“Au Sa Savasava”

Kemuni na taciqu ena matabete, sa dua na ka veivakauqeti me da raica na matamuni na le 21,000 ena loma ni Vale ni Koniferedi, ka da kila ni ra soqoni tu ena olo ni veivalenilotu kei na veivanua tale eso e vuravura raraba. Au veivutunitaka niu sa rui qase ena dua na gauna se qai talei cake mai kina na bula.

Me vaka ko ni sa kila kece tiko, au a tabaki ka vakatikori me Peresitedi ni Lotu ena 12 na yabaki sa oti, ena ika 12 ni Maji, 1995. E biuta vata ko Elder Ballard eso na matanivika me baleta na 12 na yabaki oqo. Au na cavuvosa mai na nona itukutuku:

• E 387,750 na daukaulotu era sa curuma na buturara ni kaulotu, oqori e 40 na pasede ni iwiliwili taucoko ni daukaulotu era sa veiqaravi ena itabagauna oqo—oya, e 40 na pasede ena iotioti ni 12 na yabaki oqo ni 177 na yabaki mai na gauna a tauyavu kina na Lotu.

• E 3,400,000 na saumaki mai era sa papitaiso, oya e tautauvata ni sivia na dua na ikava ni levu taucoko ni lewe ni Lotu ena gauna oqo.

• Sa tubu cake na iwiliwili ni tabana ni kaulotu ena Lotu mai na 303 ki na 344, vata kei na tolu tale me vakarau duri ena dua na gauna ga oqo.

• Na nodra maroroi na curu mai me vaka e vakarautaki ena iwiliwili ni tiko rawa ena sakaramede, veitabaki ena Matabete, kei na yalodina ena saumi ikatini sa tubu cake vakalevu sara.

Ni vaka tu oqo na kena vakasakiti, au kila ni kevaka eda na solia tale vakalailai na yaloda dina, na gauna vakasakiti sa sivi oqo ena rawa ni yaco me ikau ga mai ni dua na vunilagi cecere.

Me da biuta kece mada na tabada ena qiqi ka bili, cakava na noda itavi ena yalomarau. Na inaki oqo e gadreva na cakacaka, me kakua na soreva, biuta na tabamu ena qiqi ka bili. (Raica “Put Your Shoulder to the Wheel,” Hymns, naba 252).

Oqo, au gadreva meu na goleva e dua tale na tikina. Au a vosa ena ka vata oqo ena vuqa na yabaki sa oti yani. Au taleva tale baleta ni o ira era a rogoca ena gauna ko ya era sa guilecava makawa, kei ira era a sega ni rogoca era gadreva me ra rogoca. E baleti Peresitedi Joseph F. Smith, ka a veiqaravi vaka-Peresitedi ni Lotu mai na 1901 ki na 1918, ka 17 taucoko na yabaki.

O Joseph F. Smith e luvei Hyrum Smith, o koya na tuakana na Parofita ko Josefa ka rau a vakamatei vata ena vuku ni nodrau vakabauta mai Carthage. A sucu ko Joseph F. e Far West, Missouri, ena ika 13 ni Noveba, 1838. A biuti Missouri mai ni se gonelailai sara. Ni se cauravou lailai ka se bera ni yabaki ono, a rogoca e dua na tukituki ena katubaleka ni vale nei tinana mai Nauvoo. Oqori e dua na turaga ka vodo ose vakatotolo mai Carthage, ka mai tukuna vei Sisita Smith ni a vakamatei ena yakavisiga ko ya na watina.

Ni yabaki ciwa a draivataka e dua na timi bulumakau vata kei tinana ka kosova kina na vanua tautauvata ki na bucabuca oqo. Ni yabaki 15 a kacivi me kaulotu ki Awai. A lako ki San Francisco ka cakacaka ena dua na iqaqi ni vatulalai (sigili) me rawata kina na ilavo me sauma na nona ivodovodo ki yanuyanu.

E se bera kina ni vanua ni saravanua ko Awai ena gauna ko ya. Era se tawana voli ga ko ira na itaukei kei Awai, ena gauna ko ya era tamata dravudravua e vuqa vei ira, ia era lomasoli ena veika e tu vei ira. A vulica me vosataka na nodra vosa ka lomani ira. Ni veiqaravi tiko mai kea a raica kina e dua na tadra vakasakiti. Au na cavuta na veika e tukuna me baleta na tikina oqo:

“Sa bibi dina na noqu icolacola [ena gauna] au kaulotu voli kina. Sa voleka sara meu luvaiwale ka sega sara na noqu itokani, vakavo ga na nodra veitokani e dua na … matatamata dravudravua ka yalo vakaturaga. Au vakila niu sa vakayalomalumalumutaki sara vakalevu ena kequ ituvaki dravudravua, sega na vuku kei na kila ka, e dua ga na gonetagane, kau sega ni rawa ni raica vakadodonu … na matana e dua na tamata.

“Niu tu ena itutu oya au qai tadra [ena dua na bogi] niu lako tiko ena dua na ilakolako, au vakauqeti ni dodonu meu vakatotolo—vakatotolo ena noqu igu taucoko, niu leqataka deu sa rui bera vakalevu. Au vakusakusa yani ena kena totolo duadua au rawata, au vakila niu kauta tikoga e dua na ioloolo lailai, e dua na itavoi kei na dua na ioloolo e olo tiko e lomana. Au sega ni kila se cava oya … ena gauna au vakusakusa tiko kina ena noqu igu taucoko; au qai yacova yani e dua na vale vakaitamera ka vakasakiti … au nanuma niu kila ni sai koya oya na vanua au lako tiko kina. Niu lako sivita, ena kena totolo duadua au rawata, au raica e dua na notisi, [ka kaya vakaoqo S-I-S-I-L-I], ‘Sisili’ Au lako yani vakatotolo ka curu sara ki na isilisili ka savati au meu savasava. Au dolava na ioloolo lailai au kauta tiko yani, ka tu kina e [so] na [isulu] vulavula savasava vinaka, e dua na ka au sa sega tu ni bau raica ena dua na gauna balavu sara, baleta ni o ira na tamata au tiko vata kei ira era sega soti ni dau kauwaitaka me ra vakasavasavataka sara na ka. Ia na noqu [isulu e] savasava, kau daramaka sara. Au qai cici sara ki na dua na ka e vaka na katuba. Au tukituki ka tadola na katuba, ia na tamata e duri tu kina sai koya na Parofita ko Josefa Simici. A raici au mai vakaca, na imatai ni vosa e cavuta mai: ‘I Joseph, o sa bera mai.’ Ia au yalodei ka [sauma]:

“‘Io, ia au sa savasava—au sa savasava!’

“E taura na ligaqu ka dreti au ki loma, qai sogota na katuba levu oya. Au vakila na ligana ni kaukauwa me vaka au dau vakila na ligadra na tagane. Au kilai koya, ia na gauna au curu yani kina au qai raica na tamaqu, kei Brigham [Young] kei Heber [C. Kimball], kei Willard [Richards], kei ira na tamata vinaka tale eso au sa kila, era tucake tu ena dua na iyatu. Au raica ni vaka me kosova tiko na buca oqo, ka vaka me vakasinaiti tu ena dua na ibinibini tamata vakaitamera, ia ena buturara o ira kece na tamata au sa kilai ira oti. E tu kina na tinaqu, ka tenea tiko e dua na gone; kau rawa ni tukuna na yacadra o ira kece au rawa ni nanuma na yacadra, era dabe tiko e kea, ka vaka me ra maliwai ira o ira na digitaki, o ira na vakacerecerei… .

“[Niu raica tiko na tadra oqo,] au davo duadua tu ena dua na ibe, ena veiulunivanua kei Awai—e sega ni dua e tiko vata kei au. Ia ena raivotu oqo au tabaka na ligaqu vua na Parofita, kau raica ni matadredredre… .

“Niu yadra cake ena mataka oya au sa tamata bula, e dina niu [se] gonetagane ga. E sega tale ni dua na ka e vuravura meu rerevaka [ni oti oya]. Sa rawa niu sotava e dua na tagane se yalewa se gone ka raica na matadra, au vakila e yaloqu niu sa tamata bula ena veitikiqu kece. Na raivotu, na veivakatakilai kei na ivakadinadina au a marautaka ena gauna ko ya, au sa yaco kina me o au ena gauna oqo, kevaka e bau dua na kequ vinaka, se savasava, se dodonu ena mata ni Turaga, kevaka e dua na ka vinaka e tu vei au. Oqori sa vukei au ena veivakatovolei yadua kei na veigauna dredre au lako sivita” (Gospel Doctrine, ika 5 ni kena tabaki [1939], 542–43).

Na uto ni tadra vakaibalebale oya e kunei ena veivakadodonutaki a vakayacora ko Josefa Simici vei Joseph F. lailai. E kaya na Parofita, “I Joseph, o sa bera mai.”

E sauma ko Joseph F., “Io, ia au sa savasava—au sa savasava!”

Na vua ni tadra oya sai koya ni a veisautaki me tamata bula e dua na gonetagane. Na nona cavuta “Au sa savasava” sa solia vua na veivakadeitaki kei na yaloqaqa me sotava kina na tamata kecega kei na veika kecega. A rawata na kaukauwa e basika ena lewa matau ka vaqaqacotaki ena veivakauqeti ni Parofita ko Josefa.

Na tadra vakaparofita oqo e koto kina e dua na ka me baleta na tamata uabula kei na gonetagane kece e soqoni ena ivavakoso vakaitamera oqo ena bogi nikua. Oqori e dua na ivosavosa makawa vei keda “na bula savasava e tarava na bula vakalou.”

E kaya ko Aisea na parofita:

“Dou vui kemudou, vakasavasavataki kemudou; kauta tani e mataqu na nomudou ivalavala ca; dou kua ni caka ca;

“Vulica na caka vinaka… .

“Dou mada mai, me tou veivosaki vata, sa kaya ko Jiova: ke sa vaka na ka kulakula na nomudou ivalavala ca, sa na vulavula me vaka na uca vulavula; ke sa damuvakula, sa na vaka na vutika ni sipi” (Aisea 1:16–18).

Ena ivakatakila ni gauna oqo e kaya kina na Turaga: “Mo dou savasava mai koi kemudou sa kauta na iyaya ni Turaga” (V&V 133:5).

Ena dua na vuravura e luvuci tu ena dukadukali, mo savasava—ena vosa, ena vakasama, ena yago, ena isulusulu.

Vei kemuni yadua au kaya, mo savasava ena nomu vosa. Sa rui sivia na vosa dukadukali ka lolovira ena gauna oqo. Na nomu sega ni rawa ni vakayagataka na vosa savasava mo vakamacalataki iko kina sa na vakatakilakilataki iko ni o dua ka lailai na vosa o kila. Ni volavola ko Jiova ena veipeleti vatu, e kaya kina vei ira na luvei Isireli, “Mo kakua ni cavuta walega na yacai Jiova na nomu Kalou; ni sa sega ni vakadonui koya ko Jiova sa cavuta wale na yacana” (Lako Yani 20:7).

Sa vaqaqacotaka na Turaga na ivakaro ko ya ena vosa ni ivakatakila ena gauna oqo, “Ia mo dou kila ni sa ka tabu na veika vakalomalagi, io me cavuti ena vosa e kilikili ena veituberi ni Yalotabu” (V&V 63:64).

Me savasava na nomu vakanananu. Sa kaya na Turaga, “Raica na ka kecega sa caka me savasava e mataqu” (V&V 42:41).

Na vakasama duka ena vakaraitaki koya ena ivosavosa dukadukali ka lolovira. Na vakasama savasava ena vakaraitaki koya ena vosa e vinaka ka veilaveti kei na ivalavala e kauta mai na marau ki na yalo.

Mo savasava ena yagomu kei na isulusulu kei na itovo. Kakua ni vakatara me samuqawe na yagomu. Kevaka o vakayacora, ena dua na siga o na veivutunitaka. Ena qai rawa walega ni kau laivi na samuqawe ena ivalavala mosimosi ka isau levu.

Mo savasava ka maqosa ka matau. Na isulusulu sakasaka ena vakavuna na ivalavala sakasaka. Au sega soti ni leqataka na veika o ni daramaka ia me savasava ga ka rakorako. Nanuma na tadra nei Joseph F. Smith. Ni vakusakusa tiko ki na vale vakaitamera ko ya, a taura tiko e dua na ioloolo lailai ka ologi koto ena dua na itavoi. Ni sa sisili oti ka dolava, e raica ni tu kina na isulu savasava. Ena veigauna o qarava se veisoliyaka kina na sakaramede, me uasivi duadua na kemu irairai. Mo dau raica ka vakadeitaka na nomu savasava vakataki iko.

Ia, kemuni na taciqu lomani, e rawa niu toso tikoga. Au na rawa ni veivosakitaka vata kei kemuni na veika e yaco tiko ena Initaneti kei na kena vakayagataki na kompiuta ka na vakavuna na vakanananu lolovira kei na ivalavala. Sa rauta me tukuni ni sa sega sara ga ni vaka na ivalavala ni tamata e tu vua na matabete ni Kalou. O kemuni na nona italai digitaki; ko ni sa tabaki ki na dua na ka e tabu ka vakasakiti. E sega ni rawa ni ko ni bula tiko e vuravura ka vakaivotavota ena ivalavala e vakavuravura. Mo ni levea na veika kecega oqori.

Me vakalougatataki kemuni na Turaga, kemuni na taciqu lomani. Vei kemuni na cauravou au kaya, ni tomana na nomuni vuli. Ni ko ni sa vakamau, sa na nomuni na icolacola mo ni vakarautaka na veika me ra bula kina na nomu matavuvale. E tu e matamuni na veigauna vivinaka e sega ni vakaiyalayala, ia na vuli sai koya na ki me na dolava na katuba oya. Oqori ena katuba ni vale vakaitamera a tadra ko Joseph F. Smith ni se cauravou ka moce voli ena veiulunivanua mai Awai.

Me vakalougatataki kemuni na Kalou, kemuni na taciqu lomani. Ni vosa vua na Turaga ena masu. Vakabulabulataka na nomudrau veiwekani. O koya na Kaukauwa, ka tu vua na kaukauwa me veilaveti ka veivuke. Au masuta me me vakakina, ena yacai Jisu Karisito, emeni.