Labaw pa Kaysa usa ka Giya sa Misyonaryo

Si James Setterberg kabahin usab sa unang henerasyon sa mga misyonaryo nga naggamit sa Isangyaw ang Akong Ebanghelyo. Sa dihang siya miabut sa Texas Houston East Mission niadtong 2005, ang iyang kauban nga mga misyonaryo kanunay na nga naggamit sa maong kapanguhaan sulod na sa daghang bulan. Apan tungod sa ehemplo sa usa ka lokal nga priesthood lider, si Elder Setterberg nakaamgo nga ang kamapuslanon sa mao nga himan dili lamang limitado ngadto sa mga misyonaryo.

“Sa usa ka area, kaming mga misyonaryo mipuyo sa panimalay sa presidente sa stake ug sa iyang pamilya. Matag buntag, sila mibangon alang sa pagtuon sa kasulatan, nga naglakip sa pagbasa sa nagkalain-laing mga kapitulo sa Isangyaw ang Akong Ebanghelyo. Niana nakaamgo ako nga kining libro para gayud sa tanan,” siya miingon.

Kadto usa ka leksyon nga iyang gidala pauli sa panimalay. “Sa wala pa ang akong misyon, wala gayud ako maghimo og piho nga mga tumong alang sa akong kinabuhi; tingali dili ko gusto nga hilabihan ka sayong magplano sa mga butang,” siya miangkon. “Apan tungod sa paghatag og gibug-aton sa pagmugna og tumong gikan sa presidente sa misyon ug sa kapitulo 8 sa Isangyaw ang Akong Ebanghelyo, kana misugod sa pag-usab.”

Ang matag semana nga pagplano ug mga sesyon sa pagmugna og tumong sulod sa duha ka tuig nahimong usa ka batasan nga gipadayon ni James sukad sa iyang pagpauli. Siya, sama pananglit, nakamugna ug nakatrabaho padulong sa mga tumong sa edukasyon ug sa espirituhanon. Siya miingon, “Nakaamgo ako nga kon dili magmugna og mga tumong, dili gayud kamo makasulti asa na kamo sa kinabuhi, nga may kalabutan sa paglambo. Apan kon kamo magmugna ug magtrabaho og mga tumong, inyong mahagit ang inyong kaugalingon ug mahimong mas maayo nga tawo. Anaa koy Isangyaw ang Akong Ebanghelyo nga mapasalamatan tungod sa pagkat-on niana.”

Bisan ang mga miyembro nga wala mogamit sa Isangyaw ang Akong Ebanghelyo isip mga misyonaryo nakadiskobre sa mga gahum niini. Si Jake Peterson usa ka miyembro sa branch sa mga young single adult diha sa stake. Bisan siya miserbisyo sa iyang misyon sa wala pa ang Isangyaw ang Akong Ebanghelyo, si Jake miingon nga ang kapanguhaan kanunayng bililhon kaayo kaniya sa iyang calling isip branch mission lider tungod kay kini nagpasabut sa mga rason nganong kita mopakigbahin sa ebanghelyo: “Usahay kita isip mga miyembro maghunahuna, ‘Unsa man ang labing importante nga butang kabahin sa misyonaryo nga buhat? Ang akong mga silingan nagpuyo og maayong kinabuhi ug nagbuhat sa maayong mga butang. Ngano nga magmugna man ako og posibleng makaulaw nga sitwasyon pinaagi sa pag-istorya kanila kabahin sa Simbahan?’ Ang Isangyaw ang Akong Ebanghelyo naghisgot man kabahin niana. Nagpasabut kini kon nganong kita mopakigbahin sa ebanghelyo ngadto sa atong mga higala: tungod kay ang ebanghelyo ni Jesukristo ‘mopanalangin sa ilang mga pamilya, mosangkap sa ilang espirituhanon nga mga panginahanglan, ug magtabang kanilang matuman ang ilang tinud-anay nga tinguha.’”¹

Kini usab makatabang sa tanang mga miyembro nga magpabiling lig-on sa sukaranang mga doktrina sa ebanghelyo, siya miingon. “Adunay usa ka kinutlo nga akong ganahan gikan ni Hyrum Smith kabahin sa pagtudlo sa unang mga baruganan sa ebanghelyo, dayon sa pagtudlo og balik-balik niini.² Kana nga pahayag ug ang mga doktrina nga anaa sa Isangyaw ang Akong Ebanghelyo naghatag kanako og labaw nga panabut sa gahum sa sukaranang mga baruganan ug pagdayeg alang sa kalig-on nga atong maangkon gikan sa pagtuon sa mga butang sama sa Pagpahiuli, hugot nga pagtuo, sa Pag-ula, o paghinulsol. Adunay talagsaon nga gahum niadtong mga butanga.”

Lain nga miyembro sa stake, si Rick Doane, nagserbisyo isip ward mission lider sa dihang ang Isangyaw ang Akong Ebanghelyo unang gipagawas. Si Rick diha-diha dayon mibati nga kining bag-o nga himan makatabang kaniya sa iyang calling.

“Ganahan ko sa kamatuoran nga ang libro naglangkob og usa ka kapitulo unsaon sa pagtrabaho uban sa stake ug mga lider sa ward. Ang mga misyonaryo dili magpermanente, apan ang mga lider sa ward maanaa diha sa taas nga panahon. Sila ang tinugyanan sa pagkalig-on. Ganahan ko nga ang libro naghatag og gibug-aton sa kaimportante niana,” miingon si Rick.

Si Rick ug ang iyang asawa, si Moshi, nakakita usab sa potensyal sa libro isip kapanguhaan sa pagtudlo sa ilang batan-ong mga anak nga lalaki. “Adunay 15 minutos nga leksyon sa matag kapitulo nga mahimong angay kaayo alang sa family home evening,” mipasabut si Rick. “Kini nakapokus sa baruganan, busa kini makatabang kaninyo nga magpabilin sa sukaranang mga baruganan, nga makatabang kaninyo sa pagtukod og lig-on nga pundasyon alang sa inyong kaugalingon ug sa inyong mga anak. Ang libro gani may listahan sa mga kasulatan ug mga kalihokan nga inyong magamit. Kini usa ka talagsaon nga kapanguhaan nga magamit, kon kamo nagtudlo man sa inyong panimalay o bisan asa.”

Si Mark Wadsworth, 19 anyos, karon nagserbisyo sa Spain Bilbao Mission ug kanunay nga naggamit sa Isangyaw ang Akong Ebanghelyo. Apan bisan sa wala pa sa iyang misyon, siya nagtuon na niini. “Matag higayon nga ako mobasa niini, kanunay adunay usa ka bag-o nga butang nga akong nakat-unan gikan niini,” siya miingon.

Ang pagtuon sa Isangyaw ang Akong Ebanghelyo sa wala pa siya magmisyon nakatabang kaniya sa pag-ila sa mga oportunidad sa misyonaryo. Ang mga misyonaryo sa iyang area mitabang kaniya ug sa iyang pamilya sa pagpalambo og plano sa pamilya alang sa pagmisyon. “Kana nakapahunahuna kanako kabahin sa misyonaryo nga buhat sa mas aktibo nga paagi,” siya miingon. Isip resulta, siya adunay mas daghang pag-istoryahanay uban sa mga higala kabahin sa mga doktrina sa Simbahan, sa kasaysayan niini, ug mga kalihokan nga may kalabutan sa Simbahan.

“Tingali ako adunay susama nga gidaghanon nga mga oportunidad sa pag-istorya kabahin sa Simbahan sa wala pa namo himoa ang among plano, apan mitubag ako sa laing paagi niadtong mga oportunidad,” miingon si Elder Wadsworth. “Kadto kabahin lamang sa paghunahuna og lahi og gamay kabahin sa mga butang nga akoa nang gipangbuhat.”

Si Andrew Mello, 18 anyos, aduna pay pipila ka mga bulan sa wala pa niya ipasa ang iyang mga papel sa misyon, apan kana wala nagpasabut nga siya dili aktibong nangandam karon. Ang pagtuon sa Isangyaw ang Akong Ebanghelyo, siya miingon, mao ang usa sa labing maayo nga paagi sa iyang pagpangandam.

Ang pipila sa pagpangandam nahitabo pinaagi sa personal nga pagtuon. Sa ubang higayon kini nahitabo gikan sa pagbansay diha sa iyang korum sa mga priest. Sa unang Dominggo sa matag bulan, usa ka sakop sa korum naka-assign sa pagtudlo og usa ka leksyon gikan sa Isangyaw ang Akong Ebanghelyo ngadto sa iyang mga kaedad ug tigtambag. Usahay motudlo sila sa kompletong 45 minutos nga leksyon, apan sa laing mga higayon, sa pagpraktis lamang, sila hinoon motudlo sa 15 o 5 minutos nga mga bersyon sa pipila ka nagkalahi-lahi nga mga leksyon.

Ug samtang si Andrew miila nga kini nga pagpangandam naghatag kaniya og mga kapanguhaan alang sa full-time nga misyonaryo nga pagserbisyo, iyang nakita usab ang mga kaayohan niini sa iyang kinabuhi karon.

“Nakita nako ang akong kaugalingon nga naghunahuna kanunay kabahin sa mga butang gikan sa Isangyaw ang Akong Ebanghelyo,” miingon si Andrew. “Ako lamang ang Mormon sa akong pagka-high school, busa ang mga tawo kanunay mangutana kanako kabahin sa unsay akong gituohan. Nakagamit ako sa mga leksyon ug mga kahanas gikan sa Isangyaw ang Akong Ebanghelyo sa pag-istorya sa mga higala o mga kaila kabahin sa ebanghelyo.

“Adunay pipila ka mga pangutana o pag-istoryahanay nga bisan asa lang paingon,” siya mipadayon, “apan kon sila akong madala ngadto sa mas mabungahon nga direksyon tungod sa mga butang nga akong natun-an, nindot kaayo kana nga pagbati.”

Sama ni Andrew Mello, si Andrew Hovey, 19 anyos, midawat og kopya sa Isangyaw ang Akong Ebanghelyo panahon sa iyang katuigan sa high school, apan miabut una sa iyang unang tuig sa kolehiyo nga siya nakadayeg niini. Pinaagi sa impluwensya sa usa ka returned-missionary nga kauban sa kwarto ug sa klase sa pagpangandam sa misyon, si Andrew misugod sa pagpangandam alang sa iyang misyon nga mas aktibo sukad-sukad. Ang iyang mga pag-ampo nahimong mas personal ug makahuluganon, ang iyang pagtuon sa kasulatan nahimong mas adunay kapaingnan, ug ang iyang mga plano sa misyon nahimong mas tinuod, siya miingon. Dugang pa, siya misugod sa paggamit sa Isangyaw ang Akong Ebanghelyo sa pagdirekta sa iyang mga paningkamot.

Sukad niadto, si Andrew nakapalambo og usa ka sistema sa pagmarka ug pag-color code sa iyang mga kasulatan aron sa pagpahiangay uban sa mga baruganan nga iyang gitun-an sa Isangyaw ang Akong Ebanghelyo ingon man alang sa pagrekord sa mga panghunahuna ug mga impresyon nga iyang nadawat panahon sa iyang pagtuon. Apan dali siya sa pag-ila nga ang punto dili mao ang pagbaton og pulong lamang [prescriptive] nga paagi sa pagmarka o pag-color code o pagsulat. Hinoon, “mapersonal ninyo ang inyong pamaagi sa pagtuon sa paagi nga mohaum gayud alang kaninyo,” siya miingon. “Kana mao ang katalagsaon sa ebanghelyo. Kitang tanan managlahi, apan ang ebanghelyo haum alang kanatong tanan.

“Susama ra kini sa Isangyaw ang Akong Ebanghelyo. Kini nagtudlo sa sukaranang mga doktrina sa lapad nga mga paagi aron inyong magamit kini isip usa ka giya. Magamit kini nato sa paagi nga gikinahanglan nato alang sa atong kaugalingon nga pagkat-on o sa pagduol sa uban.

Si Patrick Smith, lain nga batan-ong lalaki sa stake sa Hingham, mireport nga kausa sa matag bulan sa iyang mga miting sa Aaronic Priesthood, ang batan-ong mga lalaki moreport og bisan unsa nga misyonaryo nga kasinatian nga ilang nasinati ug dayon moeskedyul sa pagtrabaho uban sa full-time nga mga misyonaryo.

“Dili pa lang dugay, mikuyog ako sa mga misyonaryo sa pagtudlo og usa ka pamilya kinsa natudloan na sa istorya ni Joseph Smith,” miingon si Patrick. “Ang mga elder mihangyo kanako sa pagtudlo kabahin sa pag-anhi ni Kristo sa yuta ug sa pagtukod sa Iyang Simbahan. Ang Isangyaw ang Akong Ebanghelyo tin-aw nga mihulagway sa tanang butang ug milista sa tanang mga kasulatan aron sa pagsuporta sa tanang butang. Ang tanan gihan-ay didto.

“Nasayud ako kabahin niining mga butanga ug adunay pagpamatuod niini, apan ang Isangyaw ang Akong Ebanghelyo ug sa pagpakig-uban sa mga misyonaryo nakatabang kanako sa pagtudlo niining mga baruganan sa mas maayong paagi,” miingon si Patrick. “Ang mga doktrina nga gilatid sa libro milig-on sa unsa ang akong nakat-unan sa panimalay ug sa Primary kutob sa akong mahinumduman. Ug ang mga butang nga gipangtudlo sa Isangyaw ang Akong Ebanghelyo nagdapit sa Espiritu, nga mao ang labing importante nga butang nga atong maangkon kon kita maghisgut kabahin sa Simbahan.”

Ang magulang nga lalaki ni Patrick, si Tom, miuli na gikan sa California Ventura Mission niadtong Agosto 2009. Siya mibati nga ang Isangyaw ang Akong Ebanghelyo mao ang usa sa labing maayo nga himan alang sa misyonaryo nga buhat. Bisan tuod si Tom midayeg unsa ang natabang sa libro kaniya isip usa ka misyonaryo, siya misulat nga hapit tanan sa mga propetikanhong mga pahayag kabahin sa misyonaryo nga buhat nga makita sa mga pahina 12–13 sa Isangyaw ang Akong Ebanghelyo naghisgut mahitungod sa mga bahin [role] sa mga miyembro sa pagpakigbahin sa ebanghelyo. Siya miingon nga kana nagpasabut sa gidaghanon sa misyonaryo nga buhat nga kinahanglang himoon sa mga miyembro ug dili lamang sa full-time nga mga misyonaryo.

“Sa dihang hapit na ako mahuman sa akong misyon,” siya mihinumdom, “Nagtuon ako kabahin sa mga responsibilidad sa mga misyonaryo ug nganong kita—mga misyonaryo ug mga miyembro—gihatagan niini nga buluhaton sa pagbuhat. Nagbasa ako sa Moises 1:39 ug naghunahuna kabahin sa misyonaryo nga buhat gikan sa panglantaw sa Langitnong Amahan. Ang gusto lamang Niya nga ang tanan Niyang mga anak makabalik ngadto Kaniya. Ang gisangon sa ato nga buhaton, nakahunahuna ako, mao ang pagtabang sa atong Amahan sa pagtuman sa Iyang buluhaton.

“Karon isip usa ka miyembro nga misyonaryo, nasayud ako nga uban sa kanunay nga pagtuon sa kasulatan (apil ang pagtuon sa Isangyaw ang Akong Ebanghelyo), pag-ampo, ug pagpangita sa Espiritu, kita magmalampuson sa bisan unsa nga paningkamot. Ug kon atong itugot ang ebanghelyo nga maanaa sa sentro sa atong kinabuhi ug motrabaho sa mas maayong pagsabut niini, mas mahimong sayon ang pagpakigbahin ug pagpamatuod niini.”