Vakayagataki ni iSolisoli Cecere ni Masumasu

Na masumasu sa ikoya e dua na isolisoli cecere nei Tamada vakalomalagi kivei keda vakayadua. Vakasamataka mada: na Tamada sa Cecere sara, ka kila taucoko tu na veika kecega, raica-taucoko, kaukauwa taucoko vakatamata, vakauqeti iko kei au, me vaka ni da tamata tawayaga, me da veivosaki kei Koya me vaka ni Tamada. E ka dina, baleta ni kila tu o Koya na noda gadreva vakalevu sara na Nona veidusimaki, e vakarota o Koya: “Io mo daumasu votu, masu lo, masu e matanalevu, ka masu vuni talega.”¹

E sega ni dua na ka na keda ituvaki, ke da yalomalua se yalokaukauwa, dravudravua se vutuniyau, galala se bobula, kila ka se lecaika, lomani se vakalolomataki, e rawa me da vosa Vua. Eda sega ni gadreva na veiloku. E rawa me lekaleka walega na noda kerekere se e rawa me vakayagataki taucoko na gauna e gadrevi. E rawa me vakatetei yani na ivakaraitaki ni loloma kei na vakavinavinaka se e dua na kere veivuke vakatotolo. E a sa bulia oti tu na veivuravura kei na lomalagi ka sega ni wili rawa ka vakatawani ira vata kei na vuravura, ia o iko kei au e rawa me daru vosa sara ga vakaitaukei Vua, ka na sauma tikoga mai o Koya.

Eda masumasu tiko kivua na Tamada Vakalomalagi ena yaca tabu ni Luvena Lomani, o Jisu Karisito. Na masumasu e yaga vakalevu sara ni da tovolea me da savasava ka talairawarawa, vata kei na vakanananu kilikili, ka da vakayacora ena yalodina na veika e kerea o Koya. Na yalomalua, masumasu ena vakabauta e kauta mai na veidusimaki kei na vakacegu.

Kakua ni lomaleqataka na sakasaka ni nomu cauraka na veika o vakila. Mo vosa ga vua na Tamamu yalololoma, ka daukilakila. O iko na Nona gone vakamareqeti ka lomana vakavinaka o Koya ka vinakata me vukea. Ni ko masumasu kila tiko ni Tamada mai Lomalagi e voleka ka vakarorogo tiko.

Na idola ni vakavinakataki ni masumasu sa ikoya na vulici ni kena tarogi na veitaro dodonu. Vakasamataka mo veisautaka mai na nomu kerea na veika e vinakata ki na kena vakasaqarai ena yalodina na cava e vinakata o Koya me baleti iko. Ni ko sa vulica na Nona lewa, masulaka mo na tuberi me tiko vei iko na kaukauwa mo vakayacora vakakina.

Ni ko sa vakila tiko na nomu yawaka mai na Tamada, e rawa me levu sara na vuna. Na cava ga e vakavuna, me vaka ni o tomana tikoga na kere veivuke, ena dusimaki iko o Koya mo cakava na veika ena vakalesuya tale mai na nomu yalodei ni voleka tiko o Koya. Mo masumasu veitalia mada ga ke sega ni yalomu dina mo masu. E vakavuqa, me vaka e dua na gone, e rawa mo ivalavala vakatani ka vakila ni o sega ni rawa ni toro voleka vua na Tamamu ena nomu leqa. Sa ikoya o ya na gauna o gadreva duadua kina na masumasu. Kakua vakadua ni vakasamataka ni o sa rui tawakilikili mo masu.

Au lomatarotarotaka kevaka e rawa vei keda me da dikeva na kaukauwa vakaitamera ni masumasu me yacova na gauna eda sa sotava kina e dua na leqa levu, vakasauri ka vakila ni sega vei keda na kaukauwa me da walia kina. Eda sa na qai vuki kivua na Tamada ena noda kila ena yalomalumalumu na noda vakararavi vakatabakidua tu Vua. Ena veivuke sara na noda kunea e dua na vanua vakatikitiki me rawa ni da vakaraitaka kina na kena cauraki na veika eda vakila ena kena balavu cava ga kei na kena rabailevu ni kena yaga.

Au a sa cakava oti o ya. Ena dua na gauna au a sotava kina e dua na ka e vakavuna na vakaitamera ni noqu lomatarotaro. E a sega ni dua na ka me baleta na talaidredre se cakacala ia e bibi vakalevu ena veimaliwai vakatamata. Ena so na gauna au sovaraka yani na lomaqu ena masumasu vakariri. Ia au tovolea e yaloqu taucoko, au sega ni kunea rawa na kena iwali, e sega ni vakadeitaka na kaukauwa ni veivakauqeti e lomaqu. Au kerea na veivuke mai vua na Tamada Tawamudu niu sa kila ka vakabauta taucoko sara. Au sega ni raica rawa e dua na sala me na vakarautaka na maravu ni sai koya oqori na noqu veivakalougatataki raraba me marautaki. E yacovi au mai na via moce. Ena gauna au yadra kina sa taucoko na noqu vakacegu. Au se baci tekiduru tale ena masumasu tabu ka kerea, “Turaga, me caka vakacava?” E lomaqu, au kila na kena isau sa ikoya na Nona loloma kei na Nona kauwaitaki au. Sa ikoya oqori na kaukauwa ni masumasu ena yalodina kivua e dua na Tamada dauloloma.

Au sa vulica e levu sara na ka me baleta na masumasu ena vakarorogo vei Peresitedi Hinckley ena nona kere veivuke ena noda veisoqoni. E rawa talega mo vulica mai vua ena nomu vulica vakavinaka na kilai tani ni masumasu e matanalevu e a vakayacora ena kena mai cava na koniferedi ni Okotova 2001 me baleti ira na luvei Tamada e vuravura raraba. E a masu mai lomana dina, ka sega ni vakarautaki vakaivola. (Me vakarawarawataka e volai toka na masu oqori ena itinitini ni itukutuku oqo.)²

Vulica na masumasu o ya, ko na raica ni sega ni talevi tale na veika tawayaga, e sega na ituvaki vakayalo me vakayavalati ira na tani, me vaka e dau yaco vakavuqa. E cokota vata na veivosa rawarawa, matai ena vosa. E masu me vaka e dua na yalomalua, luvena tagane nuitaki ka kila vakavinaka tu na Tamada lomani mai Lomalagi. E vakadeitaka tu na kena matata ni Nona isau ni masumasu ena qai lako ga mai ena gauna e gadrevi vakaidina kina. Na masumasu vakayadua e caka ena kena inaki, vata kei na dua na kena itukutuku matata ni veika e gadrevi me wali, me vakatalega kina na kena cauraki vakarauta na vakavinavinaka me baleta vakatabakidua na vakilai ni veivakalouagatataki. Na nona masumasu vakaikoya era tautauvata kei na icakacaka ni vatu talei, e dua na ivakadinadina lo ki na tauyavutaki ni vanua ni masumasu e sa vakatawana na nona bula me baleta e vuqa, vakavuqa na veiyabaki.

E vakawasoma ni gauna eda masumasu kina me baleta na veivuke ena dua na ka vakaibalebale, ena solia vei keda na Tamada Vakalomalagi na veivakauqeti malumu ka gadrevi kina me da vakasama, cakacakataki ni vakabauta, cakacaka, ena gauna dredre, qai cakava. Sa ikoya e dua na cakacakataki ni ikalawa-vakaikalawa me rawa kina ni da raica vakamatata na veivakauqeti ni kedra isau.

Au sa kunea rawa ni vakavuqa na bai e vakababa tu ka vakataotaka tiko na veitaratara sa ikoya e dua na ikalawa vakaitamera me ciqomi ena veivakabauti. E vagauna noda dau ciqoma na taucoko ni kena isau kece vakadua ena dua ga na gauna. Ena lako mai e dua ga na tikina ena dua na gauna, vakaioloolo, me rawa ni o tubu vakalevu. Me vaka ni tikina yadua e salamuria na vakabauta, o na vagolei ki na veitikina tale eso me yacova ni o sa taura na kena isau taucoko. Na iwalewale o ya e gadrevi kina mo cakacakataka na vakabauta na Tamada ena kena levu me saumi mai. Ena so na gauna e sa dua dina na ka dredre, e yaco kina na tubu yadudua vakaibalebale.

Ena dau rogoca o Koya na nomu masumasu ka na sega ni veisau na kedra isau. Ia, ena vagauna Nona sauma mai ni o sa tekiduru tiko ena masumasu, kevaka mada ga o kerea tiko me saumi mai vakatotolo. Ia, ena vakauqeti iko o Koya ena vakadirorogo ena gauna e rawa me tara vakalevu sara kina na Yalotabu na nomu vakasama kei na lomamu. O koya gona, e dodonu mo dau solia eso na gauna ni vakadirorogo mo vakila kina na nomu dusimaki ka vakaukauwataki tiko. Na Nona iwalewale e vakavuna na nomu tubu.

E a vakadinadinataka o Peresitedi David O. McKay, “E dina ni isau ni noda masumasu ena sega ni dau wasoma na kena yaco mai vakadodonu kei na kena gauna, e sega talega ni kena ivakarau uasivi me baleti koya ka vakacabora na kerekere.”³ Dau vakavinavinakataka ni vakavuqa na nona dau laiva na Kalou mo sotava na leqa ena dua na gauna balavu ni bera ni qai yaco mai na kena isau. Ena tubu cake na nomu itovo; ena rabailevu na nomu vakabauta. E tiko e dua na veiwekani ena kedrau maliwa na lewe rua oqori: na levu cake ni nomu vakabauta, ena kaukauwa cake na nomu itovo; kei na rabailevu ni nomu itovo e vakalevutaka cake na nomu rawa ni vakayagataka vakalevu cake sara na vakabauta.

Eso na gauna, ena solia vei iko na Turaga na kena isau ni bera na nomu kerekere. E rawa me yaco na ka oqo ena nomu sega ni tadra e dua na ka rerevaki se cakava e dua na ka cala, ena cala ni vakabauta ni sa dodonu.

E sa rui dredre dina na masulaka ena yalodina e dua na ka o gadreva vakalevu ka qai sega ni saumi mai ena kena sala o vinakata. E sa rui dredre dina me kilai na vuna o vakayacora kina ena titobu ni vakabauta ena yalodina mai na dua na bula talairawarawa e sega ni solia na kena isau e gadrevi. E vakavulica na iVakabula, “Ia na ka kecega dou sa kerea vei Tamaqu ena yacaqu sa soli vei kemudou, me vaka e ganiti kemudou.”⁴ Ena so na gauna e sa rui dredre me kilai na cava e uasivi se ganiti kemudou ena veigauna. Na nomu bula ena rawarawa cake sara mo ciqoma na veika e vakayacora na Kalou ena nomu bula me baleta na nomu vinaka tawamudu.

O sa kerei mo vakasaqara e dua na isau ni nomu masumasu.⁵ Muria na ivakasala ni iVakavuvuli mo “vakasamataka vakavinaka taumada.”⁶ O na vakasamataka vakawasoma me dua na kena iwali; ena nomu vakasaqara na veivakadeitaki ni sa dodonu na nomu isau ni taro, ena yaco mai na veivuke. E rawa beka ni basika mai ena nomu masumasu, se ena dua na ivakaraitaki ni Yalo Tabu, kei na so na gauna mai na nodra veivakameautaki eso tani tale.⁷

Na idusidusi oqo me baleta na masumasu e a soli kivei Oliver Cowdery e rawa talega ni vukei iko: “Io, … ko a sega mada ni vakasamataka, ia ko a nanuma ga mo rawata na ka ko sa kerea vei au.

“… A dodonu sara mo vakasamataka vakavinaka taumada; mo … qai kerea, ia kevaka au kila ni ganita, au na uqeta na yalomu … ka na katakataka mai na lomamu … ; raica ko na qai kila sara ni sa dodonu.”⁸

Ena qai lako mai na kena isau me vaka e dua na ka o vakila kei na dua na kila dina e rau salavata mai. Na iVakabula e vakamacalataka e rua na sala duidui: “Raica ena vakatakila vei iko na Yalo Tabu; io ena lako yani vei iko ko koya ka tukutuku sara ki lomamu.”⁹

Na veisaunitaro ki na vakasama kei na lomada era sa itukutuku mai vua na Yalo Tabu ki na yaloda. Vei au, na kena isau ki na vakasama e sa rui matailalai, me vaka na veivosa wiligusutaki, ia na kena isau ki na lomada sa ikoya e vakararabataki, me vaka na noda vakila me da dau masumasu vakalevu cake.¹⁰

E qai vakamatatataka na Turaga: “Ia kevaka [na veika o vakatura] e sega tiko ni dodonu, ko … na sega ni vakila e dua na ka”¹¹ Oqori, vei au, e sa dua na vakasama sega ni dei, ka sega ni veivakacegui.

E a vakavulici o Oliver Cowdery ena dua tale na sala ka lako mai kina na isau ni taro dina: “Au a sega li ni vakaceguya kina na yalomu?”¹² Na vakilai ni vakacegu sai koya na ivakadinadina veivakadeitaki uasivi duadua au sotava vakaiau. Niu dau kauwaitaka vakalevu e dua na ka bibi, e dau dredre na kena sagai me wali ka sega ni rawa, au dau tomana tikoga na veisasaga oqori ena vakabauta. E muri, e qai dau lako mai na vakacegu e kune raraba, vakadeitaka na noqu lomatarotaro, me vaka e a yalataka o Koya.

Ena kena sega ni matata na veika me baleta na masumasu e rawa me vakamatatataki mai na kena kilai na ivolanikalou e vakamacalataka na veivakavuvuli me baleta na masumasu yaga, ia era sega ni vakadeitaka na gauna ena saumi mai kina. Na kena dina, ena sauma mai o Koya ena dua vei iratou na tolu na kena sala. iMatai, e rawa mo vakila na sautu, vakacegu, kei na veidinadinati e vakadeitaka na dodonu ni nomu vakatulewa. Se me ikarua, e rawa mo kidava ni o vakila na kena tayana, sega ni vakila e dua na ka, ivakaraitaki ni cala na nomu digidigi. Se me ikatolu—ka sa ikoya e dredre—e rawa mo vakila ni sega ni saumi mai.

Na cava o cakava ena gauna o sa vakarautaki iko tu kina vakavinaka, o sa masumasu vakaukauwa, waraka e dua na gauna vinaka me baleta na kena saumi mai, ka sega tiko ni vakila e dua na kena isau? E rawa beka mo vakaraitaka na nomu vakavinavinaka ena gauna e yaco kina oqori, baleta ni sa ikoya e dua na ivakadinadina ni Nona vakabauti. Ena nomu bula kilikili tiko kei na nomu digidigi e salavata tiko na ivakavuvuli ni iVakabula kei na kena gadrevi mo cakacakataka, toso vata tiko kei na vakabauta. Ena nomu kidava tiko na veivakauqeti ni Yalotabu, e dua vei rau na rua na ka ena yaco mai, ivakaraitaki ni digidigi cala, se na sautu se na katakata ni yalomu ena vakilai, me vakadeitaka ni dodonu na nomu digidigi. Ena nomu bula vakadodonu tiko kei na nomu cakacaka tiko ena vakabauta, ena sega ni vakalaiva na Kalou mo toso vakayawa sara ki liu ni sega ni ivakasala veivakurabuitaki kevaka o digidigi cala.

E dua na inaki bibi ni masumasu sa ikoya na vakavinavinaka. E vakaraitaka o Jisu, “Raica sa kilikili … me vakatusa na tamata ni sa bulia na ka kece ga na Kalou, io me muria tale ga na nona vunau.”¹³ Ni da vakasamataka na kena sega ni vakatautauvatani rawa na isolisoli ni masumasu kei na veivakalougatataki sega ni yalani rawa ka drodro mai kina, e vakasinaita noda vakasama kei na lomada na vakavinavinaka vakaidina ena vuabale ni soli vakavinavinaka vua na Kalou. O koya gona, e sega li ni dodonu vei keda, me da tomana tiko ka vakabibitaka noda vakaraitaka vua na Tamada lomani, me vaka ni da rawata, noda vakavinavinaka sega ni vakaiyalayala me baleta na isolisoli cecere ni masumasu kei na Nona dau sauma mai me sotava na veika eda gadreva ena nona vakayaloqaqataki keda me da tubu?

Au vakadinadinataka ni Tamada ena dau sauma mai na nomuni masumasu ena gaunisala kei na kena gauna me na uasivi kina na nomuni vinaka tawamudu. Ena yaca i Jisu Karisito, emeni.