Pagdala ni Kristo sa Atong Panimalay

Mga pipila ka tuig ang milabay, human makadungog sa usa ka batan-ong babaye sa among ward nga misag-ulo sa “Ang Buhi nga Kristo,”¹ mihukom ako sa pagsag-ulo usab niini. Magdala ako og gamay nga kopya sa maong dokumento samtang ako magdagan sa sayo sa buntag. Tungod kay ako nag-inusara ug wala kaayoy mga samok, usa kini ka maayong oportunidad alang kanako sa paghunahuna. Human sa pipila ka bulan sa pagbuhat niini, nindot kaayo ang akong panglawas—ug nakab-ot nako ang akong tumong sa pagsag-ulo.

Bisan og nindot ang akong pagbati sa “paghuman” niini, ang taas og tagal sa panahon nga mga benepisyo gani mas maayo. Nakita nako ang akong kaugalingon nga mas naghunahuna kanunay kabahin ni Jesukristo, sa Iyang kinabuhi, ug sa Iyang misyon ug gustong mas mahisama Kaniya. Gitratar nako ang akong bana ug among mga anak nga mas may pagpailub ug paghigugma. Nakakaplag ako og mas labaw nga kalinaw ug kalipay sa tanan nakong gibuhat. Ug mibati ako nga mas malipayon sa pag-amuma ug paghigugma niadtong nagpalibut kanako. Dayon, sama ni Lehi, kinsa mikaon sa bunga sa kahoy sa kinabuhi, gusto nako nga ang akong pamilya makasinati unsa ang akong nasinati (tan-awa sa 1 Nephi 8:12).

Misugod ako sa pagpangita og mga pamaagi nga makatudlo ako sa “Ang Buhi nga Kristo” ngadto sa among mga anak. Nakaamgo ako nga sila mga bata pa (ang among kinamagulangan 11 ang edad) ug kining talagsaon nga dokumento taas ra. Apan ako adunay tinguha, ug human ako nag-ampo ug naghunahuna niini sa kanunay, ang Espiritu mipakita kanako kon unsaon sa pagtudlo sa akong pamilya.

Dugay na akong nangolekta og ginunting nga mga litrato sa daang mga magasin sa Simbahan. Miadto ako sa kahon diin kini akong gitipigan ug misugod sa pagkuha sa mga litrato nga ingon og motugma sa nagkalain-laing mga hugpong sa mga pulong sa “Ang Buhi nga Kristo.” Sama pananglit, kay “Siya mao ang Halangdong Jehova sa Daang Tugon,” nakakita ako og litrato ni Kristo, isip Jehova, nga nakig-istorya ni Moises. Alang sa sunod nga hugpong sa mga pulong, “Ubos sa pagdumala sa Iyang Amahan,” nakakita ako og usa ka litrato sa Langitnong Amahan ug ni Jesukristo nga silang duha nagbarug. Sa mubo nga panahon, nakapundok ako og daghang litrato ug nakaparis niini uban sa gipasabut niini nga teksto gikan sa “Ang Buhi nga Kristo.”

Ang Disyembre ingon og mao ang hingpit nga panahon alang sa among pamilya nga magsugod sa pagpokus sa “Ang Buhi nga Kristo.” Ang among mga anak naghinam-hinam ug miapil gayud sa among paningkamot. Among gipapilit ang mga litrato nga among gitrabaho diha sa among kusina. Nabantayan nako nga panahon sa adlaw, ang mga bata molitok sa hugpong sa mga pulong inig-agi nila sa mga litrato. Kon ang tanan nakasag-ulo sa set sa mga litrato diha sa bong-bong, kini among tang-tangon ug magsugod og trabaho sa usa ka bag-o nga set.

Sa matag litrato, kami mihisgut sa ebanghelyo ug kinabuhi ni Jesukristo. Ang among mga leksyon sa family home evening napuno sa mga istorya ug mga leksyon kabahin sa Manluluwas. Ang akong bana mitudlo sa pipila ka mga konsepto diha sa “Ang Buhi nga Kristo,” naghatag og bag-ong mga panabut.

Ang mga pag-ampo sa pamilya nahimong mas makahuluganon tungod kay ang mga bata mas namalandong Kaniya kansang ngalan sila nag-ampo. Ang Espiritu mipuno sa among panimalay. Kami mibati sama ni Nephi sa dihang siya misulat, “Kami naghisgot kang Kristo, kami nalipay diha kang Kristo, kami nagsangyaw kang Kristo” (2 Nephi 25:26). Ang among panimalay nahimong usa ka dapit nga may labaw nga kalinaw.

Ang mga panalangin miabut, sa mga pamaagi nga wala gayud nako mahunahuna. Sama pananglit, bisan tuod naningkamot ako sa pagpasayon sa pipila ka mga pulong alang sa among kinamanghuran nga anak, si Joseph, nga upat ka tuig, siya wala mohunong sa pagkat-on sa kompletong dokumento kada pulong. Kini nahimong piho nga nakapatandog usa ka semana didto sa simbahan. Ang hapin sa programa sa miting sa sakrament mipakita og usa ka litrato sa Manluluwas sa Getsemani nga among gigamit sa among pagsag-ulo. Si Joseph mitudlo sa litrato ug miingon, “Tan-awa, Mommy. ‘Siya mihatag sa Iyang kinabuhi aron sa pag-ula sa mga sala sa tanang katawhan.’”

Sa lain nga semana kami adunay problema sa simbahan; ang mga bata mas kiat kaysa sa una, ilabi na panahon sa sakrament. Pagkasunod gabii kami mihisgot kabahin sa sakrament diha sa family home evening. Kami mihisgot kabahin sa katuyoan niini ug unsaon namo sa pagbinuotan samtang ang sakrament giapud-apod. Nangutana ako sa mga bata unsa ang ilang hunahuna kabahin sa sakrament. Ang among 10 anyos, si Sharanne, mikomentaryo nga siya naghunahuna kabahin sa kinabuhi ni Jesukristo ug sa mga pulong gikan sa “Ang Buhi nga Kristo.” Wala nay lain pang kinahanglan nga isulti.

Sa laing higayon, si Joseph naglisud sa pagkatulog. Dili siya mokooperar ug daling masuko. Ako siyang gihangyo sa pagsulti kanako og pipila sa “Ang Buhi nga Kristo.” Sa iyang pagsugod, nabati nako ang Espiritu misulod sa kwarto. Siya mikalma ug mibalik sa iyang normal, malipayon nga kaugalingon. Mga pipila ka adlaw ang milabay, sa laing gabii sa dihang siya dili makatulog, akoa kining gisulayan pag-usab. Niining higayona ang iyang tubag kay lahi kaayo: “Dili! Dili ko gustong magmalipayon!” Ang among batan-ong anak nga lalaki nakakat-on unsa ang mahimo sa paghinumdom ni Jesukristo. Tinuod, ang Manluluwas nahimong mas tinuod kanamong tanan.

Ang among pamilya nakasag-ulo sa “Ang Buhi nga Kristo” pagkasunod Pasko sa Pagkabanhaw. Mao kadto ang labing talagsaon nga upat ka bulan nga kasinatian nga among nasinati. Bisan tuod ang proyekto nahuman na, nasayud ako nga ang mga epekto sa among nakat-unan magpabilin sa matag sakop sa pamilya hangtud sa among tibuok kinabuhi.

Nasayud ako nga ang Langitnong Amahan ug si Jesukristo tinuod. Mapasalamaton ako sa pagbaton og mas maayong panabut sa Ilang mga buhat ug sa pagbati og mas lawom sa Ilang gugma. Mapasalamaton ako sa dili matupngan nga gasa sa Iyang balaan nga Anak ug sa maanindot nga kasinatian sa pagkat-on kabahin Kaniya ug sa pagpaningkamot nga mas mahimong sama Kaniya.