa ni sa tiko e dua na sala meu na “tamata uasivi sara.”

E kaya vakaoqo o Jemesa: “Ni da sa cala kecega ena ka e vuqa. [Ia] kevaka sa sega ni cala e dua ena vosa, sa tamata uasivi sara ko koya, a sa rawarawa vua me tarova na yagona taucoko.’’

E a tomana tale me baleta na ibalebale ni itatarovi ni gusu, a kaya kina: “Raica kevaka eda sa vakaciqira na kedra itarovi na ose e gusudra, me ra talairawarawa kina vei keda, eda sa qai saumaka na yagodra taucoko.

“Raica talega … na waqa, ni sa ka … levu vakaidina, a sa savu kalia ena cagi kaukauwa, ia sa saumaki ga ena uli lailai sara… .”

Sa qai vakaraitaka kina o Jemesa: “Sa vaka [talega] kina na yameda ni sa tikina lailai ga … [Ia] raica sa vakacaudreva na buka levu na bukawaqa lailai [me vakama].

“… Sa vakakina na yameda [sa dua na bukawaqa] ena veitiki ni yagoda taucoko, … sa vakacaudreva na ivalavala kecega ni yagoda, … a sa vakacaudreva oqori ko eli.

“Ni sa vakamanoataki na manumanu kecega e yavai va, kei na ka sa qasi, kei na ka ni waitui, … a sa vakamanoataki ira tu ko ira na tamata:

“Ia ka sa sega na tamata sa vakamanoataka rawa na yame; a ka ca sa sega ni tarovi rawa, sa sinai ena ka gaga.

“Eda sa vakavinavinaka kina vua na Turaga, ko Tamada, eda sa rukaki ira talega kina na tamata, era sa buli me tautauvata kei na Kalou.

“Sa vu mai na gusu e duabau ga, na vakavinavinaka kei na veirukaki. Oi kemudou na wekaqu, e sega ni dodonu me vakakina na veika oqo.”⁴

Io, na ka oqo sa matata sara! E sega ni tukuna tiko eke o Jemesa ni veigauna kecega sa dau valavala ca na yameda se veika kece eda tukuna sa “sinai ena ka gaga” Ia sa vakamatatataka tiko o koya ni so na gauna eda dau cavuta na veika e rawa ni veivakarusai, ka rawa ni veivagagai—na ka oqo sa beitaki keda tiko kina na Yalododonu Edaidai! Na domo e cavuta tiko na ivakadinadina, e cabora na masu malumalumu, ka lagata na sere kei Saioni sa rawa me domo vata tikoga oya e dau veirukaki, veivakacacani, veivakamaduataki ka veibeci, e veivakamavoataki ka vakarusa na yalo ni tamata yadua kei ira tale e so ena gauna era vakayacori kina. “Sa vu mai na gusu e duabauga, na vakavinavinaka kei na veirukaki,” e rarawataka vakakina o Jemesa. “Oi kemudou na [wekaqu],” a kaya, “e sega ni dodonu me vakakina na veika oqo.”

Oqo beka na ka meda na vakavinakataka mada ga vakalailai? Sai koya beka oqo na ka meda saga oi keda yadua meda laki tagane se yalewa “uasivi sara kina’’?

Kemuni na tagane vakawati, sa vakatikori vei kemuni e dua na isolisoli talei duadua e rawa ni lolomataka vei kemuni na Kalou—na watimuni, e dua na luvena yalewa na Kalou, sai koya na tinadratou na gone sa mai soli koya vei iko ena loloma kei na marau ni veitokani. Mo nanuma mada na veivosa vivinaka o ni dau tauca ena gauna drau a veimusumusuki tiko kina, nanuma na veivakalougatataki o a solia ena kena vakadavori ena loloma na ligamu e na doka ni uluna, nanuma tiko ni drau sa mai ituvaki tu vakalou, ka mo qai vakasamataka ena veigauna tale e so ni basika kina e so na vosa e butobuto, veivakamavoataki, ka tau tu ga vakaveitalia. Ena vuku ni veivakacacani e na yaco kina, sa rauta me kaya kina na Turaga, “A ka sa curu ki na gusuna sa sega ni vakadukadukalitaka na tamata; ia na ka ga sa lako mai na gusuna, sai koya ga sa vakadukadukalitaka na tamata.”⁵ Na tagane vakawati ka sega ni rawa vakadua me na mokuta na watina sa rawa me vakaramusutaka na sui nei watina, na lomana, mai na veivakacacani ni vosa tawamacala se tawa kilikili. Na veivakacacani vakayago e saqata vakaivakavuvuli ka vakadodonu na Lotu i Jisu Karisito ni Yalododonu Edaidai. Kevaka e rawa me na levu cake mai na veivakacacani vakaoya, eda na vunauca vakaukauwa kina na veicakacaka kecega ni veivakacacani vakayago. Ena domo vata ga oqori eda sa vunauca kina na veivakacacani vakai keda vakayalo kei na vakayago, ia sa vakabibi ga vei ira na veiwatini. Kemuni na wekaqu, sa sega ni vinaka na veika sa vakaoqo.

Ena domo vata ga oqo eda sa vosa vakakina vei ira na marama, ni ivalavalaca ni vosa ca e sega ni kila na tagane se yalewa. Kemuni na marama vakawati, sa vakacava beka na itatarovi ni voqa ni gusumuni, me baleta na kaukauwa ni vinaka se na ka ca ena nomuni vosa? Ena rawa beka vakacava ki na dua na domo voqa totoka sa vakalou sa vakaagilosi sa voleka ki lomalagi, sa dau yalomalua ka tu vua na loloma me qai vuki vakasauri ka kaikaila, veikati, cudru katakata ka sega ni tarovi rawa? Na vosa ni dua na yalewa e rawa ni kakana vakatitobu cake mai na dua na isele e veisuwaki, ka rawa me muataki ira na nodra daulomani me ra laki tiko vuni ka yawa cake sara mai vua e dua tale ena ivakatekivu ni veivakacacani oya ka sega ni nanumi me na yaco vakakina. Kemuni na marama, sa sega ni gadrevi me tiko ena yalomuni totoka oqori na mataqali vosa e kaukauwa ka veivakacacani, ka oka kina na kakase, se liu muri se vakalelewa. Me sa qai kakua ni yaco ena loma ni noda vuvale se ena noda tabanalevu se noda itikotiko raraba ni “sa buka waqa na yameda, a ka taucoko ni ca [sa vakacaudreva] ena veitiki ni yagoda.”

Au gadreva meu vakasalataka talega vakakina na matavuvale. Me da qarauna sara na noda ivosavosa vei ira na gone. Na ka e da tukuna se sega ni tukuna, na iwalewale ni noda vosa kei na gauna eda kaya kina, sa ka bibi sara ni sa na vakaituvakitaki koya tiko kina na gone oya. Ia sa ka bibi cake na kena susugi na nodra vakabauti keda na gone ka ra vakabauta na Kalou. Me veivakatataki na nomuni vosa vei ira na gone—me ivakarau tudei. Kakua vakadua ni tukuna vei ira, se ena veiwali mada ga, ni ra levulevu ca se gavui se vucesa se rairai ca. Mo ni kakua ni cakava na ka oya ena cudru, ia era na dau nanuma tiko ka saga dredre ena veigauna mai muri me ra na guilecava—ka veivosoti kina. Mo ni kakua ni vakatautauvatataki ira na luvemuni, kevaka sara mada ga o nanuma ni o iko e dua na kena dau. Ko na dau kaya dina beka ni “rairai vinaka o Susana ka totoka o Sera,” ia ena qai nanuma tiko ga o Susana ni sega ni totoka ka nanuma o Sera ni sega ni rairai vinaka. Mo vakacaucautaki ira yadudua na gone ena kena ituvaki dina ka vukei koya me kakua ni vakamuria na ivakavuvuli makawa ni veivakatautauvatataki, veisisivi, ka kakua ni nanuma ni da sa “vinaka cake.”

Ena veika kece oqo, au rawa ni kaya eke ni veivosa kece e ca e tadu ga mai na veivakanananu butobuto, ka oka kina na veivakanananu butobuto vakai keda yadua. Eda sa dau raica tu ga na noda dui cala, eda dau cavuta—se da dau vakanananutaka—na veika ca me baleti keda, sa na qai dau laki yaco me da raici ira kina vakatani na tamata kei na veika kecega. Sa qai sega na rarama, sa sega na veika totoka, sa yali na inuinui se na marau. Sa tarava sara tiko ga mai ni ra sa ca o ira era tiko voliti keda.

Au taleitaka na ka a tukuna ena dua na gauna o Elder Orson F. Whitney: “Na yalo ni kosipeli sai koya na vakanuinui vinaka; sa vakanuinui vua na Kalou ka raica ga na yasana vinaka ni veika kecega. Na yalo ni veisaqasaqa kei na vakanuinui ca e talaraki ira sobu na tamata ka vakayawaki ira mai vua na Kalou, era raica na veika butobuto, vosa kudrukudru, vakaiulubale, ka berabera me talairawarawa.”⁶ E dodonu me da doka na ivakaro ni iVakabula oya “dou vakacegu.”⁷ (Sa dina sara, ni sa vaka vei au eda sa kila tiko ni da voroka vakalevu cake na ivunau mai vua e dua tale!) Mo vosa ena vakanuinui. Mo vosa ni veivakayaloqaqataki, vei iko talega. Tovolea mo kakua ni dau vosa kudrukudru ka rarawa tu ga. Me vaka e kaya e dua, “Ena gauna mada ga ni veisiga vinaka sa sivi yani a kudruvaka e dua na tamata ni sa ca kecega na veika kece.”

Au dau nanuma ni gauna a vesuki kina o Nifai ka mokulaki ena dali e rairai vinaka cake vua ka ca cake sara na nona vakarogoca tiko na nodrau vosa kudrukudru o Leimani kei Lemueli.⁸ E a rawa ni kaya mada ga vakadua vakaoqo, “Mokuti au vakadua tale. Au se rogoci kemudrau rawa tiko.” Sa dina sara, sa tu na leqaleqa ni bula oqo ka dina sara ni sa tu na veibasai ni ka eda na sotava, ia sa kerei moni rogoca na vosa oqo nei Elder Holland me baleta na veika dina ni bula—e sega ni dua na ka rarawa me ca vakalevu cake mai na kena lagataki tiko ni sega ni ca vakalevu kina.

E vakamatatataka o Paula, ia ena vakanuinui. E kaya kina vei keda kece: “Me kakua ni lako mai e gusumudou e dua na vosa velavela, ia o koya [duadua] ga sa vinaka me ia kina na veivakatataki, me vaka sa rauta, me yaco kina na vinaka vei ira era sa rogoca.

“Ia dou kakua ni vakararawataka na Yalo Tabu… .

“Me biu tani kece vei kemudou na yaloca, kei na cudrucudru kei na daunene, kei na veiba, kei na vosa vakacaca… .

“Ia dou veilomani vakai kemudou, dou lomavinaka, dou kakua ni veicudruvi, me vaka sa sega talega ni cudruvi kemudou na Kalou e na vuku i Karisito.”⁹

Mai na nona otioti ni ivakadinadina veivakauqeti, sa sureti keda kina o Nifai me da “muria na Luvena [na Kalou], ena lomamudou taucoko,” ka yalataka ni “dou na qai … papitaisotaki talega ena Yalo Tabu kei na bukawaqa, ka vosataka rawa na vosa tani kei na vosa ni agilosi… . Ia … dou na vosataka rawa vakaevei na vosa ni agilosi kevaka sa sega na Yalo Tabu? Era sa vosa na agilosi ena kaukauwa ni Yalo Tabu; a ra sa vosataka na vosa i Karisito”¹⁰ Sa dina sara ni Karisito sai koya tikoga “na Vosa ” me vaka e vola o Joni na Daulomani,¹¹ sa sinai ena loloma kei na dina, sa dauloloma ka daulomasoli.

O koya gona, kemuni na taciqu kei na ganequ, ena ilakolako balavu oqo me da vakataka na noda iVakabula, me da kakavaki yani me da tagane ka yalewa “uasivi sara” ena dua mada ga na itovo oqo—sega ni cala ena vosa, se me vakamatatataki, me da na vosa ga ena yame vou, na nodra vosa na agilosi. Na noda vosa , me vaka ga na noda ivalavala, me vakasinaiti ena vakabauta kei na inuinui kei na loloma, sai koya na veika cecere Vakarisito me maqusataki ena vuravura edaidai. Ena veivosa vakaoya, e cauraki ena veivakauqeti ni Yalotabu, sa rawa me oti na rarawa, vakacegui na yalo, sa rawa me vakatatakitaki na bula, yaco mai na inuinui, vakavotukanataki na nuidei. Sa noqu masu ni noqu vosa oqo, ena ulutaga mada ga oqo, me na vakayaloqaqataki kemuni, sega ni vakayalolailaitaki kemuni, ni sa voqa yani mai na domoqu niu lomani kemuni, baleta niu sa dina. E ka bibi talega, niu kila ni lomani kemuni na Tamada Vakalomalagi sa vakakina na Luvena sa Duabauga. Ni rau vosa vei kemuni—ka Rau na cakava—ena sega ni lako mai ena cagi, se ena uneune, se ena bukawaqa, ia ena domo ga sa rogo lailai ka vinaka, na domo sa malua ka dauloloma.¹² Ena nodra vosa na agilosi. Me sa noda na marau ni gauna eda na cavuta kina na veivosa e veivakatatakitaki, veivakayaloqaqataki kivei ira sa lailai oqo, sai ira na tacida kei na ganeda kei ira na lalai, eda sa tukuna tiko vua na Kalou.¹³ Ena yaca i Jisu Karisito,emeni.