MOABUT NGA Andam sa Pagdula
Ang pagpakita lamang dili igo.
Ang basketball maoy usa sa labing importante nga mga butang sa kinabuhi ni Roger Enrique Velasquez Paredes, kinsa nailhan sa pangalan nga Koki tungod kay kini mas sayon nga litukon kon gamay na lang ang oras nga nahibilin sa dula ug walay kasigurohan kon mapilde ba o modaug.
Si Koki, miyembro sa Victoria Ward, Puno Peru Central Stake, maoy starting forward sa mga lalaki nga ubos sa 17 ang panuigon diha sa team sa Benson Jazz, usa ka panag-abin nga team sa komunidad nga gipasiugdahan sa mga miyembro sa Simbahan sa Puno, Peru. Ang team ni Koki wala mapilde hangtud ngadto sa dula sa championship sa kada katapusang duha ka mga panahon ug midaug sa ikaduhang dapit sulod sa duha ka tuig.
Ang iyang kasinatian diha sa team nakatudlo ni Koki dili lamang daghan mahitungod sa basketball apan usab mahitungod sa pagsunod sa ebanghelyo ug paghimo sa seminary nga bililhon.
“Ang seminary ug ang basketball dili kaayo lahi,” nag-ingon siya, dayon nagkatawa. Kinahanglan ako nga momata og sayo alang niining duha.”
Sa walay pagkomedya, si Koki nakahimo sa pagkakita og pipila ka importante nga pagkasusama tali sa dula nga iyang gihigugma ug sa ebanghelyo nga iyang gisunod: ikaw kinahanglan nga maminaw ngadto sa coach, gamiton unsa ang iyang gitudlo ug sa dili paghunong sa pagbansay unsa ang imong nakat-unan.
Pamati ngadto sa Imong Coach
Nag-ingon si Koki nga ang iyang coach talagsaon, apan dili kini mag-agad kon unsa ka maayo ang imong coach kon ikaw dili maminaw. Ang seminary dili lahi.
“Sa basketball ug sa seminary, ako adunay maayo nga coach,” nag-ingon si Koki. “Apan kon ako dili maminaw, dili ako mahimo nga mas maayo.”
Ang usa ka coach naninguha sa pagtudlo sa magdudula og mga butang nga mohimo kaniya nga mas maayo, sama kon unsaon sa pagshoot. “Ang magtutudlo naghimo sa sama nga butang,” nag-ingon si Koki. Apil sa uban nga mga butang, ang magtutudlo naninguha sa pagtabang sa mga estudyante sa paglampos batok sa ilang kaatbang sa kinabuhi. Naninguha sila sa pagtudlo kanato kon unsaon pagbiya sa kalibutan ug paglig-on kanato batok sa tintasyon.”
Si Koki nakakat-on nga ang pagpakita lamang, maanaa man sa pagbansay sa basketball o diha sa seminary ug sa simbahan, dili igo sa paghimo kanimo nga mas maayo. Ikaw kinahanglan nga maminaw ngadto sa coach.
Bansaya Unsa ang Gisangyaw
Naningkamot si Koki sa pagpaminaw samtang ang coach nagpasabut og usa ka butang nga bag-o. Apan iyang nakat-unan nga kon siya sa tinuod gusto nga makasabut unsa ang gisulti sa coach, kinahanglan nga iya kining bansayon.
Ang pagbansay sa usa ka butang, o ang paggamit niini, maoy usa ka importante nga bahin sa pagkat-on, nag-ingon si Koki. Ang usa ka coach makasulti sa tibuok adlaw mahitungod sa maayo nga porma sa pagshoot ug gani makapakita og balik-balik niini, apan hangtud inyong bansayon unsa ang iyang gisulti, dili kamo makakat-on kon unsaon sa pagbuhat niini sa inyong kaugalingon.
“Ingon niana kon giunsa nako sa pagkat-on ang mahitungod sa pag-ampo.” nag-ingon si Koki. Natudloan siya nga ang kanunay nga personal nga pag-ampo modapit sa panabang sa Ginoo. “Apan human lamang nga akong gisulayan kini diha pa nako nakita nga kini tinuod.”
Ang pagbansay sa mga baruganan sa ebanghelyo naghatag sa Espiritu Santo og oportunidad sa pagpamatuod ngari kanato nga ang baruganan tinuod.
“Kon kita nagkat-on og usa ka butang nga bag-o apan kini dili gamiton, susama ra nga kita wala gayud nakakat-on niini,” nag-ingon si Koki.
Gamita Kini o Wad-a Kini
Naminaw si Koki sa diha nga ang iyang coach mitudlo mahitungod sa pagshoot, ug siya misulay sa paggamit unsa ang iyang nakat-unan. Karon, aron sa pag-uswag, si Koki kinahanglan nga mokugi sa pagbansay.
Ang pagkugi nagpasabut og pagkamaunungon o pagpadayon sa paggamit unsa ang imong nakat-unan bisan diha sa atubangan sa oposisyon.
“Kinahanglan ako nga magmaunungon,” nag-ingon si Koki. Kon ako mohunong sa pagbansay, ang akong mga kahanas pagatay-an.”
Kana usa ka importante nga leksyon nga iyang nakat-unan human nga wala siya makabansay sa makadiyut tungod kay nabunggo ang iyang ilong diha sa usa ka gubot nga dula kauban sa mas magulang nga mga magdudula.
“Kon kita dili magbansay, kita wala lamang maghunong sa pag-uswag—kita masaag,” nag-ingon si Koki. “Sama kini sa espirituhanon nga paagi. Kon kita naghatag og pagtagad ug naggamit unsa ang atong nakat-unan, makakat-on kita og mas daghan. Kon dili, kita mawad-an unsay anaa kanato.”
Ayaw Pagbiya
Ang mga kauban ni Koki sa team naghimo sa ilang labing maayo sa pagpaminaw ngadto sa coach ug sa paggamit unsay iyang gitudlo kanila. Nagbansay sila sulod sa daghan nga oras aron sa paghupot unsay ilang nakat-unan.
Nakakat-on usab sila nga human nianang tanan, kini posible—ug makawala sa kadasig—nga magkulang pagkahingpit. “Naningkamot kami pag-ayo,” nag-ingon si Koki. “Makawala sa kadasig nga mapilde og usab sa championship.”
Apan samtang ang diha dayon nga kahingpitan wala igarantiya, kini mahimong imposible kon sila mohunong sa pagpaningkamot. Sa pagkakaron, si Koki nakakita nga adunay daghan nga mga ganti, lakip ang paglambo ug pag-uswag nga moabut gumikan sa pagpaningkamot.
Si Koki, kinsa nagserbisyo isip usa ka ward missionary, nakakita og mga ganti tungod sa pagkugi bisan dili magdula. Mitabang siya sa paghan-ay og mga gabii nga salida, pagkamping, ug mga kalihokan sa sports aron sa paghaylo sa duha ka batan-ong mga lalaki sa iyang ward kinsa wala na misimba sulod sa pipila ka panahon. “Sa una kami kinahanglan nga moadto sa pagkuha kanila, o dili sila moanha,” siya nag-ingon. “Karon moanha sila mismo sa ilang kaugalingon. Mikabat kini og gamay nga panahon ug daghan nga mga pagbisita, apan kanunay na silang moanhi karon.”
Tali sa pagdula og basketball, sa pag-adto sa seminary, ug sa pagserbisyo diha sa Simbahan, si Koki nagkat-on unsay gipasabut ni Hari Benjamin sa diha nga siya miingon nga kita kinahanglan gayud nga magkugi nga “makadaug sa ganti” (Mosiah 4:27).
Nagkat-on usab siya nga magdula o dili, ang mga ganti takus sa kahago.
Gilitratohan ni Adam C. Olson